5. ஸுபா⁴கம்மாரதீ⁴துதே²ரீகா³தா²

339. ‘‘த³ஹராஹம் ஸுத்³த⁴வஸனா, யம் புரே த⁴ம்மமஸ்ஸுணிம்;

தஸ்ஸா மே அப்பமத்தாய, ஸச்சாபி⁴ஸமயோ அஹு.

340. ‘‘ததோஹம் ஸப்³ப³காமேஸு, பு⁴ஸம் அரதிமஜ்ஜ²க³ம்;

ஸக்காயஸ்மிம் ப⁴யம் தி³ஸ்வா, நேக்க²ம்மமேவ [நேக்க²ம்மஞ்ஞேவ (ஸீ.), நேக்க²ம்மஸ்ஸேவ (ஸ்யா.)] பீஹயே.

341. ‘‘ஹித்வானஹம் ஞாதிக³ணம், தா³ஸகம்மகரானி ச;

கா³மகே²த்தானி பீ²தானி, ரமணீயே பமோதி³தே.

342. ‘‘பஹாயஹம் பப்³ப³ஜிதா, ஸாபதேய்யமனப்பகம்;

ஏவம் ஸத்³தா⁴ய நிக்க²ம்ம, ஸத்³த⁴ம்மே ஸுப்பவேதி³தே.

343. ‘‘நேதம் [ந மேதம் (ஸீ. ஸ்யா.)] அஸ்ஸ பதிரூபம், ஆகிஞ்சஞ்ஞஞ்ஹி பத்த²யே;

யோ [யா (ஸ்யா.)] ஜாதரூபம் ரஜதம், ச²ட்³டே³த்வா [த²பேத்வா (க.)] புனராக³மே [புனராக³ஹே (க.)].

344. ‘‘ரஜதம் ஜாதரூபம் வா, ந போ³தா⁴ய ந ஸந்தியா;

நேதம் ஸமணஸாருப்பம், ந ஏதம் அரியத்³த⁴னம்.

345. ‘‘லோப⁴னம் மத³னஞ்சேதம், மோஹனம் ரஜவட்³ட⁴னம்;

ஸாஸங்கம் ப³ஹுஆயாஸம், நத்தி² சேத்த² து⁴வம் டி²தி.

346. ‘‘ஏத்த² ரத்தா பமத்தா ச, ஸங்கிலிட்ட²மனா நரா;

அஞ்ஞமஞ்ஞேன ப்³யாருத்³தா⁴, புது² குப்³ப³ந்தி மேத⁴க³ம்.

347. ‘‘வதோ⁴ ப³ந்தோ⁴ பரிக்லேஸோ, ஜானி ஸோகபரித்³த³வோ;

காமேஸு அதி⁴பன்னானம், தி³ஸ்ஸதே ப்³யஸனம் ப³ஹும்.

348. ‘‘தம் மம் ஞாதீ அமித்தாவ, கிம் வோ காமேஸு யுஞ்ஜத²;

ஜானாத² மம் பப்³ப³ஜிதம், காமேஸு ப⁴யத³ஸ்ஸினிம்.

349. ‘‘ந ஹிரஞ்ஞஸுவண்ணேன, பரிக்கீ²யந்தி ஆஸவா;

அமித்தா வத⁴கா காமா, ஸபத்தா ஸல்லப³ந்த⁴னா.

350. ‘‘தம் மம் ஞாதீ அமித்தாவ, கிம் வோ காமேஸு யுஞ்ஜத²;

ஜானாத² மம் பப்³ப³ஜிதம், முண்ட³ம் ஸங்கா⁴டிபாருதம்.

351. ‘‘உத்திட்ட²பிண்டோ³ உஞ்சோ² ச, பம்ஸுகூலஞ்ச சீவரம்;

ஏதம் கோ² மம ஸாருப்பம், அனகா³ரூபனிஸ்ஸயோ.

352. ‘‘வந்தா மஹேஸீஹி காமா, யே தி³ப்³பா³ யே ச மானுஸா;

கே²மட்டா²னே விமுத்தா தே, பத்தா தே அசலம் ஸுக²ம்.

353. ‘‘மாஹம் காமேஹி ஸங்க³ச்சி²ம், யேஸு தாணம் ந விஜ்ஜதி;

அமித்தா வத⁴கா காமா, அக்³கி³க்க²ந்தூ⁴பமா து³கா².

354. ‘‘பரிபந்தோ² ஏஸ ப⁴யோ, ஸவிகா⁴தோ ஸகண்டகோ;

கே³தோ⁴ ஸுவிஸமோ சேஸோ [லேபோ (ஸீ.)], மஹந்தோ மோஹனாமுகோ².

355. ‘‘உபஸக்³கோ³ பீ⁴மரூபோ, காமா ஸப்பஸிரூபமா;

யே பா³லா அபி⁴னந்த³ந்தி, அந்த⁴பூ⁴தா புது²ஜ்ஜனா.

356. ‘‘காமபங்கேன ஸத்தா ஹி, ப³ஹூ லோகே அவித்³த³ஸூ;

பரியந்தம் ந ஜானந்தி, ஜாதியா மரணஸ்ஸ ச.

357. ‘‘து³க்³க³திக³மனம் மக்³க³ம், மனுஸ்ஸா காமஹேதுகம்;

ப³ஹும் வே படிபஜ்ஜந்தி, அத்தனோ ரோக³மாவஹம்.

358. ‘‘ஏவம் அமித்தஜனனா, தாபனா ஸம்கிலேஸிகா;

லோகாமிஸா ப³ந்த⁴னீயா, காமா மரணப³ந்த⁴னா [சரணப³ந்த⁴னா (ஸீ.)].

359. ‘‘உம்மாத³னா உல்லபனா, காமா சித்தப்பமத்³தி³னோ;

ஸத்தானம் ஸங்கிலேஸாய, கி²ப்பம் [கி²பம் (ஸீ.)] மாரேன ஓட்³டி³தம்.

360. ‘‘அனந்தாதீ³னவா காமா, ப³ஹுது³க்கா² மஹாவிஸா;

அப்பஸ்ஸாதா³ ரணகரா, ஸுக்கபக்க²விஸோஸனா [விஸோஸகா (ஸீ.)].

361. ‘‘ஸாஹம் ஏதாதி³ஸம் கத்வா, ப்³யஸனம் காமஹேதுகம்;

ந தம் பச்சாக³மிஸ்ஸாமி, நிப்³பா³னாபி⁴ரதா ஸதா³.

362. ‘‘ரணம் கரித்வா [தரித்வா (ஸீ.)] காமானம், ஸீதிபா⁴வாபி⁴கங்கி²னீ;

அப்பமத்தா விஹஸ்ஸாமி, ஸப்³ப³ஸம்யோஜனக்க²யே.

363. ‘‘அஸோகம் விரஜம் கே²மம், அரியட்ட²ங்கி³கம் உஜும்;

தம் மக்³க³ம் அனுக³ச்சா²மி, யேன திண்ணா மஹேஸினோ’’.

364. இமம் பஸ்ஸத² த⁴ம்மட்ட²ம், ஸுப⁴ம் கம்மாரதீ⁴தரம்;

அனேஜம் உபஸம்பஜ்ஜ, ருக்க²மூலம்ஹி ஜா²யதி.

365. அஜ்ஜட்ட²மீ பப்³ப³ஜிதா, ஸத்³தா⁴ ஸத்³த⁴ம்மஸோப⁴னா;

வினீதுப்பலவண்ணாய, தேவிஜ்ஜா மச்சுஹாயினீ.

366. ஸாயம் பு⁴ஜிஸ்ஸா அனணா, பி⁴க்கு²னீ பா⁴விதிந்த்³ரியா;

ஸப்³ப³யோக³விஸம்யுத்தா, கதகிச்சா அனாஸவா.

367. தம் ஸக்கோ தே³வஸங்கே⁴ன, உபஸங்கம்ம இத்³தி⁴யா;

நமஸ்ஸதி பூ⁴தபதி, ஸுப⁴ம் கம்மாரதீ⁴தரந்தி.

… ஸுபா⁴ கம்மாரதீ⁴தா தே²ரீ….

வீஸதினிபாதோ நிட்டி²தோ.