9. ஸிப்பஸுத்தம்

29. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலானம் பி⁴க்கூ²னம் பச்சா²ப⁴த்தம் பிண்ட³பாதபடிக்கந்தானம் மண்ட³லமாளே ஸன்னிஸின்னானம் ஸன்னிபதிதானம் அயமந்தராகதா² உத³பாதி³ – ‘‘கோ நு கோ², ஆவுஸோ, ஸிப்பம் ஜானாதி? கோ கிம் ஸிப்பம் ஸிக்கி²? கதரம் ஸிப்பம் ஸிப்பானம் அக்³க³’’ந்தி?

தத்தே²கச்சே ஏவமாஹம்ஸு – ‘‘ஹத்தி²ஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘அஸ்ஸஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘ரத²ஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘த⁴னுஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘த²ருஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘முத்³தா³ஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘க³ணனாஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘ஸங்கா²னஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘லேகா²ஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘காவேய்யஸிப்பம் [காப்³யஸிப்பம் (ஸ்யா.)] ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘லோகாயதஸிப்பம் ஸிப்பானம் அக்³க³’’ந்தி. ஏகச்சே ஏவமாஹம்ஸு – ‘‘க²த்தவிஜ்ஜாஸிப்பம் ஸிப்பானம் அக்³க³’’ந்தி. அயஞ்சரஹி தேஸம் பி⁴க்கூ²னம் அந்தராகதா² ஹோதி விப்பகதா.

அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன மண்ட³லமாளோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா, கா ச பன வோ அந்தராகதா² விப்பகதா’’தி?

‘‘இத⁴, ப⁴ந்தே, அம்ஹாகம் பச்சா²ப⁴த்தம் பிண்ட³பாதபடிக்கந்தானம் மண்ட³லமாளே ஸன்னிஸின்னானம் அயமந்தராகதா² உத³பாதி³ – ‘கோ நு கோ², ஆவுஸோ, ஸிப்பம் ஜானாதி? கோ கிம் ஸிப்பம் ஸிக்கி²? கதரம் ஸிப்பம் ஸிப்பானம் அக்³க³’ந்தி?

‘‘தத்தே²கச்சே ஏவமாஹம்ஸு – ‘ஹத்தி²ஸிப்பம் ஸிப்பானம் அக்³க³’ந்தி. ஏகச்சே ஏவமாஹம்ஸு – ‘அஸ்ஸஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘ரத²ஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘த⁴னுஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘த²ருஸிப்பம் ஸிப்பானம் அக்³க³’ந்தி, ஏகச்சே ஏவமாஹம்ஸு – ‘முத்³தா³ஸிப்பம் ஸிப்பானம் அக்³க³’ந்தி ஏகச்சே ஏவமாஹம்ஸு – ‘க³ணனாஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘ஸங்கா²னஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘லேகா²ஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘காவேய்யஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘லோகாயதஸிப்பம் ஸிப்பானம் அக்³க³’ந்தி; ஏகச்சே ஏவமாஹம்ஸு – ‘க²த்தவிஜ்ஜாஸிப்பம் ஸிப்பானம் அக்³க³’ந்தி. அயம் கோ² நோ, ப⁴ந்தே, அந்தராகதா² ஹோதி விப்பகதா, அத² ப⁴க³வா அனுப்பத்தோ’’தி.

‘‘ந க்²வேதம், பி⁴க்க²வே, தும்ஹாகம் பதிரூபம் குலபுத்தானம் ஸத்³தா⁴ அகா³ரஸ்மா அனகா³ரியம் பப்³ப³ஜிதானம் யம் தும்ஹே ஏவரூபிம் கத²ம் கதே²ய்யாத². ஸன்னிபதிதானம் வோ, பி⁴க்க²வே, த்³வயம் கரணீயம் – த⁴ம்மீ வா கதா² அரியோ வா துண்ஹீபா⁴வோ’’தி.

அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘அஸிப்பஜீவீ லஹு அத்த²காமோ,

யதிந்த்³ரியோ ஸப்³ப³தி⁴ விப்பமுத்தோ;

அனோகஸாரீ அமமோ நிராஸோ,

ஹித்வா மானம் ஏகசரோ ஸ பி⁴க்கூ²’’தி. நவமம்;