2. மஹாராஹுலோவாத³ஸுத்தம்

113. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. ஆயஸ்மாபி கோ² ராஹுலோ புப்³ப³ண்ஹஸமயம் நிவாஸேத்வா பத்தசீவரமாதா³ய ப⁴க³வந்தம் பிட்டி²தோ பிட்டி²தோ அனுப³ந்தி⁴. அத² கோ² ப⁴க³வா அபலோகேத்வா ஆயஸ்மந்தம் ராஹுலம் ஆமந்தேஸி – ‘‘யம் கிஞ்சி, ராஹுல, ரூபம் – அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா – ஸப்³ப³ம் ரூபம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³’’ந்தி. ‘‘ரூபமேவ நு கோ², ப⁴க³வா, ரூபமேவ நு கோ², ஸுக³தா’’தி? ‘‘ரூபம்பி, ராஹுல, வேத³னாபி, ராஹுல, ஸஞ்ஞாபி, ராஹுல, ஸங்கா²ராபி, ராஹுல, விஞ்ஞாணம்பி, ராஹுலா’’தி. அத² கோ² ஆயஸ்மா ராஹுலோ ‘‘கோ நஜ்ஜ [கோ நுஜ்ஜ (ஸ்யா. கம்.)] ப⁴க³வதா ஸம்முகா² ஓவாதே³ன ஓவதி³தோ கா³மம் பிண்டா³ய பவிஸிஸ்ஸதீ’’தி ததோ படினிவத்தித்வா அஞ்ஞதரஸ்மிம் ருக்க²மூலே நிஸீதி³ பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. அத்³த³ஸா கோ² ஆயஸ்மா ஸாரிபுத்தோ ஆயஸ்மந்தம் ராஹுலம் அஞ்ஞதரஸ்மிம் ருக்க²மூலே நிஸின்னம் பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. தி³ஸ்வான ஆயஸ்மந்தம் ராஹுலம் ஆமந்தேஸி – ‘‘ஆனாபானஸ்ஸதிம், ராஹுல, பா⁴வனம் பா⁴வேஹி. ஆனாபானஸ்ஸதி, ராஹுல, பா⁴வனா பா⁴விதா ப³ஹுலீகதா மஹப்ப²லா ஹோதி மஹானிஸம்ஸா’’தி.

114. அத² கோ² ஆயஸ்மா ராஹுலோ ஸாயன்ஹஸமயம் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ராஹுலோ ப⁴க³வந்தம் ஏதத³வோச – ‘‘கத²ம் பா⁴விதா நு கோ², ப⁴ந்தே, ஆனாபானஸ்ஸதி, கத²ம் ப³ஹுலீகதா மஹப்ப²லா ஹோதி மஹானிஸம்ஸா’’தி? ‘‘யம் கிஞ்சி, ராஹுல, அஜ்ஜ²த்தம் பச்சத்தம் கக்க²ளம் க²ரிக³தம் உபாதி³ன்னம், ஸேய்யதி²த³ம் – கேஸா லோமா நகா² த³ந்தா தசோ மம்ஸம் ந்ஹாரு [நஹாரு (ஸீ. ஸ்யா. கம். பீ.)] அட்டி² அட்டி²மிஞ்ஜம் வக்கம் ஹத³யம் யகனம் கிலோமகம் பிஹகம் பப்பா²ஸம் அந்தம் அந்தகு³ணம் உத³ரியம் கரீஸம், யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் கக்க²ளம் க²ரிக³தம் உபாதி³ன்னம் – அயம் வுச்சதி, ராஹுல, அஜ்ஜ²த்திகா பத²வீதா⁴து [பட²வீதா⁴து (ஸீ. ஸ்யா. கம். பீ.)]. யா சேவ கோ² பன அஜ்ஜ²த்திகா பத²வீதா⁴து யா ச பா³ஹிரா பத²வீதா⁴து, பத²வீதா⁴துரேவேஸா. தம் ‘நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா பத²வீதா⁴துயா நிப்³பி³ந்த³தி, பத²வீதா⁴துயா சித்தம் விராஜேதி’’.

115. ‘‘கதமா ச, ராஹுல, ஆபோதா⁴து? ஆபோதா⁴து ஸியா அஜ்ஜ²த்திகா, ஸியா பா³ஹிரா. கதமா ச, ராஹுல, அஜ்ஜ²த்திகா ஆபோதா⁴து? யம் அஜ்ஜ²த்தம் பச்சத்தம் ஆபோ ஆபோக³தம் உபாதி³ன்னம், ஸேய்யதி²த³ம் – பித்தம் ஸேம்ஹம் புப்³போ³ லோஹிதம் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தம், யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் ஆபோ ஆபோக³தம் உபாதி³ன்னம் – அயம் வுச்சதி, ராஹுல, அஜ்ஜ²த்திகா ஆபோதா⁴து. யா சேவ கோ² பன அஜ்ஜ²த்திகா ஆபோதா⁴து யா ச பா³ஹிரா ஆபோதா⁴து ஆபோதா⁴துரேவேஸா. தம் ‘நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா ஆபோதா⁴துயா நிப்³பி³ந்த³தி, ஆபோதா⁴துயா சித்தம் விராஜேதி.

116. ‘‘கதமா ச, ராஹுல, தேஜோதா⁴து? தேஜோதா⁴து ஸியா அஜ்ஜ²த்திகா, ஸியா பா³ஹிரா. கதமா ச, ராஹுல, அஜ்ஜ²த்திகா தேஜோதா⁴து? யம் அஜ்ஜ²த்தம் பச்சத்தம் தேஜோ தேஜோக³தம் உபாதி³ன்னம், ஸேய்யதி²த³ம் – யேன ச ஸந்தப்பதி யேன ச ஜீரீயதி யேன ச பரிட³ய்ஹதி யேன ச அஸிதபீதகா²யிதஸாயிதம் ஸம்மா பரிணாமம் க³ச்ச²தி, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் தேஜோ தேஜோக³தம் உபாதி³ன்னம் – அயம் வுச்சதி, ராஹுல, அஜ்ஜ²த்திகா தேஜோதா⁴து. யா சேவ கோ² பன அஜ்ஜ²த்திகா தேஜோதா⁴து யா ச பா³ஹிரா தேஜோதா⁴து தேஜோதா⁴துரேவேஸா. தம் ‘நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா தேஜோதா⁴துயா நிப்³பி³ந்த³தி, தேஜோதா⁴துயா சித்தம் விராஜேதி.

117. ‘‘கதமா ச, ராஹுல, வாயோதா⁴து? வாயோதா⁴து ஸியா அஜ்ஜ²த்திகா, ஸியா பா³ஹிரா. கதமா ச, ராஹுல, அஜ்ஜ²த்திகா வாயோதா⁴து? யம் அஜ்ஜ²த்தம் பச்சத்தம் வாயோ வாயோக³தம் உபாதி³ன்னம், ஸேய்யதி²த³ம் – உத்³த⁴ங்க³மா வாதா, அதோ⁴க³மா வாதா, குச்சி²ஸயா வாதா, கோட்டா²ஸயா [கோட்ட²ஸயா (ஸீ. பீ.)] வாதா, அங்க³மங்கா³னுஸாரினோ வாதா, அஸ்ஸாஸோ பஸ்ஸாஸோ, இதி யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் வாயோ வாயோக³தம் உபாதி³ன்னம் – அயம் வுச்சதி, ராஹுல, அஜ்ஜ²த்திகா வாயோதா⁴து. யா சேவ கோ² பன அஜ்ஜ²த்திகா வாயோதா⁴து யா ச பா³ஹிரா வாயோதா⁴து வாயோதா⁴துரேவேஸா. தம் ‘நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா வாயோதா⁴துயா நிப்³பி³ந்த³தி, வாயோதா⁴துயா சித்தம் விராஜேதி.

118. ‘‘கதமா ச, ராஹுல, ஆகாஸதா⁴து? ஆகாஸதா⁴து ஸியா அஜ்ஜ²த்திகா, ஸியா பா³ஹிரா. கதமா ச, ராஹுல, அஜ்ஜ²த்திகா ஆகாஸதா⁴து? யம் அஜ்ஜ²த்தம் பச்சத்தம் ஆகாஸம் ஆகாஸக³தம் உபாதி³ன்னம், ஸேய்யதி²த³ம் – கண்ணச்சி²த்³த³ம் நாஸச்சி²த்³த³ம் முக²த்³வாரம், யேன ச அஸிதபீதகா²யிதஸாயிதம் அஜ்ஜோ²ஹரதி, யத்த² ச அஸிதபீதகா²யிதஸாயிதம் ஸந்திட்ட²தி, யேன ச அஸிதபீதகா²யிதஸாயிதம் அதோ⁴பா⁴க³ம் [அதோ⁴பா⁴கா³ (ஸீ. ஸ்யா. கம். பீ.)] நிக்க²மதி, யம் வா பனஞ்ஞம்பி கிஞ்சி அஜ்ஜ²த்தம் பச்சத்தம் ஆகாஸம் ஆகாஸக³தம், அக⁴ம் அக⁴க³தம், விவரம் விவரக³தம், அஸம்பு²ட்ட²ம், மம்ஸலோஹிதேஹி உபாதி³ன்னம் [ஆகாஸக³தம் உபாதி³ன்னம் (ஸீ. பீ.)] – அயம் வுச்சதி, ராஹுல, அஜ்ஜ²த்திகா ஆகாஸதா⁴து. யா சேவ கோ² பன அஜ்ஜ²த்திகா ஆகாஸதா⁴து யா ச பா³ஹிரா ஆகாஸதா⁴து ஆகாஸதா⁴துரேவேஸா. தம் ‘நேதம் மம, நேஸோஹமஸ்மி, ந மேஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா ஆகாஸதா⁴துயா சித்தம் நிப்³பி³ந்த³தி, ஆகாஸதா⁴துயா சித்தம் விராஜேதி.

119. ‘‘பத²வீஸமம், ராஹுல, பா⁴வனம் பா⁴வேஹி. பத²வீஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி. ஸேய்யதா²பி, ராஹுல, பத²வியா ஸுசிம்பி நிக்கி²பந்தி, அஸுசிம்பி நிக்கி²பந்தி, கூ³த²க³தம்பி நிக்கி²பந்தி, முத்தக³தம்பி நிக்கி²பந்தி, கே²ளக³தம்பி நிக்கி²பந்தி, புப்³ப³க³தம்பி நிக்கி²பந்தி, லோஹிதக³தம்பி நிக்கி²பந்தி, ந ச தேன பத²வீ அட்டீயதி வா ஹராயதி வா ஜிகு³ச்ச²தி வா; ஏவமேவ கோ² த்வம், ராஹுல, பத²வீஸமம் பா⁴வனம் பா⁴வேஹி. பத²வீஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி.

‘‘ஆபோஸமம், ராஹுல, பா⁴வனம் பா⁴வேஹி. ஆபோஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி. ஸேய்யதா²பி, ராஹுல, ஆபஸ்மிம் ஸுசிம்பி தோ⁴வந்தி, அஸுசிம்பி தோ⁴வந்தி, கூ³த²க³தம்பி தோ⁴வந்தி, முத்தக³தம்பி தோ⁴வந்தி, கே²ளக³தம்பி தோ⁴வந்தி, புப்³ப³க³தம்பி தோ⁴வந்தி, லோஹிதக³தம்பி தோ⁴வந்தி, ந ச தேன ஆபோ அட்டீயதி வா ஹராயதி வா ஜிகு³ச்ச²தி வா; ஏவமேவ கோ² த்வம், ராஹுல, ஆபோஸமம் பா⁴வனம் பா⁴வேஹி. ஆபோஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி.

‘‘தேஜோஸமம், ராஹுல, பா⁴வனம் பா⁴வேஹி. தேஜோஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி. ஸேய்யதா²பி, ராஹுல, தேஜோ ஸுசிம்பி த³ஹதி, அஸுசிம்பி த³ஹதி, கூ³த²க³தம்பி த³ஹதி, முத்தக³தம்பி த³ஹதி, கே²ளக³தம்பி த³ஹதி, புப்³ப³க³தம்பி த³ஹதி, லோஹிதக³தம்பி த³ஹதி, ந ச தேன தேஜோ அட்டீயதி வா ஹராயதி வா ஜிகு³ச்ச²தி வா; ஏவமேவ கோ² த்வம், ராஹுல, தேஜோஸமம் பா⁴வனம் பா⁴வேஹி. தேஜோஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி.

‘‘வாயோஸமம், ராஹுல, பா⁴வனம் பா⁴வேஹி. வாயோஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி. ஸேய்யதா²பி, ராஹுல, வாயோ ஸுசிம்பி உபவாயதி, அஸுசிம்பி உபவாயதி, கூ³த²க³தம்பி உபவாயதி, முத்தக³தம்பி உபவாயதி, கே²ளக³தம்பி உபவாயதி, புப்³ப³க³தம்பி உபவாயதி, லோஹிதக³தம்பி உபவாயதி, ந ச தேன வாயோ அட்டீயதி வா ஹராயதி வா ஜிகு³ச்ச²தி வா; ஏவமேவ கோ² த்வம், ராஹுல, வாயோஸமம் பா⁴வனம் பா⁴வேஹி. வாயோஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி.

‘‘ஆகாஸஸமம், ராஹுல, பா⁴வனம் பா⁴வேஹி. ஆகாஸஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி. ஸேய்யதா²பி, ராஹுல, ஆகாஸோ ந கத்த²சி பதிட்டி²தோ; ஏவமேவ கோ² த்வம், ராஹுல, ஆகாஸஸமம் பா⁴வனம் பா⁴வேஹி. ஆகாஸஸமஞ்ஹி தே, ராஹுல, பா⁴வனம் பா⁴வயதோ உப்பன்னா மனாபாமனாபா ப²ஸ்ஸா சித்தம் ந பரியாதா³ய ட²ஸ்ஸந்தி.

120. ‘‘மேத்தம், ராஹுல, பா⁴வனம் பா⁴வேஹி. மேத்தஞ்ஹி தே, ராஹுல, பா⁴வனம் பா⁴வயதோ யோ ப்³யாபாதோ³ ஸோ பஹீயிஸ்ஸதி. கருணம், ராஹுல, பா⁴வனம் பா⁴வேஹி. கருணஞ்ஹி தே, ராஹுல, பா⁴வனம் பா⁴வயதோ யா விஹேஸா ஸா பஹீயிஸ்ஸதி. முதி³தம், ராஹுல, பா⁴வனம் பா⁴வேஹி. முதி³தஞ்ஹி தே, ராஹுல, பா⁴வனம் பா⁴வயதோ யா அரதி ஸா பஹீயிஸ்ஸதி. உபேக்க²ம், ராஹுல, பா⁴வனம் பா⁴வேஹி. உபேக்க²ஞ்ஹி தே, ராஹுல, பா⁴வனம் பா⁴வயதோ யோ படிகோ⁴ ஸோ பஹீயிஸ்ஸதி. அஸுப⁴ம், ராஹுல, பா⁴வனம் பா⁴வேஹி. அஸுப⁴ஞ்ஹி தே, ராஹுல, பா⁴வனம் பா⁴வயதோ யோ ராகோ³ ஸோ பஹீயிஸ்ஸதி. அனிச்சஸஞ்ஞம், ராஹுல, பா⁴வனம் பா⁴வேஹி. அனிச்சஸஞ்ஞஞ்ஹி தே, ராஹுல, பா⁴வனம் பா⁴வயதோ யோ அஸ்மிமானோ ஸோ பஹீயிஸ்ஸதி.

121. ‘‘ஆனாபானஸ்ஸதிம், ராஹுல, பா⁴வனம் பா⁴வேஹி. ஆனாபானஸ்ஸதி ஹி தே, ராஹுல, பா⁴விதா ப³ஹுலீகதா மஹப்ப²லா ஹோதி மஹானிஸம்ஸா. கத²ம் பா⁴விதா ச, ராஹுல, ஆனாபானஸ்ஸதி, கத²ம் ப³ஹுலீகதா மஹப்ப²லா ஹோதி மஹானிஸம்ஸா? இத⁴, ராஹுல, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி ஸதோவ [ஸதோ (ஸீ. ஸ்யா. கம். பீ.)] பஸ்ஸஸதி.

‘‘தீ³க⁴ம் வா அஸ்ஸஸந்தோ ‘தீ³க⁴ம் அஸ்ஸஸாமீ’தி பஜானாதி, தீ³க⁴ம் வா பஸ்ஸஸந்தோ ‘தீ³க⁴ம் பஸ்ஸஸாமீ’தி பஜானாதி; ரஸ்ஸம் வா அஸ்ஸஸந்தோ ‘ரஸ்ஸம் அஸ்ஸஸாமீ’தி பஜானாதி, ரஸ்ஸம் வா பஸ்ஸஸந்தோ ‘ரஸ்ஸம் பஸ்ஸஸாமீ’தி பஜானாதி. ‘ஸப்³ப³காயப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி; ‘ஸப்³ப³காயப்படிஸம்வேதீ³ பஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யம் காயஸங்கா²ரம் அஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யம் காயஸங்கா²ரம் பஸ்ஸஸிஸ்ஸாமீ’தி ஸிக்க²தி.

‘‘‘பீதிப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி; ‘பீதிப்படிஸம்வேதீ³ பஸ்ஸஸிஸ்ஸாமீ’தி ஸிக்க²தி; ‘ஸுக²ப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி; ‘ஸுக²ப்படிஸம்வேதீ³ பஸ்ஸஸிஸ்ஸாமீ’தி ஸிக்க²தி; ‘சித்தஸங்கா²ரப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி; ‘சித்தஸங்கா²ரப்படிஸம்வேதீ³ பஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யம் சித்தஸங்கா²ரம் அஸ்ஸஸிஸ்ஸாமீ’தி ஸிக்க²தி; ‘பஸ்ஸம்ப⁴யம் சித்தஸங்கா²ரம் பஸ்ஸஸிஸ்ஸாமீ’தி ஸிக்க²தி.

‘‘‘சித்தப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி; ‘சித்தப்படிஸம்வேதீ³ பஸ்ஸஸிஸ்ஸாமீ’தி ஸிக்க²தி; ‘அபி⁴ப்பமோத³யம் சித்தம் அஸ்ஸஸிஸ்ஸாமீ’தி ஸிக்க²தி; ‘அபி⁴ப்பமோத³யம் சித்தம் பஸ்ஸஸிஸ்ஸாமீ’தி ஸிக்க²தி; ‘ஸமாத³ஹம் சித்தம் அஸ்ஸஸிஸ்ஸாமீ’தி ஸிக்க²தி; ‘ஸமாத³ஹம் சித்தம் பஸ்ஸஸிஸ்ஸாமீ’தி ஸிக்க²தி; ‘விமோசயம் சித்தம் அஸ்ஸஸிஸ்ஸாமீ’தி ஸிக்க²தி; ‘விமோசயம் சித்தம் பஸ்ஸஸிஸ்ஸாமீ’தி ஸிக்க²தி.

‘‘‘அனிச்சானுபஸ்ஸீ அஸ்ஸஸிஸ்ஸாமீ’தி ஸிக்க²தி; ‘அனிச்சானுபஸ்ஸீ பஸ்ஸஸிஸ்ஸாமீ’தி ஸிக்க²தி; ‘விராகா³னுபஸ்ஸீ அஸ்ஸஸிஸ்ஸாமீ’தி ஸிக்க²தி; ‘விராகா³னுபஸ்ஸீ பஸ்ஸஸிஸ்ஸாமீ’தி ஸிக்க²தி; ‘நிரோதா⁴னுபஸ்ஸீ அஸ்ஸஸிஸ்ஸாமீ’தி ஸிக்க²தி; ‘நிரோதா⁴னுபஸ்ஸீ பஸ்ஸஸிஸ்ஸாமீ’தி ஸிக்க²தி; ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி; ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி.

‘‘ஏவம் பா⁴விதா கோ², ராஹுல, ஆனாபானஸ்ஸதி, ஏவம் ப³ஹுலீகதா மஹப்ப²லா ஹோதி மஹானிஸம்ஸா. ஏவம் பா⁴விதாய, ராஹுல, ஆனாபானஸ்ஸதியா, ஏவம் ப³ஹுலீகதாய யேபி தே சரிமகா அஸ்ஸாஸா தேபி விதி³தாவ நிருஜ்ஜ²ந்தி நோ அவிதி³தா’’தி.

இத³மவோச ப⁴க³வா. அத்தமனோ ஆயஸ்மா ராஹுலோ ப⁴க³வதோ பா⁴ஸிதம் அபி⁴னந்தீ³தி.

மஹாராஹுலோவாத³ஸுத்தம் நிட்டி²தம் து³தியம்.