8. சேதனாஸுத்தம்

38. ஸாவத்தி²னிதா³னம். ‘‘யஞ்ச, பி⁴க்க²வே, சேதேதி யஞ்ச பகப்பேதி யஞ்ச அனுஸேதி, ஆரம்மணமேதம் [ஆரமணமேதம் (?)] ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிம் பதிட்டி²தே விஞ்ஞாணே விரூள்ஹே ஆயதிம் புனப்³ப⁴வாபி⁴னிப்³ப³த்தி ஹோதி. ஆயதிம் புனப்³ப⁴வாபி⁴னிப்³ப³த்தியா ஸதி ஆயதிம் ஜாதி ஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.

‘‘நோ சே, பி⁴க்க²வே, சேதேதி நோ சே பகப்பேதி, அத² சே அனுஸேதி, ஆரம்மணமேதம் ஹோதி விஞ்ஞாணஸ்ஸ டி²தியா. ஆரம்மணே ஸதி பதிட்டா² விஞ்ஞாணஸ்ஸ ஹோதி. தஸ்மிம் பதிட்டி²தே விஞ்ஞாணே விரூள்ஹே ஆயதிம் புனப்³ப⁴வாபி⁴னிப்³ப³த்தி ஹோதி. ஆயதிம் புனப்³ப⁴வாபி⁴னிப்³ப³த்தியா ஸதி ஆயதிம் ஜாதிஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

‘‘யதோ ச கோ², பி⁴க்க²வே, நோ சேவ சேதேதி நோ ச பகப்பேதி நோ ச அனுஸேதி, ஆரம்மணமேதம் ந ஹோதி விஞ்ஞாணஸ்ஸ டி²தியா. ஆரம்மணே அஸதி பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தே விஞ்ஞாணே அவிரூள்ஹே ஆயதிம் புனப்³ப⁴வாபி⁴னிப்³ப³த்தி ந ஹோதி. ஆயதிம் புனப்³ப⁴வாபி⁴னிப்³ப³த்தியா அஸதி ஆயதிம் ஜாதிஜராமரணம் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. அட்ட²மம்.