1. ஸோளஸபஞ்ஞானித்³தே³ஸோ

4. பஞ்ஞாபடிலாபா⁴ய ஸம்வத்தந்தீதி கதமோ பஞ்ஞாபடிலாபோ⁴? சதுன்னம் மக்³க³ஞாணானம், சதுன்னம் ப²லஞாணானம், சதுன்னம் படிஸம்பி⁴தா³ஞாணானம், ச²ன்னம் அபி⁴ஞ்ஞாஞாணானம், தேஸத்ததீனம் ஞாணானம், ஸத்தஸத்ததீனம் ஞாணானம் லாபோ⁴ படிலாபோ⁴ பத்தி ஸம்பத்தி ப²ஸ்ஸனா [பு²ஸனா (க.)] ஸச்சி²கிரியா உபஸம்பதா³. பஞ்ஞாபடிலாபா⁴ய ஸம்வத்தந்தீதி – அயம் பஞ்ஞா படிலாபோ⁴.

பஞ்ஞாபு³த்³தி⁴யா ஸம்வத்தந்தீதி கதமா பஞ்ஞாபு³த்³தி⁴? ஸத்தன்னஞ்ச ஸேக்கா²னம் புது²ஜ்ஜனகல்யாணகஸ்ஸ ச பஞ்ஞா வட்³ட⁴தி, அரஹதோ பஞ்ஞா வட்³ட⁴தி. வட்³டி⁴தவட்³ட⁴னா பஞ்ஞாபு³த்³தி⁴யா ஸம்வத்தந்தீதி – அயம் பஞ்ஞாபு³த்³தி⁴.

பஞ்ஞாவேபுல்லாய ஸம்வத்தந்தீதி கதமம் பஞ்ஞாவேபுல்லம்? ஸத்தன்னம் ஸேக்கா²னம் புது²ஜ்ஜனகல்யாணகஸ்ஸ ச பஞ்ஞாவேபுல்லம் க³ச்ச²தி. அரஹதோ பஞ்ஞா வேபுல்லக³தா பஞ்ஞாவேபுல்லாய ஸம்வத்தந்தீதி – இத³ம் பஞ்ஞாவேபுல்லம்.

மஹாபஞ்ஞதாய ஸம்வத்தந்தீதி கதமா மஹாபஞ்ஞா? மஹந்தே அத்தே² பரிக்³க³ண்ஹாதீதி – மஹாபஞ்ஞா. மஹந்தே த⁴ம்மே பரிக்³க³ண்ஹாதீதி – மஹாபஞ்ஞா. மஹந்தா நிருத்தியோ பரிக்³க³ண்ஹாதீதி – மஹாபஞ்ஞா. மஹந்தானி படிபா⁴னானி பரிக்³க³ண்ஹாதீதி – மஹாபஞ்ஞா. மஹந்தே ஸீலக்க²ந்தே⁴ பரிக்³க³ண்ஹாதீதி – மஹாபஞ்ஞா. மஹந்தே ஸமாதி⁴க்க²ந்தே⁴ பரிக்³க³ண்ஹாதீதி – மஹாபஞ்ஞா. மஹந்தே பஞ்ஞாக்க²ந்தே⁴ பரிக்³க³ண்ஹாதீதி – மஹாபஞ்ஞா. மஹந்தே விமுத்திக்க²ந்தே⁴ பரிக்³க³ண்ஹாதீதி – மஹாபஞ்ஞா. மஹந்தே விமுத்திஞாணத³ஸ்ஸனக்க²ந்தே⁴ பரிக்³க³ண்ஹாதீதி – மஹாபஞ்ஞா. மஹந்தானி டா²னாட்டா²னானி பரிக்³க³ண்ஹாதீதி – மஹாபஞ்ஞா. மஹந்தா விஹாரஸமாபத்தியோ பரிக்³க³ண்ஹாதீதி – மஹாபஞ்ஞா. மஹந்தானி அரியஸச்சானி பரிக்³க³ண்ஹாதீதி – மஹாபஞ்ஞா. மஹந்தே ஸதிபட்டா²னே பரிக்³க³ண்ஹாதீதி – மஹாபஞ்ஞா. மஹந்தே ஸம்மப்பதா⁴னே பரிக்³க³ண்ஹாதீதி – மஹாபஞ்ஞா. மஹந்தே இத்³தி⁴பாதே³ பரிக்³க³ண்ஹாதீதி – மஹாபஞ்ஞா. மஹந்தானி இந்த்³ரியானி பரிக்³க³ண்ஹாதீதி – மஹாபஞ்ஞா. மஹந்தானி ப³லானி பரிக்³க³ண்ஹாதீதி – மஹாபஞ்ஞா. மஹந்தே போ³ஜ்ஜ²ங்கே³ பரிக்³க³ண்ஹாதீதி – மஹாபஞ்ஞா. மஹந்தம் அரியமக்³க³ம் [மஹந்தே அரியமக்³கே³ (க.)] பரிக்³க³ண்ஹாதீதி – மஹாபஞ்ஞா. மஹந்தானி ஸாமஞ்ஞப²லானி பரிக்³க³ண்ஹாதீதி – மஹாபஞ்ஞா. மஹந்தா அபி⁴ஞ்ஞாயோ [மஹாபி⁴ஞ்ஞாயோ (க.)] பரிக்³க³ண்ஹாதீதி – மஹாபஞ்ஞா. மஹந்தம் பரமத்த²ம் நிப்³பா³னம் பரிக்³க³ண்ஹாதீதி – மஹாபஞ்ஞா. மஹாபஞ்ஞதாய ஸம்வத்தந்தீதி – அயம் மஹாபஞ்ஞா.

புது²பஞ்ஞதாய ஸம்வத்தந்தீதி கதமா புது²பஞ்ஞா? புது²னானாக²ந்தே⁴ஸு ஞாணம் பவத்ததீதி – புது²பஞ்ஞா. புது²னானாதா⁴தூஸு ஞாணம் பவத்ததீதி – புது²பஞ்ஞா. புது²னானாஆயதனேஸு ஞாணம் பவத்ததீதி – புது²பஞ்ஞா. புது²னானாபடிச்சஸமுப்பாதே³ஸு ஞாணம் பவத்ததீதி – புது²பஞ்ஞா. புது²னானாஸுஞ்ஞதமனுபலப்³பே⁴ஸு ஞாணம் பவத்ததீதி – புது²பஞ்ஞா. புது²னானாஅத்தே²ஸு ஞாணம் பவத்ததீதி – புது²பஞ்ஞா. புது²னானாத⁴ம்மேஸு ஞாணம் பவத்ததீதி – புது²பஞ்ஞா. புது²னானானிருத்தீஸு ஞாணம் பவத்ததீதி – புது²பஞ்ஞா. புது²னானாபடிபா⁴னேஸு ஞாணம் பவத்ததீதி – புது²பஞ்ஞா. புது²னானாஸீலக்க²ந்தே⁴ஸு ஞாணம் பவத்ததீதி – புது²பஞ்ஞா. புது²னானாஸமாதி⁴க்க²ந்தே⁴ஸு ஞாணம் பவத்ததீதி – புது²பஞ்ஞா. புது²னானாபஞ்ஞாக்க²ந்தே⁴ஸு ஞாணம் பவத்ததீதி – புது²பஞ்ஞா. புது²னானாவிமுத்திக்க²ந்தே⁴ஸு ஞாணம் பவத்ததீதி – புது²பஞ்ஞா. புது²னானாவிமுத்திஞாணத³ஸ்ஸனக்க²ந்தே⁴ஸு ஞாணம் பவத்ததீதி – புது²பஞ்ஞா. புது²னானாடா²னாட்டா²னேஸு ஞாணம் பவத்ததீதி – புது²பஞ்ஞா. புது²னானாவிஹாரஸமாபத்தீஸு ஞாணம் பவத்ததீதி – புது²பஞ்ஞா. புது²னானாஅரியஸச்சேஸு ஞாணம் பவத்ததீதி – புது²பஞ்ஞா. புது²னானாஸதிபட்டா²னேஸு ஞாணம் பவத்ததீதி – புது²பஞ்ஞா. புது²னானாஸம்மப்பதா⁴னேஸு ஞாணம் பவத்ததீதி – புது²பஞ்ஞா. புது²னானாஇத்³தி⁴பாதே³ஸு ஞாணம் பவத்ததீதி – புது²பஞ்ஞா. புது²னானாஇந்த்³ரியேஸு ஞாணம் பவத்ததீதி – புது²பஞ்ஞா. புது²னானாப³லேஸு ஞாணம் பவத்ததீதி – புது²பஞ்ஞா. புது²னானாபோ³ஜ்ஜ²ங்கே³ஸு ஞாணம் பவத்ததீதி – புது²பஞ்ஞா. புது²னானாஅரியமக்³கே³ஸு ஞாணம் பவத்ததீதி – புது²பஞ்ஞா. புது²னானாஸாமஞ்ஞப²லேஸு ஞாணம் பவத்ததீதி – புது²பஞ்ஞா. புது²னானாஅபி⁴ஞ்ஞாஸு ஞாணம் பவத்ததீதி – புது²பஞ்ஞா. புது²ஜ்ஜனஸாதா⁴ரணே த⁴ம்மே அதிக்கம்ம [ஸமதிக்கம்ம (ஸ்யா.)] பரமத்தே² நிப்³பா³னே ஞாணம் பவத்ததீதி – புது²பஞ்ஞா. புது²பஞ்ஞதாய ஸம்வத்தந்தீதி – அயம் புது²பஞ்ஞா.

விபுலபஞ்ஞதாய ஸம்வத்தந்தீதி கதமா விபுலபஞ்ஞா? விபுலே அத்தே² பரிக்³க³ண்ஹாதீதி – விபுலபஞ்ஞா. விபுலே த⁴ம்மே பரிக்³க³ண்ஹாதீதி – விபுலபஞ்ஞா. விபுலா நிருத்தியோ பரிக்³க³ண்ஹாதீதி – விபுலபஞ்ஞா. விபுலானி படிபா⁴னானி பரிக்³க³ண்ஹாதீதி – விபுலபஞ்ஞா. விபுலே ஸீலக்க²ந்தே⁴ பரிக்³க³ண்ஹாதீதி – விபுலபஞ்ஞா. விபுலே ஸமாதி⁴க்க²ந்தே⁴ பரிக்³க³ண்ஹாதீதி – விபுலபஞ்ஞா. விபுலே பஞ்ஞாக்க²ந்தே⁴ பரிக்³க³ண்ஹாதீதி – விபுலபஞ்ஞா. விபுலே விமுத்திக்க²ந்தே⁴ பரிக்³க³ண்ஹாதீதி – விபுலபஞ்ஞா. விபுலே விமுத்திஞாணத³ஸ்ஸனக்க²ந்தே⁴ பரிக்³க³ண்ஹாதீதி – விபுலபஞ்ஞா. விபுலானி டா²னாட்டா²னானி பரிக்³க³ண்ஹாதீதி – விபுலபஞ்ஞா. விபுலா விஹாரஸமாபத்தியோ பரிக்³க³ண்ஹாதீதி – விபுலபஞ்ஞா. விபுலானி அரியஸச்சானி பரிக்³க³ண்ஹாதீதி – விபுலபஞ்ஞா. விபுலே ஸதிபட்டா²னே பரிக்³க³ண்ஹாதீதி – விபுலபஞ்ஞா. விபுலே ஸம்மப்பதா⁴னே பரிக்³க³ண்ஹாதீதி – விபுலபஞ்ஞா. விபுலே இத்³தி⁴பாதே³ பரிக்³க³ண்ஹாதீதி – விபுலபஞ்ஞா. விபுலானி இந்த்³ரியானி பரிக்³க³ண்ஹாதீதி – விபுலபஞ்ஞா. விபுலானி ப³லானி பரிக்³க³ண்ஹாதீதி – விபுலபஞ்ஞா. விபுலே போ³ஜ்ஜ²ங்கே³ பரிக்³க³ண்ஹாதீதி – விபுலபஞ்ஞா. விபுலே அரியமக்³கே³ பரிக்³க³ண்ஹாதீதி – விபுலபஞ்ஞா. விபுலானி ஸாமஞ்ஞப²லானி பரிக்³க³ண்ஹாதீதி – விபுலபஞ்ஞா. விபுலா அபி⁴ஞ்ஞாயோ பரிக்³க³ண்ஹாதீதி – விபுலபஞ்ஞா. விபுலம் பரமத்த²ம் நிப்³பா³னம் பரிக்³க³ண்ஹாதீதி – விபுலபஞ்ஞா. விபுலபஞ்ஞதாய ஸம்வத்தந்தீதி – அயம் விபுலபஞ்ஞா.

க³ம்பீ⁴ரபஞ்ஞதாய ஸம்வத்தந்தீதி கதமா க³ம்பீ⁴ரபஞ்ஞா? க³ம்பீ⁴ரேஸு க²ந்தே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ராஸு தா⁴தூஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஆயதனேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு படிச்சஸமுப்பாதே³ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஸுஞ்ஞதமனுபலப்³பே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு அத்தே²ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு த⁴ம்மேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ராஸு நிருத்தீஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு படிபா⁴னேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஸீலக்க²ந்தே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஸமாதி⁴க்க²ந்தே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு பஞ்ஞாக்க²ந்தே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு விமுத்திக்க²ந்தே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு விமுத்திஞாணத³ஸ்ஸனக்க²ந்தே⁴ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு டா²னாட்டா²னேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ராஸு விஹாரஸமாபத்தீஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு அரியஸச்சேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஸதிபட்டா²னேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஸம்மப்பதா⁴னேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு இத்³தி⁴பாதே³ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு இந்த்³ரியேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ப³லேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு போ³ஜ்ஜ²ங்கே³ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு அரியமக்³கே³ஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரேஸு ஸாமஞ்ஞப²லேஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ராஸு அபி⁴ஞ்ஞாஸு ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரே பரமத்தே² நிப்³பா³னே ஞாணம் பவத்ததீதி – க³ம்பீ⁴ரபஞ்ஞா. க³ம்பீ⁴ரபஞ்ஞதாய ஸம்வத்தந்தீதி – அயம் க³ம்பீ⁴ரபஞ்ஞா.

அஸாமந்தபஞ்ஞதாய ஸம்வத்தந்தீதி கதமா அஸாமந்தபஞ்ஞா? யஸ்ஸ புக்³க³லஸ்ஸ அத்த²வவத்தா²னதோ அத்த²படிஸம்பி⁴தா³ அதி⁴க³தா ஹோதி ஸச்சி²கதா ப²ஸ்ஸிதா பஞ்ஞாய, த⁴ம்மவவத்தா²னதோ த⁴ம்மபடிஸம்பி⁴தா³ அதி⁴க³தா ஹோதி ஸச்சி²கதா ப²ஸ்ஸிதா பஞ்ஞாய, நிருத்திவவத்தா²னதோ நிருத்திபடிஸம்பி⁴தா³ அதி⁴க³தா ஹோதி ஸச்சி²கதா ப²ஸ்ஸிதா பஞ்ஞாய, படிபா⁴னவவத்தா²னதோ படிபா⁴னபடிஸம்பி⁴தா³ அதி⁴க³தா ஹோதி ஸச்சி²கதா ப²ஸ்ஸிதா பஞ்ஞாய, தஸ்ஸ அத்தே² ச த⁴ம்மே ச நிருத்தியா ச படிபா⁴னே ச ந அஞ்ஞோ கோசி ஸக்கோதி அபி⁴ஸம்ப⁴விதும். அனபி⁴ஸம்ப⁴வனீயோ ச ஸோ அஞ்ஞேஹீதி – அஸாமந்தபஞ்ஞோ.

புது²ஜ்ஜனகல்யாணகஸ்ஸ பஞ்ஞா அட்ட²மகஸ்ஸ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா. புது²ஜ்ஜனகல்யாணகம் உபாதா³ய அட்ட²மகோ அஸாமந்தபஞ்ஞோ. அட்ட²மகஸ்ஸ பஞ்ஞா ஸோதாபன்னஸ்ஸ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா. அட்ட²மகம் உபாதா³ய ஸோதாபன்னோ அஸாமந்தபஞ்ஞோ. ஸோதாபன்னஸ்ஸ பஞ்ஞா ஸகதா³கா³மிஸ்ஸ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா. ஸோதாபன்னம் உபாதா³ய ஸகதா³கா³மி அஸாமந்தபஞ்ஞோ. ஸகதா³கா³மிஸ்ஸ பஞ்ஞா அனாகா³மிஸ்ஸ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா. ஸகதா³கா³மிம் உபாதா³ய அனாகா³மீ அஸாமந்தபஞ்ஞோ. அனாகா³மிஸ்ஸ பஞ்ஞா அரஹதோ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா. அனாகா³மிம் உபாதா³ய அரஹா அஸாமந்தபஞ்ஞோ. அரஹதோ பஞ்ஞா பச்சேகஸம்பு³த்³த⁴ஸ்ஸ [பச்சேகபு³த்³த⁴ஸ்ஸ (ஸ்யா. க.) அட்ட²கதா² ஓலோகேதப்³பா³] பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா. அரஹந்தம் உபாதா³ய பச்சேகபு³த்³தோ⁴ அஸாமந்தபஞ்ஞோ. பச்சேகபு³த்³த⁴ஞ்ச ஸதே³வகஞ்ச லோகம் உபாதா³ய ததா²க³தோ அரஹம் ஸம்மாஸம்பு³த்³தோ⁴ அக்³கோ³ அஸாமந்தபஞ்ஞோ.

5. பஞ்ஞாபபே⁴த³குஸலோ பபி⁴ன்னஞாணோ அதி⁴க³தப்படிஸம்பி⁴தோ³ சதுவேஸாரஜ்ஜப்பத்தோ த³ஸப³லதா⁴ரீ புரிஸாஸபோ⁴ புரிஸஸீஹோ புரிஸனாகோ³ புரிஸாஜஞ்ஞோ புரிஸதோ⁴ரய்ஹோ அனந்தஞாணோ அனந்ததேஜோ அனந்தயஸோ அட்³டோ⁴ மஹத்³த⁴னோ த⁴னவா நேதா வினேதா அனுனேதா பஞ்ஞாபேதா நிஜ்ஜா²பேதா பேக்கே²தா பஸாதே³தா. ஸோ ஹி ப⁴க³வா அனுப்பன்னஸ்ஸ மக்³க³ஸ்ஸ உப்பாதே³தா, அஸஞ்ஜாதஸ்ஸ மக்³க³ஸ்ஸ ஸஞ்ஜனேதா [ஸஞ்ஜானேதா (ஸ்யா.)], அனக்கா²தஸ்ஸ மக்³க³ஸ்ஸ அக்கா²தா, மக்³க³ஞ்ஞூ மக்³க³விதூ³ மக்³க³கோவிதோ³ மக்³கா³னுகா³மீ [மக்³கா³னுகா³ (ஸ்யா.) மஹானி. 69 பஸ்ஸிதப்³போ³] ச பனஸ்ஸ ஏதரஹி ஸாவகா விஹரந்தி பச்சா² ஸமன்னாக³தா.

ஸோ ஹி ப⁴க³வா ஜானம் ஜானாதி, பஸ்ஸம் பஸ்ஸதி, சக்கு²பூ⁴தோ ஞாணபூ⁴தோ த⁴ம்மபூ⁴தோ ப்³ரஹ்மபூ⁴தோ வத்தா பவத்தா அத்த²ஸ்ஸ நின்னேதா அமதஸ்ஸ தா³தா த⁴ம்மஸ்ஸாமீ ததா²க³தோ. நத்தி² தஸ்ஸ ப⁴க³வதோ அஞ்ஞாதம் அதி³ட்ட²ம் அவிதி³தம் அஸச்சி²கதம் அப²ஸ்ஸிதம் பஞ்ஞாய. அதீதம் அனாக³தம் பச்சுப்பன்னம் [அதீதானாக³தபச்சுப்பன்னம் (ஸ்யா.) மஹானி. 69] உபாதா³ய ஸப்³பே³ த⁴ம்மா ஸப்³பா³காரேன பு³த்³த⁴ஸ்ஸ ப⁴க³வதோ ஞாணமுகே² ஆபாத²ம் ஆக³ச்ச²ந்தி. யம் கிஞ்சி நேய்யம் நாம அத்தி² தம் ஸப்³ப³ம் ஜானிதப்³ப³ம் [ஸப்³ப³ம் த⁴ம்மம் ஜானிதப்³ப³ம் (க.)]. அத்தத்தோ² வா பரத்தோ² வா உப⁴யத்தோ² வா தி³ட்ட²த⁴ம்மிகோ வா அத்தோ² ஸம்பராயிகோ வா அத்தோ² உத்தானோ வா அத்தோ² க³ம்பீ⁴ரோ வா அத்தோ² கூ³ள்ஹோ வா அத்தோ² படிச்ச²ன்னோ வா அத்தோ² நேய்யோ வா அத்தோ² நீதோ வா அத்தோ² அனவஜ்ஜோ வா அத்தோ² நிக்கிலேஸோ வா அத்தோ² வோதா³னோ வா அத்தோ² பரமத்தோ² வா அத்தோ², ஸப்³ப³ம் தம் அந்தோபு³த்³த⁴ஞாணே பரிவத்ததி.

ஸப்³ப³ம் காயகம்மம் பு³த்³த⁴ஸ்ஸ ப⁴க³வதோ ஞாணானுபரிவத்தி. ஸப்³ப³ம் வசீகம்மம் பு³த்³த⁴ஸ்ஸ ப⁴க³வதோ ஞாணானுபரிவத்தி. ஸப்³ப³ம் மனோகம்மம் பு³த்³த⁴ஸ்ஸ ப⁴க³வதோ ஞாணானுபரிவத்தி. அதீதே பு³த்³த⁴ஸ்ஸ ப⁴க³வதோ அப்படிஹதம் ஞாணம். அனாக³தே பு³த்³த⁴ஸ்ஸ ப⁴க³வதோ அப்படிஹதம் ஞாணம். பச்சுப்பன்னே பு³த்³த⁴ஸ்ஸ ப⁴க³வதோ அப்படிஹதம் ஞாணம். யாவதகம் நேய்யம் தாவதகம் ஞாணம், யாவதகம் ஞாணம் தாவதகம் நேய்யம். நேய்யபரியந்திகம் ஞாணம், ஞாணபரியந்திகம் நேய்யம். நேய்யம் அதிக்கமித்வா ஞாணம் நப்பவத்ததி. ஞாணம் அதிக்கமித்வா நேய்யபதோ² நத்தி². அஞ்ஞமஞ்ஞபரியந்தட்டா²யினோ தே த⁴ம்மா. யதா² த்³வின்னம் ஸமுக்³க³படலானம் ஸம்மா பு²ஸிதானம் [ஸுபு²ஸ்ஸிதானம் (ஸ்யா. க.)] ஹேட்டி²மம் ஸமுக்³க³படலம் உபரிமம் நாதிவத்ததி, உபரிமம் ஸமுக்³க³படலம் ஹேட்டி²மம் நாதிவத்ததி, அஞ்ஞமஞ்ஞபரியந்தட்டா²யினோ; ஏவமேவ பு³த்³த⁴ஸ்ஸ ப⁴க³வதோ நேய்யஞ்ச ஞாணஞ்ச அஞ்ஞமஞ்ஞபரியந்தட்டா²யினோ. யாவதகம் நேய்யம் தாவதகம் ஞாணம், யாவதகம் ஞாணம் தாவதகம் நேய்யம். நேய்யபரியந்திகம் ஞாணம், ஞாணபரியந்திகம் நேய்யம். நேய்யம் அதிக்கமித்வா ஞாணம் நப்பவத்ததி. ஞாணம் அதிக்கமித்வா நேய்யபதோ² நத்தி². அஞ்ஞமஞ்ஞபரியந்தட்டா²யினோ தே த⁴ம்மா. ஸப்³ப³த⁴ம்மேஸு பு³த்³த⁴ஸ்ஸ ப⁴க³வதோ ஞாணம் பவத்ததி.

ஸப்³பே³ த⁴ம்மா பு³த்³த⁴ஸ்ஸ ப⁴க³வதோ ஆவஜ்ஜனப்படிப³த்³தா⁴ ஆகங்க²ப்படிப³த்³தா⁴ மனஸிகாரப்படிப³த்³தா⁴ சித்துப்பாத³ப்படிப³த்³தா⁴. ஸப்³ப³ஸத்தேஸு பு³த்³த⁴ஸ்ஸ ப⁴க³வதோ ஞாணம் பவத்ததி. ஸப்³பே³ஸம் ஸத்தானம் பு³த்³தோ⁴ ஆஸயம் ஜானாதி, அனுஸயம் ஜானாதி, சரிதம் [சரியம் (ஸ்யா.) மஹானி. 69 பஸ்ஸிதப்³பா³] ஜானாதி, அதி⁴முத்திம் ஜானாதி. அப்பரஜக்கே² மஹாரஜக்கே² திக்கி²ந்த்³ரியே முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே து³விஞ்ஞாபயே ப⁴ப்³பா³ப⁴ப்³பே³ ஸத்தே பஜானாதி. ஸதே³வகோ லோகோ ஸமாரகோ ஸப்³ரஹ்மகோ ஸஸ்ஸமணப்³ராஹ்மணீ பஜா ஸதே³வமனுஸ்ஸா அந்தோபு³த்³த⁴ஞாணே பரிவத்ததி.

யதா² யே கேசி மச்ச²கச்ச²பா, அந்தமஸோ திமிதிமிங்க³லம் உபாதா³ய, அந்தோமஹாஸமுத்³தே³ பரிவத்தந்தி, ஏவமேவம் ஸதே³வகோ லோகோ ஸமாரகோ ஸப்³ரஹ்மகோ ஸஸ்ஸமணப்³ராஹ்மணீ பஜா ஸதே³வமனுஸ்ஸா அந்தோபு³த்³த⁴ஞாணே பரிவத்ததி. யதா² யே கேசி பக்கி²னோ, அந்தமஸோ க³ருளம் வேனதேய்யம் உபாதா³ய, ஆகாஸஸ்ஸ பதே³ஸே பரிவத்தந்தி; ஏவமேவ யேபி தே ஸாரிபுத்தஸமா பஞ்ஞாய தேபி பு³த்³த⁴ஞாணஸ்ஸ பதே³ஸே பரிவத்தந்தி. பு³த்³த⁴ஞாணம் தே³வமனுஸ்ஸானம் பஞ்ஞம் ப²ரித்வா அதிக⁴ம்ஸித்வா திட்ட²தி. யேபி தே க²த்தியபண்டி³தா ப்³ராஹ்மணபண்டி³தா க³ஹபதிபண்டி³தா ஸமணபண்டி³தா நிபுணா கதபரப்பவாதா³ வாலவேதி⁴ரூபா வோபி⁴ந்த³ந்தா [தே பி⁴ந்த³ந்தா (ஸ்யா. க.)] மஞ்ஞே சரந்தி பஞ்ஞாக³தேன தி³ட்டி²க³தானி, தே பஞ்ஹம் அபி⁴ஸங்க²ரித்வா அபி⁴ஸங்க²ரித்வா ததா²க³தம் உபஸங்கமித்வா புச்ச²ந்தி கூ³ள்ஹானி ச படிச்ச²ன்னானி ச, கதி²தா விஸஜ்ஜிதா ச தே பஞ்ஹா ப⁴க³வதா ஹோந்தி நித்³தி³ட்ட²காரணா [நித்³தி³ட்டி²காரணா (ஸ்யா.)]. உபக்கி²த்தகா ச தே ப⁴க³வதோ ஸம்பஜ்ஜந்தி. அத² கோ² ப⁴க³வா தத்த² அதிரோசதி யதி³த³ம் பஞ்ஞாயாதி. அக்³கோ³ அஸாமந்தபஞ்ஞோ, அஸாமந்தபஞ்ஞதாய ஸம்வத்தந்தீதி – அயம் அஸாமந்தபஞ்ஞா.

6. பூ⁴ரிபஞ்ஞதாய ஸம்வத்தந்தீதி கதமா பூ⁴ரிபஞ்ஞா? ராக³ம் அபி⁴பு⁴ய்யதீதி – பூ⁴ரிபஞ்ஞா. அபி⁴ப⁴விதாதி – பூ⁴ரிபஞ்ஞா. தோ³ஸம் அபி⁴பு⁴ய்யதீதி – பூ⁴ரிபஞ்ஞா. அபி⁴ப⁴விதாதி – பூ⁴ரிபஞ்ஞா. மோஹம் அபி⁴பு⁴ய்யதீதி – பூ⁴ரிபஞ்ஞா. அபி⁴ப⁴விதாதி – பூ⁴ரிபஞ்ஞா. கோத⁴ம்…பே… உபனாஹம் … மக்க²ம்… பளாஸம்… இஸ்ஸம்… மச்ச²ரியம்… மாயம்… ஸாடே²ய்யம்… த²ம்ப⁴ம்… ஸாரம்ப⁴ம்… மானம்… அதிமானம்… மத³ம்… பமாத³ம்… ஸப்³பே³ கிலேஸே… ஸப்³பே³ து³ச்சரிதே… ஸப்³பே³ அபி⁴ஸங்கா²ரே…பே… ஸப்³பே³ ப⁴வகா³மிகம்மே அபி⁴பு⁴ய்யதீதி – பூ⁴ரிபஞ்ஞா. அபி⁴ப⁴விதாதி – பூ⁴ரிபஞ்ஞா. ராகோ³ அரி. தம் அரிம் மத்³த³னிபஞ்ஞாதி – பூ⁴ரிபஞ்ஞா. தோ³ஸோ அரி. தம் அரிம் மத்³த³னிபஞ்ஞாதி – பூ⁴ரிபஞ்ஞா. மோஹோ அரி. தம் அரிம் மத்³த³னிபஞ்ஞாதி – பூ⁴ரிபஞ்ஞா. கோதோ⁴…பே… உபனாஹோ… மக்கோ²… பளாஸோ… இஸ்ஸா… மச்ச²ரியம்… மாயா… ஸாடே²ய்யம்… த²ம்போ⁴… ஸாரம்போ⁴… மானோ… அதிமானோ… மதோ³… பமாதோ³… ஸப்³பே³ கிலேஸா… ஸப்³பே³ து³ச்சரிதா… ஸப்³பே³ அபி⁴ஸங்கா²ரா…பே… ஸப்³பே³ ப⁴வகா³மிகம்மா அரி. தம் அரிம் மத்³த³னிபஞ்ஞாதி – பூ⁴ரிபஞ்ஞா. பூ⁴ரி வுச்சதி பத²வீ [பட²வீ (ஸ்யா.)]. தாய பத²விஸமாய வித்த²தாய விபுலாய பஞ்ஞாய ஸமன்னாக³தோதி – பூ⁴ரிபஞ்ஞா. அபி ச, பஞ்ஞாய மேதம் அதி⁴வசனம். பூ⁴ரி மேதா⁴ பரிணாயிகாதி – பூ⁴ரிபஞ்ஞா. பூ⁴ரிபஞ்ஞதாய ஸம்வத்தந்தீதி – அயம் பூ⁴ரிபஞ்ஞா.

பஞ்ஞாபா³ஹுல்லாய ஸம்வத்தந்தீதி கதமம் பஞ்ஞாபா³ஹுல்லம்? இதே⁴கச்சோ பஞ்ஞாக³ருகோ ஹோதி பஞ்ஞாசரிதோ பஞ்ஞாஸயோ பஞ்ஞாதி⁴முத்தோ பஞ்ஞாத⁴ஜோ பஞ்ஞாகேது பஞ்ஞாதி⁴பதேய்யோ விசயப³ஹுலோ பவிசயப³ஹுலோ ஓக்கா²யனப³ஹுலோ ஸமோக்கா²யனப³ஹுலோ [ஸம்பேக்கா²யனப³ஹுலோ (ஸ்யா. க.) மஹானி. 204 பஸ்ஸிதப்³பா³] ஸம்பேக்கா²யனத⁴ம்மோ விபூ⁴தவிஹாரீ தச்சரிதோ தக்³க³ருகோ தப்³ப³ஹுலோ தன்னின்னோ தப்போணோ தப்பப்³பா⁴ரோ தத³தி⁴முத்தோ தத³தி⁴பதேய்யோ. யதா² க³ணக³ருகோ வுச்சதி ‘‘க³ணபா³ஹுலிகோ’’தி, சீவரக³ருகோ வுச்சதி ‘‘சீவரபா³ஹுலிகோ’’தி, பத்தக³ருகோ வுச்சதி ‘‘பத்தபா³ஹுலிகோ’’தி, ஸேனாஸனக³ருகோ வுச்சதி ‘‘ஸேனாஸனபா³ஹுலிகோ’’தி; ஏவமேவம் இதே⁴கச்சோ பஞ்ஞா க³ருகோ ஹோதி பஞ்ஞாசரிதோ பஞ்ஞாஸயோ பஞ்ஞாதி⁴முத்தோ பஞ்ஞாத⁴ஜோ பஞ்ஞாகேது பஞ்ஞாதி⁴பதேய்யோ விசயப³ஹுலோ பவிசயப³ஹுலோ ஓக்கா²யனப³ஹுலோ ஸமோக்கா²யனப³ஹுலோ ஸம்பேக்கா²யனத⁴ம்மோ விபூ⁴தவிஹாரீ தச்சரிதோ தக்³க³ருகோ தப்³ப³ஹுலோ தன்னின்னோ தப்போணோ தப்பப்³பா⁴ரோ தத³தி⁴முத்தோ தத³தி⁴பதேய்யோ. பஞ்ஞாபா³ஹுல்லாய ஸம்வத்தந்தீதி – இத³ம் பஞ்ஞாபா³ஹுல்லம்.

ஸீக⁴பஞ்ஞதாய ஸம்வத்தந்தீதி கதமா ஸீக⁴பஞ்ஞா? ஸீக⁴ம் ஸீக⁴ம் ஸீலானி பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் இந்த்³ரியஸம்வரம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் போ⁴ஜனே மத்தஞ்ஞுதம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் ஜாக³ரியானுயோக³ம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் ஸீலக்க²ந்த⁴ம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் ஸமாதி⁴க்க²ந்த⁴ம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் பஞ்ஞாக்க²ந்த⁴ம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் விமுத்திக்க²ந்த⁴ம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் விமுத்திஞாணத³ஸ்ஸனக்க²ந்த⁴ம் பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் டா²னாட்டா²னானி படிவிஜ்ஜ²தீதி – ஸீக⁴பஞ்ஞா. ஸீக⁴ம் ஸீக⁴ம் விஹாரஸமாபத்தியோ பரிபூரேதீதி – ஸீக⁴பஞ்ஞா. ஸீக⁴ம் ஸீக⁴ம் அரியஸச்சானி படிவிஜ்ஜ²தீதி – ஸீக⁴பஞ்ஞா. ஸீக⁴ம் ஸீக⁴ம் ஸதிபட்டா²னே பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் ஸம்மப்பதா⁴னே பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் இத்³தி⁴பாதே³ பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் இந்த்³ரியானி பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் ப³லானி பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் போ³ஜ்ஜ²ங்கே³ பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் அரியமக்³க³ம் பா⁴வேதீதி – ஸீக⁴பஞ்ஞா. ஸீக⁴ம் ஸீக⁴ம் ஸாமஞ்ஞப²லானி ஸச்சி²கரோதீதி – ஸீக⁴பஞ்ஞா. ஸீக⁴ம் ஸீக⁴ம் அபி⁴ஞ்ஞாயோ படிவிஜ்ஜ²தீதி – ஸீக⁴பஞ்ஞா. ஸீக⁴ம் ஸீக⁴ம் பரமத்த²ம் நிப்³பா³னம் ஸச்சி²கரோதீதி – ஸீக⁴பஞ்ஞா. ஸீக⁴பஞ்ஞதாய ஸம்வத்தந்தீதி – அயம் ஸீக⁴பஞ்ஞா.

லஹுபஞ்ஞதாய ஸம்வத்தந்தீதி கதமா லஹுபஞ்ஞா? லஹும் லஹும் ஸீலானி பரிபூரேதீதி – லஹுபஞ்ஞா. லஹும் லஹும் இந்த்³ரியஸம்வரம் பரிபூரேதீதி – லஹுபஞ்ஞா. லஹும் லஹும் போ⁴ஜனே மத்தஞ்ஞுதம் பரிபூரேதீதி – லஹுபஞ்ஞா. லஹும் லஹும் ஜாக³ரியானுயோக³ம் பரிபூரேதீதி – லஹுபஞ்ஞா. லஹும் லஹும் ஸீலக்க²ந்த⁴ம் …பே… ஸமாதி⁴க்க²ந்த⁴ம் … பஞ்ஞாக்க²ந்த⁴ம்… விமுத்திக்க²ந்த⁴ம்… விமுத்திஞாணத³ஸ்ஸனக்க²ந்த⁴ம் பரிபூரேதீதி – லஹுபஞ்ஞா. லஹும் லஹும் டா²னாட்டா²னானி படிவிஜ்ஜ²தீதி – லஹுபஞ்ஞா. லஹும் லஹும் விஹாரஸமாபத்தியோ பரிபூரேதீதி – லஹுபஞ்ஞா. லஹும் லஹும் அரியஸச்சானி படிவிஜ்ஜ²தீதி – லஹுபஞ்ஞா. லஹும் லஹும் ஸதிபட்டா²னே பா⁴வேதீதி – லஹுபஞ்ஞா. லஹும் லஹும் ஸம்மப்பதா⁴னே பா⁴வேதீதி – லஹுபஞ்ஞா. லஹும் லஹும் இத்³தி⁴பாதே³ பா⁴வேதீதி – லஹுபஞ்ஞா. லஹும் லஹும் இந்த்³ரியானி பா⁴வேதீதி – லஹுபஞ்ஞா. லஹும் லஹும் ப³லானி பா⁴வேதீதி – லஹுபஞ்ஞா. லஹும் லஹும் போ³ஜ்ஜ²ங்கே³ பா⁴வேதீதி – லஹுபஞ்ஞா. லஹும் லஹும் அரியமக்³க³ம் பா⁴வேதீதி – லஹுபஞ்ஞா. லஹும் லஹும் ஸாமஞ்ஞப²லானி ஸச்சி²கரோதீதி – லஹுபஞ்ஞா. லஹும் லஹும் அபி⁴ஞ்ஞாயோ படிவிஜ்ஜ²தீதி – லஹுபஞ்ஞா. லஹும் லஹும் பரமத்த²ம் நிப்³பா³னம் ஸச்சி²கரோதீதி – லஹுபஞ்ஞா. லஹுபஞ்ஞதாய ஸம்வத்தந்தீதி – அயம் லஹுபஞ்ஞா.

ஹாஸபஞ்ஞதாய ஸம்வத்தந்தீதி கதமா ஹாஸபஞ்ஞா? இதே⁴கச்சோ ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ ஸீலானி பரிபூரேதீதி – ஹாஸபஞ்ஞா. ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ இந்த்³ரியஸம்வரம் பரிபூரேதீதி – ஹாஸபஞ்ஞா. ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ போ⁴ஜனே மத்தஞ்ஞுதம் பரிபூரேதீதி – ஹாஸபஞ்ஞா. ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ ஜாக³ரியானுயோக³ம் பரிபூரேதீதி – ஹாஸபஞ்ஞா. ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ ஸீலக்க²ந்த⁴ம்…பே… ஸமாதி⁴க்க²ந்த⁴ம்… பஞ்ஞாக்க²ந்த⁴ம்… விமுத்திக்க²ந்த⁴ம்… விமுத்திஞாணத³ஸ்ஸனக்க²ந்த⁴ம் பரிபூரேதீதி…பே… டா²னாட்டா²னானி படிவிஜ்ஜ²தீதி… விஹாரஸமாபத்தியோ பரிபூரேதீதி … அரியஸச்சானி படிவிஜ்ஜ²தீதி… ஸதிபட்டா²னே பா⁴வேதீதி… ஸம்மப்பதா⁴னே பா⁴வேதீதி… இத்³தி⁴பாதே³ பா⁴வேதீதி… இந்த்³ரியானி பா⁴வேதீதி… ப³லானி பா⁴வேதீதி… போ³ஜ்ஜ²ங்கே³ பா⁴வேதீதி … அரியமக்³க³ம் பா⁴வேதீதி…பே… ஸாமஞ்ஞப²லானி ஸச்சி²கரோதீதி – ஹாஸபஞ்ஞா. ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ அபி⁴ஞ்ஞாயோ படிவிஜ்ஜ²தீதி – ஹாஸபஞ்ஞா. ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ பரமத்த²ம் நிப்³பா³னம் ஸச்சி²கரோதீதி – ஹாஸபஞ்ஞா. ஹாஸபஞ்ஞதாய ஸம்வத்தந்தீதி – அயம் ஹாஸபஞ்ஞா.

7. ஜவனபஞ்ஞதாய ஸம்வத்தந்தீதி கதமா ஜவனபஞ்ஞா? யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் அனிச்சதோ கி²ப்பம் ஜவதீதி – ஜவனபஞ்ஞா. து³க்க²தோ கி²ப்பம் ஜவதீதி – ஜவனபஞ்ஞா. அனத்ததோ கி²ப்பம் ஜவதீதி – ஜவனபஞ்ஞா. யா காசி வேத³னா…பே… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் அனிச்சதோ கி²ப்பம் ஜவதீதி – ஜவனபஞ்ஞா. து³க்க²தோ கி²ப்பம் ஜவதீதி – ஜவனபஞ்ஞா. அனத்ததோ கி²ப்பம் ஜவதீதி – ஜவனபஞ்ஞா. சக்கு²…பே… ஜராமரணம் அதீதானாக³தபச்சுப்பன்னம் அனிச்சதோ கி²ப்பம் ஜவதீதி – ஜவனபஞ்ஞா. து³க்க²தோ கி²ப்பம் ஜவதீதி – ஜவனபஞ்ஞா. அனத்ததோ கி²ப்பம் ஜவதீதி – ஜவனபஞ்ஞா.

ரூபம் அதீதானாக³தபச்சுப்பன்னம் அனிச்சம் க²யட்டே²ன து³க்க²ம் ப⁴யட்டே²ன அனத்தா அஸாரகட்டே²னாதி துலயித்வா தீரயித்வா விபா⁴வயித்வா விபூ⁴தம் கத்வா ரூபனிரோதே⁴ நிப்³பா³னே கி²ப்பம் ஜவதீதி – ஜவனபஞ்ஞா. வேத³னா…பே… ஸஞ்ஞா… ஸங்கா²ரா… விஞ்ஞாணம்… சக்கு²…பே… ஜராமரணம் அதீதானாக³தபச்சுப்பன்னம் அனிச்சம் க²யட்டே²ன து³க்க²ம் ப⁴யட்டே²ன அனத்தா அஸாரகட்டே²னாதி துலயித்வா தீரயித்வா விபா⁴வயித்வா விபூ⁴தம் கத்வா ஜராமரணனிரோதே⁴ [ஜராமரணம் ரூபனிரோதே⁴ (ஸ்யா.)] நிப்³பா³னே கி²ப்பம் ஜவதீதி – ஜவனபஞ்ஞா.

ரூபம் அதீதானாக³தபச்சுப்பன்னம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி துலயித்வா தீரயித்வா விபா⁴வயித்வா விபூ⁴தம் கத்வா ரூபனிரோதே⁴ நிப்³பா³னே கி²ப்பம் ஜவதீதி – ஜவனபஞ்ஞா. வேத³னா…பே… ஸஞ்ஞா… ஸங்கா²ரா… விஞ்ஞாணம்… சக்கு²…பே… ஜராமரணம் அதீதானாக³தபச்சுப்பன்னம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி துலயித்வா தீரயித்வா விபா⁴வயித்வா விபூ⁴தம் கத்வா ஜராமரணனிரோதே⁴ நிப்³பா³னே கி²ப்பம் ஜவதீதி – ஜவனபஞ்ஞா. ஜவனபஞ்ஞதாய ஸம்வத்தந்தீதி – அயம் ஜவனபஞ்ஞா.

திக்க²பஞ்ஞதாய ஸம்வத்தந்தீதி கதமா திக்க²பஞ்ஞா? கி²ப்பம் கிலேஸே சி²ந்த³தீதி – திக்க²பஞ்ஞா. உப்பன்னம் காமவிதக்கம் நாதி⁴வாஸேதி பஜஹதி வினோதே³தி ப்³யந்தீகரோதி [ப்³யந்திம் கரோதி (க.)] அனபா⁴வம் க³மேதீதி – திக்க²பஞ்ஞா. உப்பன்னம் ப்³யாபாத³விதக்கம் நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதீதி – திக்க²பஞ்ஞா. உப்பன்னம் விஹிம்ஸாவிதக்கம் நாதி⁴வாஸேதி…பே… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதீதி – திக்க²பஞ்ஞா. உப்பன்னம் ராக³ம் நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதீதி – திக்க²பஞ்ஞா. உப்பன்னம் தோ³ஸம்…பே… உப்பன்னம் மோஹம் … உப்பன்னம் கோத⁴ம்… உப்பன்னம் உபனாஹம்… மக்க²ம்… பளாஸம்… இஸ்ஸம்… மச்ச²ரியம்… மாயம்… ஸாடே²ய்யம்… த²ம்ப⁴ம்… ஸாரம்ப⁴ம்… மானம்… அதிமானம்… மத³ம்… பமாத³ம்… ஸப்³பே³ கிலேஸே… ஸப்³பே³ து³ச்சரிதே… ஸப்³பே³ அபி⁴ஸங்கா²ரே…பே… ஸப்³பே³ ப⁴வகா³மிகம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதீதி – திக்க²பஞ்ஞா. ஏகஸ்மிம் ஆஸனே சத்தாரோ ச அரியமக்³கா³ சத்தாரி ச ஸாமஞ்ஞப²லானி சதஸ்ஸோ படிஸம்பி⁴தா³யோ ச² அபி⁴ஞ்ஞாயோ அதி⁴க³தா ஹோந்தி ஸச்சி²கதா ப²ஸ்ஸிதா பஞ்ஞாயாதி – திக்க²பஞ்ஞா. திக்க²பஞ்ஞதாய ஸம்வத்தந்தீதி – அயம் திக்க²பஞ்ஞா.

நிப்³பே³தி⁴கபஞ்ஞதாய ஸம்வத்தந்தீதி கதமா நிப்³பே³தி⁴கபஞ்ஞா? இதே⁴கச்சோ ஸப்³ப³ஸங்கா²ரேஸு உப்³பே³க³ப³ஹுலோ ஹோதி உத்தாஸப³ஹுலோ உக்கண்ட²னப³ஹுலோ அரதிப³ஹுலோ அனபி⁴ரதிப³ஹுலோ. ப³ஹிமுகோ² ந ரமதி ஸப்³ப³ஸங்கா²ரேஸு. அனிப்³பி³த்³த⁴புப்³ப³ம் அப்பதா³லிதபுப்³ப³ம் லோப⁴க்க²ந்த⁴ம் நிப்³பி³ஜ்ஜ²தி பதா³லேதீதி – நிப்³பே³தி⁴கபஞ்ஞா. அனிப்³பி³த்³த⁴புப்³ப³ம் அப்பதா³லிதபுப்³ப³ம் தோ³ஸக்க²ந்த⁴ம் நிப்³பி³ஜ்ஜ²தி பதா³லேதீதி – நிப்³பே³தி⁴கபஞ்ஞா. அனிப்³பி³த்³த⁴புப்³ப³ம் அப்பதா³லிதபுப்³ப³ம் மோஹக்க²ந்த⁴ம் நிப்³பி³ஜ்ஜ²தி பதா³லேதீதி – நிப்³பே³தி⁴கபஞ்ஞா. அனிப்³பி³த்³த⁴புப்³ப³ம் அப்பதா³லிதபுப்³ப³ம் கோத⁴ம்…பே… உபனாஹம்… மக்க²ம்… பளாஸம்… இஸ்ஸம்… மச்ச²ரியம்… மாயம்… ஸாடே²ய்யம்… த²ம்ப⁴ம்… ஸாரம்ப⁴ம்… மானம்… அதிமானம்… மத³ம்… பமாத³ம்… ஸப்³பே³ கிலேஸே… ஸப்³பே³ து³ச்சரிதே… ஸப்³பே³ அபி⁴ஸங்கா²ரே…பே… ஸப்³பே³ ப⁴வகா³மிகம்மே நிப்³பி³ஜ்ஜ²தி பதா³லேதீதி – நிப்³பே³தி⁴கபஞ்ஞா. நிப்³பே³தி⁴கபஞ்ஞதாய ஸம்வத்தந்தீதி – அயம் நிப்³பே³தி⁴கபஞ்ஞா.

இமா ஸோளஸ பஞ்ஞாயோ. இமாஹி ஸோளஸஹி பஞ்ஞாஹி ஸமன்னாக³தோ புக்³க³லோ படிஸம்பி⁴த³ப்பத்தோ.