8. ஸல்லேக²ஸுத்தம்

81. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா மஹாசுந்தோ³ ஸாயன்ஹஸமயம் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாசுந்தோ³ ப⁴க³வந்தம் ஏதத³வோச – ‘‘யா இமா, ப⁴ந்தே, அனேகவிஹிதா தி³ட்டி²யோ லோகே உப்பஜ்ஜந்தி – அத்தவாத³படிஸம்யுத்தா வா லோகவாத³படிஸம்யுத்தா வா – ஆதி³மேவ நு கோ², ப⁴ந்தே, பி⁴க்கு²னோ மனஸிகரோதோ ஏவமேதாஸம் தி³ட்டீ²னம் பஹானம் ஹோதி, ஏவமேதாஸம் தி³ட்டீ²னம் படினிஸ்ஸக்³கோ³ ஹோதீ’’தி?

82. ‘‘யா இமா, சுந்த³, அனேகவிஹிதா தி³ட்டி²யோ லோகே உப்பஜ்ஜந்தி – அத்தவாத³படிஸம்யுத்தா வா லோகவாத³படிஸம்யுத்தா வா – யத்த² சேதா தி³ட்டி²யோ உப்பஜ்ஜந்தி யத்த² ச அனுஸேந்தி யத்த² ச ஸமுதா³சரந்தி தம் ‘நேதம் மம, நேஸோஹமஸ்மி, ந மே ஸோ அத்தா’தி – ஏவமேதம் யதா²பூ⁴தம் ஸம்மப்பஞ்ஞா பஸ்ஸதோ ஏவமேதாஸம் தி³ட்டீ²னம் பஹானம் ஹோதி, ஏவமேதாஸம் தி³ட்டீ²னம் படினிஸ்ஸக்³கோ³ ஹோதி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² பீதியா ச விராகா³ உபேக்க²கோ ச விஹரேய்ய, ஸதோ ச ஸம்பஜானோ ஸுக²ஞ்ச காயேன படிஸம்வேதே³ய்ய, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸும் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா, படிக⁴ஸஞ்ஞானம் அத்த²ங்க³மா, நானத்தஸஞ்ஞானம் அமனஸிகாரா, ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.

‘‘டா²னம் கோ² பனேதம், சுந்த³, விஜ்ஜதி யம் இதே⁴கச்சோ பி⁴க்கு² ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரேய்ய. தஸ்ஸ ஏவமஸ்ஸ – ‘ஸல்லேகே²ன விஹராமீ’தி. ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி. ஸந்தா ஏதே விஹாரா அரியஸ்ஸ வினயே வுச்சந்தி.

83. ‘‘இத⁴ கோ² பன வோ, சுந்த³, ஸல்லேகோ² கரணீயோ. ‘பரே விஹிம்ஸகா ப⁴விஸ்ஸந்தி, மயமேத்த² அவிஹிம்ஸகா ப⁴விஸ்ஸாமா’தி ஸல்லேகோ² கரணீயோ. ‘பரே பாணாதிபாதீ ப⁴விஸ்ஸந்தி, மயமேத்த² பாணாதிபாதா படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே அதி³ன்னாதா³யீ ப⁴விஸ்ஸந்தி, மயமேத்த² அதி³ன்னாதா³னா படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே அப்³ரஹ்மசாரீ ப⁴விஸ்ஸந்தி, மயமேத்த² ப்³ரஹ்மசாரீ ப⁴விஸ்ஸாமா’தி ஸல்லேகோ² கரணீயோ. ‘பரே முஸாவாதீ³ ப⁴விஸ்ஸந்தி, மயமேத்த² முஸாவாதா³ படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே பிஸுணவாசா [பிஸுணா வாசா (ஸீ. பீ.)] ப⁴விஸ்ஸந்தி, மயமேத்த² பிஸுணாய வாசாய படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே ப²ருஸவாசா [ப²ருஸா வாசா (ஸீ. பீ.)] ப⁴விஸ்ஸந்தி, மயமேத்த² ப²ருஸாய வாசாய படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே ஸம்ப²ப்பலாபீ ப⁴விஸ்ஸந்தி, மயமேத்த² ஸம்ப²ப்பலாபா படிவிரதா ப⁴விஸ்ஸாமா’தி ஸல்லேகோ² கரணீயோ. ‘பரே அபி⁴ஜ்ஜா²லூ ப⁴விஸ்ஸந்தி, மயமேத்த² அனபி⁴ஜ்ஜா²லூ ப⁴விஸ்ஸாமா’தி ஸல்லேகோ² கரணீயோ. ‘பரே ப்³யாபன்னசித்தா ப⁴விஸ்ஸந்தி, மயமேத்த² அப்³யாபன்னசித்தா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²தி³ட்டீ² ப⁴விஸ்ஸந்தி, மயமேத்த² ஸம்மாதி³ட்டீ² ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஸங்கப்பா ப⁴விஸ்ஸந்தி, மயமேத்த² ஸம்மாஸங்கப்பா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²வாசா ப⁴விஸ்ஸந்தி, மயமேத்த² ஸம்மாவாசா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²கம்மந்தா ப⁴விஸ்ஸந்தி, மயமேத்த² ஸம்மாகம்மந்தா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஆஜீவா ப⁴விஸ்ஸந்தி, மயமேத்த² ஸம்மாஆஜீவா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²வாயாமா ப⁴விஸ்ஸந்தி, மயமேத்த² ஸம்மாவாயாமா ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஸதீ ப⁴விஸ்ஸந்தி, மயமேத்த² ஸம்மாஸதீ ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஸமாதி⁴ ப⁴விஸ்ஸந்தி, மயமேத்த² ஸம்மாஸமாதீ⁴ ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²ஞாணீ ப⁴விஸ்ஸந்தி, மயமேத்த² ஸம்மாஞாணீ ப⁴விஸ்ஸாமா’தி ஸல்லேகோ² கரணீயோ. ‘பரே மிச்சா²விமுத்தீ ப⁴விஸ்ஸந்தி, மயமேத்த² ஸம்மாவிமுத்தீ ப⁴விஸ்ஸாமா’தி ஸல்லேகோ² கரணீயோ.

‘‘‘பரே தீ²னமித்³த⁴பரியுட்டி²தா ப⁴விஸ்ஸந்தி, மயமேத்த² விக³ததீ²னமித்³தா⁴ ப⁴விஸ்ஸாமா’தி ஸல்லேகோ² கரணீயோ. ‘பரே உத்³த⁴தா ப⁴விஸ்ஸந்தி, மயமேத்த² அனுத்³த⁴தா ப⁴விஸ்ஸாமா’தி ஸல்லேகோ² கரணீயோ. ‘பரே விசிகிச்சீ² [வேசிகிச்சீ² (ஸீ. பீ. க.)] ப⁴விஸ்ஸந்தி, மயமேத்த² திண்ணவிசிகிச்சா² ப⁴விஸ்ஸாமா’தி ஸல்லேகோ² கரணீயோ. ‘பரே கோத⁴னா ப⁴விஸ்ஸந்தி, மயமேத்த² அக்கோத⁴னா ப⁴விஸ்ஸாமா’தி ஸல்லேகோ² கரணீயோ. ‘பரே உபனாஹீ ப⁴விஸ்ஸந்தி, மயமேத்த² அனுபனாஹீ ப⁴விஸ்ஸாமா’தி ஸல்லேகோ² கரணீயோ. ‘பரே மக்கீ² ப⁴விஸ்ஸந்தி, மயமேத்த² அமக்கீ² ப⁴விஸ்ஸாமா’தி ஸல்லேகோ² கரணீயோ. ‘பரே பளாஸீ ப⁴விஸ்ஸந்தி, மயமேத்த² அபளாஸீ ப⁴விஸ்ஸாமா’தி ஸல்லேகோ² கரணீயோ. ‘பரே இஸ்ஸுகீ ப⁴விஸ்ஸந்தி, மயமேத்த² அனிஸ்ஸுகீ ப⁴விஸ்ஸாமா’தி ஸல்லேகோ² கரணீயோ. ‘பரே மச்ச²ரீ ப⁴விஸ்ஸந்தி, மயமேத்த² அமச்ச²ரீ ப⁴விஸ்ஸாமா’தி ஸல்லேகோ² கரணீயோ. ‘பரே ஸடா² ப⁴விஸ்ஸந்தி, மயமேத்த² அஸடா² ப⁴விஸ்ஸாமா’தி ஸல்லேகோ² கரணீயோ. ‘பரே மாயாவீ ப⁴விஸ்ஸந்தி, மயமேத்த² அமாயாவீ ப⁴விஸ்ஸாமா’தி ஸல்லேகோ² கரணீயோ. ‘பரே த²த்³தா⁴ ப⁴விஸ்ஸந்தி, மயமேத்த² அத்த²த்³தா⁴ ப⁴விஸ்ஸாமா’தி ஸல்லேகோ² கரணீயோ. ‘பரே அதிமானீ ப⁴விஸ்ஸந்தி, மயமேத்த² அனதிமானீ ப⁴விஸ்ஸாமா’தி ஸல்லேகோ² கரணீயோ. ‘பரே து³ப்³ப³சா ப⁴விஸ்ஸந்தி, மயமேத்த² ஸுவசா ப⁴விஸ்ஸாமா’தி ஸல்லேகோ² கரணீயோ. ‘பரே பாபமித்தா ப⁴விஸ்ஸந்தி, மயமேத்த² கல்யாணமித்தா ப⁴விஸ்ஸாமா’தி ஸல்லேகோ² கரணீயோ. ‘பரே பமத்தா ப⁴விஸ்ஸந்தி, மயமேத்த² அப்பமத்தா ப⁴விஸ்ஸாமா’தி ஸல்லேகோ² கரணீயோ. ‘பரே அஸ்ஸத்³தா⁴ ப⁴விஸ்ஸந்தி, மயமேத்த² ஸத்³தா⁴ ப⁴விஸ்ஸாமா’தி ஸல்லேகோ² கரணீயோ. ‘பரே அஹிரிகா ப⁴விஸ்ஸந்தி, மயமேத்த² ஹிரிமனா ப⁴விஸ்ஸாமா’தி ஸல்லேகோ² கரணீயோ. ‘பரே அனோத்தாபீ [அனோத்தப்பீ (க.)] ப⁴விஸ்ஸந்தி, மயமேத்த² ஓத்தாபீ ப⁴விஸ்ஸாமா’தி ஸல்லேகோ² கரணீயோ. ‘பரே அப்பஸ்ஸுதா ப⁴விஸ்ஸந்தி, மயமேத்த² ப³ஹுஸ்ஸுதா ப⁴விஸ்ஸாமா’தி ஸல்லேகோ² கரணீயோ. ‘பரே குஸீதா ப⁴விஸ்ஸந்தி, மயமேத்த² ஆரத்³த⁴வீரியா ப⁴விஸ்ஸாமா’தி ஸல்லேகோ² கரணீயோ. ‘பரே முட்ட²ஸ்ஸதீ ப⁴விஸ்ஸந்தி, மயமேத்த² உபட்டி²தஸ்ஸதீ ப⁴விஸ்ஸாமா’தி ஸல்லேகோ² கரணீயோ. ‘பரே து³ப்பஞ்ஞா ப⁴விஸ்ஸந்தி, மயமேத்த² பஞ்ஞாஸம்பன்னா ப⁴விஸ்ஸாமா’தி ஸல்லேகோ² கரணீயோ. ‘பரே ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³ ப⁴விஸ்ஸந்தி, மயமேத்த² அஸந்தி³ட்டி²பராமாஸீ அனாதா⁴னக்³கா³ஹீ ஸுப்படினிஸ்ஸக்³கீ³ ப⁴விஸ்ஸாமா’தி ஸல்லேகோ² கரணீயோ.

84. ‘‘சித்துப்பாத³ம்பி கோ² அஹம், சுந்த³, குஸலேஸு த⁴ம்மேஸு ப³ஹுகாரம் [ப³ஹூபகாரம் (க.)] வதா³மி, கோ பன வாதோ³ காயேன வாசாய அனுவிதீ⁴யனாஸு! தஸ்மாதிஹ, சுந்த³, ‘பரே விஹிம்ஸகா ப⁴விஸ்ஸந்தி, மயமேத்த² அவிஹிம்ஸகா ப⁴விஸ்ஸாமா’தி சித்தம் உப்பாதே³தப்³ப³ம். ‘பரே பாணாதிபாதீ ப⁴விஸ்ஸந்தி, மயமேத்த² பாணாதிபாதா படிவிரதா ப⁴விஸ்ஸாமா’தி சித்தம் உப்பாதே³தப்³ப³ம்…‘பரே ஸந்தி³ட்டி²பராமாஸீ ஆதா⁴னக்³கா³ஹீ து³ப்படினிஸ்ஸக்³கீ³ ப⁴விஸ்ஸந்தி, மயமேத்த² அஸந்தி³ட்டி²பராமாஸீ அனாதா⁴னக்³கா³ஹீ ஸுப்படினிஸ்ஸக்³கீ³ ப⁴விஸ்ஸாமா’தி சித்தம் உப்பாதே³தப்³ப³ம்.

85. ‘‘ஸேய்யதா²பி, சுந்த³, விஸமோ மக்³கோ³ அஸ்ஸ, தஸ்ஸ [மக்³கோ³ தஸ்ஸாஸ்ஸ (ஸீ. ஸ்யா. பீ.)] அஞ்ஞோ ஸமோ மக்³கோ³ பரிக்கமனாய; ஸேய்யதா² வா பன, சுந்த³, விஸமம் தித்த²ம் அஸ்ஸ, தஸ்ஸ அஞ்ஞம் ஸமம் தித்த²ம் பரிக்கமனாய; ஏவமேவ கோ², சுந்த³, விஹிம்ஸகஸ்ஸ புரிஸபுக்³க³லஸ்ஸ அவிஹிம்ஸா ஹோதி பரிக்கமனாய, பாணாதிபாதிஸ்ஸ புரிஸபுக்³க³லஸ்ஸ பாணாதிபாதா வேரமணீ ஹோதி பரிக்கமனாய, அதி³ன்னாதா³யிஸ்ஸ புரிஸபுக்³க³லஸ்ஸ அதி³ன்னாதா³னா வேரமணீ ஹோதி பரிக்கமனாய, அப்³ரஹ்மசாரிஸ்ஸ புரிஸபுக்³க³லஸ்ஸ அப்³ரஹ்மசரியா வேரமணீ ஹோதி பரிக்கமனாய, முஸாவாதி³ஸ்ஸ புரிஸபுக்³க³லஸ்ஸ முஸாவாதா³ வேரமணீ ஹோதி பரிக்கமனாய, பிஸுணவாசஸ்ஸ புரிஸபுக்³க³லஸ்ஸ பிஸுணாய வாசாய வேரமணீ ஹோதி பரிக்கமனாய, ப²ருஸவாசஸ்ஸ புரிஸபுக்³க³லஸ்ஸ ப²ருஸாய வாசாய வேரமணீ ஹோதி பரிக்கமனாய, ஸம்ப²ப்பலாபிஸ்ஸ புரிஸபுக்³க³லஸ்ஸ ஸம்ப²ப்பலாபா வேரமணீ ஹோதி பரிக்கமனாய, அபி⁴ஜ்ஜா²லுஸ்ஸ புரிஸபுக்³க³லஸ்ஸ அனபி⁴ஜ்ஜா² ஹோதி பரிக்கமனாய, ப்³யாபன்னசித்தஸ்ஸ புரிஸபுக்³க³லஸ்ஸ அப்³யாபாதோ³ ஹோதி பரிக்கமனாய, மிச்சா²தி³ட்டி²ஸ்ஸ புரிஸபுக்³க³லஸ்ஸ ஸம்மாதி³ட்டி² ஹோதி பரிக்கமனாய, மிச்சா²ஸங்கப்பஸ்ஸ புரிஸபுக்³க³லஸ்ஸ ஸம்மாஸங்கப்போ ஹோதி பரிக்கமனாய, மிச்சா²வாசஸ்ஸ புரிஸபுக்³க³லஸ்ஸ ஸம்மாவாசா ஹோதி பரிக்கமனாய, மிச்சா²கம்மந்தஸ்ஸ புரிஸபுக்³க³லஸ்ஸ ஸம்மாகம்மந்தோ ஹோதி பரிக்கமனாய, மிச்சா²ஆஜீவஸ்ஸ புரிஸபுக்³க³லஸ்ஸ ஸம்மாஆஜீவோ ஹோதி பரிக்கமனாய, மிச்சா²வாயாமஸ்ஸ புரிஸபுக்³க³லஸ்ஸ ஸம்மாவாயாமோ ஹோதி பரிக்கமனாய, மிச்சா²ஸதிஸ்ஸ புரிஸபுக்³க³லஸ்ஸ ஸம்மாஸதி ஹோதி பரிக்கமனாய, மிச்சா²ஸமாதி⁴ஸ்ஸ புரிஸபுக்³க³லஸ்ஸ ஸம்மாஸமாதி⁴ ஹோதி பரிக்கமனாய, மிச்சா²ஞாணிஸ்ஸ புரிஸபுக்³க³லஸ்ஸ ஸம்மாஞாணம் ஹோதி பரிக்கமனாய, மிச்சா²விமுத்திஸ்ஸ புரிஸபுக்³க³லஸ்ஸ ஸம்மாவிமுத்தி ஹோதி பரிக்கமனாய.

‘‘தீ²னமித்³த⁴பரியுட்டி²தஸ்ஸ புரிஸபுக்³க³லஸ்ஸ விக³ததி²னமித்³த⁴தா ஹோதி பரிக்கமனாய, உத்³த⁴தஸ்ஸ புரிஸபுக்³க³லஸ்ஸ அனுத்³த⁴ச்சம் ஹோதி பரிக்கமனாய, விசிகிச்சி²ஸ்ஸ புரிஸபுக்³க³லஸ்ஸ திண்ணவிசிகிச்ச²தா ஹோதி பரிக்கமனாய, கோத⁴னஸ்ஸ புரிஸபுக்³க³லஸ்ஸ அக்கோதோ⁴ ஹோதி பரிக்கமனாய, உபனாஹிஸ்ஸ புரிஸபுக்³க³லஸ்ஸ அனுபனாஹோ ஹோதி பரிக்கமனாய, மக்கி²ஸ்ஸ புரிஸபுக்³க³லஸ்ஸ அமக்கோ² ஹோதி பரிக்கமனாய, பளாஸிஸ்ஸ புரிஸபுக்³க³லஸ்ஸ அபளாஸோ ஹோதி பரிக்கமனாய, இஸ்ஸுகிஸ்ஸ புரிஸபுக்³க³லஸ்ஸ அனிஸ்ஸுகிதா ஹோதி பரிக்கமனாய, மச்ச²ரிஸ்ஸ புரிஸபுக்³க³லஸ்ஸ அமச்ச²ரியம் ஹோதி பரிக்கமனாய, ஸட²ஸ்ஸ புரிஸபுக்³க³லஸ்ஸ அஸாடே²ய்யம் ஹோதி பரிக்கமனாய, மாயாவிஸ்ஸ புரிஸபுக்³க³லஸ்ஸ அமாயா [அமாயாவிதா (க.)] ஹோதி பரிக்கமனாய, த²த்³த⁴ஸ்ஸ புரிஸபுக்³க³லஸ்ஸ அத்த²த்³தி⁴யம் ஹோதி பரிக்கமனாய, அதிமானிஸ்ஸ புரிஸபுக்³க³லஸ்ஸ அனதிமானோ ஹோதி பரிக்கமனாய, து³ப்³ப³சஸ்ஸ புரிஸபுக்³க³லஸ்ஸ ஸோவசஸ்ஸதா ஹோதி பரிக்கமனாய, பாபமித்தஸ்ஸ புரிஸபுக்³க³லஸ்ஸ கல்யாணமித்ததா ஹோதி பரிக்கமனாய, பமத்தஸ்ஸ புரிஸபுக்³க³லஸ்ஸ அப்பமாதோ³ ஹோதி பரிக்கமனாய, அஸ்ஸத்³த⁴ஸ்ஸ புரிஸபுக்³க³லஸ்ஸ ஸத்³தா⁴ ஹோதி பரிக்கமனாய, அஹிரிகஸ்ஸ புரிஸபுக்³க³லஸ்ஸ ஹிரீ ஹோதி பரிக்கமனாய, அனோத்தாபிஸ்ஸ புரிஸபுக்³க³லஸ்ஸ ஓத்தப்பம் ஹோதி பரிக்கமனாய, அப்பஸ்ஸுதஸ்ஸ புரிஸபுக்³க³லஸ்ஸ பா³ஹுஸச்சம் ஹோதி பரிக்கமனாய, குஸீதஸ்ஸ புரிஸபுக்³க³லஸ்ஸ வீரியாரம்போ⁴ ஹோதி பரிக்கமனாய, முட்ட²ஸ்ஸதிஸ்ஸ புரிஸபுக்³க³லஸ்ஸ உபட்டி²தஸ்ஸதிதா ஹோதி பரிக்கமனாய, து³ப்பஞ்ஞஸ்ஸ புரிஸபுக்³க³லஸ்ஸ பஞ்ஞாஸம்பதா³ ஹோதி பரிக்கமனாய, ஸந்தி³ட்டி²பராமாஸி-ஆதா⁴னக்³கா³ஹி-து³ப்படினிஸ்ஸக்³கி³ஸ்ஸ புரிஸபுக்³க³லஸ்ஸ அஸந்தி³ட்டி²பராமாஸிஅனாதா⁴னக்³கா³ஹி-ஸுப்படினிஸ்ஸக்³கி³தா ஹோதி பரிக்கமனாய.

86. ‘‘ஸேய்யதா²பி, சுந்த³, யே கேசி அகுஸலா த⁴ம்மா ஸப்³பே³ தே அதோ⁴பா⁴க³ங்க³மனீயா [அதோ⁴பா⁴வங்க³மனீயா (ஸீ. ஸ்யா. பீ.)], யே கேசி குஸலா த⁴ம்மா ஸப்³பே³ தே உபரிபா⁴க³ங்க³மனீயா [உபரிபா⁴வங்க³மனீயா (ஸீ. ஸ்யா. பீ.)], ஏவமேவ கோ², சுந்த³, விஹிம்ஸகஸ்ஸ புரிஸபுக்³க³லஸ்ஸ அவிஹிம்ஸா ஹோதி உபரிபா⁴கா³ய [உபரிபா⁴வாய (ஸீ. ஸ்யா. க.)], பாணாதிபாதிஸ்ஸ புரிஸபுக்³க³லஸ்ஸ பாணாதிபாதா வேரமணீ ஹோதி உபரிபா⁴கா³ய…பே… ஸந்தி³ட்டி²பராமாஸி-ஆதா⁴னக்³கா³ஹி-து³ப்படினிஸ்ஸக்³கி³ஸ்ஸ புரிஸபுக்³க³லஸ்ஸ அஸந்தி³ட்டி²பராமாஸி-அனாதா⁴னக்³கா³ஹி-ஸுப்படினிஸ்ஸக்³கி³தா ஹோதி உபரிபா⁴கா³ய.

87. ‘‘ஸோ வத, சுந்த³, அத்தனா பலிபபலிபன்னோ பரம் பலிபபலிபன்னம் உத்³த⁴ரிஸ்ஸதீதி நேதம் டா²னம் விஜ்ஜதி. ஸோ வத, சுந்த³, அத்தனா அபலிபபலிபன்னோ பரம் பலிபபலிபன்னம் உத்³த⁴ரிஸ்ஸதீதி டா²னமேதம் விஜ்ஜதி. ஸோ வத, சுந்த³, அத்தனா அத³ந்தோ அவினீதோ அபரினிப்³பு³தோ பரம் த³மேஸ்ஸதி வினேஸ்ஸதி பரினிப்³பா³பேஸ்ஸதீதி நேதம் டா²னம் விஜ்ஜதி. ஸோ வத, சுந்த³, அத்தனா த³ந்தோ வினீதோ பரினிப்³பு³தோ பரம் த³மேஸ்ஸதி வினேஸ்ஸதி பரினிப்³பா³பேஸ்ஸதீதி டா²னமேதம் விஜ்ஜதி. ஏவமேவ கோ², சுந்த³, விஹிம்ஸகஸ்ஸ புரிஸபுக்³க³லஸ்ஸ அவிஹிம்ஸா ஹோதி பரினிப்³பா³னாய, பாணாதிபாதிஸ்ஸ புரிஸபுக்³க³லஸ்ஸ பாணாதிபாதா வேரமணீ ஹோதி பரினிப்³பா³னாய. அதி³ன்னாதா³யிஸ்ஸ புரிஸபுக்³க³லஸ்ஸ அதி³ன்னாதா³னா வேரமணீ ஹோதி பரினிப்³பா³னாய. அப்³ரஹ்மசாரிஸ்ஸ புரிஸபுக்³க³லஸ்ஸ அப்³ரஹ்மசரியா வேரமணீ ஹோதி பரினிப்³பா³னாய. முஸாவாதி³ஸ்ஸ புரிஸபுக்³க³லஸ்ஸ முஸாவாதா³ வேரமணீ ஹோதி பரினிப்³பா³னாய. பிஸுணவாசஸ்ஸ புரிஸபுக்³க³லஸ்ஸ பிஸுணாய வாசாய வேரமணீ ஹோதி பரினிப்³பா³னாய. ப²ருஸவாசஸ்ஸ புரிஸபுக்³க³லஸ்ஸ ப²ருஸாய வாசாய வேரமணீ ஹோதி பரினிப்³பா³னாய. ஸம்ப²ப்பலாபிஸ்ஸ புரிஸபுக்³க³லஸ்ஸ ஸம்ப²ப்பலாபா வேரமணீ ஹோதி பரினிப்³பா³னாய. அபி⁴ஜ்ஜா²லுஸ்ஸ புரிஸபுக்³க³லஸ்ஸ அனபி⁴ஜ்ஜா² ஹோதி பரினிப்³பா³னாய. ப்³யாபன்னசித்தஸ்ஸ புரிஸபுக்³க³லஸ்ஸ அப்³யாபாதோ³ ஹோதி பரினிப்³பா³னாய. மிச்சா²தி³ட்டி²ஸ்ஸ புரிஸபுக்³க³லஸ்ஸ ஸம்மாதி³ட்டி² ஹோதி பரினிப்³பா³னாய. மிச்சா²ஸங்கப்பஸ்ஸ புரிஸபுக்³க³லஸ்ஸ ஸம்மாஸங்கப்போ ஹோதி பரினிப்³பா³னாய. மிச்சா²வாசஸ்ஸ புரிஸபுக்³க³லஸ்ஸ ஸம்மாவாசா ஹோதி பரினிப்³பா³னாய. மிச்சா²கம்மந்தஸ்ஸ புரிஸபுக்³க³லஸ்ஸ ஸம்மாகம்மந்தோ ஹோதி பரினிப்³பா³னாய. மிச்சா²ஆஜீவஸ்ஸ புரிஸபுக்³க³லஸ்ஸ ஸம்மாஆஜீவோ ஹோதி பரினிப்³பா³னாய. மிச்சா²வாயாமஸ்ஸ புரிஸபுக்³க³லஸ்ஸ ஸம்மாவாயாமோ ஹோதி பரினிப்³பா³னாய. மிச்சா²ஸதிஸ்ஸ புரிஸபுக்³க³லஸ்ஸ ஸம்மாஸதி ஹோதி பரினிப்³பா³னாய. மிச்சா²ஸமாதி⁴ஸ்ஸ புரிஸபுக்³க³லஸ்ஸ ஸம்மாஸமாதி⁴ ஹோதி பரினிப்³பா³னாய. மிச்சா²ஞாணிஸ்ஸ புரிஸபுக்³க³லஸ்ஸ ஸம்மாஞாணம் ஹோதி பரினிப்³பா³னாய. மிச்சா²விமுத்திஸ்ஸ புரிஸபுக்³க³லஸ்ஸ ஸம்மாவிமுத்தி ஹோதி பரினிப்³பா³னாய.

‘‘தீ²னமித்³த⁴பரியுட்டி²தஸ்ஸ புரிஸபுக்³க³லஸ்ஸ விக³ததி²னமித்³த⁴தா ஹோதி பரினிப்³பா³னாய. உத்³த⁴தஸ்ஸ புரிஸபுக்³க³லஸ்ஸ அனுத்³த⁴ச்சம் ஹோதி பரினிப்³பா³னாய. விசிகிச்சி²ஸ்ஸ புரிஸபுக்³க³லஸ்ஸ திண்ணவிசிகிச்ச²தா ஹோதி பரினிப்³பா³னாய. கோத⁴னஸ்ஸ புரிஸபுக்³க³லஸ்ஸ அக்கோதோ⁴ ஹோதி பரினிப்³பா³னாய. உபனாஹிஸ்ஸ புரிஸபுக்³க³லஸ்ஸ அனுபனாஹோ ஹோதி பரினிப்³பா³னாய. மக்கி²ஸ்ஸ புரிஸபுக்³க³லஸ்ஸ அமக்கோ² ஹோதி பரினிப்³பா³னாய. பளாஸிஸ்ஸ புரிஸபுக்³க³லஸ்ஸ அபளாஸோ ஹோதி பரினிப்³பா³னாய. இஸ்ஸுகிஸ்ஸ புரிஸபுக்³க³லஸ்ஸ அனிஸ்ஸுகிதா ஹோதி பரினிப்³பா³னாய. மச்ச²ரிஸ்ஸ புரிஸபுக்³க³லஸ்ஸ அமச்ச²ரியம் ஹோதி பரினிப்³பா³னாய. ஸட²ஸ்ஸ புரிஸபுக்³க³லஸ்ஸ அஸாடே²ய்யம் ஹோதி பரினிப்³பா³னாய. மாயாவிஸ்ஸ புரிஸபுக்³க³லஸ்ஸ அமாயா ஹோதி பரினிப்³பா³னாய. த²த்³த⁴ஸ்ஸ புரிஸபுக்³க³லஸ்ஸ அத்த²த்³தி⁴யம் ஹோதி பரினிப்³பா³னாய. அதிமானிஸ்ஸ புரிஸபுக்³க³லஸ்ஸ அனதிமானோ ஹோதி பரினிப்³பா³னாய. து³ப்³ப³சஸ்ஸ புரிஸபுக்³க³லஸ்ஸ ஸோவசஸ்ஸதா ஹோதி பரினிப்³பா³னாய. பாபமித்தஸ்ஸ புரிஸபுக்³க³லஸ்ஸ கல்யாணமித்ததா ஹோதி பரினிப்³பா³னாய. பமத்தஸ்ஸ புரிஸபுக்³க³லஸ்ஸ அப்பமாதோ³ ஹோதி பரினிப்³பா³னாய. அஸ்ஸத்³த⁴ஸ்ஸ புரிஸபுக்³க³லஸ்ஸ ஸத்³தா⁴ ஹோதி பரினிப்³பா³னாய. அஹிரிகஸ்ஸ புரிஸபுக்³க³லஸ்ஸ ஹிரீ ஹோதி பரினிப்³பா³னாய. அனோத்தாபிஸ்ஸ புரிஸபுக்³க³லஸ்ஸ ஓத்தப்பம் ஹோதி பரினிப்³பா³னாய. அப்பஸ்ஸுதஸ்ஸ புரிஸபுக்³க³லஸ்ஸ பா³ஹுஸச்சம் ஹோதி பரினிப்³பா³னாய. குஸீதஸ்ஸ புரிஸபுக்³க³லஸ்ஸ வீரியாரம்போ⁴ ஹோதி பரினிப்³பா³னாய. முட்ட²ஸ்ஸதிஸ்ஸ புரிஸபுக்³க³லஸ்ஸ உபட்டி²தஸ்ஸதிதா ஹோதி பரினிப்³பா³னாய. து³ப்பஞ்ஞஸ்ஸ புரிஸபுக்³க³லஸ்ஸ பஞ்ஞாஸம்பதா³ ஹோதி பரினிப்³பா³னாய. ஸந்தி³ட்டி²பராமாஸி-ஆதா⁴னக்³கா³ஹி-து³ப்படினிஸ்ஸக்³கி³ஸ்ஸ புரிஸபுக்³க³லஸ்ஸ அஸந்தி³ட்டி²பராமாஸி-அனாதா⁴னக்³கா³ஹி-ஸுப்படினிஸ்ஸக்³கி³தா ஹோதி பரினிப்³பா³னாய.

88. ‘‘இதி கோ², சுந்த³, தே³ஸிதோ மயா ஸல்லேக²பரியாயோ, தே³ஸிதோ சித்துப்பாத³பரியாயோ, தே³ஸிதோ பரிக்கமனபரியாயோ, தே³ஸிதோ உபரிபா⁴க³பரியாயோ, தே³ஸிதோ பரினிப்³பா³னபரியாயோ. யம் கோ², சுந்த³, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ‘ஏதானி, சுந்த³, ருக்க²மூலானி, ஏதானி ஸுஞ்ஞாகா³ரானி, ஜா²யத², சுந்த³, மா பமாத³த்த², மா பச்சா²விப்படிஸாரினோ அஹுவத்த²’ – அயம் கோ² அம்ஹாகம் அனுஸாஸனீ’’தி.

இத³மவோச ப⁴க³வா. அத்தமனோ ஆயஸ்மா மஹாசுந்தோ³ ப⁴க³வதோ பா⁴ஸிதம் அபி⁴னந்தீ³தி.

சதுத்தாலீஸபதா³ வுத்தா, ஸந்த⁴யோ பஞ்ச தே³ஸிதா;

ஸல்லேகோ² நாம ஸுத்தந்தோ, க³ம்பீ⁴ரோ ஸாக³ரூபமோதி.

ஸல்லேக²ஸுத்தம் நிட்டி²தம் அட்ட²மம்.