2. ச²ன்னோவாத³ஸுத்தம்

389. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா ச ஸாரிபுத்தோ ஆயஸ்மா ச மஹாசுந்தோ³ ஆயஸ்மா ச ச²ன்னோ கி³ஜ்ஜ²கூடே பப்³ப³தே விஹரந்தி. தேன கோ² பன ஸமயேன ஆயஸ்மா ச²ன்னோ ஆபா³தி⁴கோ ஹோதி து³க்கி²தோ பா³ள்ஹகி³லானோ. அத² கோ² ஆயஸ்மா ஸாரிபுத்தோ ஸாயன்ஹஸமயம் படிஸல்லானா வுட்டி²தோ யேனாயஸ்மா மஹாசுந்தோ³ தேனுபஸங்கமி; உபஸங்கமித்வா ஆயஸ்மந்தம் மஹாசுந்த³ம் ஏதத³வோச – ‘‘ஆயாமாவுஸோ சுந்த³, யேனாயஸ்மா ச²ன்னோ தேனுபஸங்கமிஸ்ஸாம கி³லானபுச்ச²கா’’தி. ‘‘ஏவமாவுஸோ’’தி கோ² ஆயஸ்மா மஹாசுந்தோ³ ஆயஸ்மதோ ஸாரிபுத்தஸ்ஸ பச்சஸ்ஸோஸி.

அத² கோ² ஆயஸ்மா ச ஸாரிபுத்தோ ஆயஸ்மா ச மஹாசுந்தோ³ யேனாயஸ்மா ச²ன்னோ தேனுபஸங்கமிம்ஸு; உபஸங்கமித்வா ஆயஸ்மதா ச²ன்னேன ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் ச²ன்னம் ஏதத³வோச – ‘‘கச்சி தே, ஆவுஸோ ச²ன்ன, க²மனீயம், கச்சி யாபனீயம்? கச்சி தே து³க்கா² வேத³னா படிக்கமந்தி, நோ அபி⁴க்கமந்தி; படிக்கமோஸானம் பஞ்ஞாயதி, நோ அபி⁴க்கமோ’’தி?

‘‘ந மே, ஆவுஸோ ஸாரிபுத்த, க²மனீயம் ந யாபனீயம். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானம் பஞ்ஞாயதி, நோ படிக்கமோ. ஸேய்யதா²பி, ஆவுஸோ ஸாரிபுத்த, ப³லவா புரிஸோ திண்ஹேன ஸிக²ரேன முத்³த⁴னி அபி⁴மத்தே²ய்ய; ஏவமேவ கோ² மே, ஆவுஸோ ஸாரிபுத்த, அதி⁴மத்தா வாதா முத்³த⁴னி ஊஹனந்தி. ந மே, ஆவுஸோ ஸாரிபுத்த, க²மனீயம் ந யாபனீயம். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானம் பஞ்ஞாயதி நோ படிக்கமோ. ஸேய்யதா²பி, ஆவுஸோ ஸாரிபுத்த, ப³லவா புரிஸோ த³ள்ஹேன வரத்தக்க²ண்டே³ன ஸீஸே ஸீஸவேட²ம் த³தே³ய்ய; ஏவமேவ கோ² மே, ஆவுஸோ ஸாரிபுத்த, அதி⁴மத்தா ஸீஸே ஸீஸவேத³னா. ந மே, ஆவுஸோ ஸாரிபுத்த, க²மனீயம் ந யாபனீயம். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானம் பஞ்ஞாயதி, நோ படிக்கமோ. ஸேய்யதா²பி, ஆவுஸோ ஸாரிபுத்த, த³க்கோ² கோ³கா⁴தகோ வா கோ³கா⁴தகந்தேவாஸீ வா திண்ஹேன கோ³விகந்தனேன குச்சி²ம் பரிகந்தேய்ய; ஏவமேவ கோ² மே, ஆவுஸோ ஸாரிபுத்த, அதி⁴மத்தா வாதா குச்சி²ம் பரிகந்தந்தி. ந மே, ஆவுஸோ ஸாரிபுத்த, க²மனீயம் ந யாபனீயம். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானம் பஞ்ஞாயதி, நோ படிக்கமோ. ஸேய்யதா²பி, ஆவுஸோ ஸாரிபுத்த, த்³வே ப³லவந்தோ புரிஸா து³ப்³ப³லதரம் புரிஸம் நானாபா³ஹாஸு க³ஹேத்வா அங்கா³ரகாஸுயா ஸந்தாபேய்யும் ஸம்பரிதாபேய்யும்; ஏவமேவ கோ² மே, ஆவுஸோ ஸாரிபுத்த, அதி⁴மத்தோ காயஸ்மிம் டா³ஹோ. ந மே, ஆவுஸோ ஸாரிபுத்த, க²மனீயம் ந யாபனீயம். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானம் பஞ்ஞாயதி, நோ படிக்கமோ. ஸத்த²ம், ஆவுஸோ ஸாரிபுத்த, ஆஹரிஸ்ஸாமி, நாவகங்கா²மி ஜீவித’’ந்தி.

390. ‘‘மாயஸ்மா ச²ன்னோ ஸத்த²ம் ஆஹரேஸி. யாபேதாயஸ்மா ச²ன்னோ. யாபேந்தம் மயம் ஆயஸ்மந்தம் ச²ன்னம் இச்சா²ம. ஸசே ஆயஸ்மதோ ச²ன்னஸ்ஸ நத்தி² ஸப்பாயானி போ⁴ஜனானி, அஹம் ஆயஸ்மதோ ச²ன்னஸ்ஸ ஸப்பாயானி போ⁴ஜனானி பரியேஸிஸ்ஸாமி. ஸசே ஆயஸ்மதோ ச²ன்னஸ்ஸ நத்தி² ஸப்பாயானி பே⁴ஸஜ்ஜானி, அஹம் ஆயஸ்மதோ ச²ன்னஸ்ஸ ஸப்பாயானி பே⁴ஸஜ்ஜானி பரியேஸிஸ்ஸாமி. ஸசே ஆயஸ்மதோ ச²ன்னஸ்ஸ நத்தி² பதிரூபா உபட்டா²கா, அஹம் ஆயஸ்மந்தம் ச²ன்னம் உபட்ட²ஹிஸ்ஸாமி. மாயஸ்மா ச²ன்னோ ஸத்த²ம் ஆஹரேஸி. யாபேதாயஸ்மா ச²ன்னோ. யாபேந்தம் மயம் ஆயஸ்மந்தம் ச²ன்னம் இச்சா²மா’’தி.

‘‘நபி மே, ஆவுஸோ ஸாரிபுத்த, நத்தி² ஸப்பாயானி போ⁴ஜனானி; நபி மே நத்தி² ஸப்பாயானி பே⁴ஸஜ்ஜானி; நபி மே நத்தி² பதிரூபா உபட்டா²கா; அபி சாவுஸோ ஸாரிபுத்த, பரிசிண்ணோ மே ஸத்தா² தீ³க⁴ரத்தம் மனாபேனேவ நோ அமனாபேன. ஏதஞ்ஹி, ஆவுஸோ ஸாரிபுத்த, ஸாவகஸ்ஸ பதிரூபம் யம் ஸத்தா²ரம் பரிசரேய்ய மனாபேனேவ நோ அமனாபேன. ‘அனுபவஜ்ஜம் ச²ன்னோ பி⁴க்கு² ஸத்த²ம் ஆஹரிஸ்ஸதீ’தி ஏவமேதம் [ஏவமேவ கோ² த்வம் (க.)], ஆவுஸோ ஸாரிபுத்த, தா⁴ரேஹீ’’தி. ‘‘புச்சே²ய்யாம மயம் ஆயஸ்மந்தம் ச²ன்னம் கஞ்சிதே³வ தே³ஸம், ஸசே ஆயஸ்மா ச²ன்னோ ஓகாஸம் கரோதி பஞ்ஹஸ்ஸ வேய்யாகரணாயா’’தி. ‘‘புச்சா²வுஸோ ஸாரிபுத்த, ஸுத்வா வேதி³ஸ்ஸாமீ’’தி.

391. ‘‘சக்கு²ம், ஆவுஸோ ச²ன்ன, சக்கு²விஞ்ஞாணம் சக்கு²விஞ்ஞாணவிஞ்ஞாதப்³பே³ த⁴ம்மே ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸி? ஸோதம், ஆவுஸோ ச²ன்ன, ஸோதவிஞ்ஞாணம்…பே… கா⁴னம், ஆவுஸோ ச²ன்ன, கா⁴னவிஞ்ஞாணம்… ஜிவ்ஹம், ஆவுஸோ ச²ன்ன, ஜிவ்ஹாவிஞ்ஞாணம் … காயம், ஆவுஸோ ச²ன்ன, காயவிஞ்ஞாணம்… மனம், ஆவுஸோ ச²ன்ன, மனோவிஞ்ஞாணம் மனோவிஞ்ஞாணவிஞ்ஞாதப்³பே³ த⁴ம்மே ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸீ’’தி?

‘‘சக்கு²ம், ஆவுஸோ ஸாரிபுத்த, சக்கு²விஞ்ஞாணம் சக்கு²விஞ்ஞாணவிஞ்ஞாதப்³பே³ த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமி. ஸோதம், ஆவுஸோ ஸாரிபுத்த…பே… கா⁴னம், ஆவுஸோ ஸாரிபுத்த… ஜிவ்ஹம், ஆவுஸோ ஸாரிபுத்த… காயம், ஆவுஸோ ஸாரிபுத்த… மனம், ஆவுஸோ ஸாரிபுத்த, மனோவிஞ்ஞாணம் மனோவிஞ்ஞாணவிஞ்ஞாதப்³பே³ த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமீ’’தி.

392. ‘‘சக்கு²ஸ்மிம், ஆவுஸோ ச²ன்ன, சக்கு²விஞ்ஞாணே சக்கு²விஞ்ஞாணவிஞ்ஞாதப்³பே³ஸு த⁴ம்மேஸு கிம் தி³ஸ்வா கிம் அபி⁴ஞ்ஞாய சக்கு²ம் சக்கு²விஞ்ஞாணம் சக்கு²விஞ்ஞாணவிஞ்ஞாதப்³பே³ த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸி? ஸோதஸ்மிம், ஆவுஸோ ச²ன்ன, ஸோதவிஞ்ஞாணே … கா⁴னஸ்மிம், ஆவுஸோ ச²ன்ன, கா⁴னவிஞ்ஞாணே… ஜிவ்ஹாய, ஆவுஸோ ச²ன்ன, ஜிவ்ஹாவிஞ்ஞாணே… காயஸ்மிம், ஆவுஸோ ச²ன்ன, காயவிஞ்ஞாணே… மனஸ்மிம், ஆவுஸோ ச²ன்ன, மனோவிஞ்ஞாணே மனோவிஞ்ஞாணவிஞ்ஞாதப்³பே³ஸு த⁴ம்மேஸு கிம் தி³ஸ்வா கிம் அபி⁴ஞ்ஞாய மனம் மனோவிஞ்ஞாணம் மனோவிஞ்ஞாணவிஞ்ஞாதப்³பே³ த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸீ’’தி?

‘‘சக்கு²ஸ்மிம், ஆவுஸோ ஸாரிபுத்த, சக்கு²விஞ்ஞாணே சக்கு²விஞ்ஞாணவிஞ்ஞாதப்³பே³ஸு த⁴ம்மேஸு நிரோத⁴ம் தி³ஸ்வா நிரோத⁴ம் அபி⁴ஞ்ஞாய சக்கு²ம் சக்கு²விஞ்ஞாணம் சக்கு²விஞ்ஞாணவிஞ்ஞாதப்³பே³ த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமி. ஸோதஸ்மிம், ஆவுஸோ ஸாரிபுத்த, ஸோதவிஞ்ஞாணே… கா⁴னஸ்மிம், ஆவுஸோ ஸாரிபுத்த, கா⁴னவிஞ்ஞாணே… ஜிவ்ஹாய, ஆவுஸோ ஸாரிபுத்த, ஜிவ்ஹாவிஞ்ஞாணே… காயஸ்மிம், ஆவுஸோ ஸாரிபுத்த, காயவிஞ்ஞாணே… மனஸ்மிம், ஆவுஸோ ஸாரிபுத்த, மனோவிஞ்ஞாணே மனோவிஞ்ஞாணவிஞ்ஞாதப்³பே³ஸு த⁴ம்மேஸு நிரோத⁴ம் தி³ஸ்வா நிரோத⁴ம் அபி⁴ஞ்ஞா மனம் மனோவிஞ்ஞாணம் மனோவிஞ்ஞாணவிஞ்ஞாதப்³பே³ த⁴ம்மே ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமீ’’தி.

393. ஏவம் வுத்தே, ஆயஸ்மா மஹாசுந்தோ³ ஆயஸ்மந்தம் ச²ன்னம் ஏதத³வோச – ‘‘தஸ்மாதிஹ, ஆவுஸோ ச²ன்ன, இத³ம்பி தஸ்ஸ ப⁴க³வதோ ஸாஸனம் [வசனம் (ஸீ.)], நிச்சகப்பம் மனஸி காதப்³ப³ம் – ‘நிஸ்ஸிதஸ்ஸ சலிதம், அனிஸ்ஸிதஸ்ஸ சலிதம் நத்தி². சலிதே அஸதி பஸ்ஸத்³தி⁴, பஸ்ஸத்³தி⁴யா ஸதி நதி ந ஹோதி. நதியா அஸதி ஆக³திக³தி ந ஹோதி. ஆக³திக³தியா அஸதி சுதூபபாதோ ந ஹோதி. சுதூபபாதே அஸதி நேவித⁴ ந ஹுரம் ந உப⁴யமந்தரேன. ஏஸேவந்தோ து³க்க²ஸ்ஸா’’’தி. அத² கோ² ஆயஸ்மா ச ஸாரிபுத்தோ ஆயஸ்மா ச மஹாசுந்தோ³ ஆயஸ்மந்தம் ச²ன்னம் இமினா ஓவாதே³ன ஓவதி³த்வா உட்டா²யாஸனா பக்கமிம்ஸு.

394. அத² கோ² ஆயஸ்மா ச²ன்னோ அசிரபக்கந்தே ஆயஸ்மந்தே ச ஸாரிபுத்தே ஆயஸ்மந்தே ச மஹாசுந்தே³ ஸத்த²ம் ஆஹரேஸி. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘ஆயஸ்மதா, ப⁴ந்தே, ச²ன்னேன ஸத்த²ம் ஆஹரிதம். தஸ்ஸ கா க³தி, கோ அபி⁴ஸம்பராயோ’’தி? ‘‘நனு தே, ஸாரிபுத்த, ச²ன்னேன பி⁴க்கு²னா ஸம்முகா²யேவ அனுபவஜ்ஜதா ப்³யாகதா’’தி? ‘‘அத்தி², ப⁴ந்தே, புப்³ப³ஜிரம் [பப்பஜிதஞ்ஹிதம் (க.), உபவஜ்ஜிதம் (க.), புப்³ப³விஜ்ஜனம், புப்³ப³விஜ்ஜ²னம், புப்³ப³விசிரம் (ஸம்யுத்தகே)] நாம வஜ்ஜிகா³மோ. தத்தா²யஸ்மதோ ச²ன்னஸ்ஸ மித்தகுலானி ஸுஹஜ்ஜகுலானி உபவஜ்ஜகுலானீ’’தி. ‘‘ஹோந்தி [போஸந்தி (க.)] ஹேதே, ஸாரிபுத்த, ச²ன்னஸ்ஸ பி⁴க்கு²னோ மித்தகுலானி ஸுஹஜ்ஜகுலானி உபவஜ்ஜகுலானி. நாஹம், ஸாரிபுத்த, ஏத்தாவதா ‘ஸஉபவஜ்ஜோ’தி வதா³மி. யோ கோ², ஸாரிபுத்த, இமஞ்ச காயம் நிக்கி²பதி அஞ்ஞஞ்ச காயம் உபாதி³யதி தமஹம் ‘ஸஉபவஜ்ஜோ’தி வதா³மி. தம் ச²ன்னஸ்ஸ பி⁴க்கு²னோ நத்தி². ‘அனுபவஜ்ஜோ ச²ன்னோ பி⁴க்கு² ஸத்த²ம் ஆஹரேஸீ’தி ஏவமேதம், ஸாரிபுத்த, தா⁴ரேஹீ’’தி.

இத³மவோச ப⁴க³வா. அத்தமனோ ஆயஸ்மா ஸாரிபுத்தோ ப⁴க³வதோ பா⁴ஸிதம் அபி⁴னந்தீ³தி.

ச²ன்னோவாத³ஸுத்தம் நிட்டி²தம் து³தியம்.