6. பாடிஹாரியகதா²

30. ‘‘தீணிமானி, பி⁴க்க²வே [அ. நி. 3.61 பஸ்ஸிதப்³பா³], பாடிஹாரியானி. கதமானி தீணி? இத்³தி⁴பாடிஹாரியம், ஆதே³ஸனாபாடிஹாரியம், அனுஸாஸனீபாடிஹாரியம்.

‘‘கதமஞ்ச, பி⁴க்க²வே, இத்³தி⁴பாடிஹாரியம்? இத⁴, பி⁴க்க²வே, ஏகச்சோ அனேகவிஹிதம் இத்³தி⁴வித⁴ம் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி; ஆவிபா⁴வம் திரோபா⁴வம்…பே… யாவ ப்³ரஹ்மலோகாபி காயேன வஸம் வத்தேதி. இத³ம் வுச்சதி, பி⁴க்க²வே, இத்³தி⁴பாடிஹாரியம்.

‘‘கதமஞ்ச, பி⁴க்க²வே, ஆதே³ஸனாபாடிஹாரியம்? இத⁴, பி⁴க்க²வே, ஏகச்சோ நிமித்தேன ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹும் சேபி ஆதி³ஸதி, ததே²வ தம் ஹோதி, நோ அஞ்ஞதா². இத⁴ பன, பி⁴க்க²வே, ஏகச்சோ ந ஹேவ கோ² நிமித்தேன ஆதி³ஸதி, அபி ச கோ² மனுஸ்ஸானம் வா அமனுஸ்ஸானம் வா தே³வதானம் வா ஸத்³த³ம் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹும் சேபி ஆதி³ஸதி, ததே²வ தம் ஹோதி, நோ அஞ்ஞதா². இத⁴ பன, பி⁴க்க²வே, ஏகச்சோ ந ஹேவ கோ² நிமித்தேன ஆதி³ஸதி, நபி மனுஸ்ஸானம் வா அமனுஸ்ஸானம் வா தே³வதானம் வா ஸத்³த³ம் ஸுத்வா ஆதி³ஸதி, அபி ச கோ² விதக்கயதோ விசாரயதோ விதக்கவிப்பா²ரஸத்³த³ம் ஸுத்வா ஆதி³ஸதி – ‘ஏவம்பி தே மனோ, இத்த²ம்பி தே மனோ, இதிபி தே சித்த’ந்தி. ஸோ ப³ஹும் சேபி ஆதி³ஸதி, ததே²வ தம் ஹோதி, நோ அஞ்ஞதா². இத⁴ பன, பி⁴க்க²வே, ஏகச்சோ ந ஹேவ கோ² நிமித்தேன ஆதி³ஸதி, நபி மனுஸ்ஸானம் வா அமனுஸ்ஸானம் வா தே³வதானம் வா ஸத்³த³ம் ஸுத்வா ஆதி³ஸதி, நபி விதக்கயதோ விசாரயதோ விதக்கவிப்பா²ரஸத்³த³ம் ஸுத்வா ஆதி³ஸதி, அபி ச கோ² அவிதக்கம் அவிசாரம் ஸமாதி⁴ம் ஸமாபன்னஸ்ஸ சேதஸா சேதோ பரிச்ச பஜானாதி – ‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ [ததா² இமஸ்ஸ (ஸ்யா.), யதா² இமஸ்ஸ (க.) அ. நி. 3.61 பஸ்ஸிதப்³பா³] சித்தஸ்ஸ அனந்தரா அமுகம் நாம விதக்கம் விதக்கயிஸ்ஸதீ’தி [விதக்கேஸ்ஸதீதி (ஸ்யா.) அ. நி. 3.61]. ஸோ ப³ஹும் சேபி ஆதி³ஸதி, ததே²வ தம் ஹோதி, நோ அஞ்ஞதா². இத³ம் வுச்சதி, பி⁴க்க²வே, ஆதே³ஸனாபாடிஹாரியம்.

‘‘கதமஞ்ச, பி⁴க்க²வே, அனுஸாஸனீபாடிஹாரியம்? இத⁴, பி⁴க்க²வே, ஏகச்சோ ஏவமனுஸாஸதி – ‘ஏவம் விதக்கேத², மா ஏவம் விதக்கயித்த². ஏவம் மனஸி கரோத², மா ஏவம் மனஸி கரித்த². இத³ம் பஜஹத², இத³ம் உபஸம்பஜ்ஜ விஹரதா²’தி. இத³ம் வுச்சதி, பி⁴க்க²வே, அனுஸாஸனீபாடிஹாரியம். இமானி கோ², பி⁴க்க²வே, தீணி பாடிஹாரியானி’’.

31. நேக்க²ம்மம் இஜ்ஜ²தீதி – இத்³தி⁴. காமச்ச²ந்த³ம் படிஹரதீதி – பாடிஹாரியம். யே தேன நேக்க²ம்மேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘தம் கோ² பன நேக்க²ம்மம் ஏவம் ஆஸேவிதப்³ப³ம், ஏவம் பா⁴வேதப்³ப³ம், ஏவம் ப³ஹுலீகாதப்³ப³ம், ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்.

அப்³யாபாதோ³ இஜ்ஜ²தீதி – இத்³தி⁴. ப்³யாபாத³ம் படிஹரதீதி – பாடிஹாரியம். யே தேன அப்³யாபாதே³ன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘ஸோ கோ² பன அப்³யாபாதோ³ ஏவம் ஆஸேவிதப்³போ³, ஏவம் பா⁴வேதப்³போ³, ஏவம் ப³ஹுலீகாதப்³போ³, ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்.

ஆலோகஸஞ்ஞா இஜ்ஜ²தீதி – இத்³தி⁴. தி²னமித்³த⁴ம் படிஹரதீதி – பாடிஹாரியம். யே தாய ஆலோகஸஞ்ஞாய ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘ஸா கோ² பன ஆலோகஸஞ்ஞா ஏவம் ஆஸேவிதப்³பா³, ஏவம் பா⁴வேதப்³பா³, ஏவம் ப³ஹுலீகாதப்³பா³, ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்.

அவிக்கே²போ இஜ்ஜ²தீதி – இத்³தி⁴. உத்³த⁴ச்சம் படிஹரதீதி – பாடிஹாரியம். யே தேன அவிக்கே²பேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘ஸோ கோ² பன அவிக்கே²போ ஏவம் ஆஸேவிதப்³போ³, ஏவம் பா⁴வேதப்³போ³, ஏவம் ப³ஹுலீகாதப்³போ³, ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்.

த⁴ம்மவவத்தா²னம் இஜ்ஜ²தீதி – இத்³தி⁴. விசிகிச்ச²ம் படிஹரதீதி – பாடிஹாரியம். யே தேன த⁴ம்மவவத்தா²னேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘தம் கோ² பன த⁴ம்மவவத்தா²னம் ஏவம் ஆஸேவிதப்³ப³ம், ஏவம் பா⁴வேதப்³ப³ம், ஏவம் ப³ஹுலீகாதப்³ப³ம், ஏவம் தத³னுத⁴ம்மதா, ஸதி உபட்டா²பேதப்³பா³’’தி – அனுஸாஸனீபாடிஹாரியம்.

ஞாணம் இஜ்ஜ²தீதி – இத்³தி⁴. அவிஜ்ஜம் படிஹரதீதி – பாடிஹாரியம். யே தேன ஞாணேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘தம் கோ² பன ஞாணம் ஏவம் ஆஸேவிதப்³ப³ம், ஏவம் பா⁴வேதப்³ப³ம், ஏவம் ப³ஹுலீகாதப்³ப³ம், ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்.

பாமோஜ்ஜம் இஜ்ஜ²தீதி – இத்³தி⁴. அரதிம் படிஹரதீதி – பாடிஹாரியம். யே தேன பாமோஜ்ஜேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘தம் கோ² பன பாமோஜ்ஜம் ஏவம் ஆஸேவிதப்³ப³ம், ஏவம் பா⁴வேதப்³ப³ம், ஏவம் ப³ஹுலீகாதப்³ப³ம், ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்…பே….

பட²மம் ஜா²னம் இஜ்ஜ²தீதி – இத்³தி⁴. நீவரணே படிஹரதீதி – பாடிஹாரியம். யே தேன பட²மேன ஜா²னேன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘தம் கோ² பன பட²மம் ஜா²னம் ஏவம் ஆஸேவிதப்³ப³ம், ஏவம் பா⁴வேதப்³ப³ம், ஏவம் ப³ஹுலீகாதப்³ப³ம், ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்…பே….

அரஹத்தமக்³கோ³ இஜ்ஜ²தீதி – இத்³தி⁴. ஸப்³ப³கிலேஸே படிஹரதீதி – பாடிஹாரியம். யே தேன அரஹத்தமக்³கே³ன ஸமன்னாக³தா, ஸப்³பே³ தே விஸுத்³த⁴சித்தா அனாவிலஸங்கப்பாதி – ஆதே³ஸனாபாடிஹாரியம். ‘‘ஸோ கோ² பன அரஹத்தமக்³கோ³ ஏவம் ஆஸேவிதப்³போ³, ஏவம் பா⁴வேதப்³போ³, ஏவம் ப³ஹுலீகாதப்³போ³, ஏவம் தத³னுத⁴ம்மதா ஸதி உபட்டா²பேதப்³பா³’’தி – அனுஸாஸனீபாடிஹாரியம்.

32. நேக்க²ம்மம் இஜ்ஜ²தீதி – இத்³தி⁴. காமச்ச²ந்த³ம் படிஹரதீதி – பாடிஹாரியம். யா ச இத்³தி⁴ யஞ்ச பாடிஹாரியம், இத³ம் வுச்சதி இத்³தி⁴பாடிஹாரியம். அப்³யாபாதோ³ இஜ்ஜ²தீதி – இத்³தி⁴. ப்³யாபாத³ம் படிஹரதீதி – பாடிஹாரியம். யா ச இத்³தி⁴ யஞ்ச பாடிஹாரியம், இத³ம் வுச்சதி இத்³தி⁴பாடிஹாரியம். ஆலோகஸஞ்ஞா இஜ்ஜ²தீதி – இத்³தி⁴. தி²னமித்³த⁴ம் படிஹரதீதி – பாடிஹாரியம்…பே… அரஹத்தமக்³கோ³ இஜ்ஜ²தீதி – இத்³தி⁴. ஸப்³ப³கிலேஸே படிஹரதீதி – பாடிஹாரியம். யா ச இத்³தி⁴ யஞ்ச பாடிஹாரியம், இத³ம் வுச்சதி இத்³தி⁴பாடிஹாரியந்தி.

பாடிஹாரியகதா² நிட்டி²தா.