3. அபி⁴ஸமயகதா²

19. அபி⁴ஸமயோதி. கேன அபி⁴ஸமேதி? சித்தேன அபி⁴ஸமேதி.

ஹஞ்சி சித்தேன அபி⁴ஸமேதி, தேன ஹி அஞ்ஞாணீ அபி⁴ஸமேதி? ந அஞ்ஞாணீ அபி⁴ஸமேதி. ஞாணேன அபி⁴ஸமேதி.

ஹஞ்சி ஞாணேன அபி⁴ஸமேதி, தேன ஹி அசித்தேன ச ஞாணேன ச அசித்தகோ [தேன ஹி அசித்தகோ (ஸ்யா.)] அபி⁴ஸமேதி? ந அசித்தகோ அபி⁴ஸமேதி. சித்தேன ச ஞாணேன ச அபி⁴ஸமேதி.

ஹஞ்சி சித்தேன ச ஞாணேன ச அபி⁴ஸமேதி, தேன ஹி காமாவசரசித்தேன ச ஞாணேன ச அபி⁴ஸமேதி? ந காமாவசரசித்தேன ச ஞாணேன ச அபி⁴ஸமேதி.

தேன ஹி ரூபாவசரசித்தேன ச ஞாணேன ச அபி⁴ஸமேதி? ந ரூபாவசரசித்தேன ச ஞாணேன ச அபி⁴ஸமேதி.

தேன ஹி அரூபாவசரசித்தேன ச ஞாணேன ச அபி⁴ஸமேதி? ந அரூபாவசரசித்தேன ச ஞாணேன ச அபி⁴ஸமேதி.

தேன ஹி கம்மஸ்ஸகதசித்தேன ச ஞாணேன ச அபி⁴ஸமேதி? ந கம்மஸ்ஸகதசித்தேன ச ஞாணேன ச அபி⁴ஸமேதி.

தேன ஹி ஸச்சானுலோமிகசித்தேன ச ஞாணேன ச அபி⁴ஸமேதி? ந ஸச்சானுலோமிகசித்தேன ச ஞாணேன ச அபி⁴ஸமேதி.

தேன ஹி அதீதசித்தேன ச ஞாணேன ச அபி⁴ஸமேதி? ந அதீதசித்தேன ச ஞாணேன ச அபி⁴ஸமேதி.

தேன ஹி அனாக³தசித்தேன ச ஞாணேன ச அபி⁴ஸமேதி? ந அனாக³தசித்தேன ச ஞாணேன ச அபி⁴ஸமேதி.

தேன ஹி பச்சுப்பன்னலோகியசித்தேன ச ஞாணேன ச அபி⁴ஸமேதி? ந பச்சுப்பன்னலோகியசித்தேன ச ஞாணேன ச அபி⁴ஸமேதி. லோகுத்தரமக்³க³க்க²ணே பச்சுப்பன்னசித்தேன ச ஞாணேன ச அபி⁴ஸமேதி.

கத²ம் லோகுத்தரமக்³க³க்க²ணே பச்சுப்பன்னசித்தேன ச ஞாணேன ச அபி⁴ஸமேதி? லோகுத்தரமக்³க³க்க²ணே உப்பாதா³தி⁴பதேய்யம் சித்தம் ஞாணஸ்ஸ ஹேது பச்சயோ ச. தம்ஸம்பயுத்தம் நிரோத⁴கோ³சரம் த³ஸ்ஸனாதி⁴பதேய்யம் ஞாணம் சித்தஸ்ஸ ஹேது பச்சயோ ச. தம்ஸம்பயுத்தம் ஞாணம் நிரோத⁴கோ³சரம். ஏவம் லோகுத்தரமக்³க³க்க²ணே பச்சுப்பன்னசித்தேன ச ஞாணேன ச அபி⁴ஸமேதி.

20. கிம் நு ஏத்தகோயேவ அபி⁴ஸமயோதி? ந ஹி.லோகுத்தரமக்³க³க்க²ணே த³ஸ்ஸனாபி⁴ஸமயோ ஸம்மாதி³ட்டி², அபி⁴னிரோபனாபி⁴ஸமயோ ஸம்மாஸங்கப்போ, பரிக்³க³ஹாபி⁴ஸமயோ ஸம்மாவாசா, ஸமுட்டா²னாபி⁴ஸமயோ ஸம்மாகம்மந்தோ, வோதா³னாபி⁴ஸமயோ ஸம்மாஆஜீவோ, பக்³க³ஹாபி⁴ஸமயோ ஸம்மாவாயாமோ, உபட்டா²னாபி⁴ஸமயோ ஸம்மாஸதி, அவிக்கே²பாபி⁴ஸமயோ ஸம்மாஸமாதி⁴; உபட்டா²னாபி⁴ஸமயோ ஸதிஸம்போ³ஜ்ஜ²ங்கோ³, பவிசயாபி⁴ஸமயோ த⁴ம்மவிசயஸம்போ³ஜ்ஜ²ங்கோ³, பக்³க³ஹாபி⁴ஸமயோ வீரியஸம்போ³ஜ்ஜ²ங்கோ³, ப²ரணாபி⁴ஸமயோ பீதிஸம்போ³ஜ்ஜ²ங்கோ³, உபஸமாபி⁴ஸமயோ பஸ்ஸத்³தி⁴ஸம்போ³ஜ்ஜ²ங்கோ³, அவிக்கே²பாபி⁴ஸமயோ ஸமாதி⁴ஸம்போ³ஜ்ஜ²ங்கோ³, படிஸங்கா²னாபி⁴ஸமயோ உபேக்கா²ஸம்போ³ஜ்ஜ²ங்கோ³; அஸ்ஸத்³தி⁴யே அகம்பியாபி⁴ஸமயோ ஸத்³தா⁴ப³லம், கோஸஜ்ஜே அகம்பியாபி⁴ஸமயோ வீரியப³லம், பமாதே³ அகம்பியாபி⁴ஸமயோ ஸதிப³லம், உத்³த⁴ச்சே அகம்பியாபி⁴ஸமயோ ஸமாதி⁴ப³லம், அவிஜ்ஜாய அகம்பியாபி⁴ஸமயோ பஞ்ஞாப³லம்; அதி⁴மோக்கா²பி⁴ஸமயோ ஸத்³தி⁴ந்த்³ரியம், பக்³க³ஹாபி⁴ஸமயோ வீரியிந்த்³ரியம், உபட்டா²னாபி⁴ஸமயோ ஸதிந்த்³ரியம், அவிக்கே²பாபி⁴ஸமயோ ஸமாதி⁴ந்த்³ரியம், த³ஸ்ஸனாபி⁴ஸமயோ பஞ்ஞிந்த்³ரியம். ஆதி⁴பதேய்யட்டே²ன இந்த்³ரியாபி⁴ஸமயோ, அகம்பியட்டே²ன ப³லாபி⁴ஸமயோ, நிய்யானட்டே²ன போ³ஜ்ஜ²ங்கா³பி⁴ஸமயோ, ஹேதுட்டே²ன மக்³கா³பி⁴ஸமயோ, உபட்டா²னட்டே²ன ஸதிபட்டா²னாபி⁴ஸமயோ, பத³ஹட்டே²ன ஸம்மப்பதா⁴னாபி⁴ஸமயோ, இஜ்ஜ²னட்டே²ன இத்³தி⁴பாதா³பி⁴ஸமயோ, தத²ட்டே²ன ஸச்சாபி⁴ஸமயோ, அவிக்கே²பட்டே²ன ஸமதா²பி⁴ஸமயோ, அனுபஸ்ஸனட்டே²ன விபஸ்ஸனாபி⁴ஸமயோ, ஏகரஸட்டே²ன ஸமத²விபஸ்ஸனாபி⁴ஸமயோ, அனதிவத்தனட்டே²ன யுக³னத்³தா⁴பி⁴ஸமயோ, ஸம்வரட்டே²ன ஸீலவிஸுத்³தி⁴அபி⁴ஸமயோ, அவிக்கே²பட்டே²ன விஸுத்³தி⁴அபி⁴ஸமயோ, த³ஸ்ஸனட்டே²ன தி³ட்டி²விஸுத்³தி⁴அபி⁴ஸமயோ, முத்தட்டே²ன விமோக்கா²பி⁴ஸமயோ, படிவேத⁴ட்டே²ன விஜ்ஜாபி⁴ஸமயோ, பரிச்சாக³ட்டே²ன விமுத்திஅபி⁴ஸமயோ, ஸமுச்சே²த³ட்டே²ன க²யே ஞாணம் அபி⁴ஸமயோ. ச²ந்தோ³ மூலட்டே²ன அபி⁴ஸமயோ, மனஸிகாரோ ஸமுட்டா²னட்டே²ன அபி⁴ஸமயோ, ப²ஸ்ஸோ ஸமோதா⁴னட்டே²ன அபி⁴ஸமயோ, வேத³னா ஸமோஸரணட்டே²ன அபி⁴ஸமயோ, ஸமாதி⁴ பமுக²ட்டே²ன அபி⁴ஸமயோ, ஸதி ஆதி⁴பதேய்யட்டே²ன அபி⁴ஸமயோ, பஞ்ஞா ததுத்தரட்டே²ன அபி⁴ஸமயோ, விமுத்தி ஸாரட்டே²ன அபி⁴ஸமயோ, அமதோக³த⁴ம் நிப்³பா³னம் பரியோஸானட்டே²ன அபி⁴ஸமயோ.

21. கிம் நு ஏத்தகோயேவ அபி⁴ஸமயோதி? ந ஹி. ஸோதாபத்திமக்³க³க்க²ணே த³ஸ்ஸனாபி⁴ஸமயோ ஸம்மாதி³ட்டி²…பே… அமதோக³த⁴ம் நிப்³பா³னம் பரியோஸானட்டே²ன அபி⁴ஸமயோ.

கிம் நு ஏத்தகோயேவ அபி⁴ஸமயோதி? ந ஹி. ஸோதாபத்திப²லக்க²ணே த³ஸ்ஸனாபி⁴ஸமயோ ஸம்மாதி³ட்டி²…பே… படிப்பஸ்ஸத்³த⁴ட்டே²ன அனுப்பாதே³ ஞாணம் அபி⁴ஸமயோ. ச²ந்தோ³ மூலட்டே²ன அபி⁴ஸமயோ…பே… அமதோக³த⁴ம் 5 நிப்³பா³னம் பரியோஸானட்டே²ன அபி⁴ஸமயோ.

கிம் நு ஏத்தகோயேவ அபி⁴ஸமயோதி?

ந ஹி. ஸகதா³கா³மிமக்³க³க்க²ணே…பே… ஸகதா³கா³மிப²லக்க²ணே… அனாகா³மிமக்³க³க்க²ணே… அனாகா³மிப²லக்க²ணே… அரஹத்தமக்³க³க்க²ணே…பே… அரஹத்தப²லக்க²ணே த³ஸ்ஸனாபி⁴ஸமயோ ஸம்மாதி³ட்டி², அபி⁴னிரோபனாபி⁴ஸமயோ ஸம்மாஸங்கப்போ…பே… படிப்பஸ்ஸத்³த⁴ட்டே²ன அனுப்பாதே³ ஞாணம் அபி⁴ஸமயோ. ச²ந்தோ³ மூலட்டே²ன அபி⁴ஸமயோ…பே… அமதோக³த⁴ம் நிப்³பா³னம் பரியோஸானட்டே²ன அபி⁴ஸமயோ.

ய்வாயம் [ஸ்யாயம் (ஸ்யா. பீ.)] கிலேஸே பஜஹதி, அதீதே கிலேஸே பஜஹதி…பே… அனாக³தே கிலேஸே பஜஹதி, பச்சுப்பன்னே கிலேஸே பஜஹதி, அதீதே கிலேஸே பஜஹதீதி. ஹஞ்சி அதீதே கிலேஸே பஜஹதி, தேன ஹி கீ²ணம் கே²பேதி, நிருத்³த⁴ம் நிரோதே⁴தி, விக³தம் விக³மேதி, அத்த²ங்க³தம் அத்த²ங்க³மேதி, அதீதம் யம் ந அத்தி² தம் பஜஹதீதி? ந அதீதே கிலேஸே பஜஹதீதி. அனாக³தே கிலேஸே பஜஹதீதி. ஹஞ்சி அனாக³தே கிலேஸே பஜஹதி, தேன ஹி அஜாதம் பஜஹதி, அனிப்³ப³த்தம் பஜஹதி, அனுப்பன்னம் பஜஹதி, அபாதுபூ⁴தம் பஜஹதி, அனாக³தம் யம் ந அத்தி² தம் பஜஹதீதி? ந அனாக³தே கிலேஸே பஜஹதீதி. பச்சுப்பன்னே கிலேஸே பஜஹதீதி. ஹஞ்சி பச்சுப்பன்னே கிலேஸே பஜஹதி, தேன ஹி ரத்தோ ராக³ம் பஜஹதி, து³ட்டோ² தோ³ஸம் பஜஹதி, மூள்ஹோ மோஹம் பஜஹதி, வினிப³த்³தோ⁴ மானம் பஜஹதி, பராமட்டோ² தி³ட்டி²ம் பஜஹதி,

விக்கே²பக³தோ உத்³த⁴ச்சம் பஜஹதி, அனிட்ட²ங்க³தோ விசிகிச்ச²ம் பஜஹதி, தா²மக³தோ அனுஸயம் பஜஹதி, கண்ஹஸுக்கத⁴ம்மா யுக³னத்³தா⁴ ஸமமேவ வத்தந்தி, ஸம்கிலேஸிகா [தம்ஸம்கிலேஸிகா (ஸ்யா. க.)] மக்³க³பா⁴வனா ஹோதி?

ந ஹி அதீதே கிலேஸே பஜஹதி, ந அனாக³தே கிலேஸே பஜஹதி, ந பச்சுப்பன்னே கிலேஸே பஜஹதீதி. ஹஞ்சி ந அதீதே கிலேஸே பஜஹதி, ந அனாக³தே…பே… ந பச்சுப்பன்னே கிலேஸே பஜஹதி, தேன ஹி நத்தி² மக்³க³பா⁴வனா, நத்தி² ப²லஸச்சி²கிரியா, நத்தி² கிலேஸப்பஹானம், நத்தி² த⁴ம்மாபி⁴ஸமயோதி? அத்தி² மக்³க³பா⁴வனா, அத்தி² ப²லஸச்சி²கிரியா, அத்தி² கிலேஸப்பஹானம், அத்தி² த⁴ம்மாபி⁴ஸமயோ. யதா² கத²ம் விய? ஸேய்யதா²பி தருணோ ருக்கோ² அஜாதப²லோ. தமேனம் புரிஸோ மூலம் சி²ந்தே³ய்ய. யே தஸ்ஸ ருக்க²ஸ்ஸ அஜாதப²லா, தே அஜாதாயேவ ந ஜாயந்தி, அனிப்³ப³த்தாயேவ ந நிப்³ப³த்தந்தி, அனுப்பன்னாயேவ ந உப்பஜ்ஜந்தி, அபாதுபூ⁴தாயேவ ந பாதுப⁴வந்தி. ஏவமேவம் உப்பாதோ³ ஹேது, உப்பாதோ³ பச்சயோ கிலேஸானம் நிப்³ப³த்தியாதி. உப்பாதே³ ஆதீ³னவம் தி³ஸ்வா அனுப்பாதே³ சித்தம் பக்க²ந்த³தி. அனுப்பாதே³ சித்தஸ்ஸ பக்க²ந்த³த்தா யே உப்பாத³பச்சயா கிலேஸா நிப்³ப³த்தேய்யும், தே அஜாதாயேவ ந ஜாயந்தி, அனிப்³ப³த்தாயேவ ந நிப்³ப³த்தந்தி, அனுப்பன்னாயேவ ந உப்பஜ்ஜந்தி, அபாதுபூ⁴தாயேவ ந பாதுப⁴வந்தி. ஏவம் ஹேதுனிரோதா⁴ து³க்க²னிரோதோ⁴. பவத்தம் ஹேது, நிமித்தம் ஹேது, ஆயூஹனா ஹேது. ஆயூஹனா பச்சயோ கிலேஸானம் நிப்³ப³த்தியாதி. ஆயூஹனே ஆதீ³னவம் தி³ஸ்வா அனாயூஹனே சித்தம் பக்க²ந்த³தி. அனாயூஹனே சித்தஸ்ஸ பக்க²ந்த³த்தா, யே ஆயூஹனபச்சயா கிலேஸா நிப்³ப³த்தேய்யும், தே அஜாதாயேவ ந ஜாயந்தி, அனிப்³ப³த்தாயேவ ந நிப்³ப³த்தந்தி, அனுப்பன்னாயேவ ந உப்பஜ்ஜந்தி, அபாதுபூ⁴தாயேவ ந பாதுப⁴வந்தி. ஏவம் ஹேதுனிரோதா⁴ து³க்க²னிரோதோ⁴. ஏவம் அத்தி² மக்³க³பா⁴வனா, அத்தி² ப²லஸச்சி²கிரியா, அத்தி² கிலேஸப்பஹானம், அத்தி² த⁴ம்மாபி⁴ஸமயோதி.

அபி⁴ஸமயகதா² நிட்டி²தா.