8. பிண்ட³பாதிகஸுத்தம்

28. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலானம் பி⁴க்கூ²னம் பச்சா²ப⁴த்தம் பிண்ட³பாதபடிக்கந்தானம் கரேரிமண்ட³லமாளே ஸன்னிஸின்னானம் ஸன்னிபதிதானம் அயமந்தராகதா² உத³பாதி³ –

‘‘பிண்ட³பாதிகோ, ஆவுஸோ, பி⁴க்கு² பிண்டா³ய சரந்தோ லப⁴தி காலேன காலம் மனாபிகே சக்கு²னா ரூபே பஸ்ஸிதும், லப⁴தி காலேன காலம் மனாபிகே ஸோதேன ஸத்³தே³ ஸோதும், லப⁴தி காலேன காலம் மனாபிகே கா⁴னேன க³ந்தே⁴ கா⁴யிதும், லப⁴தி காலேன காலம் மனாபிகே ஜிவ்ஹாய ரஸே ஸாயிதும், லப⁴தி காலேன காலம் மனாபிகே காயேன போ²ட்ட²ப்³பே³ பு²ஸிதும். பிண்ட³பாதிகோ, ஆவுஸோ, பி⁴க்கு² ஸக்கதோ க³ருகதோ மானிதோ பூஜிதோ அபசிதோ பிண்டா³ய சரதி. ஹந்தா³வுஸோ, மயம்பி பிண்ட³பாதிகா ஹோம. மயம்பி லச்சா²ம காலேன காலம் மனாபிகே சக்கு²னா ரூபே பஸ்ஸிதும், மயம்பி லச்சா²ம காலேன காலம் மனாபிகே ஸோதேன ஸத்³தே³ ஸோதும், மயம்பி லச்சா²ம காலேன காலம் மனாபிகே கா⁴னேன க³ந்தே⁴ கா⁴யிதும், மயம்பி லச்சா²ம காலேன காலம் மனாபிகே ஜிவ்ஹாய ரஸே ஸாயிதும், மயம்பி லச்சா²ம காலேன காலம் மனாபிகே காயேன போ²ட்ட²ப்³பே³ பு²ஸிதும்; மயம்பி ஸக்கதா க³ருகதா மானிதா பூஜிதா அபசிதா பிண்டா³ய சரிஸ்ஸாமா’’தி. அயஞ்சரஹி தேஸம் பி⁴க்கூ²னம் அந்தராகதா² ஹோதி விப்பகதா.

அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன கரேரிமண்ட³லமாளோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா, கா ச பன வோ அந்தராகதா² விப்பகதா’’தி?

‘‘இத⁴, ப⁴ந்தே, அம்ஹாகம் பச்சா²ப⁴த்தம் பிண்ட³பாதபடிக்கந்தானம் கரேரிமண்ட³லமாளே ஸன்னிஸின்னானம் ஸன்னிபதிதானம் அயமந்தராகதா² உத³பாதி³ –

‘பிண்ட³பாதிகோ, ஆவுஸோ, பி⁴க்கு² பிண்டா³ய சரந்தோ லப⁴தி காலேன காலம் மனாபிகே சக்கு²னா ரூபே பஸ்ஸிதும், லப⁴தி காலேன காலம் மனாபிகே ஸோதேன ஸத்³தே³ ஸோதும், லப⁴தி காலேன காலம் மனாபிகே கா⁴னேன க³ந்தே⁴ கா⁴யிதும், லப⁴தி காலேன காலம் மனாபிகே ஜிவ்ஹாய ரஸே ஸாயிதும், லப⁴தி காலேன காலம் மனாபிகே காயேன போ²ட்ட²ப்³பே³ பு²ஸிதும். பிண்ட³பாதிகோ, ஆவுஸோ, பி⁴க்கு² ஸக்கதோ க³ருகதோ மானிதோ பூஜிதோ அபசிதோ பிண்டா³ய சரதி. ஹந்தா³வுஸோ, மயம்பி பிண்ட³பாதிகா ஹோம. மயம்பி லச்சா²ம காலேன காலம் மனாபிகே சக்கு²னா ரூபே பஸ்ஸிதும்…பே… காயேன போ²ட்ட²ப்³பே³ பு²ஸிதும். மயம்பி ஸக்கதா க³ருகதா மானிதா பூஜிதா அபசிதா பிண்டா³ய சரிஸ்ஸாமா’தி. அயம் கோ² நோ, ப⁴ந்தே, அந்தராகதா² விப்பகதா, அத² ப⁴க³வா அனுப்பத்தோ’’தி.

‘‘ந க்²வேதம், பி⁴க்க²வே, தும்ஹாகம் பதிரூபம் குலபுத்தானம் ஸத்³தா⁴ அகா³ரஸ்மா அனகா³ரியம் பப்³ப³ஜிதானம் யம் தும்ஹே ஏவரூபிம் கத²ம் கதே²ய்யாத². ஸன்னிபதிதானம் வோ, பி⁴க்க²வே, த்³வயம் கரணீயம் – த⁴ம்மீ வா கதா² அரியோ வா துண்ஹீபா⁴வோ’’தி.

அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘பிண்ட³பாதிகஸ்ஸ பி⁴க்கு²னோ,

அத்தப⁴ரஸ்ஸ அனஞ்ஞபோஸினோ;

தே³வா பிஹயந்தி தாதி³னோ,

நோ சே ஸத்³த³ஸிலோகனிஸ்ஸிதோ’’தி. அட்ட²மம்;