8. விபல்லாஸகதா²

236. புரிமனிதா³னம். ‘‘சத்தாரோமே, பி⁴க்க²வே [அ. நி. 4.49 பஸ்ஸிதப்³பா³], ஸஞ்ஞாவிபல்லாஸா சித்தவிபல்லாஸா தி³ட்டி²விபல்லாஸா. கதமே சத்தாரோ? அனிச்சே, பி⁴க்க²வே, நிச்சந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ. து³க்கே², பி⁴க்க²வே, ஸுக²ந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ. அனத்தனி, பி⁴க்க²வே, அத்தாதி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ. அஸுபே⁴, பி⁴க்க²வே, ஸுப⁴ந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ. இமே கோ², பி⁴க்க²வே, சத்தாரோ ஸஞ்ஞாவிபல்லாஸா சித்தவிபல்லாஸா தி³ட்டி²விபல்லாஸா.

‘‘சத்தாரோமே, பி⁴க்க²வே, நஸஞ்ஞாவிபல்லாஸா நசித்தவிபல்லாஸா நதி³ட்டி²விபல்லாஸா. கதமே சத்தாரோ? அனிச்சே, பி⁴க்க²வே, அனிச்சந்தி நஸஞ்ஞாவிபல்லாஸோ நசித்தவிபல்லாஸோ நதி³ட்டி²விபல்லாஸோ. து³க்கே², பி⁴க்க²வே, து³க்க²ந்தி நஸஞ்ஞாவிபல்லாஸோ நசித்தவிபல்லாஸோ நதி³ட்டி²விபல்லாஸோ. அனத்தனி, பி⁴க்க²வே, அனத்தாதி நஸஞ்ஞாவிபல்லாஸோ நசித்தவிபல்லாஸோ நதி³ட்டி²விபல்லாஸோ. அஸுபே⁴, பி⁴க்க²வே, அஸுப⁴ந்தி நஸஞ்ஞாவிபல்லாஸோ நசித்தவிபல்லாஸோ நதி³ட்டி²விபல்லாஸோ. இமே கோ², பி⁴க்க²வே, சத்தாரோ நஸஞ்ஞாவிபல்லாஸா நசித்தவிபல்லாஸா நதி³ட்டி²விபல்லாஸா’’தி.

‘‘அனிச்சே நிச்சஸஞ்ஞினோ, து³க்கே² ச ஸுக²ஸஞ்ஞினோ;

அனத்தனி ச அத்தாதி [அத்தஸஞ்ஞினோ (ஸ்யா.) அ. நி. 4.49 பஸ்ஸிதப்³பா³], அஸுபே⁴ ஸுப⁴ஸஞ்ஞினோ;

மிச்சா²தி³ட்டி²ஹதா ஸத்தா, கி²த்தசித்தா விஸஞ்ஞினோ.

‘‘தே யோக³யுத்தா மாரஸ்ஸ, அயோக³க்கே²மினோ ஜனா;

ஸத்தா க³ச்ச²ந்தி ஸம்ஸாரம், ஜாதிமரணகா³மினோ.

‘‘யதா³ ச பு³த்³தா⁴ லோகஸ்மிம், உப்பஜ்ஜந்தி பப⁴ங்கரா;

தே இமம் த⁴ம்மம் பகாஸேந்தி, து³க்கூ²பஸமகா³மினம்.

‘‘தேஸம் ஸுத்வான ஸப்பஞ்ஞா, ஸசித்தம் பச்சலத்³து⁴ [பச்சலத்³து⁴ம் (ஸ்யா.), பச்சலத்³தா⁴ அ. நி. 4.49] தே;

அனிச்சம் அனிச்சதோ த³க்கு²ம், து³க்க²மத்³த³க்கு² து³க்க²தோ.

‘‘அனத்தனி அனத்தாதி, அஸுப⁴ம் அஸுப⁴தத்³த³ஸும்;

ஸம்மாதி³ட்டி²ஸமாதா³னா, ஸப்³ப³ம் து³க்க²ம் உபச்சகு³’’ந்தி.

இமே சத்தாரோ விபல்லாஸா தி³ட்டி²ஸம்பன்னஸ்ஸ புக்³க³லஸ்ஸ பஹீனா, அப்பஹீனாதி. கேசி பஹீனா, கேசி அப்பஹீனா? அனிச்சே நிச்சந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ பஹீனோ. து³க்கே² ஸுக²ந்தி ஸஞ்ஞா உப்பஜ்ஜதி, சித்தம் உப்பஜ்ஜதி, தி³ட்டி²விபல்லாஸோ பஹீனோ. அனத்தனி அத்தாதி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ பஹீனோ. அஸுபே⁴ ஸுப⁴ந்தி ஸஞ்ஞா உப்பஜ்ஜதி, சித்தம் உப்பஜ்ஜதி, தி³ட்டி²விபல்லாஸோ பஹீனோ. த்³வீஸு வத்தூ²ஸு ச² விபல்லாஸா பஹீனா. த்³வீஸு வத்தூ²ஸு த்³வே விபல்லாஸா பஹீனா, சத்தாரோ விபல்லாஸா அப்பஹீனா. சதூஸு வத்தூ²ஸு அட்ட² விபல்லாஸா பஹீனா, சத்தாரோ விபல்லாஸா அப்பஹீனாதி.

விபல்லாஸகதா² நிட்டி²தா.