1. ஸோணகோளிவிஸத்தே²ரகா³தா²

632. ‘‘யாஹு ரட்டே² ஸமுக்கட்டோ², ரஞ்ஞோ அங்க³ஸ்ஸ பத்³த⁴கூ³ [பத்த²கூ³ (ஸ்யா.), பட்ட²கூ³ (க.)];

ஸ்வாஜ்ஜ த⁴ம்மேஸு உக்கட்டோ², ஸோணோ து³க்க²ஸ்ஸ பாரகூ³.

633. ‘‘பஞ்ச சி²ந்தே³ பஞ்ச ஜஹே, பஞ்ச சுத்தரி பா⁴வயே;

பஞ்சஸங்கா³திகோ³ பி⁴க்கு², ஓக⁴திண்ணோதி வுச்சதி.

634. ‘‘உன்னளஸ்ஸ பமத்தஸ்ஸ, பா³ஹிராஸஸ்ஸ [பா³ஹிராஸயஸ்ஸ (க.)] பி⁴க்கு²னோ;

ஸீலம் ஸமாதி⁴ பஞ்ஞா ச, பாரிபூரிம் ந க³ச்ச²தி.

635. ‘‘யஞ்ஹி கிச்சம் அபவித்³த⁴ம் [தத³பவித்³த⁴ம் (ஸீ. ஸ்யா.)], அகிச்சம் பன கரீயதி;

உன்னளானம் பமத்தானம், தேஸம் வட்³ட⁴ந்தி ஆஸவா.

636. ‘‘யேஸஞ்ச ஸுஸமாரத்³தா⁴, நிச்சம் காயக³தா ஸதி;

அகிச்சம் தே ந ஸேவந்தி, கிச்சே ஸாதச்சகாரினோ;

ஸதானம் ஸம்பஜானானம், அத்த²ம் க³ச்ச²ந்தி ஆஸவா.

637. ‘‘உஜுமக்³க³ம்ஹி அக்கா²தே, க³ச்ச²த² மா நிவத்தத²;

அத்தனா சோத³யத்தானம், நிப்³பா³னமபி⁴ஹாரயே.

638. ‘‘அச்சாரத்³த⁴ம்ஹி வீரியம்ஹி, ஸத்தா² லோகே அனுத்தரோ;

வீணோபமம் கரித்வா மே, த⁴ம்மம் தே³ஸேஸி சக்கு²மா;

தஸ்ஸாஹம் வசனம் ஸுத்வா, விஹாஸிம் ஸாஸனே ரதோ.

639. ‘‘ஸமத²ம் படிபாதே³ஸிம், உத்தமத்த²ஸ்ஸ பத்தியா;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனம்.

640. ‘‘நேக்க²ம்மே [நிக்க²மே (க.), நேக்க²ம்மம் (மஹாவ. 244; அ. நி. 6.55)] அதி⁴முத்தஸ்ஸ, பவிவேகஞ்ச சேதஸோ;

அப்³யாபஜ்ஜா²தி⁴முத்தஸ்ஸ [அப்³யாபஜ்ஜா²தி⁴ம்ஹத்தஸ்ஸ (க.)], உபாதா³னக்க²யஸ்ஸ ச.

641. ‘‘தண்ஹக்க²யாதி⁴முத்தஸ்ஸ, அஸம்மோஹஞ்ச சேதஸோ;

தி³ஸ்வா ஆயதனுப்பாத³ம், ஸம்மா சித்தம் விமுச்சதி.

642. ‘‘தஸ்ஸ ஸம்மா விமுத்தஸ்ஸ, ஸந்தசித்தஸ்ஸ பி⁴க்கு²னோ;

கதஸ்ஸ படிசயோ நத்தி², கரணீயம் ந விஜ்ஜதி.

643. ‘‘ஸேலோ யதா² ஏகக⁴னோ [ஏகக⁴னோ (க.)], வாதேன ந ஸமீரதி;

ஏவம் ரூபா ரஸா ஸத்³தா³, க³ந்தா⁴ ப²ஸ்ஸா ச கேவலா.

644. ‘‘இட்டா² த⁴ம்மா அனிட்டா² ச, நப்பவேதே⁴ந்தி தாதி³னோ;

டி²தம் சித்தம் விஸஞ்ஞுத்தம், வயஞ்சஸ்ஸானுபஸ்ஸதீ’’தி.

… ஸோணோ கோளிவிஸோ தே²ரோ….

தேரஸனிபாதோ நிட்டி²தோ.