14. திம்ஸனிபாதோ

1. ஸுபா⁴ஜீவகம்ப³வனிகாதே²ரீகா³தா²

368. ஜீவகம்ப³வனம் ரம்மம், க³ச்ச²ந்திம் பி⁴க்கு²னிம் ஸுப⁴ம்;

து⁴த்தகோ ஸன்னிவாரேஸி [தம் நிவாரேஸி (க.)], தமேனம் அப்³ரவீ ஸுபா⁴.

369. ‘‘கிம் தே அபராதி⁴தம் மயா, யம் மம் ஓவரியான திட்ட²ஸி;

ந ஹி பப்³ப³ஜிதாய ஆவுஸோ, புரிஸோ ஸம்பு²ஸனாய கப்பதி.

370. ‘‘க³ருகே மம ஸத்து²ஸாஸனே, யா ஸிக்கா² ஸுக³தேன தே³ஸிதா;

பரிஸுத்³த⁴பத³ம் அனங்க³ணம், கிம் மம் ஓவரியான திட்ட²ஸி.

371. ‘‘ஆவிலசித்தோ அனாவிலம், ஸரஜோ வீதரஜம் அனங்க³ணம்;

ஸப்³ப³த்த² விமுத்தமானஸம், கிம் மம் ஓவரியான திட்ட²ஸி’’.

372. ‘‘த³ஹரா ச அபாபிகா சஸி, கிம் தே பப்³ப³ஜ்ஜா கரிஸ்ஸதி;

நிக்கி²ப காஸாயசீவரம், ஏஹி ரமாம ஸுபுப்பி²தே [ரமாமஸே புப்பி²தே (ஸீ. ஸ்யா.)] வனே.

373. ‘‘மது⁴ரஞ்ச பவந்தி ஸப்³ப³ஸோ, குஸுமரஜேன ஸமுட்டி²தா து³மா;

பட²மவஸந்தோ ஸுகோ² உது, ஏஹி ரமாம ஸுபுப்பி²தே வனே.

374. ‘‘குஸுமிதஸிக²ரா ச பாத³பா, அபி⁴க³ஜ்ஜந்திவ மாலுதேரிதா;

கா துய்ஹம் ரதி ப⁴விஸ்ஸதி, யதி³ ஏகா வனமோக³ஹிஸ்ஸஸி [வனமோதரிஸ்ஸஸி (ஸீ.), வனமோகா³ஹிஸ்ஸஸி (ஸ்யா. க.)].

375. ‘‘வாளமிக³ஸங்க⁴ஸேவிதம், குஞ்ஜரமத்தகரேணுலோளிதம்;

அஸஹாயிகா க³ந்துமிச்ச²ஸி, ரஹிதம் பி⁴ம்ஸனகம் மஹாவனம்.

376. ‘‘தபனீயகதாவ தீ⁴திகா, விசரஸி சித்தலதேவ அச்ச²ரா;

காஸிகஸுகு²மேஹி வக்³கு³பி⁴, ஸோப⁴ஸீ ஸுவஸனேஹி நூபமே.

377. ‘‘அஹம் தவ வஸானுகோ³ ஸியம், யதி³ விஹரேமஸே [யதி³பி விஹரேஸி (க.)] கானனந்தரே;

ந ஹி மத்தி² தயா பியத்தரோ, பாணோ கின்னரிமந்த³லோசனே.

378. ‘‘யதி³ மே வசனம் கரிஸ்ஸஸி, ஸுகி²தா ஏஹி அகா³ரமாவஸ;

பாஸாத³னிவாதவாஸினீ, பரிகம்மம் தே கரோந்து நாரியோ.

379. ‘‘காஸிகஸுகு²மானி தா⁴ரய, அபி⁴ரோபேஹி [அபி⁴ரோஹேஹி (ஸீ.)] ச மாலவண்ணகம்;

கஞ்சனமணிமுத்தகம் ப³ஹும், விவித⁴ம் ஆப⁴ரணம் கரோமி தே.

380. ‘‘ஸுதோ⁴தரஜபச்ச²த³ம் ஸுப⁴ம், கோ³ணகதூலிகஸந்த²தம் நவம்;

அபி⁴ருஹ ஸயனம் மஹாரஹம், சந்த³னமண்டி³தஸாரக³ந்தி⁴கம்;

381. ‘‘உப்பலம் சுத³கா ஸமுக்³க³தம், யதா² தம் அமனுஸ்ஸஸேவிதம்;

ஏவம் த்வம் ப்³ரஹ்மசாரினீ, ஸகேஸங்கே³ஸு ஜரம் க³மிஸ்ஸஸி’’.

382. ‘‘கிம் தே இத⁴ ஸாரஸம்மதம், குணபபூரம்ஹி ஸுஸானவட்³ட⁴னே;

பே⁴த³னத⁴ம்மே களேவரே [கலேவரே (ஸீ. க.)], யம் தி³ஸ்வா விமனோ உதி³க்க²ஸி’’.

383. ‘‘அக்கீ²னி ச துரியாரிவ, கின்னரியாரிவ பப்³ப³தந்தரே;

தவ மே நயனானி த³க்கி²ய, பி⁴ய்யோ காமரதீ பவட்³ட⁴தி.

384. ‘‘உப்பலஸிக²ரோபமானி தே, விமலே ஹாடகஸன்னிபே⁴ முகே²;

தவ மே நயனானி த³க்கி²ய [நயனானுதி³க்கி²ய (ஸீ.)], பி⁴ய்யோ காமகு³ணோ பவட்³ட⁴தி.

385. ‘‘அபி தூ³ரக³தா ஸரம்ஹஸே, ஆயதபம்ஹே விஸுத்³த⁴த³ஸ்ஸனே;

ந ஹி மத்தி² தயா பியத்தரா, நயனா கின்னரிமந்த³லோசனே’’.

386. ‘‘அபதே²ன பயாதுமிச்ச²ஸி, சந்த³ம் கீளனகம் க³வேஸஸி;

மேரும் லங்கே⁴துமிச்ச²ஸி, யோ த்வம் பு³த்³த⁴ஸுதம் மக்³க³யஸி.

387. ‘‘நத்தி² ஹி லோகே ஸதே³வகே, ராகோ³ யத்த²பி தா³னி மே ஸியா;

நபி நம் ஜானாமி கீரிஸோ, அத² மக்³கே³ன ஹதோ ஸமூலகோ.

388. ‘‘இங்கா³லகுயாவ [இங்கா⁴ளகு²யாவ (ஸ்யா.)] உஜ்ஜி²தோ, விஸபத்தோரிவ அக்³கி³தோ கதோ [அக்³க⁴தோ ஹதோ (ஸீ.)];

நபி நம் பஸ்ஸாமி கீரிஸோ, அத² மக்³கே³ன ஹதோ ஸமூலகோ.

389. ‘‘யஸ்ஸா ஸியா அபச்சவேக்கி²தம், ஸத்தா² வா அனுபாஸிதோ ஸியா;

த்வம் தாதி³ஸிகம் பலோப⁴ய, ஜானந்திம் ஸோ இமம் விஹஞ்ஞஸி.

390. ‘‘மய்ஹஞ்ஹி அக்குட்ட²வந்தி³தே, ஸுக²து³க்கே² ச ஸதீ உபட்டி²தா;

ஸங்க²தமஸுப⁴ந்தி ஜானிய, ஸப்³ப³த்தே²வ மனோ ந லிம்பதி.

391. ‘‘ஸாஹம் ஸுக³தஸ்ஸ ஸாவிகா, மக்³க³ட்ட²ங்கி³கயானயாயினீ;

உத்³த⁴டஸல்லா அனாஸவா, ஸுஞ்ஞாகா³ரக³தா ரமாமஹம்.

392. ‘‘தி³ட்டா² ஹி மயா ஸுசித்திதா, ஸோம்பா⁴ தா³ருகபில்லகானி வா;

தந்தீஹி ச கீ²லகேஹி ச, வினிப³த்³தா⁴ விவித⁴ம் பனச்சகா.

393. ‘‘தம்ஹுத்³த⁴டே தந்திகீ²லகே, விஸ்ஸட்டே² விகலே பரிக்ரிதே [பரிபக்கீ²தே (ஸீ.), பரிபக்கதே (ஸ்யா.)];

ந விந்தே³ய்ய க²ண்ட³ஸோ கதே, கிம்ஹி தத்த² மனம் நிவேஸயே.

394. ‘‘ததூ²பமா தே³ஹகானி மம், தேஹி த⁴ம்மேஹி வினா ந வத்தந்தி;

த⁴ம்மேஹி வினா ந வத்ததி, கிம்ஹி தத்த² மனம் நிவேஸயே.

395. ‘‘யதா² ஹரிதாலேன மக்கி²தம், அத்³த³ஸ சித்திகம் பி⁴த்தியா கதம்;

தம்ஹி தே விபரீதத³ஸ்ஸனம், ஸஞ்ஞா மானுஸிகா நிரத்தி²கா.

396. ‘‘மாயம் விய அக்³க³தோ கதம், ஸுபினந்தேவ ஸுவண்ணபாத³பம்;

உபக³ச்ச²ஸி அந்த⁴ ரித்தகம், ஜனமஜ்ஜே²ரிவ ருப்பரூபகம் [ரூபரூபகம் (க.)].

397. ‘‘வட்டனிரிவ கோடரோஹிதா, மஜ்ஜே² புப்³பு³ளகா ஸஅஸ்ஸுகா;

பீளகோளிகா சேத்த² ஜாயதி, விவிதா⁴ சக்கு²விதா⁴ ச பிண்டி³தா’’.

398. உப்பாடிய சாருத³ஸ்ஸனா, ந ச பஜ்ஜித்த² அஸங்க³மானஸா;

‘‘ஹந்த³ தே சக்கு²ம் ஹரஸ்ஸு தம்’’, தஸ்ஸ நரஸ்ஸ அதா³ஸி தாவதே³.

399. தஸ்ஸ ச விரமாஸி தாவதே³, ராகோ³ தத்த² க²மாபயீ ச நம்;

‘‘ஸோத்தி² ஸியா ப்³ரஹ்மசாரினீ, ந புனோ ஏதி³ஸகம் ப⁴விஸ்ஸதி’’.

400. ‘‘ஆஸாதி³ய [ஆஹனிய (ஸ்யா. க.)] ஏதி³ஸம் ஜனம், அக்³கி³ம் பஜ்ஜலிதம் வ லிங்கி³ய;

க³ண்ஹிய ஆஸீவிஸம் விய, அபி நு ஸோத்தி² ஸியா க²மேஹி நோ’’.

401. முத்தா ச ததோ ஸா பி⁴க்கு²னீ, அக³மீ பு³த்³த⁴வரஸ்ஸ ஸந்திகம்;

பஸ்ஸிய வரபுஞ்ஞலக்க²ணம், சக்கு² ஆஸி யதா² புராணகந்தி.

… ஸுபா⁴ ஜீவகம்ப³வனிகா தே²ரீ….

திம்ஸனிபாதோ நிட்டி²தோ.