6. பத்தஸுத்தம்

152. ஸாவத்தி²னிதா³னம். தேன கோ² பன ஸமயேன ப⁴க³வா பஞ்சன்னம் உபாதா³னக்க²ந்தா⁴னம் உபாதா³ய பி⁴க்கூ²னம் த⁴ம்மியா கதா²ய ஸந்த³ஸ்ஸேதி ஸமாத³பேதி [ஸமாதா³பேதி (?)] ஸமுத்தேஜேதி ஸம்பஹம்ஸேதி. தே ச பி⁴க்கூ² அட்டி²ம் கத்வா [அட்டி²கத்வா (ஸீ. ஸ்யா. கம். பீ.)] மனஸி கத்வா ஸப்³ப³சேதஸா [ஸப்³ப³சேதஸோ (ஸீ. ஸ்யா. கம். பீ.), ஸப்³ப³ம் சேதஸா (க.)] ஸமன்னாஹரித்வா ஓஹிதஸோதா த⁴ம்மம் ஸுணந்தி.

அத² கோ² மாரஸ்ஸ பாபிமதோ ஏதத³ஹோஸி – ‘‘அயம் கோ² ஸமணோ கோ³தமோ பஞ்சன்னம் உபாதா³னக்க²ந்தா⁴னம் உபாதா³ய பி⁴க்கூ²னம் த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹம்ஸேதி. தே ச பி⁴க்கூ² அட்டி²ம் கத்வா மனஸி கத்வா ஸப்³ப³சேதஸா ஸமன்னாஹரித்வா ஓஹிதஸோதா த⁴ம்மம் ஸுணந்தி. யம்னூனாஹம் யேன ஸமணோ கோ³தமோ தேனுபஸங்கமேய்யம் விசக்கு²கம்மாயா’’தி.

தேன கோ² பன ஸமயேன ஸம்ப³ஹுலா பத்தா அப்³போ⁴காஸே நிக்கி²த்தா ஹோந்தி. அத² கோ² மாரோ பாபிமா ப³லீப³த்³த³வண்ணம் அபி⁴னிம்மினித்வா யேன தே பத்தா தேனுபஸங்கமி. அத² கோ² அஞ்ஞதரோ பி⁴க்கு² அஞ்ஞதரம் பி⁴க்கு²ம் ஏதத³வோச – ‘‘பி⁴க்கு², பி⁴க்கு², ஏஸோ ப³லீப³த்³தோ³ பத்தே பி⁴ந்தே³ய்யா’’தி. ஏவம் வுத்தே ப⁴க³வா தம் பி⁴க்கு²ம் ஏதத³வோச – ‘‘ந ஸோ, பி⁴க்கு², ப³லீப³த்³தோ³. மாரோ ஏஸோ பாபிமா தும்ஹாகம் விசக்கு²கம்மாய ஆக³தோ’’தி. அத² கோ² ப⁴க³வா ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ய அஜ்ஜ²பா⁴ஸி –

‘‘ரூபம் வேத³யிதம் ஸஞ்ஞா, விஞ்ஞாணம் யஞ்ச ஸங்க²தம்;

நேஸோஹமஸ்மி நேதம் மே, ஏவம் தத்த² விரஜ்ஜதி.

‘‘ஏவம் விரத்தம் கே²மத்தம், ஸப்³ப³ஸம்யோஜனாதிக³ம்;

அன்வேஸம் ஸப்³ப³ட்டா²னேஸு, மாரஸேனாபி நாஜ்ஜ²கா³’’தி.

அத² கோ² மாரோ பாபிமா…பே… தத்தே²வந்தரதா⁴யீதி.