2. அட்ட²கனாக³ரஸுத்தம்

17. ஏவம் மே ஸுதம் – ஏகம் ஸமயம் ஆயஸ்மா ஆனந்தோ³ வேஸாலியம் விஹரதி பே³லுவகா³மகே [வேளுவகா³மகே (ஸ்யா. கம். க.)]. தேன கோ² பன ஸமயேன த³ஸமோ க³ஹபதி அட்ட²கனாக³ரோ பாடலிபுத்தம் அனுப்பத்தோ ஹோதி கேனசிதே³வ கரணீயேன. அத² கோ² த³ஸமோ க³ஹபதி அட்ட²கனாக³ரோ யேன குக்குடாராமோ யேன அஞ்ஞதரோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² த³ஸமோ க³ஹபதி அட்ட²கனாக³ரோ தம் பி⁴க்கு²ம் ஏதத³வோச – ‘‘கஹம் நு கோ², ப⁴ந்தே, ஆயஸ்மா ஆனந்தோ³ ஏதரஹி விஹரதி? த³ஸ்ஸனகாமா ஹி மயம் தம் ஆயஸ்மந்தம் ஆனந்த³’’ந்தி. ‘‘ஏஸோ, க³ஹபதி, ஆயஸ்மா ஆனந்தோ³ வேஸாலியம் விஹரதி பே³லுவகா³மகே’’தி. அத² கோ² த³ஸமோ க³ஹபதி அட்ட²கனாக³ரோ பாடலிபுத்தே தம் கரணீயம் தீரேத்வா யேன வேஸாலீ யேன பே³லுவகா³மகோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தம் ஆனந்த³ம் அபி⁴வாதே³த்வா ஏகமந்தம் நிஸீதி³.

18. ஏகமந்தம் நிஸின்னோ கோ² த³ஸமோ க³ஹபதி அட்ட²கனாக³ரோ ஆயஸ்மந்தம் ஆனந்த³ம் ஏதத³வோச – ‘‘அத்தி² நு கோ², ப⁴ந்தே ஆனந்த³, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தம் விமுச்சதி, அபரிக்கீ²ணா ச ஆஸவா பரிக்க²யம் க³ச்ச²ந்தி, அனனுப்பத்தஞ்ச அனுத்தரம் யோக³க்கே²மம் அனுபாபுணாதீ’’தி?

‘‘அத்தி² கோ², க³ஹபதி, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தம் விமுச்சதி, அபரிக்கீ²ணா ச ஆஸவா பரிக்க²யம் க³ச்ச²ந்தி, அனனுப்பத்தஞ்ச அனுத்தரம் யோக³க்கே²மம் அனுபாபுணாதீ’’தி.

‘‘கதமோ பன, ப⁴ந்தே ஆனந்த³, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தம் விமுச்சதி, அபரிக்கீ²ணா ச ஆஸவா பரிக்க²யம் க³ச்ச²ந்தி, அனனுப்பத்தஞ்ச அனுத்தரம் யோக³க்கே²மம் அனுபாபுணாதீ’’தி?

19. ‘‘இத⁴, க³ஹபதி, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘இத³ம்பி பட²மம் ஜா²னம் அபி⁴ஸங்க²தம் அபி⁴ஸஞ்சேதயிதம். யம் கோ² பன கிஞ்சி அபி⁴ஸங்க²தம் அபி⁴ஸஞ்சேதயிதம் தத³னிச்சம் நிரோத⁴த⁴ம்ம’ந்தி பஜானாதி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. அயம்பி கோ², க³ஹபதி, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தம் விமுச்சதி, அபரிக்கீ²ணா ச ஆஸவா பரிக்க²யம் க³ச்ச²ந்தி, அனனுப்பத்தஞ்ச அனுத்தரம் யோக³க்கே²மம் அனுபாபுணாதி.

20. ‘‘புன சபரம், க³ஹபதி, பி⁴க்கு² விதக்கவிசாரானம் வூபஸமா அஜ்ஜ²த்தம் ஸம்பஸாத³னம்…பே… து³தியம் ஜா²னம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘இத³ம்பி கோ² து³தியம் ஜா²னம் அபி⁴ஸங்க²தம் அபி⁴ஸஞ்சேதயிதம்… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² பீதியா ச விராகா³…பே… ததியம் ஜா²னம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘இத³ம்பி கோ² ததியம் ஜா²னம் அபி⁴ஸங்க²தம் அபி⁴ஸஞ்சேதயிதம்…பே… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² ஸுக²ஸ்ஸ ச பஹானா …பே… சதுத்த²ம் ஜா²னம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘இத³ம்பி கோ² சதுத்த²ம் ஜா²னம் அபி⁴ஸங்க²தம் அபி⁴ஸஞ்சேதயிதம்… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம் [சதுத்தி²ம் (ஸீ. பீ.)]. இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன [அப்³யாபஜ்ஜே²ன (ஸீ. ஸ்யா. பீ.), அப்³யாபஜ்ஜேன (க.) அங்கு³த்தரதிகனிபாதடீகா ஓலோகேதப்³பா³] ப²ரித்வா விஹரதி. ஸோ இதி படிஸஞ்சிக்க²தி – ‘அயம்பி கோ² மேத்தாசேதோவிமுத்தி அபி⁴ஸங்க²தா அபி⁴ஸஞ்சேதயிதா. யம் கோ² பன கிஞ்சி அபி⁴ஸங்க²தம் அபி⁴ஸஞ்சேதயிதம் தத³னிச்சம் நிரோத⁴த⁴ம்ம’ந்தி பஜானாதி. ஸோ தத்த² டி²தோ…பே… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² கருணாஸஹக³தேன சேதஸா…பே… முதி³தாஸஹக³தேன சேதஸா…பே… உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாப³ஜ்ஜே²ன ப²ரித்வா விஹரதி. ஸோ இதி படிஸஞ்சிக்க²தி – ‘அயம்பி கோ² உபேக்கா²சேதோவிமுத்தி அபி⁴ஸங்க²தா அபி⁴ஸஞ்சேதயிதா. யம் கோ² பன கிஞ்சி அபி⁴ஸங்க²தம் அபி⁴ஸஞ்சேதயிதம் தத³னிச்சம் நிரோத⁴த⁴ம்ம’ந்தி பஜானாதி. ஸோ தத்த² டி²தோ… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘அயம்பி கோ² ஆகாஸானஞ்சாயதனஸமாபத்தி அபி⁴ஸங்க²தா அபி⁴ஸஞ்சேதயிதா. யம் கோ² பன கிஞ்சி அபி⁴ஸங்க²தம் அபி⁴ஸஞ்சேதயிதம் தத³னிச்சம் நிரோத⁴த⁴ம்ம’ந்தி பஜானாதி. ஸோ தத்த² டி²தோ…பே… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘அயம்பி கோ² விஞ்ஞாணஞ்சாயதனஸமாபத்தி அபி⁴ஸங்க²தா அபி⁴ஸஞ்சேதயிதா. யம் கோ² பன கிஞ்சி அபி⁴ஸங்க²தம் அபி⁴ஸஞ்சேதயிதம் தத³னிச்சம் நிரோத⁴த⁴ம்ம’ந்தி பஜானாதி. ஸோ தத்த² டி²தோ…பே… அனுத்தரம் யோக³க்கே²மம் அனுபாபுணாதி.

‘‘புன சபரம், க³ஹபதி, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஸோ இதி படிஸஞ்சிக்க²தி – ‘அயம்பி கோ² ஆகிஞ்சஞ்ஞாயதனஸமாபத்தி அபி⁴ஸங்க²தா அபி⁴ஸஞ்சேதயிதா. யம் கோ² பன கிஞ்சி அபி⁴ஸங்க²தம் அபி⁴ஸஞ்சேதயிதம் தத³னிச்சம் நிரோத⁴த⁴ம்ம’ந்தி பஜானாதி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. அயம்பி கோ², க³ஹபதி, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஏகத⁴ம்மோ அக்கா²தோ யத்த² பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிமுத்தஞ்சேவ சித்தம் விமுச்சதி, அபரிக்கீ²ணா ச ஆஸவா பரிக்க²யம் க³ச்ச²ந்தி, அனனுப்பத்தஞ்ச அனுத்தரம் யோக³க்கே²மம் அனுபாபுணாதீ’’தி.

21. ஏவம் வுத்தே, த³ஸமோ க³ஹபதி அட்ட²கனாக³ரோ ஆயஸ்மந்தம் ஆனந்த³ம் ஏதத³வோச – ‘‘ஸேய்யதா²பி, ப⁴ந்தே ஆனந்த³, புரிஸோ ஏகம்வ நிதி⁴முக²ம் க³வேஸந்தோ ஸகிதே³வ ஏகாத³ஸ நிதி⁴முகா²னி அதி⁴க³ச்சே²ய்ய; ஏவமேவ கோ² அஹம், ப⁴ந்தே, ஏகம் அமதத்³வாரம் க³வேஸந்தோ ஸகிதே³வ [ஸகிம் தே³வ (க.)] ஏகாத³ஸ அமதத்³வாரானி அலத்த²ம் பா⁴வனாய. ஸேய்யதா²பி, ப⁴ந்தே, புரிஸஸ்ஸ அகா³ரம் ஏகாத³ஸத்³வாரம், ஸோ தஸ்மிம் அகா³ரே ஆதி³த்தே ஏகமேகேனபி த்³வாரேன ஸக்குணேய்ய அத்தானம் ஸோத்தி²ம் காதும்; ஏவமேவ கோ² அஹம், ப⁴ந்தே, இமேஸம் ஏகாத³ஸன்னம் அமதத்³வாரானம் ஏகமேகேனபி அமதத்³வாரேன ஸக்குணிஸ்ஸாமி அத்தானம் ஸோத்தி²ம் காதும். இமேஹி நாம, ப⁴ந்தே, அஞ்ஞதித்தி²யா ஆசரியஸ்ஸ ஆசரியத⁴னம் பரியேஸிஸ்ஸந்தி, கிமங்க³ம் [கிம் (ஸீ. பீ.)] பனாஹம் ஆயஸ்மதோ ஆனந்த³ஸ்ஸ பூஜம் ந கரிஸ்ஸாமீ’’தி! அத² கோ² த³ஸமோ க³ஹபதி அட்ட²கனாக³ரோ பாடலிபுத்தகஞ்ச வேஸாலிகஞ்ச பி⁴க்கு²ஸங்க⁴ம் ஸன்னிபாதேத்வா பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி, ஏகமேகஞ்ச பி⁴க்கு²ம் பச்சேகம் து³ஸ்ஸயுகே³ன அச்சா²தே³ஸி, ஆயஸ்மந்தஞ்ச ஆனந்த³ம் திசீவரேன அச்சா²தே³ஸி, ஆயஸ்மதோ ச ஆனந்த³ஸ்ஸ பஞ்சஸதவிஹாரம் காராபேஸீதி.

அட்ட²கனாக³ரஸுத்தம் நிட்டி²தம் து³தியம்.