3. து³தியஸுத்தந்தனித்³தே³ஸோ

14. யம் ரூபம் படிச்ச உப்பஜ்ஜதி ஸுக²ம் ஸோமனஸ்ஸம், அயம் ரூபஸ்ஸ அஸ்ஸாதோ³தி – பஹானப்படிவேதோ⁴ ஸமுத³யஸச்சம். யம் ரூபம் அனிச்சம் தம் து³க்க²ம் விபரிணாமத⁴ம்மம், அயம் ரூபஸ்ஸ ஆதீ³னவோதி – பரிஞ்ஞாபடிவேதோ⁴ து³க்க²ஸச்சம். யோ ரூபஸ்மிம் ச²ந்த³ராக³வினயோ ச²ந்த³ராக³ப்பஹானம், இத³ம் ரூபஸ்ஸ நிஸ்ஸரணந்தி – ஸச்சி²கிரியாபடிவேதோ⁴ நிரோத⁴ஸச்சம். யா இமேஸு தீஸு டா²னேஸு தி³ட்டி² ஸங்கப்போ வாசா கம்மந்தோ ஆஜீவோ வாயாமோ ஸதி ஸமாதி⁴ – பா⁴வனாபடிவேதோ⁴ மக்³க³ஸச்சம்.

யம் வேத³னம் படிச்ச…பே… யம் ஸஞ்ஞம் படிச்ச… யம் ஸங்கா²ரே படிச்ச… யம் விஞ்ஞாணம் படிச்ச உப்பஜ்ஜதி ஸுக²ம் ஸோமனஸ்ஸம், அயம் விஞ்ஞாணஸ்ஸ அஸ்ஸாதோ³தி – பஹானப்படிவேதோ⁴ ஸமுத³யஸச்சம். யம் விஞ்ஞாணம் அனிச்சம் தம் து³க்க²ம் விபரிணாமத⁴ம்மம், அயம் விஞ்ஞாணஸ்ஸ ஆதீ³னவோதி – பரிஞ்ஞாபடிவேதோ⁴ து³க்க²ஸச்சம். யோ விஞ்ஞாணஸ்மிம் ச²ந்த³ராக³வினயோ ச²ந்த³ராக³ப்பஹானம், இத³ம் விஞ்ஞாணஸ்ஸ நிஸ்ஸரணந்தி – ஸச்சி²கிரியாபடிவேதோ⁴ நிரோத⁴ஸச்சம். யா இமேஸு தீஸு டா²னேஸு தி³ட்டி² ஸங்கப்போ வாசா கம்மந்தோ ஆஜீவோ வாயாமோ ஸதி ஸமாதி⁴ – பா⁴வனாபடிவேதோ⁴ மக்³க³ஸச்சம்.

15. ஸச்சந்தி கதிஹாகாரேஹி ஸச்சம்? ஏஸனட்டே²ன, பரிக்³க³ஹட்டே²ன, படிவேத⁴ட்டே²ன. கத²ம் ஏஸனட்டே²ன ஸச்சம்? ஜராமரணம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வந்தி – ஏவம் ஏஸனட்டே²ன ஸச்சம். ஜராமரணம் ஜாதினிதா³னம், ஜாதிஸமுத³யம், ஜாதிஜாதிகம், ஜாதிப்பப⁴வந்தி – ஏவம் பரிக்³க³ஹட்டே²ன ஸச்சம். ஜராமரணஞ்ச பஜானாதி, ஜராமரணஸமுத³யஞ்ச பஜானாதி, ஜராமரணனிரோத⁴ஞ்ச பஜானாதி, ஜராமரணனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

ஜாதி கிம்னிதா³னா, கிம்ஸமுத³யா, கிம்ஜாதிகா, கிம்பப⁴வாதி – ஏவம் ஏஸனட்டே²ன ஸச்சம். ஜாதி ப⁴வனிதா³னா, ப⁴வஸமுத³யா, ப⁴வஜாதிகா, ப⁴வப்பப⁴வாதி – ஏவம் பரிக்³க³ஹட்டே²ன ஸச்சம். ஜாதிஞ்ச பஜானாதி, ஜாதிஸமுத³யஞ்ச பஜானாதி, ஜாதினிரோத⁴ஞ்ச பஜானாதி, ஜாதினிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

ப⁴வோ கிம்னிதா³னோ, கிம்ஸமுத³யோ, கிம்ஜாதிகோ, கிம்பப⁴வோதி – ஏவம் ஏஸனட்டே²ன ஸச்சம். ப⁴வோ உபாதா³னனிதா³னோ, உபாதா³னஸமுத³யோ, உபாதா³னஜாதிகோ, உபாதா³னப்பப⁴வோதி – ஏவம் பரிக்³க³ஹட்டே²ன ஸச்சம். ப⁴வம் ச பஜானாதி, ப⁴வஸமுத³யஞ்ச பஜானாதி, ப⁴வனிரோத⁴ஞ்ச பஜானாதி, ப⁴வனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

உபாதா³னம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வந்தி – ஏவம் ஏஸனட்டே²ன ஸச்சம். உபாதா³னம் தண்ஹானிதா³னம், தண்ஹாஸமுத³யம், தண்ஹாஜாதிகம், தண்ஹாபப⁴வந்தி – ஏவம் பரிக்³க³ஹட்டே²ன ஸச்சம். உபாதா³னஞ்ச பஜானாதி, உபாதா³னஸமுத³யஞ்ச பஜானாதி, உபாதா³னனிரோத⁴ஞ்ச பஜானாதி உபாதா³னனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

தண்ஹா கிம்னிதா³னா, கிம்ஸமுத³யா, கிம்ஜாதிகா, கிம்பப⁴வாதி – ஏவம் ஏஸனட்டே²ன ஸச்சம். தண்ஹா வேத³னானிதா³னா, வேத³னாஸமுத³யா, வேத³னாஜாதிகா, வேத³னாபப⁴வாதி – ஏவம் பரிக்³க³ஹட்டே²ன ஸச்சம். தண்ஹஞ்ச பஜானாதி, தண்ஹாஸமுத³யஞ்ச பஜானாதி, தண்ஹானிரோத⁴ஞ்ச பஜானாதி, தண்ஹானிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

வேத³னா கிம்னிதா³னா, கிம்ஸமுத³யா, கிம்ஜாதிகா, கிம்பப⁴வாதி – ஏவம் ஏஸனட்டே²ன ஸச்சம். வேத³னா ப²ஸ்ஸனிதா³னா, ப²ஸ்ஸஸமுத³யா, ப²ஸ்ஸஜாதிகா, ப²ஸ்ஸப்பப⁴வாதி – ஏவம் பரிக்³க³ஹட்டே²ன ஸச்சம். வேத³னஞ்ச பஜானாதி, வேத³னாஸமுத³யஞ்ச பஜானாதி, வேத³னானிரோத⁴ஞ்ச பஜானாதி, வேத³னானிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

ப²ஸ்ஸோ கிம்னிதா³னோ, கிம்ஸமுத³யோ, கிம்ஜாதிகோ, கிம்பப⁴வோதி – ஏவம் ஏஸனட்டே²ன ஸச்சம். ப²ஸ்ஸோ ஸளாயதனனிதா³னோ, ஸளாயதனஸமுத³யோ, ஸளாயதனஜாதிகோ, ஸளாயதனப்பப⁴வோதி – ஏவம் பரிக்³க³ஹட்டே²ன ஸச்சம். ப²ஸ்ஸஞ்ச பஜானாதி, ப²ஸ்ஸஸமுத³யஞ்ச பஜானாதி, ப²ஸ்ஸனிரோத⁴ஞ்ச பஜானாதி, ப²ஸ்ஸனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

ஸளாயதனம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வந்தி – ஏவம் ஏஸனட்டே²ன ஸச்சம். ஸளாயதனம் நாமரூபனிதா³னம், நாமரூபஸமுத³யம், நாமரூபஜாதிகம், நாமரூபப்பப⁴வந்தி – ஏவம் பரிக்³க³ஹட்டே²ன ஸச்சம். ஸளாயதனஞ்ச பஜானாதி, ஸளாயதனஸமுத³யஞ்ச பஜானாதி, ஸளாயதனனிரோத⁴ஞ்ச பஜானாதி, ஸளாயதனனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

நாமரூபம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வந்தி – ஏவம் ஏஸனட்டே²ன ஸச்சம். நாமரூபம் விஞ்ஞாணனிதா³னம், விஞ்ஞாணஸமுத³யம், விஞ்ஞாணஜாதிகம், விஞ்ஞாணப்பப⁴வந்தி – ஏவம் பரிக்³க³ஹட்டே²ன ஸச்சம். நாமரூபஞ்ச பஜானாதி, நாமரூபஸமுத³யஞ்ச பஜானாதி, நாமரூபனிரோத⁴ஞ்ச பஜானாதி, நாமரூபனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

விஞ்ஞாணம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வந்தி – ஏவம் ஏஸனட்டே²ன ஸச்சம். விஞ்ஞாணம் ஸங்கா²ரனிதா³னம், ஸங்கா²ரஸமுத³யம், ஸங்கா²ரஜாதிகம், ஸங்கா²ரப்பப⁴வந்தி – ஏவம் பரிக்³க³ஹட்டே²ன ஸச்சம். விஞ்ஞாணஞ்ச பஜானாதி, விஞ்ஞாணஸமுத³யஞ்ச பஜானாதி, விஞ்ஞாணனிரோத⁴ஞ்ச பஜானாதி, விஞ்ஞாணனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

ஸங்கா²ரா கிம்னிதா³னா, கிம்ஸமுத³யா, கிம்ஜாதிகா, கிம்பப⁴வாதி – ஏவம் ஏஸனட்டே²ன ஸச்சம். ஸங்கா²ரா அவிஜ்ஜானிதா³னா, அவிஜ்ஜாஸமுத³யா, அவிஜ்ஜாஜாதிகா, அவிஜ்ஜாபப⁴வாதி – ஏவம் பரிக்³க³ஹட்டே²ன ஸச்சம். ஸங்கா²ரே ச பஜானாதி, ஸங்கா²ரஸமுத³யஞ்ச பஜானாதி, ஸங்கா²ரனிரோத⁴ஞ்ச பஜானாதி, ஸங்கா²ரனிரோத⁴கா³மினிம் படிபத³ஞ்ச பஜானாதி – ஏவம் படிவேத⁴ட்டே²ன ஸச்சம்.

16. ஜராமரணம் து³க்க²ஸச்சம், ஜாதி ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். ஜாதி து³க்க²ஸச்சம், ப⁴வோ ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். ப⁴வோ து³க்க²ஸச்சம், உபாதா³னம் ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். உபாதா³னம் து³க்க²ஸச்சம், தண்ஹா ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். தண்ஹா து³க்க²ஸச்சம், வேத³னா ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். வேத³னா து³க்க²ஸச்சம், ப²ஸ்ஸோ ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். ப²ஸ்ஸோ து³க்க²ஸச்சம், ஸளாயதனம் ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். ஸளாயதனம் து³க்க²ஸச்சம், நாமரூபம் ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். நாமரூபம் து³க்க²ஸச்சம், விஞ்ஞாணம் ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். விஞ்ஞாணம் து³க்க²ஸச்சம், ஸங்கா²ரா ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். ஸங்கா²ரா து³க்க²ஸச்சம், அவிஜ்ஜா ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம்.

ஜராமரணம் ஸியா து³க்க²ஸச்சம், ஸியா ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சம். ஜாதி ஸியா து³க்க²ஸச்சம், ஸியா ஸமுத³யஸச்சம்…பே… ப⁴வோ ஸியா து³க்க²ஸச்சம், ஸியா ஸமுத³யஸச்சம், உபி⁴ன்னம்பி நிஸ்ஸரணம் நிரோத⁴ஸச்சம், நிரோத⁴ப்பஜானனா மக்³க³ஸச்சந்தி.

பா⁴ணவாரோ.

ஸச்சகதா² நிட்டி²தா.