5. பரினிப்³பா³னஸுத்தம்

186. ஏகம் ஸமயம் ப⁴க³வா குஸினாராயம் விஹரதி உபவத்தனே மல்லானம் ஸாலவனே அந்தரேன யமகஸாலானம் பரினிப்³பா³னஸமயே. அத² கோ² ப⁴க³வா பி⁴க்கூ² ஆமந்தேஸி – ‘‘ஹந்த³ தா³னி, பி⁴க்க²வே, ஆமந்தயாமி வோ – ‘வயத⁴ம்மா ஸங்கா²ரா, அப்பமாதே³ன ஸம்பாதே³தா²’தி. அயம் ததா²க³தஸ்ஸ பச்சி²மா வாசா’’.

அத² கோ² ப⁴க³வா பட²மம் ஜா²னம் [பட²மஜ்ஜா²னம் (ஸ்யா. கம்.) ஏவம் து³தியம் ஜா²னம் இச்சாதீ³ஸுபி] ஸமாபஜ்ஜி. பட²மா ஜா²னா [பட²மஜ்ஜா²னா (ஸ்யா. கம்.) ஏவம் து³தியா ஜா²னா இச்சாதீ³ஸுபி] வுட்ட²ஹித்வா து³தியம் ஜா²னம் ஸமாபஜ்ஜி. து³தியா ஜா²னா வுட்ட²ஹித்வா ததியம் ஜா²னம் ஸமாபஜ்ஜி. ததியா ஜா²னா வுட்ட²ஹித்வா சதுத்த²ம் ஜா²னம் ஸமாபஜ்ஜி. சதுத்தா² ஜா²னா வுட்ட²ஹித்வா ஆகாஸானஞ்சாயதனம் ஸமாபஜ்ஜி. ஆகாஸானஞ்சாயதனா வுட்ட²ஹித்வா விஞ்ஞாணஞ்சாயதனம் ஸமாபஜ்ஜி. விஞ்ஞாணஞ்சாயதனா வுட்ட²ஹித்வா ஆகிஞ்சஞ்ஞாயதனம் ஸமாபஜ்ஜி. ஆகிஞ்சஞ்ஞாயதனா வுட்ட²ஹித்வா நேவஸஞ்ஞானாஸஞ்ஞாயதனம் ஸமாபஜ்ஜி. நேவஸஞ்ஞானாஸஞ்ஞாயதனா வுட்ட²ஹித்வா ஸஞ்ஞாவேத³யிதனிரோத⁴ம் ஸமாபஜ்ஜி.

ஸஞ்ஞாவேத³யிதனிரோதா⁴ வுட்ட²ஹித்வா நேவஸஞ்ஞானாஸஞ்ஞாயதனம் ஸமாபஜ்ஜி. நேவஸஞ்ஞானாஸஞ்ஞாயதனா வுட்ட²ஹித்வா ஆகிஞ்சஞ்ஞாயதனம் ஸமாபஜ்ஜி. ஆகிஞ்சஞ்ஞாயதனா வுட்ட²ஹித்வா விஞ்ஞாணஞ்சாயதனம் ஸமாபஜ்ஜி. விஞ்ஞாணஞ்சாயதனா வுட்ட²ஹித்வா ஆகாஸானஞ்சாயதனம் ஸமாபஜ்ஜி. ஆகாஸானஞ்சாயதனா வுட்ட²ஹித்வா சதுத்த²ம் ஜா²னம் ஸமாபஜ்ஜி. சதுத்தா² ஜா²னா வுட்ட²ஹித்வா ததியம் ஜா²னம் ஸமாபஜ்ஜி. ததியா ஜா²னா வுட்ட²ஹித்வா து³தியம் ஜா²னம் ஸமாபஜ்ஜி. து³தியா ஜா²னா வுட்ட²ஹித்வா பட²மம் ஜா²னம் ஸமாபஜ்ஜி. பட²மா ஜா²னா வுட்ட²ஹித்வா து³தியம் ஜா²னம் ஸமாபஜ்ஜி. து³தியா ஜா²னா வுட்ட²ஹித்வா ததியம் ஜா²னம் ஸமாபஜ்ஜி. ததியா ஜா²னா வுட்ட²ஹித்வா சதுத்த²ம் ஜா²னம் ஸமாபஜ்ஜி. சதுத்தா² ஜா²னா வுட்ட²ஹித்வா ஸமனந்தரம் ப⁴க³வா பரினிப்³பா³யி. பரினிப்³பு³தே ப⁴க³வதி ஸஹ பரினிப்³பா³னா ப்³ரஹ்மா ஸஹம்பதி இமம் கா³த²ம் அபா⁴ஸி –

‘‘ஸப்³பே³வ நிக்கி²பிஸ்ஸந்தி, பூ⁴தா லோகே ஸமுஸ்ஸயம்;

யத்த² ஏதாதி³ஸோ ஸத்தா², லோகே அப்படிபுக்³க³லோ;

ததா²க³தோ ப³லப்பத்தோ, ஸம்பு³த்³தோ⁴ பரினிப்³பு³தோ’’தி.

பரினிப்³பு³தே ப⁴க³வதி ஸஹ பரினிப்³பா³னா ஸக்கோ தே³வானமிந்தோ³ இமம் கா³த²ம் அபா⁴ஸி –

‘‘அனிச்சா வத ஸங்கா²ரா, உப்பாத³வயத⁴ம்மினோ;

உப்பஜ்ஜித்வா நிருஜ்ஜ²ந்தி, தேஸம் வூபஸமோ ஸுகோ²’’தி.

பரினிப்³பு³தே ப⁴க³வதி ஸஹ பரினிப்³பா³னா ஆயஸ்மா ஆனந்தோ³ இமம் கா³த²ம் அபா⁴ஸி –

‘‘ததா³ஸி யம் பி⁴ம்ஸனகம், ததா³ஸி லோமஹம்ஸனம்;

ஸப்³பா³காரவரூபேதே, ஸம்பு³த்³தே⁴ பரினிப்³பு³தே’’தி.

பரினிப்³பு³தே ப⁴க³வதி ஸஹ பரினிப்³பா³னா ஆயஸ்மா அனுருத்³தோ⁴ இமா கா³தா²யோ அபா⁴ஸி –

‘‘நாஹு அஸ்ஸாஸபஸ்ஸாஸோ, டி²தசித்தஸ்ஸ தாதி³னோ;

அனேஜோ ஸந்திமாரப்³ப⁴, சக்கு²மா பரினிப்³பு³தோ [யம் காலமகரீ முனி (மஹாபரினிப்³பா³னஸுத்தே)].

‘‘அஸல்லீனேன சித்தேன, வேத³னம் அஜ்ஜ²வாஸயி;

பஜ்ஜோதஸ்ஸேவ நிப்³பா³னம், விமோக்கோ² சேதஸோ அஹூ’’தி.

து³தியோ வக்³கோ³.

தஸ்ஸுத்³தா³னம் –

ப்³ரஹ்மாஸனம் தே³வத³த்தோ, அந்த⁴கவிந்தோ³ அருணவதீ;

பரினிப்³பா³னேன ச தே³ஸிதம், இத³ம் ப்³ரஹ்மபஞ்சகந்தி.

ப்³ரஹ்மஸம்யுத்தம் ஸமத்தம். [இதோ பரம் மரம்மபோத்த²கேஸு ஏவம்பி தி³ஸ்ஸதி –§ப்³ரஹ்மாயாசனம் அகா³ரவஞ்ச, ப்³ரஹ்மதே³வோ ப³கோ ச ப்³ரஹ்மா.§அஞ்ஞதரோ ச ப்³ரஹ்மாகோகாலிகஞ்ச, திஸ்ஸகஞ்ச துரூ ச.§ப்³ரஹ்மா கோகாலிகபி⁴க்கு², ஸனங்குமாரேன தே³வத³த்தம்.§அந்த⁴கவிந்த³ம் அருணவதி, பரினிப்³பா³னேன பன்னரஸாதி.]