1. ஆஹாரஸுத்தம்

11. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே…பே… ஏதத³வோச – ‘‘சத்தாரோமே, பி⁴க்க²வே, ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாய. கதமே சத்தாரோ? கப³ளீகாரோ [கப³ளிம்காரோ (ஸீ. பீ.), கவளீகாரோ (ஸ்யா. கம்.)] ஆஹாரோ – ஓளாரிகோ வா ஸுகு²மோ வா, ப²ஸ்ஸோ து³தியோ, மனோஸஞ்சேதனா ததியா, விஞ்ஞாணம் சதுத்த²ம். இமே கோ², பி⁴க்க²வே, சத்தாரோ ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாய’’.

‘‘இமே, பி⁴க்க²வே, சத்தாரோ ஆஹாரா கிம்னிதா³னா கிம்ஸமுத³யா கிம்ஜாதிகா கிம்பப⁴வா? இமே சத்தாரோ ஆஹாரா தண்ஹானிதா³னா தண்ஹாஸமுத³யா தண்ஹாஜாதிகா தண்ஹாபப⁴வா. தண்ஹா சாயம், பி⁴க்க²வே, கிம்னிதா³னா கிம்ஸமுத³யா கிம்ஜாதிகா கிம்பப⁴வா? தண்ஹா வேத³னானிதா³னா வேத³னாஸமுத³யா வேத³னாஜாதிகா வேத³னாபப⁴வா. வேத³னா சாயம், பி⁴க்க²வே, கிம்னிதா³னா கிம்ஸமுத³யா கிம்ஜாதிகா கிம்பப⁴வா? வேத³னா ப²ஸ்ஸனிதா³னா ப²ஸ்ஸஸமுத³யா ப²ஸ்ஸஜாதிகா ப²ஸ்ஸபப⁴வா. ப²ஸ்ஸோ சாயம், பி⁴க்க²வே, கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? ப²ஸ்ஸோ ஸளாயதனனிதா³னோ ஸளாயதனஸமுத³யோ ஸளாயதனஜாதிகோ ஸளாயதனபப⁴வோ. ஸளாயதனஞ்சித³ம், பி⁴க்க²வே, கிம்னிதா³னம் கிம்ஸமுத³யம் கிம்ஜாதிகம் கிம்பப⁴வம்? ஸளாயதனம் நாமரூபனிதா³னம் நாமரூபஸமுத³யம் நாமரூபஜாதிகம் நாமரூபபப⁴வம். நாமரூபஞ்சித³ம், பி⁴க்க²வே, கிம்னிதா³னம் கிம்ஸமுத³யம் கிம்ஜாதிகம் கிம்பப⁴வம்? நாமரூபம் விஞ்ஞாணனிதா³னம் விஞ்ஞாணஸமுத³யம் விஞ்ஞாணஜாதிகம் விஞ்ஞாணபப⁴வம். விஞ்ஞாணஞ்சித³ம், பி⁴க்க²வே, கிம்னிதா³னம் கிம்ஸமுத³யம் கிம்ஜாதிகம் கிம்பப⁴வம்? விஞ்ஞாணம் ஸங்கா²ரனிதா³னம் ஸங்கா²ரஸமுத³யம் ஸங்கா²ரஜாதிகம் ஸங்கா²ரபப⁴வம். ஸங்கா²ரா சிமே, பி⁴க்க²வே, கிம்னிதா³னா கிம்ஸமுத³யா கிம்ஜாதிகா கிம்பப⁴வா? ஸங்கா²ரா அவிஜ்ஜானிதா³னா அவிஜ்ஜாஸமுத³யா அவிஜ்ஜாஜாதிகா அவிஜ்ஜாபப⁴வா.

‘‘இதி கோ², பி⁴க்க²வே, அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணம்…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴ …பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. பட²மம்.