6. கண்ஹபேதவத்து²

207. ‘‘உட்டே²ஹி கண்ஹ கிம் ஸேஸி, கோ அத்தோ² ஸுபனேன தே;

யோ ச துய்ஹம் ஸகோ பா⁴தா, ஹத³யம் சக்கு² ச [சக்கு²ம்வ (அட்ட².)] த³க்கி²ணம்;

தஸ்ஸ வாதா ப³லீயந்தி, ஸஸம் ஜப்பதி [க⁴டோ ஜப்பதி (க.)] கேஸவா’’தி.

208. ‘‘தஸ்ஸ தம் வசனம் ஸுத்வா, ரோஹிணேய்யஸ்ஸ கேஸவோ;

தரமானரூபோ வுட்டா²ஸி, பா⁴துஸோகேன அட்டிதோ.

209. ‘‘கிம் நு உம்மத்தரூபோவ, கேவலம் த்³வாரகம் இமம்;

ஸஸோ ஸஸோதி லபஸி, கீதி³ஸம் ஸஸமிச்ச²ஸி.

210. ‘‘ஸோவண்ணமயம் மணிமயம், லோஹமயம் அத² ரூபியமயம்;

ஸங்க²ஸிலாபவாளமயம், காரயிஸ்ஸாமி தே ஸஸம்.

211. ‘‘ஸந்தி அஞ்ஞேபி ஸஸகா, அரஞ்ஞவனகோ³சரா;

தேபி தே ஆனயிஸ்ஸாமி, கீதி³ஸம் ஸஸமிச்ச²ஸீ’’தி.

212. ‘‘நாஹமேதே ஸஸே இச்சே², யே ஸஸா பத²விஸ்ஸிதா;

சந்த³தோ ஸஸமிச்சா²மி, தம் மே ஓஹர கேஸவா’’தி.

213. ‘‘ஸோ நூன மது⁴ரம் ஞாதி, ஜீவிதம் விஜஹிஸ்ஸஸி;

அபத்தி²யம் பத்த²யஸி, சந்த³தோ ஸஸமிச்ச²ஸீ’’தி.

214. ‘‘ஏவம் சே கண்ஹ ஜானாஸி, யத²ஞ்ஞமனுஸாஸஸி;

கஸ்மா புரே மதம் புத்தம், அஜ்ஜாபி மனுஸோசஸி.

215. ‘‘ந யம் லப்³பா⁴ மனுஸ்ஸேன, அமனுஸ்ஸேன வா பன;

ஜாதோ மே மா மரி புத்தோ, குதோ லப்³பா⁴ அலப்³பி⁴யம்.

216. ‘‘ந மந்தா மூலபே⁴ஸஜ்ஜா, ஓஸதே⁴ஹி த⁴னேன வா;

ஸக்கா ஆனயிதும் கண்ஹ, யம் பேதமனுஸோசஸி.

217. ‘‘மஹத்³த⁴னா மஹாபோ⁴கா³, ரட்ட²வந்தோபி க²த்தியா;

பஹூதத⁴னத⁴ஞ்ஞாஸே, தேபி நோ [நத்தே²த்த²பாட²பே⁴தோ³] அஜராமரா.

218. ‘‘க²த்தியா ப்³ராஹ்மணா வேஸ்ஸா, ஸுத்³தா³ சண்டா³லபுக்குஸா;

ஏதே சஞ்ஞே ச ஜாதியா, தேபி நோ அஜராமரா.

219. ‘‘யே மந்தம் பரிவத்தேந்தி, ச²ளங்க³ம் ப்³ரஹ்மசிந்திதம்;

ஏதே சஞ்ஞே ச விஜ்ஜாய, தேபி நோ அஜராமரா.

220. ‘‘இஸயோ வாபி [இஸயோ சாபி (விமானவத்து² 99)] யே ஸந்தா, ஸஞ்ஞதத்தா தபஸ்ஸினோ;

ஸரீரம் தேபி காலேன, விஜஹந்தி தபஸ்ஸினோ.

221. ‘‘பா⁴விதத்தா அரஹந்தோ, கதகிச்சா அனாஸவா;

நிக்கி²பந்தி இமம் தே³ஹம், புஞ்ஞபாபபரிக்க²யா’’தி.

222. ‘‘ஆதி³த்தம் வத மம் ஸந்தம், க⁴தஸித்தம்வ பாவகம்;

வாரினா விய ஓஸிஞ்சம், ஸப்³ப³ம் நிப்³பா³பயே த³ரம்.

223. ‘‘அப்³ப³ஹீ வத மே ஸல்லம், ஸோகம் ஹத³யனிஸ்ஸிதம்;

யோ மே ஸோகபரேதஸ்ஸ, புத்தஸோகம் அபானுதி³.

224. ‘‘ஸ்வாஹம் அப்³பூ³ள்ஹஸல்லோஸ்மி, ஸீதிபூ⁴தோஸ்மி நிப்³பு³தோ;

ந ஸோசாமி ந ரோதா³மி, தவ ஸுத்வான பா⁴திக’’ [பா⁴ஸிதம் (ஸ்யா.)].

225. ஏவம் கரோந்தி ஸப்பஞ்ஞா, யே ஹோந்தி அனுகம்பகா;

நிவத்தயந்தி ஸோகம்ஹா, க⁴டோ ஜேட்ட²ம்வ பா⁴தரம்.

226. யஸ்ஸ ஏதாதி³ஸா ஹோந்தி, அமச்சா பரிசாரகா;

ஸுபா⁴ஸிதேன அன்வேந்தி, க⁴டோ ஜேட்ட²ம்வ பா⁴தரந்தி.

கண்ஹபேதவத்து² ச²ட்ட²ம்.