14. சுத்³த³ஸகனிபாதோ

1. க²தி³ரவனியரேவதத்தே²ரகா³தா²

645. ‘‘யதா³ அஹம் பப்³ப³ஜிதோ, அகா³ரஸ்மானகா³ரியம்;

நாபி⁴ஜானாமி ஸங்கப்பம், அனரியம் தோ³ஸஸம்ஹிதம்.

646. ‘‘‘இமே ஹஞ்ஞந்து வஜ்ஜ²ந்து, து³க்க²ம் பப்போந்து பாணினோ’;

ஸங்கப்பம் நாபி⁴ஜானாமி, இமஸ்மிம் தீ³க⁴மந்தரே.

647. ‘‘மேத்தஞ்ச அபி⁴ஜானாமி, அப்பமாணம் ஸுபா⁴விதம்;

அனுபுப்³ப³ம் பரிசிதம், யதா² பு³த்³தே⁴ன தே³ஸிதம்.

648. ‘‘ஸப்³ப³மித்தோ ஸப்³ப³ஸகோ², ஸப்³ப³பூ⁴தானுகம்பகோ;

மேத்தசித்தஞ்ச [மேத்தம் சித்தம் (ஸீ. ஸ்யா.)] பா⁴வேமி, அப்³யாபஜ்ஜரதோ [அப்³யாபஜ்ஜ²ரதோ (ஸீ. ஸ்யா.)] ஸதா³.

649. ‘‘அஸம்ஹீரம் அஸம்குப்பம், சித்தம் ஆமோத³யாமஹம்;

ப்³ரஹ்மவிஹாரம் பா⁴வேமி, அகாபுரிஸஸேவிதம்.

650. ‘‘அவிதக்கம் ஸமாபன்னோ, ஸம்மாஸம்பு³த்³த⁴ஸாவகோ;

அரியேன துண்ஹீபா⁴வேன, உபேதோ ஹோதி தாவதே³.

651. ‘‘யதா²பி பப்³ப³தோ ஸேலோ, அசலோ ஸுப்பதிட்டி²தோ;

ஏவம் மோஹக்க²யா பி⁴க்கு², பப்³ப³தோவ ந வேத⁴தி.

652. ‘‘அனங்க³ணஸ்ஸ போஸஸ்ஸ, நிச்சம் ஸுசிக³வேஸினோ;

வாலக்³க³மத்தம் பாபஸ்ஸ, அப்³ப⁴மத்தம்வ கா²யதி.

653. ‘‘நக³ரம் யதா² பச்சந்தம், கு³த்தம் ஸந்தரபா³ஹிரம்;

ஏவம் கோ³பேத² அத்தானம், க²ணோ வோ மா உபச்சகா³.

654. ‘‘நாபி⁴னந்தா³மி மரணம், நாபி⁴னந்தா³மி ஜீவிதம்;

காலஞ்ச படிகங்கா²மி, நிப்³பி³ஸம் ப⁴தகோ யதா².

655. ‘‘நாபி⁴னந்தா³மி மரணம்…பே… ஸம்பஜானோ பதிஸ்ஸதோ.

656. ‘‘பரிசிண்ணோ மயா ஸத்தா², கதம் பு³த்³த⁴ஸ்ஸ ஸாஸனம்;

ஓஹிதோ க³ருகோ பா⁴ரோ, ப⁴வனேத்தி ஸமூஹதா.

657. ‘‘யஸ்ஸ சத்தா²ய பப்³ப³ஜிதோ, அகா³ரஸ்மானகா³ரியம்;

ஸோ மே அத்தோ² அனுப்பத்தோ, ஸப்³ப³ஸம்யோஜனக்க²யோ.

658. ‘‘ஸம்பாதே³த²ப்பமாதே³ன, ஏஸா மே அனுஸாஸனீ;

ஹந்தா³ஹம் பரினிப்³பி³ஸ்ஸம், விப்பமுத்தோம்ஹி ஸப்³ப³தீ⁴’’தி.

… க²தி³ரவனியரேவதோ தே²ரோ….

2. கோ³த³த்தத்தே²ரகா³தா²

659. ‘‘யதா²பி ப⁴த்³தோ³ ஆஜஞ்ஞோ, து⁴ரே யுத்தோ து⁴ரஸ்ஸஹோ [து⁴ராஸஹோ (அட்ட².)];

மதி²தோ அதிபா⁴ரேன, ஸம்யுக³ம் நாதிவத்ததி.

660. ‘‘ஏவம் பஞ்ஞாய யே தித்தா, ஸமுத்³தோ³ வாரினா யதா²;

ந பரே அதிமஞ்ஞந்தி, அரியத⁴ம்மோவ பாணினம்.

661. ‘‘காலே காலவஸம் பத்தா, ப⁴வாப⁴வவஸம் க³தா;

நரா து³க்க²ம் நிக³ச்ச²ந்தி, தேத⁴ ஸோசந்தி மாணவா [மானவா (ஸீ.)].

662. ‘‘உன்னதா ஸுக²த⁴ம்மேன, து³க்க²த⁴ம்மேன சோனதா;

த்³வயேன பா³லா ஹஞ்ஞந்தி, யதா²பூ⁴தம் அத³ஸ்ஸினோ.

663. ‘‘யே ச து³க்கே² ஸுக²ஸ்மிஞ்ச, மஜ்ஜே² ஸிப்³பி³னிமச்சகூ³;

டி²தா தே இந்த³கீ²லோவ, ந தே உன்னதஓனதா.

664. ‘‘ந ஹேவ லாபே⁴ நாலாபே⁴, ந யஸே ந ச கித்தியா;

ந நிந்தா³யம் பஸம்ஸாய, ந தே து³க்கே² ஸுக²ம்ஹி.

665. ‘‘ஸப்³ப³த்த² தே ந லிம்பந்தி, உத³பி³ந்து³வ போக்க²ரே;

ஸப்³ப³த்த² ஸுகி²தா தீ⁴ரா, ஸப்³ப³த்த² அபராஜிதா.

666. ‘‘த⁴ம்மேன ச அலாபோ⁴ யோ, யோ ச லாபோ⁴ அத⁴ம்மிகோ;

அலாபோ⁴ த⁴ம்மிகோ ஸேய்யோ, யம் சே லாபோ⁴ அத⁴ம்மிகோ.

667. ‘‘யஸோ ச அப்பபு³த்³தீ⁴னம், விஞ்ஞூனம் அயஸோ ச யோ;

அயஸோவ ஸேய்யோ விஞ்ஞூனம், ந யஸோ அப்பபு³த்³தி⁴னம்.

668. ‘‘து³ம்மேதே⁴ஹி பஸம்ஸா ச, விஞ்ஞூஹி க³ரஹா ச யா;

க³ரஹாவ ஸேய்யோ விஞ்ஞூஹி, யம் சே பா³லப்பஸம்ஸனா.

669. ‘‘ஸுக²ஞ்ச காமமயிகம், து³க்க²ஞ்ச பவிவேகியம்;

பவிவேகது³க்க²ம் ஸேய்யோ, யம் சே காமமயம் ஸுக²ம்.

670. ‘‘ஜீவிதஞ்ச அத⁴ம்மேன, த⁴ம்மேன மரணஞ்ச யம்;

மரணம் த⁴ம்மிகம் ஸேய்யோ, யம் சே ஜீவே அத⁴ம்மிகம்.

671. ‘‘காமகோபப்பஹீனா யே, ஸந்தசித்தா ப⁴வாப⁴வே;

சரந்தி லோகே அஸிதா, நத்தி² தேஸம் பியாபியம்.

672. ‘‘பா⁴வயித்வான போ³ஜ்ஜ²ங்கே³, இந்த்³ரியானி ப³லானி ச;

பப்புய்ய பரமம் ஸந்திம், பரினிப்³ப³ந்தினாஸவா’’தி.

… கோ³த³த்தோ தே²ரோ….

சுத்³த³ஸகனிபாதோ நிட்டி²தோ.