5. மட்ட²குண்ட³லீபேதவத்து²

186. [வி. வ. 1207] ‘‘அலங்கதோ மட்ட²குண்ட³லீ, மாலதா⁴ரீ ஹரிசந்த³னுஸ்ஸதோ³;

பா³ஹா பக்³க³ய்ஹ கந்த³ஸி, வனமஜ்ஜே² கிம் து³க்கி²தோ துவ’’ந்தி.

187. ‘‘ஸோவண்ணமயோ பப⁴ஸ்ஸரோ, உப்பன்னோ ரத²பஞ்ஜரோ மம;

தஸ்ஸ சக்கயுக³ம் ந விந்தா³மி, தேன து³க்கே²ன ஜஹாமி ஜீவித’’ந்தி.

188. ‘‘ஸோவண்ணமயம் மணிமயம், லோஹிதகமயம் [லோஹிதங்க³மயம் (ஸ்யா.), லோஹிதங்கமயம் (ஸீ.), லோஹமயம் (கத்த²சி)] அத² ரூபியமயம்;

ஆசிக்க² மே ப⁴த்³த³மாணவ, சக்கயுக³ம் படிபாத³யாமி தே’’தி.

189. ஸோ மாணவோ தஸ்ஸ பாவதி³, ‘‘சந்த³ஸூரியா உப⁴யேத்த² தி³ஸ்ஸரே;

ஸோவண்ணமயோ ரதோ² மம, தேன சக்கயுகே³ன ஸோப⁴தீ’’தி.

190. ‘‘பா³லோ கோ² த்வம் அஸி மாணவ, யோ த்வம் பத்த²யஸே அபத்தி²யம்;

மஞ்ஞாமி துவம் மரிஸ்ஸஸி, ந ஹி த்வம் லச்ச²ஸி சந்த³ஸூரியே’’தி.

191. ‘‘க³மனாக³மனம்பி தி³ஸ்ஸதி, வண்ணதா⁴து உப⁴யத்த² வீதி²யா;

பேதோ காலகதோ ந தி³ஸ்ஸதி, கோ நித⁴ கந்த³தம் பா³ல்யதரோ’’தி.

192. ‘‘ஸச்சம் கோ² வதே³ஸி மாணவ, அஹமேவ கந்த³தம் பா³ல்யதரோ;

சந்த³ம் விய தா³ரகோ ருத³ம், பேதம் காலகதாபி⁴பத்த²யி’’ந்தி.

193. ‘‘ஆதி³த்தம் வத மம் ஸந்தம், க⁴தஸித்தம்வ பாவகம்;

வாரினா விய ஓஸிஞ்சம், ஸப்³ப³ம் நிப்³பா³பயே த³ரம்.

194. ‘‘அப்³ப³ஹீ [அப்³பூ³ள்ஹம் (ஸ்யா. க.)] வத மே ஸல்லம், ஸோகம் ஹத³யனிஸ்ஸிதம்;

யோ மே ஸோகபரேதஸ்ஸ, புத்தஸோகம் அபானுதி³.

195. ‘‘ஸ்வாஹம் அப்³பூ³ள்ஹஸல்லோஸ்மி, ஸீதிபூ⁴தோஸ்மி நிப்³பு³தோ;

ந ஸோசாமி ந ரோதா³மி, தவ ஸுத்வான மாணவா’’தி.

196. ‘‘தே³வதா நுஸி க³ந்த⁴ப்³போ³, அது³ ஸக்கோ புரிந்த³தோ³;

கோ வா த்வம் கஸ்ஸ வா புத்தோ, கத²ம் ஜானேமு தம் மய’’ந்தி.

197. ‘‘யஞ்ச கந்த³ஸி யஞ்ச ரோத³ஸி, புத்தம் ஆளாஹனே ஸயம் த³ஹித்வா;

ஸ்வாஹம் குஸலம் கரித்வா கம்மம், தித³ஸானம் ஸஹப்³யதம் க³தோ’’தி.

198. ‘‘அப்பம் வா ப³ஹும் வா நாத்³த³ஸாம, தா³னம் த³த³ந்தஸ்ஸ ஸகே அகா³ரே;

உபோஸத²கம்மம் வா தாதி³ஸம், கேன கம்மேன க³தோஸி தே³வலோக’’ந்தி.

199. ‘‘ஆபா³தி⁴கோஹம் து³க்கி²தோ கி³லானோ, ஆதுரரூபோம்ஹி ஸகே நிவேஸனே;

பு³த்³த⁴ம் விக³தரஜம் விதிண்ணகங்க²ம், அத்³த³க்கி²ம் ஸுக³தம் அனோமபஞ்ஞம்.

200. ‘‘ஸ்வாஹம் முதி³தமனோ பஸன்னசித்தோ, அஞ்ஜலிம் அகரிம் ததா²க³தஸ்ஸ;

தாஹம் குஸலம் கரித்வான கம்மம், தித³ஸானம் ஸஹப்³யதம் க³தோ’’தி.

201. ‘‘அச்ச²ரியம் வத அப்³பு⁴தம் வத, அஞ்ஜலிகம்மஸ்ஸ அயமீதி³ஸோ விபாகோ;

அஹம்பி முதி³தமனோ பஸன்னசித்தோ, அஜ்ஜேவ பு³த்³த⁴ம் ஸரணம் வஜாமீ’’தி.

202. ‘‘அஜ்ஜேவ பு³த்³த⁴ம் ஸரணம் வஜாஹி, த⁴ம்மஞ்ச ஸங்க⁴ஞ்ச பஸன்னசித்தோ;

ததே²வ ஸிக்கா²ய பதா³னி பஞ்ச, அக²ண்ட³பு²ல்லானி ஸமாதி³யஸ்ஸு.

203. ‘‘பாணாதிபாதா விரமஸ்ஸு கி²ப்பம், லோகே அதி³ன்னம் பரிவஜ்ஜயஸ்ஸு;

அமஜ்ஜபோ மா ச முஸா ப⁴ணாஹி, ஸகேன தா³ரேன ச ஹோஹி துட்டோ²’’தி.

204. ‘‘அத்த²காமோஸி மே யக்க², ஹிதகாமோஸி தே³வதே;

கரோமி துய்ஹம் வசனம், த்வம்ஸி ஆசரியோ மமாதி.

205. ‘‘உபேமி ஸரணம் பு³த்³த⁴ம், த⁴ம்மஞ்சாபி அனுத்தரம்;

ஸங்க⁴ஞ்ச நரதே³வஸ்ஸ, க³ச்சா²மி ஸரணம் அஹம்.

206. ‘‘பாணாதிபாதா விரமாமி கி²ப்பம், லோகே அதி³ன்னம் பரிவஜ்ஜயாமி;

அமஜ்ஜபோ நோ ச முஸா ப⁴ணாமி; ஸகேன தா³ரேன ச ஹோமி துட்டோ²’’தி.

மட்ட²குண்ட³லீபேதவத்து² பஞ்சமம்.