10. ஸங்க⁴வந்த³னாஸுத்தம்

266. ஸாவத்தி²யம் ஜேதவனே. தத்ர கோ²…பே… ஏதத³வோச – ‘‘பூ⁴தபுப்³ப³ம், பி⁴க்க²வே, ஸக்கோ தே³வானமிந்தோ³ மாதலிம் ஸங்கா³ஹகம் ஆமந்தேஸி – ‘யோஜேஹி, ஸம்ம மாதலி, ஸஹஸ்ஸயுத்தம் ஆஜஞ்ஞரத²ம், உய்யானபூ⁴மிம் க³ச்சா²ம ஸுபூ⁴மிம் த³ஸ்ஸனாயா’தி. ‘ஏவம் ப⁴த்³த³ந்தவா’தி கோ², பி⁴க்க²வே, மாதலி ஸங்கா³ஹகோ ஸக்கஸ்ஸ தே³வானமிந்த³ஸ்ஸ படிஸ்ஸுத்வா, ஸஹஸ்ஸயுத்தம் ஆஜஞ்ஞரத²ம் யோஜேத்வா ஸக்கஸ்ஸ தே³வானமிந்த³ஸ்ஸ படிவேதே³ஸி – ‘யுத்தோ கோ² தே, மாரிஸ, ஸஹஸ்ஸயுத்தோ ஆஜஞ்ஞரதோ², யஸ்ஸ தா³னி காலம் மஞ்ஞஸீ’’’தி. அத² கோ², பி⁴க்க²வே, ஸக்கோ தே³வானமிந்தோ³ வேஜயந்தபாஸாதா³ ஓரோஹந்தோ அஞ்ஜலிம் கத்வா ஸுத³ம் பி⁴க்கு²ஸங்க⁴ம் நமஸ்ஸதி. அத² கோ², பி⁴க்க²வே, மாதலி ஸங்கா³ஹகோ ஸக்கம் தே³வானமிந்த³ம் கா³தா²ய அஜ்ஜ²பா⁴ஸி –

‘‘தஞ்ஹி ஏதே நமஸ்ஸேய்யும், பூதிதே³ஹஸயா நரா;

நிமுக்³கா³ குணபம்ஹேதே, கு²ப்பிபாஸஸமப்பிதா.

‘‘கிம் நு தேஸம் பிஹயஸி, அனாகா³ரான வாஸவ;

ஆசாரம் இஸினம் ப்³ரூஹி, தம் ஸுணோம வசோ தவா’’தி.

‘‘ஏதம் தேஸம் பிஹயாமி, அனாகா³ரான மாதலி;

யம்ஹா கா³மா பக்கமந்தி, அனபேக்கா² வஜந்தி தே.

‘‘ந தேஸம் கோட்டே² ஓபேந்தி, ந கும்பி⁴ [ந கும்பா⁴ (ஸ்யா. கம். பீ. க.)] ந களோபியம் [க²ளோபியம் (ஸீ.)];

பரனிட்டி²தமேஸானா [பரனிட்டி²தமேஸனா (ஸ்யா. கம். க.)], தேன யாபேந்தி ஸுப்³ப³தா.

‘‘ஸுமந்தமந்தினோ தீ⁴ரா, துண்ஹீபூ⁴தா ஸமஞ்சரா;

தே³வா விருத்³தா⁴ அஸுரேஹி, புது² மச்சா ச மாதலி.

‘‘அவிருத்³தா⁴ விருத்³தே⁴ஸு, அத்தத³ண்டே³ஸு நிப்³பு³தா;

ஸாதா³னேஸு அனாதா³னா, தே நமஸ்ஸாமி மாதலீ’’தி.

‘‘ஸேட்டா² ஹி கிர லோகஸ்மிம், யே த்வம் ஸக்க நமஸ்ஸஸி;

அஹம்பி தே நமஸ்ஸாமி, யே நமஸ்ஸஸி வாஸவா’’தி.

‘‘இத³ம் வத்வான மக⁴வா, தே³வராஜா ஸுஜம்பதி;

பி⁴க்கு²ஸங்க⁴ம் நமஸ்ஸித்வா, பமுகோ² ரத²மாருஹீ’’தி.

து³தியோ வக்³கோ³.

தஸ்ஸுத்³தா³னம் –

தே³வா பன [வ தபதே³ன (ஸீ. ஸ்யா. கம்.)] தயோ வுத்தா, த³லித்³த³ஞ்ச ராமணேய்யகம்;

யஜமானஞ்ச வந்த³னா, தயோ ஸக்கனமஸ்ஸனாதி.