7. ப்³ராஹ்மணஸம்யுத்தம்

1. அரஹந்தவக்³கோ³

1. த⁴னஞ்ஜானீஸுத்தம்

187. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன அஞ்ஞதரஸ்ஸ பா⁴ரத்³வாஜகோ³த்தஸ்ஸ ப்³ராஹ்மணஸ்ஸ த⁴னஞ்ஜானீ [தா⁴னஞ்ஜானீ (பீ. ஸீ. அட்ட².)] நாம ப்³ராஹ்மணீ அபி⁴ப்பஸன்னா ஹோதி பு³த்³தே⁴ ச த⁴ம்மே ச ஸங்கே⁴ ச. அத² கோ² த⁴னஞ்ஜானீ ப்³ராஹ்மணீ பா⁴ரத்³வாஜகோ³த்தஸ்ஸ ப்³ராஹ்மணஸ்ஸ ப⁴த்தம் உபஸம்ஹரந்தீ உபக்க²லித்வா திக்க²த்தும் உதா³னம் உதா³னேஸி –

‘‘நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ;

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ;

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸா’’தி.

ஏவம் வுத்தே, பா⁴ரத்³வாஜகோ³த்தோ ப்³ராஹ்மணோ த⁴னஞ்ஜானிம் ப்³ராஹ்மணிம் ஏதத³வோச – ‘‘ஏவமேவம் பனாயம் வஸலீ யஸ்மிம் வா தஸ்மிம் வா தஸ்ஸ முண்ட³கஸ்ஸ ஸமணஸ்ஸ வண்ணம் பா⁴ஸதி. இதா³னி த்யாஹம், வஸலி, தஸ்ஸ ஸத்து²னோ வாத³ம் ஆரோபேஸ்ஸாமீ’’தி. ‘‘ந க்²வாஹம் தம், ப்³ராஹ்மண, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய, யோ தஸ்ஸ ப⁴க³வதோ வாத³ம் ஆரோபேய்ய அரஹதோ ஸம்மாஸம்பு³த்³த⁴ஸ்ஸ. அபி ச த்வம், ப்³ராஹ்மண, க³ச்ச², க³ந்த்வா விஜானிஸ்ஸஸீ’’தி [க³ந்த்வாபி ஜானிஸ்ஸஸீதி (ஸ்யா. கம்.)].

அத² கோ² பா⁴ரத்³வாஜகோ³த்தோ ப்³ராஹ்மணோ குபிதோ அனத்தமனோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² பா⁴ரத்³வாஜகோ³த்தோ ப்³ராஹ்மணோ ப⁴க³வந்தம் கா³தா²ய அஜ்ஜ²பா⁴ஸி –

‘‘கிம்ஸு சே²த்வா ஸுக²ம் ஸேதி, கிம்ஸு சே²த்வா ந ஸோசதி;

கிஸ்ஸஸ்ஸு ஏகத⁴ம்மஸ்ஸ, வத⁴ம் ரோசேஸி கோ³தமா’’தி.

‘‘கோத⁴ம் சே²த்வா ஸுக²ம் ஸேதி, கோத⁴ம் சே²த்வா ந ஸோசதி;

கோத⁴ஸ்ஸ விஸமூலஸ்ஸ, மது⁴ரக்³க³ஸ்ஸ ப்³ராஹ்மண;

வத⁴ம் அரியா பஸம்ஸந்தி, தஞ்ஹி சே²த்வா ந ஸோசதீ’’தி.

ஏவம் வுத்தே, பா⁴ரத்³வாஜகோ³த்தோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம, அபி⁴க்கந்தம், போ⁴ கோ³தம! ஸேய்யதா²பி, போ⁴ கோ³தம, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – சக்கு²மந்தோ ரூபானி த³க்க²ந்தீதி; ஏவமேவம் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹம், ப⁴ந்தே, ப⁴க³வந்தம் கோ³தமம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபே⁴ய்யாஹம் போ⁴தோ கோ³தமஸ்ஸ ஸந்திகே பப்³ப³ஜ்ஜம், லபே⁴ய்யம் உபஸம்பத³’’ந்தி.

அலத்த² கோ² பா⁴ரத்³வாஜகோ³த்தோ ப்³ராஹ்மணோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³ம். அசிரூபஸம்பன்னோ கோ² பனாயஸ்மா பா⁴ரத்³வாஜோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீதி.

2. அக்கோஸஸுத்தம்

188. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அஸ்ஸோஸி கோ² அக்கோஸகபா⁴ரத்³வாஜோ ப்³ராஹ்மணோ – ‘‘பா⁴ரத்³வாஜகோ³த்தோ கிர ப்³ராஹ்மணோ ஸமணஸ்ஸ கோ³தமஸ்ஸ ஸந்திகே அகா³ரஸ்மா அனகா³ரியம் பப்³ப³ஜிதோ’’தி குபிதோ அனத்தமனோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அஸப்³பா⁴ஹி ப²ருஸாஹி வாசாஹி அக்கோஸதி பரிபா⁴ஸதி.

ஏவம் வுத்தே, ப⁴க³வா அக்கோஸகபா⁴ரத்³வாஜம் ப்³ராஹ்மணம் ஏதத³வோச – ‘‘தம் கிம் மஞ்ஞஸி, ப்³ராஹ்மண, அபி நு கோ² தே ஆக³ச்ச²ந்தி மித்தாமச்சா ஞாதிஸாலோஹிதா அதிதி²யோ [அதித²யோ (?)]’’தி? ‘‘அப்பேகதா³ மே, போ⁴ கோ³தம, ஆக³ச்ச²ந்தி மித்தாமச்சா ஞாதிஸாலோஹிதா அதிதி²யோ’’தி. ‘‘‘தம் கிம் மஞ்ஞஸி, ப்³ராஹ்மண, அபி நு தேஸம் அனுப்பதே³ஸி கா²த³னீயம் வா போ⁴ஜனீயம் வா ஸாயனீயம் வா’’’தி? ‘‘‘அப்பேகதா³ நேஸாஹம், போ⁴ கோ³தம, அனுப்பதே³மி கா²த³னீயம் வா போ⁴ஜனீயம் வா ஸாயனீயம் வா’’’தி. ‘‘‘ஸசே கோ² பன தே, ப்³ராஹ்மண, நப்படிக்³க³ண்ஹந்தி, கஸ்ஸ தம் ஹோதீ’’’தி? ‘‘‘ஸசே தே, போ⁴ கோ³தம, நப்படிக்³க³ண்ஹந்தி, அம்ஹாகமேவ தம் ஹோதீ’’’தி. ‘‘ஏவமேவ கோ², ப்³ராஹ்மண, யம் த்வம் அம்ஹே அனக்கோஸந்தே அக்கோஸஸி, அரோஸேந்தே ரோஸேஸி, அப⁴ண்ட³ந்தே ப⁴ண்ட³ஸி, தம் தே மயம் நப்படிக்³க³ண்ஹாம. தவேவேதம், ப்³ராஹ்மண, ஹோதி; தவேவேதம், ப்³ராஹ்மண, ஹோதி’’.

‘‘யோ கோ², ப்³ராஹ்மண, அக்கோஸந்தம் பச்சக்கோஸதி, ரோஸேந்தம் படிரோஸேதி, ப⁴ண்ட³ந்தம் படிப⁴ண்ட³தி, அயம் வுச்சதி, ப்³ராஹ்மண, ஸம்பு⁴ஞ்ஜதி வீதிஹரதீதி. தே மயம் தயா நேவ ஸம்பு⁴ஞ்ஜாம ந வீதிஹராம. தவேவேதம், ப்³ராஹ்மண, ஹோதி; தவேவேதம், ப்³ராஹ்மண, ஹோதீ’’தி. ‘‘ப⁴வந்தம் கோ² கோ³தமம் ஸராஜிகா பரிஸா ஏவம் ஜானாதி – ‘அரஹம் ஸமணோ கோ³தமோ’தி. அத² ச பன ப⁴வம் கோ³தமோ குஜ்ஜ²தீ’’தி.

‘‘அக்கோத⁴ஸ்ஸ குதோ கோதோ⁴, த³ந்தஸ்ஸ ஸமஜீவினோ;

ஸம்மத³ஞ்ஞா விமுத்தஸ்ஸ, உபஸந்தஸ்ஸ தாதி³னோ.

‘‘தஸ்ஸேவ தேன பாபியோ, யோ குத்³த⁴ம் படிகுஜ்ஜ²தி;

குத்³த⁴ம் அப்படிகுஜ்ஜ²ந்தோ, ஸங்கா³மம் ஜேதி து³ஜ்ஜயம்.

‘‘உபி⁴ன்னமத்த²ம் சரதி, அத்தனோ ச பரஸ்ஸ ச;

பரம் ஸங்குபிதம் ஞத்வா, யோ ஸதோ உபஸம்மதி.

‘‘உபி⁴ன்னம் திகிச்ச²ந்தானம், அத்தனோ ச பரஸ்ஸ ச;

ஜனா மஞ்ஞந்தி பா³லோதி, யே த⁴ம்மஸ்ஸ அகோவிதா³’’தி.

ஏவம் வுத்தே, அக்கோஸகபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… ஏஸாஹம் ப⁴வந்தம் கோ³தமம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபே⁴ய்யாஹம், ப⁴ந்தே, போ⁴தோ கோ³தமஸ்ஸ ஸந்திகே பப்³ப³ஜ்ஜம், லபே⁴ய்யம் உபஸம்பத³’’ந்தி.

அலத்த² கோ² அக்கோஸகபா⁴ரத்³வாஜோ ப்³ராஹ்மணோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³ம். அசிரூபஸம்பன்னோ கோ² பனாயஸ்மா அக்கோஸகபா⁴ரத்³வாஜோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம் நாபரம் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீதி.

3. அஸுரிந்த³கஸுத்தம்

189. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அஸ்ஸோஸி கோ² அஸுரிந்த³கபா⁴ரத்³வாஜோ ப்³ராஹ்மணோ – ‘‘பா⁴ரத்³வாஜகோ³த்தோ ப்³ராஹ்மணோ கிர ஸமணஸ்ஸ கோ³தமஸ்ஸ ஸந்திகே அகா³ரஸ்மா அனகா³ரியம் பப்³ப³ஜிதோ’’தி குபிதோ அனத்தமனோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அஸப்³பா⁴ஹி ப²ருஸாஹி வாசாஹி அக்கோஸதி பரிபா⁴ஸதி. ஏவம் வுத்தே, ப⁴க³வா துண்ஹீ அஹோஸி. அத² கோ² அஸுரிந்த³கபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘ஜிதோஸி, ஸமண, ஜிதோஸி, ஸமணா’’தி.

‘‘ஜயம் வே மஞ்ஞதி பா³லோ, வாசாய ப²ருஸம் ப⁴ணம்;

ஜயஞ்சேவஸ்ஸ தம் ஹோதி, யா திதிக்கா² விஜானதோ.

‘‘தஸ்ஸேவ தேன பாபியோ, யோ குத்³த⁴ம் படிகுஜ்ஜ²தி;

குத்³த⁴ம் அப்படிகுஜ்ஜ²ந்தோ, ஸங்கா³மம் ஜேதி து³ஜ்ஜயம்.

‘‘உபி⁴ன்னமத்த²ம் சரதி, அத்தனோ ச பரஸ்ஸ ச;

பரம் ஸங்குபிதம் ஞத்வா, யோ ஸதோ உபஸம்மதி.

‘‘உபி⁴ன்னம் திகிச்ச²ந்தானம், அத்தனோ ச பரஸ்ஸ ச;

ஜனா மஞ்ஞந்தி பா³லோதி, யே த⁴ம்மஸ்ஸ அகோவிதா³’’தி.

ஏவம் வுத்தே, அஸுரிந்த³கபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அப்³ப⁴ஞ்ஞாஸி. அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீ’’தி.

4. பி³லங்கி³கஸுத்தம்

190. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அஸ்ஸோஸி கோ² பி³லங்கி³கபா⁴ரத்³வாஜோ ப்³ராஹ்மணோ – ‘‘பா⁴ரத்³வாஜகோ³த்தோ கிர ப்³ராஹ்மணோ ஸமணஸ்ஸ கோ³தமஸ்ஸ ஸந்திகே அகா³ரஸ்மா அனகா³ரியம் பப்³ப³ஜிதோ’’தி குபிதோ அனத்தமனோ யேன ப⁴க³வா தேனுபஸங்கமி; உபஸங்கமித்வா துண்ஹீபூ⁴தோ ஏகமந்தம் அட்டா²ஸி. அத² கோ² ப⁴க³வா பி³லங்கி³கஸ்ஸ பா⁴ரத்³வாஜஸ்ஸ ப்³ராஹ்மணஸ்ஸ சேதஸா சேதோபரிவிதக்கமஞ்ஞாய பி³லங்கி³கம் பா⁴ரத்³வாஜம் ப்³ராஹ்மணம் கா³தா²ய அஜ்ஜ²பா⁴ஸி –

‘‘யோ அப்பது³ட்ட²ஸ்ஸ நரஸ்ஸ து³ஸ்ஸதி,

ஸுத்³த⁴ஸ்ஸ போஸஸ்ஸ அனங்க³ணஸ்ஸ;

தமேவ பா³லம் பச்சேதி பாபம்,

ஸுகு²மோ ரஜோ படிவாதம்வ கி²த்தோ’’தி.

ஏவம் வுத்தே, விலங்கி³கபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அப்³ப⁴ஞ்ஞாஸி. அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீ’’தி.

5. அஹிம்ஸகஸுத்தம்

191. ஸாவத்தி²னிதா³னம். அத² கோ² அஹிம்ஸகபா⁴ரத்³வாஜோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² அஹிம்ஸகபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அஹிம்ஸகாஹம், போ⁴ கோ³தம, அஹிம்ஸகாஹம், போ⁴ கோ³தமா’’தி.

‘‘யதா² நாமம் ததா² சஸ்ஸ, ஸியா கோ² த்வம் அஹிம்ஸகோ;

யோ ச காயேன வாசாய, மனஸா ச ந ஹிம்ஸதி;

ஸ வே அஹிம்ஸகோ ஹோதி, யோ பரம் ந விஹிம்ஸதீ’’தி.

ஏவம் வுத்தே, அஹிம்ஸகபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அப்³ப⁴ஞ்ஞாஸி. அஞ்ஞதரோ ச பனாயஸ்மா அஹிம்ஸகபா⁴ரத்³வாஜோ அரஹதம் அஹோஸீ’’தி.

6. ஜடாஸுத்தம்

192. ஸாவத்தி²னிதா³னம். அத² கோ² ஜடாபா⁴ரத்³வாஜோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஜடாபா⁴ரத்³வாஜோ ப்³ராஹ்மணோ ப⁴க³வந்தம் கா³தா²ய அஜ்ஜ²பா⁴ஸி –

‘‘அந்தோஜடா ப³ஹிஜடா, ஜடாய ஜடிதா பஜா;

தம் தம் கோ³தம புச்சா²மி, கோ இமம் விஜடயே ஜட’’ந்தி.

‘‘ஸீலே பதிட்டா²ய நரோ ஸபஞ்ஞோ, சித்தம் பஞ்ஞஞ்ச பா⁴வயம்;

ஆதாபீ நிபகோ பி⁴க்கு², ஸோ இமம் விஜடயே ஜடம்.

‘‘யேஸம் ராகோ³ ச தோ³ஸோ ச, அவிஜ்ஜா ச விராஜிதா;

கீ²ணாஸவா அரஹந்தோ, தேஸம் விஜடிதா ஜடா.

‘‘யத்த² நாமஞ்ச ரூபஞ்ச, அஸேஸம் உபருஜ்ஜ²தி;

படிக⁴ம் ரூபஸஞ்ஞா ச, ஏத்தே²ஸா சி²ஜ்ஜதே ஜடா’’தி.

ஏவம் வுத்தே, ஜடாபா⁴ரத்³வாஜோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீ’’தி.

7. ஸுத்³தி⁴கஸுத்தம்

193. ஸாவத்தி²னிதா³னம். அத² கோ² ஸுத்³தி⁴கபா⁴ரத்³வாஜோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஸுத்³தி⁴கபா⁴ரத்³வாஜோ ப்³ராஹ்மணோ ப⁴க³வதோ ஸந்திகே இமம் கா³த²ம் அஜ்ஜ²பா⁴ஸி –

‘‘ந ப்³ராஹ்மணோ [நாப்³ராஹ்மணோ (?)] ஸுஜ்ஜ²தி கோசி, லோகே ஸீலவாபி தபோகரம்;

விஜ்ஜாசரணஸம்பன்னோ, ஸோ ஸுஜ்ஜ²தி ந அஞ்ஞா இதரா பஜா’’தி.

‘‘ப³ஹும்பி பலபம் ஜப்பம், ந ஜச்சா ஹோதி ப்³ராஹ்மணோ;

அந்தோகஸம்பு³ ஸங்கிலிட்டோ², குஹனம் உபனிஸ்ஸிதோ.

‘‘க²த்தியோ ப்³ராஹ்மணோ வேஸ்ஸோ, ஸுத்³தோ³ சண்டா³லபுக்குஸோ;

ஆரத்³த⁴வீரியோ பஹிதத்தோ, நிச்சம் த³ள்ஹபரக்கமோ;

பப்போதி பரமம் ஸுத்³தி⁴ம், ஏவம் ஜானாஹி ப்³ராஹ்மணா’’தி.

ஏவம் வுத்தே, ஸுத்³தி⁴கபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீ’’தி.

8. அக்³கி³கஸுத்தம்

194. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன அக்³கி³கபா⁴ரத்³வாஜஸ்ஸ ப்³ராஹ்மணஸ்ஸ ஸப்பினா பாயஸோ ஸன்னிஹிதோ ஹோதி – ‘‘அக்³கி³ம் ஜுஹிஸ்ஸாமி, அக்³கி³ஹுத்தம் பரிசரிஸ்ஸாமீ’’தி.

அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ராஜக³ஹம் பிண்டா³ய பாவிஸி. ராஜக³ஹே ஸபதா³னம் பிண்டா³ய சரமானோ யேன அக்³கி³கபா⁴ரத்³வாஜஸ்ஸ ப்³ராஹ்மணஸ்ஸ நிவேஸனம் தேனுபஸங்கமி; உபஸங்கமித்வா ஏகமந்தம் அட்டா²ஸி. அத்³த³ஸா கோ² அக்³கி³கபா⁴ரத்³வாஜோ ப்³ராஹ்மணோ ப⁴க³வந்தம் பிண்டா³ய டி²தம். தி³ஸ்வான ப⁴க³வந்தம் கா³தா²ய அஜ்ஜ²பா⁴ஸி –

‘‘தீஹி விஜ்ஜாஹி ஸம்பன்னோ, ஜாதிமா ஸுதவா ப³ஹூ;

விஜ்ஜாசரணஸம்பன்னோ, ஸோமம் பு⁴ஞ்ஜேய்ய பாயஸ’’ந்தி.

‘‘ப³ஹும்பி பலபம் ஜப்பம், ந ஜச்சா ஹோதி ப்³ராஹ்மணோ;

அந்தோகஸம்பு³ ஸம்கிலிட்டோ², குஹனாபரிவாரிதோ.

‘‘புப்³பே³னிவாஸம் யோ வேதீ³, ஸக்³கா³பாயஞ்ச பஸ்ஸதி;

அதோ² ஜாதிக்க²யம் பத்தோ, அபி⁴ஞ்ஞாவோஸிதோ முனி.

‘‘ஏதாஹி தீஹி விஜ்ஜாஹி, தேவிஜ்ஜோ ஹோதி ப்³ராஹ்மணோ;

விஜ்ஜாசரணஸம்பன்னோ, ஸோமம் பு⁴ஞ்ஜேய்ய பாயஸ’’ந்தி.

‘‘பு⁴ஞ்ஜது ப⁴வம் கோ³தமோ. ப்³ராஹ்மணோ ப⁴வ’’ந்தி.

‘‘கா³தா²பி⁴கீ³தம் மே அபோ⁴ஜனேய்யம்,

ஸம்பஸ்ஸதம் ப்³ராஹ்மண நேஸ த⁴ம்மோ;

கா³தா²பி⁴கீ³தம் பனுத³ந்தி பு³த்³தா⁴,

த⁴ம்மே ஸதி ப்³ராஹ்மண வுத்திரேஸா.

‘‘அஞ்ஞேன ச கேவலினம் மஹேஸிம்,

கீ²ணாஸவம் குக்குச்சவூபஸந்தம்;

அன்னேன பானேன உபட்ட²ஹஸ்ஸு,

கே²த்தஞ்ஹி தம் புஞ்ஞபேக்க²ஸ்ஸ ஹோதீ’’தி.

ஏவம் வுத்தே, அக்³கி³கபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அஞ்ஞதரோ ச பனாயஸ்மா அக்³கி³கபா⁴ரத்³வாஜோ அரஹதம் அஹோஸீ’’தி.

9. ஸுந்த³ரிகஸுத்தம்

195. ஏகம் ஸமயம் ப⁴க³வா கோஸலேஸு விஹரதி ஸுந்த³ரிகாய நதி³யா தீரே. தேன கோ² பன ஸமயேன ஸுந்த³ரிகபா⁴ரத்³வாஜோ ப்³ராஹ்மணோ ஸுந்த³ரிகாய நதி³யா தீரே அக்³கி³ம் ஜுஹதி, அக்³கி³ஹுத்தம் பரிசரதி. அத² கோ² ஸுந்த³ரிகபா⁴ரத்³வாஜோ ப்³ராஹ்மணோ அக்³கி³ம் ஜுஹித்வா அக்³கி³ஹுத்தம் பரிசரித்வா உட்டா²யாஸனா ஸமந்தா சதுத்³தி³ஸா அனுவிலோகேஸி – ‘‘கோ நு கோ² இமம் ஹப்³யஸேஸம் பு⁴ஞ்ஜேய்யா’’தி? அத்³த³ஸா கோ² ஸுந்த³ரிகபா⁴ரத்³வாஜோ ப்³ராஹ்மணோ ப⁴க³வந்தம் அஞ்ஞதரஸ்மிம் ருக்க²மூலே ஸஸீஸம் பாருதம் நிஸின்னம். தி³ஸ்வான வாமேன ஹத்தே²ன ஹப்³யஸேஸம் க³ஹேத்வா த³க்கி²ணேன ஹத்தே²ன கமண்ட³லும் க³ஹேத்வா யேன ப⁴க³வா தேனுபஸங்கமி. அத² கோ² ப⁴க³வா ஸுந்த³ரிகபா⁴ரத்³வாஜஸ்ஸ ப்³ராஹ்மணஸ்ஸ பத³ஸத்³தே³ன ஸீஸம் விவரி. அத² கோ² ஸுந்த³ரிகபா⁴ரத்³வாஜோ ப்³ராஹ்மணோ ‘முண்டோ³ அயம் ப⁴வம், முண்ட³கோ அயம் ப⁴வ’ந்தி ததோவ புன நிவத்திதுகாமோ அஹோஸி. அத² கோ² ஸுந்த³ரிகபா⁴ரத்³வாஜஸ்ஸ ப்³ராஹ்மணஸ்ஸ ஏதத³ஹோஸி – ‘முண்டா³பி ஹி இதே⁴கச்சே ப்³ராஹ்மணா ப⁴வந்தி; யம்னூனாஹம் தம் உபஸங்கமித்வா ஜாதிம் புச்சே²ய்ய’ந்தி.

அத² கோ² ஸுந்த³ரிகபா⁴ரத்³வாஜோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘கிம்ஜச்சோ ப⁴வ’ந்தி?

‘‘மா ஜாதிம் புச்ச² சரணஞ்ச புச்ச²,

கட்டா² ஹவே ஜாயதி ஜாதவேதோ³;

நீசாகுலீனோபி முனி தி⁴திமா,

ஆஜானீயோ ஹோதி ஹிரீனிஸேதோ⁴.

‘‘ஸச்சேன த³ந்தோ த³மஸா உபேதோ,

வேத³ந்தகூ³ வுஸிதப்³ரஹ்மசரியோ;

யஞ்ஞோபனீதோ தமுபவ்ஹயேத²,

காலேன ஸோ ஜுஹதி த³க்கி²ணேய்யே’’தி.

‘‘அத்³தா⁴ ஸுயிட்ட²ம் ஸுஹுதம் மம யித³ம்,

யம் தாதி³ஸம் வேத³கு³மத்³த³ஸாமி;

தும்ஹாதி³ஸானஞ்ஹி அத³ஸ்ஸனேன,

அஞ்ஞோ ஜனோ பு⁴ஞ்ஜதி ஹப்³யஸேஸ’’ந்தி.

‘‘பு⁴ஞ்ஜது ப⁴வம் கோ³தமோ. ப்³ராஹ்மணோ ப⁴வ’’ந்தி.

‘‘கா³தா²பி⁴கீ³தம் மே அபோ⁴ஜனேய்யம்,

ஸம்பஸ்ஸதம் ப்³ராஹ்மண நேஸ த⁴ம்மோ;

கா³தா²பி⁴கீ³தம் பனுத³ந்தி பு³த்³தா⁴,

த⁴ம்மே ஸதி ப்³ராஹ்மண வுத்திரேஸா.

‘‘அஞ்ஞேன ச கேவலினம் மஹேஸிம்,

கீ²ணாஸவம் குக்குச்சவூபஸந்தம்;

அன்னேன பானேன உபட்ட²ஹஸ்ஸு,

கே²த்தஞ்ஹி தம் புஞ்ஞபேக்க²ஸ்ஸ ஹோதீ’’தி.

‘‘அத² கஸ்ஸ சாஹம், போ⁴ கோ³தம, இமம் ஹப்³யஸேஸம் த³ம்மீ’’தி? ‘‘ந க்²வாஹம், ப்³ராஹ்மண, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய யஸ்ஸேஸோ ஹப்³யஸேஸோ பு⁴த்தோ ஸம்மா பரிணாமம் க³ச்சே²ய்ய அஞ்ஞத்ர, ப்³ராஹ்மண, ததா²க³தஸ்ஸ வா ததா²க³தஸாவகஸ்ஸ வா. தேன ஹி த்வம், ப்³ராஹ்மண, தம் ஹப்³யஸேஸம் அப்பஹரிதே வா ச²ட்³டே³ஹி அப்பாணகே வா உத³கே ஓபிலாபேஹீ’’தி.

அத² கோ² ஸுந்த³ரிகபா⁴ரத்³வாஜோ ப்³ராஹ்மணோ தம் ஹப்³யஸேஸம் அப்பாணகே உத³கே ஓபிலாபேஸி. அத² கோ² ஸோ ஹப்³யஸேஸோ உத³கே பக்கி²த்தோ சிச்சிடாயதி சிடிசிடாயதி ஸந்தூ⁴பாயதி ஸம்பதூ⁴பாயதி. ஸேய்யதா²பி நாம பா²லோ [லோஹோ (க.)] தி³வஸம்ஸந்தத்தோ [தி³வஸஸந்தத்தோ (ஸீ. ஸ்யா. கம். பீ.)] உத³கே பக்கி²த்தோ சிச்சிடாயதி சிடிசிடாயதி ஸந்தூ⁴பாயதி ஸம்பதூ⁴பாயதி; ஏவமேவ ஸோ ஹப்³யஸேஸோ உத³கே பக்கி²த்தோ சிச்சிடாயதி சிடிசிடாயதி ஸந்தூ⁴பாயதி ஸம்பதூ⁴பாயதி.

அத² கோ² ஸுந்த³ரிகபா⁴ரத்³வாஜோ ப்³ராஹ்மணோ ஸம்விக்³கோ³ லோமஹட்ட²ஜாதோ யேன ப⁴க³வா தேனுபஸங்கமி; உபஸங்கமித்வா ஏகமந்தம் அட்டா²ஸி. ஏகமந்தம் டி²தம் கோ² ஸுந்த³ரிகபா⁴ரத்³வாஜம் ப்³ராஹ்மணம் ப⁴க³வா கா³தா²ஹி அஜ்ஜ²பா⁴ஸி –

‘‘மா ப்³ராஹ்மண தா³ரு ஸமாத³ஹானோ,

ஸுத்³தி⁴ம் அமஞ்ஞி ப³ஹித்³தா⁴ ஹி ஏதம்;

ந ஹி தேன ஸுத்³தி⁴ம் குஸலா வத³ந்தி,

யோ பா³ஹிரேன பரிஸுத்³தி⁴மிச்சே².

‘‘ஹித்வா அஹம் ப்³ராஹ்மண தா³ருதா³ஹம்

அஜ்ஜ²த்தமேவுஜ்ஜலயாமி [அஜ்ஜ²த்தமேவ ஜலயாமி (ஸீ. ஸ்யா. கம். பீ.)] ஜோதிம்;

நிச்சக்³கி³னீ நிச்சஸமாஹிதத்தோ,

அரஹம் அஹம் ப்³ரஹ்மசரியம் சராமி.

‘‘மானோ ஹி தே ப்³ராஹ்மண கா²ரிபா⁴ரோ,

கோதோ⁴ து⁴மோ ப⁴ஸ்மனி மோஸவஜ்ஜம்;

ஜிவ்ஹா ஸுஜா ஹத³யம் ஜோதிடா²னம்,

அத்தா ஸுத³ந்தோ புரிஸஸ்ஸ ஜோதி.

‘‘த⁴ம்மோ ரஹதோ³ ப்³ராஹ்மண ஸீலதித்தோ²,

அனாவிலோ ஸப்³பி⁴ ஸதம் பஸத்தோ²;

யத்த² ஹவே வேத³கு³னோ ஸினாதா,

அனல்லக³த்தாவ [அனல்லீனக³த்தாவ (ஸீ. பீ. க.)] தரந்தி பாரம்.

‘‘ஸச்சம் த⁴ம்மோ ஸம்யமோ ப்³ரஹ்மசரியம்,

மஜ்ஜே² ஸிதா ப்³ராஹ்மண ப்³ரஹ்மபத்தி;

ஸ துஜ்ஜுபூ⁴தேஸு நமோ கரோஹி,

தமஹம் நரம் த⁴ம்மஸாரீதி ப்³ரூமீ’’தி.

ஏவம் வுத்தே, ஸுந்த³ரிகபா⁴ரத்³வாஜோ ப்³ராஹ்மணோ ப⁴க³வந்தம் ஏதத³வோச – ‘‘அபி⁴க்கந்தம், போ⁴ கோ³தம…பே… அஞ்ஞதரோ ச பனாயஸ்மா பா⁴ரத்³வாஜோ அரஹதம் அஹோஸீ’’தி.

10. ப³ஹுதீ⁴தரஸுத்தம்

196. ஏகம் ஸமயம் ப⁴க³வா கோஸலேஸு விஹரதி அஞ்ஞதரஸ்மிம் வனஸண்டே³. தேன கோ² பன ஸமயேன அஞ்ஞதரஸ்ஸ பா⁴ரத்³வாஜகோ³த்தஸ்ஸ ப்³ராஹ்மணஸ்ஸ சதுத்³த³ஸ ப³லீப³த்³தா³ நட்டா² ஹோந்தி. அத² கோ² பா⁴ரத்³வாஜகோ³த்தோ ப்³ராஹ்மணோ தே ப³லீப³த்³தே³ க³வேஸந்தோ யேன ஸோ வனஸண்டோ³ தேனுபஸங்கமி; உபஸங்கமித்வா அத்³த³ஸ ப⁴க³வந்தம் தஸ்மிம் வனஸண்டே³ நிஸின்னம் பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. தி³ஸ்வான யேன ப⁴க³வா தேனுபஸங்கமி; உபஸங்கமித்வா ப⁴க³வதோ ஸந்திகே இமா கா³தா²யோ அபா⁴ஸி –

‘‘ந ஹி நூனிமஸ்ஸ [நஹனூனிமஸ்ஸ (ஸீ. ஸ்யா. கம்.)] ஸமணஸ்ஸ, ப³லீப³த்³தா³ சதுத்³த³ஸ;

அஜ்ஜஸட்டி²ம் ந தி³ஸ்ஸந்தி, தேனாயம் ஸமணோ ஸுகீ².

‘‘ந ஹி நூனிமஸ்ஸ ஸமணஸ்ஸ, திலாகே²த்தஸ்மி பாபகா;

ஏகபண்ணா து³பண்ணா [த்³விபண்ணா (ஸீ. பீ.)] ச, தேனாயம் ஸமணோ ஸுகீ².