1. ஸுவீரஸுத்தம்

247. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘பூ⁴தபுப்³ப³ம், பி⁴க்க²வே, அஸுரா தே³வே அபி⁴யம்ஸு. அத² கோ², பி⁴க்க²வே, ஸக்கோ தே³வானமிந்தோ³ ஸுவீரம் தே³வபுத்தம் ஆமந்தேஸி – ‘ஏதே, தாத ஸுவீர, அஸுரா தே³வே அபி⁴யந்தி. க³ச்ச², தாத ஸுவீர, அஸுரே பச்சுய்யாஹீ’தி. ‘ஏவம் ப⁴த்³த³ந்தவா’தி கோ², பி⁴க்க²வே, ஸுவீரோ தே³வபுத்தோ ஸக்கஸ்ஸ தே³வானமிந்த³ஸ்ஸ படிஸ்ஸுத்வா பமாத³ம் ஆபாதே³ஸி [ஆஹரேஸி (கத்த²சி) நவங்கு³த்தரே ஸீஹனாத³ஸுத்தேபி]. து³தியம்பி கோ², பி⁴க்க²வே, ஸக்கோ தே³வானமிந்தோ³ ஸுவீரம் தே³வபுத்தம் ஆமந்தேஸி – ‘ஏதே, தாத ஸுவீர, அஸுரா தே³வே அபி⁴யந்தி. க³ச்ச², தாத ஸுவீர, அஸுரே பச்சுய்யாஹீ’தி. ‘ஏவம் ப⁴த்³த³ந்தவா’தி கோ², பி⁴க்க²வே, ஸுவீரோ தே³வபுத்தோ ஸக்கஸ்ஸ தே³வானமிந்த³ஸ்ஸ படிஸ்ஸுத்வா து³தியம்பி பமாத³ம் ஆபாதே³ஸி. ததியம்பி கோ², பி⁴க்க²வே, ஸக்கோ தே³வானமிந்தோ³ ஸுவீரம் தே³வபுத்தம் ஆமந்தேஸி – ‘ஏதே, தாத ஸுவீர, அஸுரா தே³வே அபி⁴யந்தி. க³ச்ச², தாத ஸுவீர, அஸுரே பச்சுய்யாஹீ’தி. ‘ஏவம் ப⁴த்³த³ந்தவா’தி கோ², பி⁴க்க²வே, ஸுவீரோ தே³வபுத்தோ ஸக்கஸ்ஸ தே³வானமிந்த³ஸ்ஸ படிஸ்ஸுத்வா ததியம்பி பமாத³ம் ஆபாதே³ஸி. அத² கோ², பி⁴க்க²வே, ஸக்கோ தே³வானமிந்தோ³ ஸுவீரம் தே³வபுத்தம் கா³தா²ய அஜ்ஜ²பா⁴ஸி –

‘‘அனுட்ட²ஹம் அவாயாமம், ஸுக²ம் யத்ராதி⁴க³ச்ச²தி;

ஸுவீர தத்த² க³ச்சா²ஹி, மஞ்ச தத்தே²வ பாபயா’’தி.

‘‘அலஸ்வஸ்ஸ [அலஸ’ஸ்ஸ (ஸீ. பீ.), அலஸ்வாயம் (ஸ்யா. கம்.)] அனுட்டா²தா, ந ச கிச்சானி காரயே;

ஸப்³ப³காமஸமித்³த⁴ஸ்ஸ, தம் மே ஸக்க வரம் தி³ஸா’’தி.

‘‘யத்தா²லஸோ அனுட்டா²தா, அச்சந்தம் ஸுக²மேத⁴தி;

ஸுவீர தத்த² க³ச்சா²ஹி, மஞ்ச தத்தே²வ பாபயா’’தி.

‘‘அகம்முனா [அகம்மனா (ஸீ. பீ.)] தே³வஸேட்ட², ஸக்க விந்தே³மு யம் ஸுக²ம்;

அஸோகம் அனுபாயாஸம், தம் மே ஸக்க வரம் தி³ஸா’’தி.

‘‘ஸசே அத்தி² அகம்மேன, கோசி க்வசி ந ஜீவதி;

நிப்³பா³னஸ்ஸ ஹி ஸோ மக்³கோ³, ஸுவீர தத்த² க³ச்சா²ஹி;

மஞ்ச தத்தே²வ பாபயா’’தி.

‘‘ஸோ ஹி நாம, பி⁴க்க²வே, ஸக்கோ தே³வானமிந்தோ³ ஸகம் புஞ்ஞப²லம் உபஜீவமானோ தே³வானம் தாவதிம்ஸானம் இஸ்ஸரியாதி⁴பச்சம் ரஜ்ஜம் காரேந்தோ உட்டா²னவீரியஸ்ஸ வண்ணவாதீ³ ப⁴விஸ்ஸதி. இத⁴ கோ² தம், பி⁴க்க²வே, ஸோபே⁴த², யம் தும்ஹே ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா உட்ட²ஹேய்யாத² க⁴டேய்யாத² வாயமேய்யாத² அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய, அஸச்சி²கதஸ்ஸ ஸச்சி²கிரியாயா’’தி.