4. பா³குலஸுத்தம்

209. ஏவம் மே ஸுதம் – ஏகம் ஸமயம் ஆயஸ்மா பா³குலோ [ப³க்குலோ (ஸீ. ஸ்யா. கம். பீ.)] ராஜக³ஹே விஹரதி வேளுவனே கலந்த³கனிவாபே. அத² கோ² அசேலகஸ்ஸபோ ஆயஸ்மதோ பா³குலஸ்ஸ புராணகி³ஹிஸஹாயோ யேனாயஸ்மா பா³குலோ தேனுபஸங்கமி; உபஸங்கமித்வா ஆயஸ்மதா பா³குலேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² அசேலகஸ்ஸபோ ஆயஸ்மந்தம் பா³குலம் ஏதத³வோச –

‘‘கீவசிரம் பப்³ப³ஜிதோஸி, ஆவுஸோ பா³குலா’’தி? ‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸா’’தி. ‘‘இமேஹி பன தே, ஆவுஸோ பா³குல, அஸீதியா வஸ்ஸேஹி கதிக்க²த்தும் மேது²னோ த⁴ம்மோ படிஸேவிதோ’’தி? ‘‘ந கோ² மம், ஆவுஸோ கஸ்ஸப, ஏவம் புச்சி²தப்³ப³ம் – ‘இமேஹி பன தே, ஆவுஸோ பா³குல, அஸீதியா வஸ்ஸேஹி கதிக்க²த்தும் மேது²னோ த⁴ம்மோ படிஸேவிதோ’தி. ஏவஞ்ச கோ² மம், ஆவுஸோ கஸ்ஸப, புச்சி²தப்³ப³ம் – ‘இமேஹி பன தே, ஆவுஸோ பா³குல, அஸீதியா வஸ்ஸேஹி கதிக்க²த்தும் காமஸஞ்ஞா உப்பன்னபுப்³பா³’’’தி? ( ) [(இமேஹி பன தே ஆவுஸோ ப³க்குல அஸீதியோ வஸ்ஸேஹி கதிக்க²த்தும் காமஸஞ்ஞா உப்பன்னபுப்³பா³தி.) (ஸீ. பீ.)]

210. ‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி காமஸஞ்ஞம் உப்பன்னபுப்³ப³ம். யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி காமஸஞ்ஞம் உப்பன்னபுப்³ப³ம் இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி ப்³யாபாத³ஸஞ்ஞம்…பே… விஹிம்ஸாஸஞ்ஞம் உப்பன்னபுப்³ப³ம். யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி விஹிம்ஸாஸஞ்ஞம் உப்பன்னபுப்³ப³ம், இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி காமவிதக்கம் உப்பன்னபுப்³ப³ம். யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி காமவிதக்கம் உப்பன்னபுப்³ப³ம், இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி ப்³யாபாத³விதக்கம்…பே… விஹிம்ஸாவிதக்கம் உப்பன்னபுப்³ப³ம். யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி விஹிம்ஸாவிதக்கம் உப்பன்னபுப்³ப³ம், இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

211. ‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி க³ஹபதிசீவரம் ஸாதி³தா. யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி க³ஹபதிசீவரம் ஸாதி³தா, இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி ஸத்தே²ன சீவரம் சி²ந்தி³தா. யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி ஸத்தே²ன சீவரம் சி²ந்தி³தா…பே… தா⁴ரேம.

‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி ஸூசியா சீவரம் ஸிப்³பி³தா…பே… நாபி⁴ஜானாமி ரஜனேன சீவரம் ரஜிதா… நாபி⁴ஜானாமி கதி²னே [கடி²னே (ஸீ. ஸ்யா. கம். பீ.)] சீவரம் ஸிப்³பி³தா… நாபி⁴ஜானாமி ஸப்³ரஹ்மசாரீனம் சீவரகம்மே விசாரிதா [ஸப்³ரஹ்மசாரீ சீவரகம்மே ப்³யாபாரிதா (ஸீ. பீ.)] … நாபி⁴ஜானாமி நிமந்தனம் ஸாதி³தா… நாபி⁴ஜானாமி ஏவரூபம் சித்தம் உப்பன்னபுப்³ப³ம் – ‘அஹோ வத மம் கோசி நிமந்தேய்யா’தி… நாபி⁴ஜானாமி அந்தரக⁴ரே நிஸீதி³தா… நாபி⁴ஜானாமி அந்தரக⁴ரே பு⁴ஞ்ஜிதா… நாபி⁴ஜானாமி மாதுகா³மஸ்ஸ அனுப்³யஞ்ஜனஸோ நிமித்தம் க³ஹேதா… நாபி⁴ஜானாமி மாதுகா³மஸ்ஸ த⁴ம்மம் தே³ஸிதா அந்தமஸோ சதுப்பத³ம்பி கா³த²ம்… நாபி⁴ஜானாமி பி⁴க்கு²னுபஸ்ஸயம் உபஸங்கமிதா… நாபி⁴ஜானாமி பி⁴க்கு²னியா த⁴ம்மம் தே³ஸிதா… நாபி⁴ஜானாமி ஸிக்க²மானாய த⁴ம்மம் தே³ஸிதா… நாபி⁴ஜானாமி ஸாமணேரியா த⁴ம்மம் தே³ஸிதா… நாபி⁴ஜானாமி பப்³பா³ஜேதா… நாபி⁴ஜானாமி உபஸம்பாதே³தா… நாபி⁴ஜானாமி நிஸ்ஸயம் தா³தா… நாபி⁴ஜானாமி ஸாமணேரம் உபட்டா²பேதா… நாபி⁴ஜானாமி ஜந்தாக⁴ரே ந்ஹாயிதா… நாபி⁴ஜானாமி சுண்ணேன ந்ஹாயிதா… நாபி⁴ஜானாமி ஸப்³ரஹ்மசாரீக³த்தபரிகம்மே விசாரிதா [ப்³யாபாரிதா (ஸீ. பீ.)] … நாபி⁴ஜானாமி ஆபா³த⁴ம் உப்பன்னபுப்³ப³ம், அந்தமஸோ க³த்³தூ³ஹனமத்தம்பி… நாபி⁴ஜானாமி பே⁴ஸஜ்ஜம் உபஹரிதா, அந்தமஸோ ஹரிதகிக²ண்ட³ம்பி… நாபி⁴ஜானாமி அபஸ்ஸேனகம் அபஸ்ஸயிதா… நாபி⁴ஜானாமி ஸேய்யம் கப்பேதா. யம்பாயஸ்மா…பே… தா⁴ரேம.

‘‘அஸீதி மே, ஆவுஸோ, வஸ்ஸானி பப்³ப³ஜிதஸ்ஸ நாபி⁴ஜானாமி கா³மந்தஸேனாஸனே வஸ்ஸம் உபக³ந்தா. யம்பாயஸ்மா பா³குலோ அஸீதியா வஸ்ஸேஹி நாபி⁴ஜானாதி கா³மந்தஸேனாஸனே வஸ்ஸம் உபக³ந்தா, இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

‘‘ஸத்தாஹமேவ கோ² அஹம், ஆவுஸோ, ஸரணோ ரட்ட²பிண்ட³ம் பு⁴ஞ்ஜிம்; அத² அட்ட²மியம் அஞ்ஞா உத³பாதி³. யம்பாயஸ்மா பா³குலோ ஸத்தாஹமேவ ஸரணோ ரட்ட²பிண்ட³ம் பு⁴ஞ்ஜி; அத² அட்ட²மியம் அஞ்ஞா உத³பாதி³ இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம.

212. ‘‘லபே⁴ய்யாஹம், ஆவுஸோ பா³குல, இமஸ்மிம் த⁴ம்மவினயே பப்³ப³ஜ்ஜம், லபே⁴ய்யம் உபஸம்பத³’’ந்தி. அலத்த² கோ² அசேலகஸ்ஸபோ இமஸ்மிம் த⁴ம்மவினயே பப்³ப³ஜ்ஜம், அலத்த² உபஸம்பத³ம். அசிரூபஸம்பன்னோ பனாயஸ்மா கஸ்ஸபோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி அப்³ப⁴ஞ்ஞாஸி. அஞ்ஞதரோ கோ² பனாயஸ்மா கஸ்ஸபோ அரஹதம் அஹோஸி.

அத² கோ² ஆயஸ்மா பா³குலோ அபரேன ஸமயேன அவாபுரணம் [அபாபுரணம் (ஸீ. ஸ்யா. கம். பீ.)] ஆதா³ய விஹாரேன விஹாரம் உபஸங்கமித்வா ஏவமாஹ – ‘‘அபி⁴க்கமதா²யஸ்மந்தோ, அபி⁴க்கமதா²யஸ்மந்தோ. அஜ்ஜ மே பரினிப்³பா³னம் ப⁴விஸ்ஸதீ’’தி. ‘‘யம்பாயஸ்மா பா³குலோ அவாபுரணம் ஆதா³ய விஹாரேன விஹாரம் உபஸங்கமித்வா ஏவமாஹ – ‘அபி⁴க்கமதா²யஸ்மந்தோ, அபி⁴க்கமதா²யஸ்மந்தோ; அஜ்ஜ மே பரினிப்³பா³னம் ப⁴விஸ்ஸதீ’தி, இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேம’’.

ஆயஸ்மா பா³குலோ மஜ்ஜே² பி⁴க்கு²ஸங்க⁴ஸ்ஸ நிஸின்னகோவ பரினிப்³பா³யி. ‘‘யம்பாயஸ்மா பா³குலோ மஜ்ஜே² பி⁴க்கு²ஸங்க⁴ஸ்ஸ நிஸின்னகோவ பரினிப்³பா³யி, இத³ம்பி மயம் ஆயஸ்மதோ பா³குலஸ்ஸ அச்ச²ரியம் அப்³பு⁴தத⁴ம்மம் தா⁴ரேமா’’தி.

பா³குலஸுத்தம் நிட்டி²தம் சதுத்த²ம்.