9. கோ³லியானிஸுத்தம்

173. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன கோ³லியானி [கு³லிஸ்ஸானி (ஸீ. பீ.), கோ³லிஸ்ஸானி (ஸ்யா. கம்.)] நாம பி⁴க்கு² ஆரஞ்ஞிகோ [ஆரஞ்ஞகோ (ஸப்³ப³த்த²)] பத³ஸமாசாரோ [பத³ரஸமாசாரோ (ஸீ. ஸ்யா. கம். பீ.)] ஸங்க⁴மஜ்ஜே² ஓஸடோ ஹோதி கேனசிதே³வ கரணீயேன. தத்ர கோ² ஆயஸ்மா ஸாரிபுத்தோ கோ³லியானிம் பி⁴க்கு²ம் ஆரப்³ப⁴ பி⁴க்கூ² ஆமந்தேஸி –

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஸப்³ரஹ்மசாரீஸு ஸகா³ரவேன ப⁴விதப்³ப³ம் ஸப்பதிஸ்ஸேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ஸப்³ரஹ்மசாரீஸு அகா³ரவோ ஹோதி அப்பதிஸ்ஸோ, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன, யோ அயமாயஸ்மா ஸப்³ரஹ்மசாரீஸு அகா³ரவோ ஹோதி அப்பதிஸ்ஸோ’தி – தஸ்ஸ [அப்பதிஸ்ஸோதிஸ்ஸ (ஸீ. பீ.)] ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஸப்³ரஹ்மசாரீஸு ஸகா³ரவேன ப⁴விதப்³ப³ம் ஸப்பதிஸ்ஸேன.

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஆஸனகுஸலேன ப⁴விதப்³ப³ம் – ‘இதி தே²ரே ச பி⁴க்கூ² நானுபக²ஜ்ஜ நிஸீதி³ஸ்ஸாமி நவே ச பி⁴க்கூ² ந ஆஸனேன படிபா³ஹிஸ்ஸாமீ’தி. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ந ஆஸனகுஸலோ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன, யோ அயமாயஸ்மா ஆஸனகுஸலோ ந ஹோதீ’தி [யோ அயமாயஸ்மா ஆபி⁴ஸமாசாரிகம்பி த⁴ம்மம் ந ஜானாதீதி (ஸீ. ஸ்யா. கம். பீ.)] – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஆஸனகுஸலேன ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஆபி⁴ஸமாசாரிகோபி த⁴ம்மோ ஜானிதப்³போ³. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ஆபி⁴ஸமாசாரிகம்பி த⁴ம்மம் ந ஜானாதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா ஆபி⁴ஸமாசாரிகம்பி த⁴ம்மம் ந ஜானாதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஆபி⁴ஸமாசாரிகோபி த⁴ம்மோ ஜானிதப்³போ³ [அயம் ஆபி⁴ஸமாசாரிகததியவாரோ ஸீ. ஸ்யா. கம். பீ. போத்த²கேஸு ந தி³ஸ்ஸதி].

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன நாதிகாலேன கா³மோ பவிஸிதப்³போ³ நாதிதி³வா [ந தி³வா (ஸ்யா. கம். பீ. க.)] படிக்கமிதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ அதிகாலேன கா³மம் பவிஸதி அதிதி³வா படிக்கமதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அதிகாலேன கா³மம் பவிஸதி அதிதி³வா படிக்கமதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன நாதிகாலேன கா³மோ பவிஸிதப்³போ³, நாதிதி³வா படிக்கமிதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ந புரேப⁴த்தம் பச்சா²ப⁴த்தம் குலேஸு சாரித்தம் ஆபஜ்ஜிதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ புரேப⁴த்தம் பச்சா²ப⁴த்தம் குலேஸு சாரித்தம் ஆபஜ்ஜதி, தஸ்ஸ ப⁴வந்தி வத்தாரோ. ‘அயம் நூனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன விஹரதோ விகாலசரியா ப³ஹுலீகதா, தமேனம் ஸங்க⁴க³தம்பி ஸமுதா³சரதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ந புரேப⁴த்தம் பச்சா²ப⁴த்தம் குலேஸு சாரித்தம் ஆபஜ்ஜிதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன அனுத்³த⁴தேன ப⁴விதப்³ப³ம் அசபலேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ உத்³த⁴தோ ஹோதி சபலோ, தஸ்ஸ ப⁴வந்தி வத்தாரோ. ‘இத³ம் நூனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன விஹரதோ உத்³த⁴ச்சம் சாபல்யம் ப³ஹுலீகதம், தமேனம் ஸங்க⁴க³தம்பி ஸமுதா³சரதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன அனுத்³த⁴தேன ப⁴விதப்³ப³ம் அசபலேன.

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன அமுக²ரேன ப⁴விதப்³ப³ம் அவிகிண்ணவாசேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ முக²ரோ ஹோதி விகிண்ணவாசோ, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா முக²ரோ விகிண்ணவாசோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன அமுக²ரேன ப⁴விதப்³ப³ம் அவிகிண்ணவாசேன.

‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஸுவசேன [ஸுப்³ப³சேன (ஸீ. க.)] ப⁴விதப்³ப³ம் கல்யாணமித்தேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ து³ப்³ப³சோ ஹோதி பாபமித்தோ, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா து³ப்³ப³சோ பாபமித்தோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஸுவசேன ப⁴விதப்³ப³ம் கல்யாணமித்தேன.

‘‘ஆரஞ்ஞிகேனாவுஸோ, பி⁴க்கு²னா இந்த்³ரியேஸு கு³த்தத்³வாரேன ப⁴விதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² இந்த்³ரியேஸு அகு³த்தத்³வாரோ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா இந்த்³ரியேஸு அகு³த்தத்³வாரோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா இந்த்³ரியேஸு கு³த்தத்³வாரேன ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா போ⁴ஜனே மத்தஞ்ஞுனா ப⁴விதப்³ப³ம். ஸசே, ஆவுஸோ, ஆரஞ்ஞிகோ போ⁴ஜனே அமத்தஞ்ஞூ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா போ⁴ஜனே அமத்தஞ்ஞூ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா போ⁴ஜனே மத்தஞ்ஞுனா ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா ஜாக³ரியம் அனுயுத்தேன ப⁴விதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² ஜாக³ரியம் அனனுயுத்தோ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா ஜாக³ரியம் அனனுயுத்தோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஜாக³ரியம் அனுயுத்தேன ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா ஆரத்³த⁴வீரியேன ப⁴விதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² குஸீதோ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா குஸீதோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஆரத்³த⁴வீரியேன ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா உபட்டி²தஸ்ஸதினா ப⁴விதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² முட்ட²ஸ்ஸதீ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா முட்ட²ஸ்ஸதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா உபட்டி²தஸ்ஸதினா ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா ஸமாஹிதேன ப⁴விதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² அஸமாஹிதோ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அஸமாஹிதோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸமாஹிதேன ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா பஞ்ஞவதா ப⁴விதப்³ப³ம். ஸசே, ஆவுஸோ, ஆரஞ்ஞிகோ பி⁴க்கு² து³ப்பஞ்ஞோ ஹோதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா து³ப்பஞ்ஞோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா பஞ்ஞவதா ப⁴விதப்³ப³ம்.

‘‘ஆரஞ்ஞிகேனாவுஸோ, பி⁴க்கு²னா அபி⁴த⁴ம்மே அபி⁴வினயே யோகோ³ கரணீயோ. ஸந்தாவுஸோ, ஆரஞ்ஞிகம் பி⁴க்கு²ம் அபி⁴த⁴ம்மே அபி⁴வினயே பஞ்ஹம் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² அபி⁴த⁴ம்மே அபி⁴வினயே பஞ்ஹம் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அபி⁴த⁴ம்மே அபி⁴வினயே பஞ்ஹம் புட்டோ² ந ஸம்பாயதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா அபி⁴த⁴ம்மே அபி⁴வினயே யோகோ³ கரணீயோ.

‘‘ஆரஞ்ஞிகேனாவுஸோ, பி⁴க்கு²னா யே தே ஸந்தா விமோக்கா² அதிக்கம்ம ரூபே ஆருப்பா தத்த² யோகோ³ கரணீயோ. ஸந்தாவுஸோ, ஆரஞ்ஞிகம் பி⁴க்கு²ம் யே தே ஸந்தா விமோக்கா² அதிக்கம்ம ரூபே ஆருப்பா தத்த² பஞ்ஹம் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² யே தே ஸந்தா விமோக்கா² அதிக்கம்ம ரூபே ஆருப்பா தத்த² பஞ்ஹம் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா யே தே ஸந்தா விமோக்கா² அதிக்கம்ம ரூபே ஆருப்பா தத்த² பஞ்ஹம் புட்டோ² ந ஸம்பாயதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா யே தே ஸந்தா விமோக்கா² அதிக்கம்ம ரூபே ஆருப்பா தத்த² யோகோ³ கரணீயோ.

‘‘ஆரஞ்ஞிகேனாவுஸோ, பி⁴க்கு²னா உத்தரி மனுஸ்ஸத⁴ம்மே யோகோ³ கரணீயோ. ஸந்தாவுஸோ, ஆரஞ்ஞிகம் பி⁴க்கு²ம் உத்தரி மனுஸ்ஸத⁴ம்மே பஞ்ஹம் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² உத்தரி மனுஸ்ஸத⁴ம்மே பஞ்ஹம் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிம் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா யஸ்ஸத்தா²ய பப்³ப³ஜிதோ தமத்த²ம் ந ஜானாதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா உத்தரி மனுஸ்ஸத⁴ம்மே யோகோ³ கரணீயோ’’தி.

ஏவம் வுத்தே, ஆயஸ்மா மஹாமோக்³க³ல்லானோ [மஹாமோக்³க³லானோ (க.)] ஆயஸ்மந்தம் ஸாரிபுத்தம் ஏதத³வோச – ‘‘ஆரஞ்ஞிகேனேவ நு கோ², ஆவுஸோ ஸாரிபுத்த, பி⁴க்கு²னா இமே த⁴ம்மா ஸமாதா³ய வத்திதப்³பா³ உதா³ஹு கா³மந்தவிஹாரினாபீ’’தி? ‘‘ஆரஞ்ஞிகேனாபி கோ², ஆவுஸோ மோக்³க³ல்லான, பி⁴க்கு²னா இமே த⁴ம்மா ஸமாதா³ய வத்திதப்³பா³ பகே³வ கா³மந்தவிஹாரினா’’தி.

கோ³லியானிஸுத்தம் நிட்டி²தம் நவமம்.