6. ச²ச²க்கஸுத்தம்

420. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச – ‘‘த⁴ம்மம் வோ, பி⁴க்க²வே, தே³ஸேஸ்ஸாமி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேஸ்ஸாமி, யதி³த³ம் – ச² ச²க்கானி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘ச² அஜ்ஜ²த்திகானி ஆயதனானி வேதி³தப்³பா³னி, ச² பா³ஹிரானி ஆயதனானி வேதி³தப்³பா³னி, ச² விஞ்ஞாணகாயா வேதி³தப்³பா³, ச² ப²ஸ்ஸகாயா வேதி³தப்³பா³, ச² வேத³னாகாயா வேதி³தப்³பா³, ச² தண்ஹாகாயா வேதி³தப்³பா³.

421. ‘‘‘ச² அஜ்ஜ²த்திகானி ஆயதனானி வேதி³தப்³பா³னீ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கா²யதனம், ஸோதாயதனம், கா⁴னாயதனம், ஜிவ்ஹாயதனம், காயாயதனம், மனாயதனம். ‘ச² அஜ்ஜ²த்திகானி ஆயதனானி வேதி³தப்³பா³னீ’தி – இதி யம் தம் வுத்தம், இத³மேதம் படிச்ச வுத்தம். இத³ம் பட²மம் ச²க்கம்.

‘‘‘ச² பா³ஹிரானி ஆயதனானி வேதி³தப்³பா³னீ’தி – இதி கோ² பனேதம் வுத்தம். கிஞ்சேதம் படிச்ச வுத்தம்? ரூபாயதனம், ஸத்³தா³யதனம், க³ந்தா⁴யதனம், ரஸாயதனம், போ²ட்ட²ப்³பா³யதனம், த⁴ம்மாயதனம். ‘ச² பா³ஹிரானி ஆயதனானி வேதி³தப்³பா³னீ’தி – இதி யம் தம் வுத்தம், இத³மேதம் படிச்ச வுத்தம். இத³ம் து³தியம் ச²க்கம்.

‘‘‘ச² விஞ்ஞாணகாயா வேதி³தப்³பா³’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணம், கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணம், ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணம், காயஞ்ச படிச்ச போ²ட்ட²ப்³பே³ ச உப்பஜ்ஜதி காயவிஞ்ஞாணம், மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணம். ‘ச² விஞ்ஞாணகாயா வேதி³தப்³பா³’தி – இதி யம் தம் வுத்தம், இத³மேதம் படிச்ச வுத்தம். இத³ம் ததியம் ச²க்கம்.

‘‘‘ச² ப²ஸ்ஸகாயா வேதி³தப்³பா³’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ; ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணம், திண்ணம் ஸங்க³தி ப²ஸ்ஸோ; கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணம், திண்ணம் ஸங்க³தி ப²ஸ்ஸோ; ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணம், திண்ணம் ஸங்க³தி ப²ஸ்ஸோ; காயஞ்ச படிச்ச போ²ட்ட²ப்³பே³ ச உப்பஜ்ஜதி காயவிஞ்ஞாணம், திண்ணம் ஸங்க³தி ப²ஸ்ஸோ; மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணம், திண்ணம் ஸங்க³தி ப²ஸ்ஸோ. ‘ச² ப²ஸ்ஸகாயா வேதி³தப்³பா³’தி – இதி யம் தம் வுத்தம், இத³மேதம் படிச்ச வுத்தம். இத³ம் சதுத்த²ம் ச²க்கம்.

‘‘‘ச² வேத³னாகாயா வேதி³தப்³பா³’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா; ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா; கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா; ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா; காயஞ்ச படிச்ச போ²ட்ட²ப்³பே³ ச உப்பஜ்ஜதி காயவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா; மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா. ‘ச² வேத³னாகாயா வேதி³தப்³பா³’தி – இதி யம் தம் வுத்தம், இத³மேதம் படிச்ச வுத்தம். இத³ம் பஞ்சமம் ச²க்கம்.

‘‘‘ச² தண்ஹாகாயா வேதி³தப்³பா³’தி – இதி கோ² பனேதம் வுத்தம். கிஞ்சேதம் படிச்ச வுத்தம்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா; ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணம்…பே… கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணம்… ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணம்… காயஞ்ச படிச்ச போ²ட்ட²ப்³பே³ ச உப்பஜ்ஜதி காயவிஞ்ஞாணம்… மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா. ‘ச² தண்ஹாகாயா வேதி³தப்³பா³’தி – இதி யம் தம் வுத்தம், இத³மேதம் படிச்ச வுத்தம். இத³ம் ச²ட்ட²ம் ச²க்கம்.

422. ‘‘‘சக்கு² அத்தா’தி யோ வதே³ய்ய தம் ந உபபஜ்ஜதி. சக்கு²ஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘சக்கு² அத்தா’தி யோ வதே³ய்ய. இதி சக்கு² அனத்தா.

‘‘‘ரூபா அத்தா’தி யோ வதே³ய்ய தம் ந உபபஜ்ஜதி. ரூபானம் உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘ரூபா அத்தா’தி யோ வதே³ய்ய. இதி சக்கு² அனத்தா, ரூபா அனத்தா.

‘‘‘சக்கு²விஞ்ஞாணம் அத்தா’தி யோ வதே³ய்ய தம் ந உபபஜ்ஜதி. சக்கு²விஞ்ஞாணஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘சக்கு²விஞ்ஞாணம் அத்தா’தி யோ வதே³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணம் அனத்தா.

‘‘‘சக்கு²ஸம்ப²ஸ்ஸோ அத்தா’தி யோ வதே³ய்ய தம் ந உபபஜ்ஜதி. சக்கு²ஸம்ப²ஸ்ஸஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘சக்கு²ஸம்ப²ஸ்ஸோ அத்தா’தி யோ வதே³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணம் அனத்தா, சக்கு²ஸம்ப²ஸ்ஸோ அனத்தா.

‘‘‘வேத³னா அத்தா’தி யோ வதே³ய்ய தம் ந உபபஜ்ஜதி. வேத³னாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘வேத³னா அத்தா’தி யோ வதே³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணம் அனத்தா, சக்கு²ஸம்ப²ஸ்ஸோ அனத்தா, வேத³னா அனத்தா.

‘‘‘தண்ஹா அத்தா’தி யோ வதே³ய்ய தம் ந உபபஜ்ஜதி. தண்ஹாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘தண்ஹா அத்தா’தி யோ வதே³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணம் அனத்தா, சக்கு²ஸம்ப²ஸ்ஸோ அனத்தா, வேத³னா அனத்தா, தண்ஹா அனத்தா.

423. ‘‘‘ஸோதம் அத்தா’தி யோ வதே³ய்ய…பே… ‘கா⁴னம் அத்தா’தி யோ வதே³ய்ய… ‘ஜிவ்ஹா அத்தா’தி யோ வதே³ய்ய… ‘காயோ அத்தா’தி யோ வதே³ய்ய… ‘மனோ அத்தா’தி யோ வதே³ய்ய தம் ந உபபஜ்ஜதி. மனஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘மனோ அத்தா’தி யோ வதே³ய்ய. இதி மனோ அனத்தா.

‘‘‘த⁴ம்மா அத்தா’தி யோ வதே³ய்ய தம் ந உபபஜ்ஜதி. த⁴ம்மானம் உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘த⁴ம்மா அத்தா’தி யோ வதே³ய்ய. இதி மனோ அனத்தா, த⁴ம்மா அனத்தா.

‘‘‘மனோவிஞ்ஞாணம் அத்தா’தி யோ வதே³ய்ய தம் ந உபபஜ்ஜதி. மனோவிஞ்ஞாணஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘மனோவிஞ்ஞாணம் அத்தா’தி யோ வதே³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணம் அனத்தா.

‘‘‘மனோஸம்ப²ஸ்ஸோ அத்தா’தி யோ வதே³ய்ய தம் ந உபபஜ்ஜதி. மனோஸம்ப²ஸ்ஸஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘மனோஸம்ப²ஸ்ஸோ அத்தா’தி யோ வதே³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணம் அனத்தா, மனோஸம்ப²ஸ்ஸோ அனத்தா.

‘‘‘வேத³னா அத்தா’தி யோ வதே³ய்ய தம் ந உபபஜ்ஜதி. வேத³னாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘வேத³னா அத்தா’தி யோ வதே³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணம் அனத்தா, மனோஸம்ப²ஸ்ஸோ அனத்தா, வேத³னா அனத்தா.

‘‘‘தண்ஹா அத்தா’தி யோ வதே³ய்ய தம் ந உபபஜ்ஜதி. தண்ஹாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தம் ஹோதி. தஸ்மா தம் ந உபபஜ்ஜதி – ‘தண்ஹா அத்தா’தி யோ வதே³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணம் அனத்தா, மனோஸம்ப²ஸ்ஸோ அனத்தா, வேத³னா அனத்தா, தண்ஹா அனத்தா.

424. ‘‘அயம் கோ² பன, பி⁴க்க²வே, ஸக்காயஸமுத³யகா³மினீ படிபதா³ – சக்கு²ம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; ரூபே ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; சக்கு²விஞ்ஞாணம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; சக்கு²ஸம்ப²ஸ்ஸம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; வேத³னம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; தண்ஹம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; ஸோதம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே… கா⁴னம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே… ஜிவ்ஹம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே… காயம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே… மனம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, த⁴ம்மே ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, மனோவிஞ்ஞாணம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, மனோஸம்ப²ஸ்ஸம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, வேத³னம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, தண்ஹம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி.

‘‘அயம் கோ² பன, பி⁴க்க²வே, ஸக்காயனிரோத⁴கா³மினீ படிபதா³ – சக்கு²ம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. ரூபே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. சக்கு²விஞ்ஞாணம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. சக்கு²ஸம்ப²ஸ்ஸம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. வேத³னம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. தண்ஹம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. ஸோதம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி…பே… கா⁴னம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி… ஜிவ்ஹம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி… காயம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி… மனம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. மனோவிஞ்ஞாணம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. மனோஸம்ப²ஸ்ஸம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. வேத³னம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. தண்ஹம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி.

425. ‘‘சக்கு²ஞ்ச, பி⁴க்க²வே, படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா. ஸோ ஸுகா²ய வேத³னாய பு²ட்டோ² ஸமானோ அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ ராகா³னுஸயோ அனுஸேதி. து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதி. தஸ்ஸ படிகா⁴னுஸயோ அனுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. தஸ்ஸ அவிஜ்ஜானுஸயோ அனுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயம் அப்பஹாய து³க்கா²ய வேத³னாய படிகா⁴னுஸயம் அப்படிவினோதே³த்வா அது³க்க²மஸுகா²ய வேத³னாய அவிஜ்ஜானுஸயம் அஸமூஹனித்வா அவிஜ்ஜம் அப்பஹாய விஜ்ஜம் அனுப்பாதே³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – நேதம் டா²னம் விஜ்ஜதி.

‘‘ஸோதஞ்ச, பி⁴க்க²வே, படிச்ச ஸத்³தே³ ச உப்பஜ்ஜதி ஸோதவிஞ்ஞாணம்…பே… கா⁴னஞ்ச, பி⁴க்க²வே, படிச்ச க³ந்தே⁴ ச உப்பஜ்ஜதி கா⁴னவிஞ்ஞாணம்…பே… ஜிவ்ஹஞ்ச, பி⁴க்க²வே, படிச்ச ரஸே ச உப்பஜ்ஜதி ஜிவ்ஹாவிஞ்ஞாணம்…பே… காயஞ்ச, பி⁴க்க²வே, படிச்ச போ²ட்ட²ப்³பே³ ச உப்பஜ்ஜதி காயவிஞ்ஞாணம்…பே… மனஞ்ச, பி⁴க்க²வே, படிச்ச த⁴ம்மே ச உப்பஜ்ஜதி மனோவிஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா. ஸோ ஸுகா²ய வேத³னாய பு²ட்டோ² ஸமானோ அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ ராகா³னுஸயோ அனுஸேதி. து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதி. தஸ்ஸ படிகா⁴னுஸயோ அனுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. தஸ்ஸ அவிஜ்ஜானுஸயோ அனுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயம் அப்பஹாய து³க்கா²ய வேத³னாய படிகா⁴னுஸயம் அப்படிவினோதே³த்வா அது³க்க²மஸுகா²ய வேத³னாய அவிஜ்ஜானுஸயம் அஸமூஹனித்வா அவிஜ்ஜம் அப்பஹாய விஜ்ஜம் அனுப்பாதே³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – நேதம் டா²னம் விஜ்ஜதி.

426. ‘‘சக்கு²ஞ்ச, பி⁴க்க²வே, படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா. ஸோ ஸுகா²ய வேத³னாய பு²ட்டோ² ஸமானோ நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ ராகா³னுஸயோ நானுஸேதி. து³க்கா²ய வேத³னாய பு²ட்டோ² ஸமானோ ந ஸோசதி ந கிலமதி பரிதே³வதி ந உரத்தாளிம் கந்த³தி ந ஸம்மோஹம் ஆபஜ்ஜதி. தஸ்ஸ படிகா⁴னுஸயோ நானுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. தஸ்ஸ அவிஜ்ஜானுஸயோ நானுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயம் பஹாய து³க்கா²ய வேத³னாய படிகா⁴னுஸயம் படிவினோதே³த்வா அது³க்க²மஸுகா²ய வேத³னாய அவிஜ்ஜானுஸயம் ஸமூஹனித்வா அவிஜ்ஜம் பஹாய விஜ்ஜம் உப்பாதே³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – டா²னமேதம் விஜ்ஜதி.

‘‘ஸோதஞ்ச, பி⁴க்க²வே, படிச்ச ஸத்³தே³ ச உப்பஜ்ஜதி ஸோதவிஞ்ஞாணம்…பே….

‘‘கா⁴னஞ்ச, பி⁴க்க²வே, படிச்ச க³ந்தே⁴ ச உப்பஜ்ஜதி கா⁴னவிஞ்ஞாணம்…பே….

‘‘ஜிவ்ஹஞ்ச, பி⁴க்க²வே, படிச்ச ரஸே ச உப்பஜ்ஜதி ஜிவ்ஹாவிஞ்ஞாணம்…பே….

‘‘காயஞ்ச, பி⁴க்க²வே, படிச்ச போ²ட்ட²ப்³பே³ ச உப்பஜ்ஜதி காயவிஞ்ஞாணம்…பே….

‘‘மனஞ்ச, பி⁴க்க²வே, படிச்ச த⁴ம்மே ச உப்பஜ்ஜதி மனோவிஞ்ஞாணம் திண்ணம் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா. ஸோ ஸுகா²ய வேத³னாய பு²ட்டோ² ஸமானோ நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ ராகா³னுஸயோ நானுஸேதி. து³க்கா²ய வேத³னாய பு²ட்டோ² ஸமானோ ந ஸோசதி ந கிலமதி ந பரிதே³வதி ந உரத்தாளிம் கந்த³தி ந ஸம்மோஹம் ஆபஜ்ஜதி. தஸ்ஸ படிகா⁴னுஸயோ நானுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. தஸ்ஸ அவிஜ்ஜானுஸயோ நானுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயம் பஹாய து³க்கா²ய வேத³னாய படிகா⁴னுஸயம் படிவினோதே³த்வா அது³க்க²மஸுகா²ய வேத³னாய அவிஜ்ஜானுஸயம் ஸமூஹனித்வா அவிஜ்ஜம் பஹாய விஜ்ஜம் உப்பாதே³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – டா²னமேதம் விஜ்ஜதி.

427. ‘‘ஏவம் பஸ்ஸம், பி⁴க்க²வே, ஸுதவா அரியஸாவகோ சக்கு²ஸ்மிம் [சக்கு²ஸ்மிம்பி (ஸ்யா. கம்.) ஏவமிதரேஸுபி] நிப்³பி³ந்த³தி, ரூபேஸு நிப்³பி³ந்த³தி, சக்கு²விஞ்ஞாணே நிப்³பி³ந்த³தி, சக்கு²ஸம்ப²ஸ்ஸே நிப்³பி³ந்த³தி, வேத³னாய நிப்³பி³ந்த³தி, தண்ஹாய நிப்³பி³ந்த³தி. ஸோதஸ்மிம் நிப்³பி³ந்த³தி, ஸத்³தே³ஸு நிப்³பி³ந்த³தி…பே… கா⁴னஸ்மிம் நிப்³பி³ந்த³தி, க³ந்தே⁴ஸு நிப்³பி³ந்த³தி… ஜிவ்ஹாய நிப்³பி³ந்த³தி, ரஸேஸு நிப்³பி³ந்த³தி… காயஸ்மிம் நிப்³பி³ந்த³தி, போ²ட்ட²ப்³பே³ஸு நிப்³பி³ந்த³தி… மனஸ்மிம் நிப்³பி³ந்த³தி, த⁴ம்மேஸு நிப்³பி³ந்த³தி, மனோவிஞ்ஞாணே நிப்³பி³ந்த³தி, மனோஸம்ப²ஸ்ஸே நிப்³பி³ந்த³தி, வேத³னாய நிப்³பி³ந்த³தி, தண்ஹாய நிப்³பி³ந்த³தி. நிப்³பி³ந்த³ம் விரஜ்ஜதி, விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி.

இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி. இமஸ்மிம் கோ² பன வேய்யாகரணஸ்மிம் ப⁴ஞ்ஞமானே ஸட்டி²மத்தானம் பி⁴க்கூ²னம் அனுபாதா³ய ஆஸவேஹி சித்தானி விமுச்சிம்ஸூதி.

ச²ச²க்கஸுத்தம் நிட்டி²தம் ச²ட்ட²ம்.