6. ஆனேஞ்ஜஸப்பாயஸுத்தம்

66. ஏவம் மே ஸுதம் – ஏகம் ஸமயம் ப⁴க³வா குரூஸு விஹரதி கம்மாஸத⁴ம்மம் நாம குரூனம் நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச – ‘‘அனிச்சா, பி⁴க்க²வே, காமா துச்சா² முஸா மோஸத⁴ம்மா. மாயாகதமே தம், பி⁴க்க²வே, பா³லலாபனம். யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா – உப⁴யமேதம் மாரதே⁴ய்யம், மாரஸ்ஸேஸ [மாரஸ்ஸேவ (க.)] விஸயோ, மாரஸ்ஸேஸ நிவாபோ, மாரஸ்ஸேஸ கோ³சரோ. ஏத்தே²தே பாபகா அகுஸலா மானஸா அபி⁴ஜ்ஜா²பி ப்³யாபாதா³பி ஸாரம்பா⁴பி ஸம்வத்தந்தி. தேவ அரியஸாவகஸ்ஸ இத⁴மனுஸிக்க²தோ அந்தராயாய ஸம்ப⁴வந்தி. தத்ர, பி⁴க்க²வே, அரியஸாவகோ இதி படிஸஞ்சிக்க²தி – ‘யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா – உப⁴யமேதம் மாரதே⁴ய்யம், மாரஸ்ஸேஸ விஸயோ, மாரஸ்ஸேஸ நிவாபோ, மாரஸ்ஸேஸ கோ³சரோ. ஏத்தே²தே பாபகா அகுஸலா மானஸா அபி⁴ஜ்ஜா²பி ப்³யாபாதா³பி ஸாரம்பா⁴பி ஸம்வத்தந்தி, தேவ அரியஸாவகஸ்ஸ இத⁴மனுஸிக்க²தோ அந்தராயாய ஸம்ப⁴வந்தி. யம்னூனாஹம் விபுலேன மஹக்³க³தேன சேதஸா விஹரேய்யம் அபி⁴பு⁴ய்ய லோகம் அதி⁴ட்டா²ய மனஸா. விபுலேன ஹி மே மஹக்³க³தேன சேதஸா விஹரதோ அபி⁴பு⁴ய்ய லோகம் அதி⁴ட்டா²ய மனஸா யே பாபகா அகுஸலா மானஸா அபி⁴ஜ்ஜா²பி ப்³யாபாதா³பி ஸாரம்பா⁴பி தே ந ப⁴விஸ்ஸந்தி. தேஸம் பஹானா அபரித்தஞ்ச மே சித்தம் ப⁴விஸ்ஸதி அப்பமாணம் ஸுபா⁴வித’ந்தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா ஆனேஞ்ஜம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ ஆனேஞ்ஜூபக³ம். அயம், பி⁴க்க²வே, பட²மா ஆனேஞ்ஜஸப்பாயா படிபதா³ அக்கா²யதி’’.

67. ‘‘புன சபரம், பி⁴க்க²வே, அரியஸாவகோ இதி படிஸஞ்சிக்க²தி – ‘யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா; யம் கிஞ்சி ரூபம் (ஸப்³ப³ம் ரூபம்) [( ) நத்தி² ஸீ. பீ. போத்த²கேஸு] சத்தாரி ச மஹாபூ⁴தானி, சதுன்னஞ்ச மஹாபூ⁴தானம் உபாதா³யரூப’ந்தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா ஆனேஞ்ஜம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ ஆனேஞ்ஜூபக³ம். அயம், பி⁴க்க²வே, து³தியா ஆனேஞ்ஜஸப்பாயா படிபதா³ அக்கா²யதி.

‘‘புன சபரம், பி⁴க்க²வே, அரியஸாவகோ இதி படிஸஞ்சிக்க²தி – ‘யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா; யே ச தி³ட்ட²த⁴ம்மிகா ரூபா, யே ச ஸம்பராயிகா ரூபா; யா ச தி³ட்ட²த⁴ம்மிகா ரூபஸஞ்ஞா, யா ச ஸம்பராயிகா ரூபஸஞ்ஞா – உப⁴யமேதம் அனிச்சம். யத³னிச்சம் தம் நாலம் அபி⁴னந்தி³தும், நாலம் அபி⁴வதி³தும், நாலம் அஜ்ஜோ²ஸிது’ந்தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா ஆனேஞ்ஜம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ ஆனேஞ்ஜூபக³ம். அயம், பி⁴க்க²வே, ததியா ஆனேஞ்ஜஸப்பாயா படிபதா³ அக்கா²யதி.

68. ‘‘புன சபரம், பி⁴க்க²வே, அரியஸாவகோ இதி படிஸஞ்சிக்க²தி – ‘யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா; யே ச தி³ட்ட²த⁴ம்மிகா ரூபா, யே ச ஸம்பராயிகா ரூபா; யா ச தி³ட்ட²த⁴ம்மிகா ரூபஸஞ்ஞா, யா ச ஸம்பராயிகா ரூபஸஞ்ஞா; யா ச ஆனேஞ்ஜஸஞ்ஞா – ஸப்³பா³ ஸஞ்ஞா. யத்தே²தா அபரிஸேஸா நிருஜ்ஜ²ந்தி ஏதம் ஸந்தம் ஏதம் பணீதம் – யதி³த³ம் ஆகிஞ்சஞ்ஞாயதன’ந்தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா ஆகிஞ்சஞ்ஞாயதனம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ ஆகிஞ்சஞ்ஞாயதனூபக³ம். அயம், பி⁴க்க²வே, பட²மா ஆகிஞ்சஞ்ஞாயதனஸப்பாயா படிபதா³ அக்கா²யதி.

69. ‘‘புன சபரம், பி⁴க்க²வே, அரியஸாவகோ அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘ஸுஞ்ஞமித³ம் அத்தேன வா அத்தனியேன வா’தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா ஆகிஞ்சஞ்ஞாயதனம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ ஆகிஞ்சஞ்ஞாயதனூபக³ம். அயம், பி⁴க்க²வே, து³தியா ஆகிஞ்சஞ்ஞாயதனஸப்பாயா படிபதா³ அக்கா²யதி.

70. ‘‘புன சபரம், பி⁴க்க²வே, அரியஸாவகோ இதி படிஸஞ்சிக்க²தி – ‘நாஹம் க்வசனி [க்வசினி (ஸ்யா. கம். ஸீ. அட்ட².)] கஸ்ஸசி கிஞ்சனதஸ்மிம் [கிஞ்சனதஸ்மி (?)], ந ச மம க்வசனி கிஸ்மிஞ்சி கிஞ்சனம் நத்தீ²’தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா ஆகிஞ்சஞ்ஞாயதனம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ ஆகிஞ்சஞ்ஞாயதனூபக³ம். அயம், பி⁴க்க²வே, ததியா ஆகிஞ்சஞ்ஞாயதனஸப்பாயா படிபதா³ அக்கா²யதி.

‘‘புன சபரம், பி⁴க்க²வே, அரியஸாவகோ இதி படிஸஞ்சிக்க²தி – ‘யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா; யே ச தி³ட்ட²த⁴ம்மிகா ரூபா, யே ச ஸம்பராயிகா ரூபா; யா ச தி³ட்ட²த⁴ம்மிகா ரூபஸஞ்ஞா, யா ச ஸம்பராயிகா ரூபஸஞ்ஞா; யா ச ஆனேஞ்ஜஸஞ்ஞா, யா ச ஆகிஞ்சஞ்ஞாயதனஸஞ்ஞா – ஸப்³பா³ ஸஞ்ஞா. யத்தே²தா அபரிஸேஸா நிருஜ்ஜ²ந்தி ஏதம் ஸந்தம் ஏதம் பணீதம் – யதி³த³ம் நேவஸஞ்ஞானாஸஞ்ஞாயதன’ந்தி. தஸ்ஸ ஏவம்படிபன்னஸ்ஸ தப்³ப³ஹுலவிஹாரினோ ஆயதனே சித்தம் பஸீத³தி. ஸம்பஸாதே³ ஸதி ஏதரஹி வா நேவஸஞ்ஞானாஸஞ்ஞாயதனம் ஸமாபஜ்ஜதி பஞ்ஞாய வா அதி⁴முச்சதி காயஸ்ஸ பே⁴தா³ பரம் மரணா. டா²னமேதம் விஜ்ஜதி யம் தம்ஸம்வத்தனிகம் விஞ்ஞாணம் அஸ்ஸ நேவஸஞ்ஞானாஸஞ்ஞாயதனூபக³ம். அயம், பி⁴க்க²வே, நேவஸஞ்ஞானாஸஞ்ஞாயதனஸப்பாயா படிபதா³ அக்கா²யதீ’’தி.

71. ஏவம் வுத்தே, ஆயஸ்மா ஆனந்தோ³ ப⁴க³வந்தம் ஏதத³வோச – ‘‘இத⁴, ப⁴ந்தே, பி⁴க்கு² ஏவம் படிபன்னோ ஹோதி – ‘நோ சஸ்ஸ, நோ ச மே ஸியா; ந ப⁴விஸ்ஸதி, ந மே ப⁴விஸ்ஸதி; யத³த்தி² யம், பூ⁴தம் – தம் பஜஹாமீ’தி. ஏவம் உபேக்க²ம் படிலப⁴தி. பரினிப்³பா³யேய்ய நு கோ² ஸோ, ப⁴ந்தே, பி⁴க்கு² ந வா பரினிப்³பா³யேய்யா’’தி? ‘‘அபேத்தே²கச்சோ, ஆனந்த³, பி⁴க்கு² பரினிப்³பா³யேய்ய, அபேத்தே²கச்சோ பி⁴க்கு² ந பரினிப்³பா³யேய்யா’’தி. ‘‘கோ நு கோ², ப⁴ந்தே, ஹேது கோ பச்சயோ யேனபேத்தே²கச்சோ பி⁴க்கு² பரினிப்³பா³யேய்ய, அபேத்தே²கச்சோ பி⁴க்கு² ந பரினிப்³பா³யேய்யா’’தி? ‘‘இதா⁴னந்த³, பி⁴க்கு² ஏவம் படிபன்னோ ஹோதி – ‘நோ சஸ்ஸ, நோ ச மே ஸியா; ந ப⁴விஸ்ஸதி, ந மே ப⁴விஸ்ஸதி; யத³த்தி², யம் பூ⁴தம் – தம் பஜஹாமீ’தி. ஏவம் உபேக்க²ம் படிலப⁴தி. ஸோ தம் உபேக்க²ம் அபி⁴னந்த³தி, அபி⁴வத³தி, அஜ்ஜோ²ஸாய திட்ட²தி. தஸ்ஸ தம் உபேக்க²ம் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ தன்னிஸ்ஸிதம் ஹோதி விஞ்ஞாணம் தது³பாதா³னம். ஸஉபாதா³னோ, ஆனந்த³, பி⁴க்கு² ந பரினிப்³பா³யதீ’’தி. ‘‘கஹம் பன ஸோ, ப⁴ந்தே, பி⁴க்கு² உபாதி³யமானோ உபாதி³யதீ’’தி? ‘‘நேவஸஞ்ஞானாஸஞ்ஞாயதனம், ஆனந்தா³’’தி. ‘‘உபாதா³னஸேட்ட²ம் கிர ஸோ, ப⁴ந்தே, பி⁴க்கு² உபாதி³யமானோ உபாதி³யதீ’’தி? ‘‘உபாதா³னஸேட்ட²ஞ்ஹி ஸோ, ஆனந்த³, பி⁴க்கு² உபாதி³யமானோ உபாதி³யதி. உபாதா³னஸேட்ட²ஞ்ஹேதம், ஆனந்த³, யதி³த³ம் – நேவஸஞ்ஞானாஸஞ்ஞாயதனம்’’.

72. ‘‘இதா⁴னந்த³, பி⁴க்கு² ஏவம் படிபன்னோ ஹோதி – ‘நோ சஸ்ஸ, நோ ச மே ஸியா; ந ப⁴விஸ்ஸதி, ந மே ப⁴விஸ்ஸதி; யத³த்தி², யம் பூ⁴தம் – தம் பஜஹாமீ’தி. ஏவம் உபேக்க²ம் படிலப⁴தி. ஸோ தம் உபேக்க²ம் நாபி⁴னந்த³தி, நாபி⁴வத³தி, ந அஜ்ஜோ²ஸாய திட்ட²தி. தஸ்ஸ தம் உபேக்க²ம் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ ந தன்னிஸ்ஸிதம் ஹோதி விஞ்ஞாணம் ந தது³பாதா³னம். அனுபாதா³னோ, ஆனந்த³, பி⁴க்கு² பரினிப்³பா³யதீ’’தி.

73. ‘‘அச்ச²ரியம், ப⁴ந்தே, அப்³பு⁴தம், ப⁴ந்தே! நிஸ்ஸாய நிஸ்ஸாய கிர நோ, ப⁴ந்தே, ப⁴க³வதா ஓக⁴ஸ்ஸ நித்த²ரணா அக்கா²தா. கதமோ பன, ப⁴ந்தே, அரியோ விமோக்கோ²’’தி? ‘‘இதா⁴னந்த³, பி⁴க்கு² அரியஸாவகோ இதி படிஸஞ்சிக்க²தி – ‘யே ச தி³ட்ட²த⁴ம்மிகா காமா, யே ச ஸம்பராயிகா காமா; யா ச தி³ட்ட²த⁴ம்மிகா காமஸஞ்ஞா, யா ச ஸம்பராயிகா காமஸஞ்ஞா; யே ச தி³ட்ட²த⁴ம்மிகா ரூபா, யே ச ஸம்பராயிகா ரூபா; யா ச தி³ட்ட²த⁴ம்மிகா ரூபஸஞ்ஞா, யா ச ஸம்பராயிகா ரூபஸஞ்ஞா; யா ச ஆனேஞ்ஜஸஞ்ஞா, யா ச ஆகிஞ்சஞ்ஞாயதனஸஞ்ஞா, யா ச நேவஸஞ்ஞானாஸஞ்ஞாயதனஸஞ்ஞா – ஏஸ ஸக்காயோ யாவதா ஸக்காயோ. ஏதம் அமதம் யதி³த³ம் அனுபாதா³ சித்தஸ்ஸ விமோக்கோ². இதி, கோ², ஆனந்த³, தே³ஸிதா மயா ஆனேஞ்ஜஸப்பாயா படிபதா³, தே³ஸிதா ஆகிஞ்சஞ்ஞாயதனஸப்பாயா படிபதா³, தே³ஸிதா நேவஸஞ்ஞானாஸஞ்ஞாயதனஸப்பாயா படிபதா³, தே³ஸிதா நிஸ்ஸாய நிஸ்ஸாய ஓக⁴ஸ்ஸ நித்த²ரணா, தே³ஸிதோ அரியோ விமோக்கோ². யம் கோ², ஆனந்த³, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, ஆனந்த³, ருக்க²மூலானி, ஏதானி ஸுஞ்ஞாகா³ரானி. ஜா²யதா²னந்த³, மா பமாத³த்த², மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’’தி.

இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதம் அபி⁴னந்தீ³தி.

ஆனேஞ்ஜஸப்பாயஸுத்தம் நிட்டி²தம் ச²ட்ட²ம்.