6. குலாவகஸுத்தம்

252. ஸாவத்தி²யம். ‘‘பூ⁴தபுப்³ப³ம், பி⁴க்க²வே, தே³வாஸுரஸங்கா³மோ ஸமுபப்³யூள்ஹோ அஹோஸி. தஸ்மிம் கோ² பன, பி⁴க்க²வே, ஸங்கா³மே அஸுரா ஜினிம்ஸு, தே³வா பராஜினிம்ஸு. பராஜிதா ச கோ², பி⁴க்க²வே, தே³வா அபாயம்ஸ்வேவ உத்தரேனமுகா², அபி⁴யம்ஸ்வேவ நே அஸுரா. அத² கோ², பி⁴க்க²வே, ஸக்கோ தே³வானமிந்தோ³ மாதலி ஸங்கா³ஹகம் கா³தா²ய அஜ்ஜ²பா⁴ஸி –

‘‘குலாவகா மாதலி ஸிம்ப³லிஸ்மிம்,

ஈஸாமுகே²ன பரிவஜ்ஜயஸ்ஸு;

காமம் சஜாம அஸுரேஸு பாணம்,

மாயிமே தி³ஜா விகுலாவகா [விகுலாவா (ஸ்யா. கம். க.)] அஹேஸு’’ந்தி.

‘‘‘ஏவம் ப⁴த்³த³ந்தவா’தி கோ², பி⁴க்க²வே, மாதலி ஸங்கா³ஹகோ ஸக்கஸ்ஸ தே³வானமிந்த³ஸ்ஸ படிஸ்ஸுத்வா ஸஹஸ்ஸயுத்தம் ஆஜஞ்ஞரத²ம் பச்சுதா³வத்தேஸி. அத² கோ², பி⁴க்க²வே, அஸுரானம் ஏதத³ஹோஸி – ‘பச்சுதா³வத்தோ கோ² தா³னி ஸக்கஸ்ஸ தே³வானமிந்த³ஸ்ஸ ஸஹஸ்ஸயுத்தோ ஆஜஞ்ஞரதோ². து³தியம்பி கோ² தே³வா அஸுரேஹி ஸங்கா³மேஸ்ஸந்தீதி பீ⁴தா அஸுரபுரமேவ பாவிஸிம்ஸு. இதி கோ², பி⁴க்க²வே, ஸக்கஸ்ஸ தே³வானமிந்த³ஸ்ஸ த⁴ம்மேன ஜயோ அஹோஸீ’’’தி.