2. நித்³தே³ஸோ

210. கதமோ ஸுஞ்ஞதோ விமோக்கோ²? இத⁴ பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘‘ஸுஞ்ஞமித³ம் அத்தேன வா அத்தனியேன வா’’தி. ஸோ தத்த² அபி⁴னிவேஸம் ந கரோதீதி – ஸுஞ்ஞதோ விமோக்கோ². அயம் ஸுஞ்ஞதோ விமோக்கோ².

கதமோ அனிமித்தோ விமோக்கோ²? இத⁴ பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘‘ஸுஞ்ஞமித³ம் அத்தேன வா அத்தனியேன வா’’தி. ஸோ தத்த² நிமித்தம் ந கரோதீதி – அனிமித்தோ விமோக்கோ². அயம் அனிமித்தோ விமோக்கோ².

கதமோ அப்பணிஹிதோ விமோக்கோ²? இத⁴ பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘‘ஸுஞ்ஞமித³ம் அத்தேன வா அத்தனியேன வா’’தி. ஸோ தத்த² பணிதி⁴ம் ந கரோதீதி – அப்பணிஹிதோ விமோக்கோ². அயம் அப்பணிஹிதோ விமோக்கோ².

கதமோ அஜ்ஜ²த்தவுட்டா²னோ விமோக்கோ²? சத்தாரி ஜா²னானி – அயம் அஜ்ஜ²த்தவுட்டா²னோ விமோக்கோ². கதமோ ப³ஹித்³தா⁴வுட்டா²னோ விமோக்கோ²? சதஸ்ஸோ அரூபஸமாபத்தியோ – அயம் ப³ஹித்³தா⁴வுட்டா²னோ விமோக்கோ². கதமோ து³ப⁴தோ வுட்டா²னோ விமோக்கோ²? சத்தாரோ அரியமக்³கா³ – அயம் து³ப⁴தோ வுட்டா²னோ விமோக்கோ².

கதமே அஜ்ஜ²த்தவுட்டா²னா சத்தாரோ விமோக்கா²? பட²மம் ஜா²னம் நீவரணேஹி வுட்டா²தி. து³தியம் ஜா²னம் விதக்கவிசாரேஹி வுட்டா²தி. ததியம் ஜா²னம் பீதியா வுட்டா²தி. சதுத்த²ம் ஜா²னம் ஸுக²து³க்கே²ஹி வுட்டா²தி. இமே அஜ்ஜ²த்தவுட்டா²னா சத்தாரோ விமோக்கா².

கதமே ப³ஹித்³தா⁴வுட்டா²னா சத்தாரோ விமோக்கா²? ஆகாஸானஞ்சாயதனஸமாபத்தி ரூபஸஞ்ஞாய படிக⁴ஸஞ்ஞாய நானத்தஸஞ்ஞாய வுட்டா²தி. விஞ்ஞாணஞ்சாயதனஸமாபத்தி ஆகாஸானஞ்சாயதனஸஞ்ஞாய வுட்டா²தி. ஆகிஞ்சஞ்ஞாயதனஸமாபத்தி விஞ்ஞாணஞ்சாயதனஸஞ்ஞாய வுட்டா²தி. நேவஸஞ்ஞானாஸஞ்ஞாயதனஸமாபத்தி ஆகிஞ்சஞ்ஞாயதனஸஞ்ஞாய வுட்டா²தி. இமே ப³ஹித்³தா⁴வுட்டா²னா சத்தாரோ விமோக்கா².

கதமே து³ப⁴தோ வுட்டா²னா சத்தாரோ விமோக்கா²? ஸோதாபத்திமக்³கோ³ ஸக்காயதி³ட்டி²விசிகிச்சா²ஸீலப்³ப³தபராமாஸா தி³ட்டா²னுஸயா விசிகிச்சா²னுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. ஸகதா³கா³மிமக்³கோ³ ஓளாரிகா காமராக³ஸஞ்ஞோஜனா படிக⁴ஸஞ்ஞோஜனா ஓளாரிகா காமராகா³னுஸயா படிகா⁴னுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. அனாகா³மிமக்³கோ³ அனுஸஹக³தா காமராக³ஸஞ்ஞோஜனா படிக⁴ஸஞ்ஞோஜனா அனுஸஹக³தா காமராகா³னுஸயா படிகா⁴னுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. அரஹத்தமக்³கோ³ ரூபராகா³ அரூபராகா³ மானா உத்³த⁴ச்சா அவிஜ்ஜாய மானானுஸயா ப⁴வராகா³னுஸயா அவிஜ்ஜானுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. இமே து³ப⁴தோ வுட்டா²னா சத்தாரோ விமோக்கா².

211. கதமே அஜ்ஜ²த்தவுட்டா²னானம் அனுலோமா சத்தாரோ விமோக்கா²? பட²மம் ஜா²னம் படிலாப⁴த்தா²ய விதக்கோ ச விசாரோ ச பீதி ச ஸுக²ஞ்ச சித்தேகக்³க³தா ச, து³தியம் ஜா²னம் படிலாப⁴த்தா²ய…பே… ததியம் ஜா²னம் படிலாப⁴த்தா²ய…பே… சதுத்த²ம் ஜா²னம் படிலாப⁴த்தா²ய விதக்கோ ச விசாரோ ச பீதி ச ஸுக²ஞ்ச சித்தேகக்³க³தா ச – இமே அஜ்ஜ²த்தவுட்டா²னானம் அனுலோமா சத்தாரோ விமோக்கா².

கதமே ப³ஹித்³தா⁴வுட்டா²னானம் அனுலோமா சத்தாரோ விமோக்கா²? ஆகாஸானஞ்சாயதனஸமாபத்திம் படிலாப⁴த்தா²ய விதக்கோ ச விசாரோ ச பீதி ச ஸுக²ஞ்ச சித்தேகக்³க³தா ச, விஞ்ஞாணஞ்சாயதனஸமாபத்திம்…பே… ஆகிஞ்சஞ்ஞாயதனஸமாபத்திம் …பே… நேவஸஞ்ஞானாஸஞ்ஞாயதனஸமாபத்திம் படிலாப⁴த்தா²ய விதக்கோ ச விசாரோ ச பீதி ச ஸுக²ஞ்ச சித்தேகக்³க³தா ச – இமே ப³ஹித்³தா⁴வுட்டா²னானம் அனுலோமா சத்தாரோ விமோக்கா².

கதமே து³ப⁴தோ வுட்டா²னானம் அனுலோமா சத்தாரோ விமோக்கா²? ஸோதாபத்திமக்³க³ம் படிலாப⁴த்தா²ய அனிச்சானுபஸ்ஸனா,து³க்கா²னுபஸ்ஸனா,அனத்தானுபஸ்ஸனா. ஸகதா³கா³மிமக்³க³ம் படிலாப⁴த்தா²ய…பே… அனாகா³மிமக்³க³ம் படிலாப⁴த்தா²ய…பே… அரஹத்தமக்³க³ம் படிலாப⁴த்தா²ய அனிச்சானுபஸ்ஸனா,து³க்கா²னுபஸ்ஸனா,அனத்தானுபஸ்ஸனா – இமே து³ப⁴தோ வுட்டா²னானம் அனுலோமா சத்தாரோ விமோக்கா².

கதமே அஜ்ஜ²த்தவுட்டா²னபடிப்பஸ்ஸத்³தீ⁴ சத்தாரோ விமோக்கா²? பட²மஸ்ஸ ஜா²னஸ்ஸ படிலாபோ⁴ வா விபாகோ வா, து³தியஸ்ஸ ஜா²னஸ்ஸ…பே… ததியஸ்ஸ ஜா²னஸ்ஸ…பே… சதுத்த²ஸ்ஸ ஜா²னஸ்ஸ படிலாபோ⁴ வா விபாகோ வா – இமே அஜ்ஜ²த்தவுட்டா²னபடிப்பஸ்ஸத்³தீ⁴ சத்தாரோ விமோக்கா².

கதமே ப³ஹித்³தா⁴வுட்டா²னபடிப்பஸ்ஸத்³தீ⁴ சத்தாரோ விமோக்கா²? ஆகாஸானஞ்சாயதனஸமாபத்தியா படிலாபோ⁴ வா விபாகோ வா, விஞ்ஞாணஞ்சாயதனஸமாபத்தியா…பே… ஆகிஞ்சஞ்ஞாயதனஸமாபத்தியா…பே… நேவஸஞ்ஞானாஸஞ்ஞாயதனஸமாபத்தியா படிலாபோ⁴ வா விபாகோ வா – இமே ப³ஹித்³தா⁴வுட்டா²னபடிப்பஸ்ஸத்³தீ⁴ சத்தாரோ விமோக்கா².

கதமே து³ப⁴தோ வுட்டா²னபடிப்பஸ்ஸத்³தீ⁴ சத்தாரோ விமோக்கா²? ஸோதாபத்திமக்³க³ஸ்ஸ ஸோதாபத்திப²லம், ஸகதா³கா³மிமக்³க³ஸ்ஸ ஸகதா³கா³மிப²லம், அனாகா³மிமக்³க³ஸ்ஸ அனாகா³மிப²லம், அரஹத்தமக்³க³ஸ்ஸ அரஹத்தப²லம் – இமே து³ப⁴தோ வுட்டா²னபடிப்பஸ்ஸத்³தீ⁴ சத்தாரோ விமோக்கா².

212. கத²ம் ரூபீ ரூபானி பஸ்ஸதீதி – விமோக்கோ²? இதே⁴கச்சோ அஜ்ஜ²த்தம் பச்சத்தம் நீலனிமித்தம் மனஸிகரோதி, நீலஸஞ்ஞம் படிலப⁴தி. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸ்வாவத்தி²தம் அவத்தா²பேதி. ஸோ தம் நிமித்தம் ஸுக்³க³ஹிதம் கத்வா ஸூபதா⁴ரிதம் [ஸுபதா⁴ரிதம் (க.)] உபதா⁴ரேத்வா ஸ்வாவத்தி²தம் அவத்தா²பேத்வா ப³ஹித்³தா⁴ நீலனிமித்தே சித்தம் உபஸம்ஹரதி, நீலஸஞ்ஞம் படிலப⁴தி. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸ்வாவத்தி²தம் அவத்தா²பேதி. ஸோ தம் நிமித்தம் ஸுக்³க³ஹிதம் கத்வா உபதா⁴ரேத்வா ஸ்வாவத்தி²தம் அவத்தா²பேத்வா ஆஸேவதி பா⁴வேதி ப³ஹுலீகரோதி. தஸ்ஸ ஏவம் ஹோதி – ‘‘அஜ்ஜ²த்தஞ்ச ப³ஹித்³தா⁴ ச உப⁴யமித³ம் ரூப’’ந்தி, ரூபஸஞ்ஞீ ஹோதி. இதே⁴கச்சோ அஜ்ஜ²த்தம் பச்சத்தம் பீதனிமித்தம்…பே… லோஹிதனிமித்தம்…பே… ஓதா³தனிமித்தம் மனஸிகரோதி, ஓதா³தஸஞ்ஞம் படிலப⁴தி. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸ்வாவத்தி²தம் அவத்தா²பேதி. ஸோ தம் நிமித்தம் ஸுக்³க³ஹிதம் கத்வா ஸூபதா⁴ரிதம் உபதா⁴ரேத்வா ஸ்வாவத்தி²தம் அவத்தா²பேத்வா ப³ஹித்³தா⁴ ஓதா³தனிமித்தே சித்தம் உபஸம்ஹரதி, ஓதா³தஸஞ்ஞம் படிலப⁴தி. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸ்வாவத்தி²தம் அவத்தா²பேதி. ஸோ தம் நிமித்தம் ஸுக்³க³ஹிதம் கத்வா ஸூபதா⁴ரிதம் உபதா⁴ரேத்வா ஸ்வாவத்தி²தம் அவத்தா²பேத்வா ஆஸேவதி பா⁴வேதி ப³ஹுலீகரோதி. தஸ்ஸ ஏவம் ஹோதி – ‘‘அஜ்ஜ²த்தஞ்ச ப³ஹித்³தா⁴ ச உப⁴யமித³ம் ரூப’’ந்தி, ரூபஸஞ்ஞீ ஹோதி. ஏவம் ரூபீ ரூபானி பஸ்ஸதீதி – விமோக்கோ².

கத²ம் அஜ்ஜ²த்தம் அரூபஸஞ்ஞீ ப³ஹித்³தா⁴ ரூபானி பஸ்ஸதீதி – விமோக்கோ²? இதே⁴கச்சோ அஜ்ஜ²த்தம் பச்சத்தம் நீலனிமித்தம் ந மனஸிகரோதி, நீலஸஞ்ஞம் ந படிலப⁴தி; ப³ஹித்³தா⁴ நீலனிமித்தே சித்தம் உபஸம்ஹரதி, நீலஸஞ்ஞம் படிலப⁴தி. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸ்வாவத்தி²தம் அவத்தா²பேதி. ஸோ தம் நிமித்தம் ஸுக்³க³ஹிதம் கத்வா ஸூபதா⁴ரிதம் உபதா⁴ரேத்வா ஸ்வாவத்தி²தம் அவத்தா²பேத்வா ஆஸேவதி பா⁴வேதி ப³ஹுலீகரோதி. தஸ்ஸ ஏவம் ஹோதி – ‘‘அஜ்ஜ²த்தம் அரூபம், ப³ஹித்³தா⁴ ரூபமித³’’ந்தி, ரூபஸஞ்ஞீ ஹோதி. இதே⁴கச்சோ அஜ்ஜ²த்தம் பச்சத்தம் பீதனிமித்தம்…பே… லோஹிதனிமித்தம்…பே… ஓதா³தனிமித்தம் ந மனஸிகரோதி, ஓதா³தஸஞ்ஞம் ந படிலப⁴தி; ப³ஹித்³தா⁴ ஓதா³தனிமித்தே சித்தம் உபஸம்ஹரதி, ஓதா³தஸஞ்ஞம் படிலப⁴தி. ஸோ தம் நிமித்தம் ஸுக்³க³ஹிதம் கரோதி, ஸூபதா⁴ரிதம் உபதா⁴ரேதி, ஸ்வாவத்தி²தம் அவத்தா²பேதி. ஸோ தம் நிமித்தம் ஸுக்³க³ஹிதம் கத்வா ஸூபதா⁴ரிதம் உபதா⁴ரேத்வா ஸ்வாவத்தி²தம் அவத்தா²பேத்வா ஆஸேவதி பா⁴வேதி ப³ஹுலீகரோதி. தஸ்ஸ ஏவம் ஹோதி – ‘‘அஜ்ஜ²த்தம் அரூபம் ப³ஹித்³தா⁴ ரூபமித³’’ந்தி, ரூபஸஞ்ஞீ ஹோதி. ஏவம் அஜ்ஜ²த்தம் அரூபஸஞ்ஞீ ப³ஹித்³தா⁴ ரூபானி பஸ்ஸதீதி – விமோக்கோ².

கத²ம் ‘‘ஸுப⁴’’ந்தேவ அதி⁴முத்தோ ஹோதீதி – விமோக்கோ²? இத⁴ பி⁴க்கு² மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன [அப்³யாபஜ்ஜே²ன (ஸ்யா.)] ப²ரித்வா விஹரதி. மேத்தாய பா⁴விதத்தா ஸத்தா அப்படிகூலா ஹோந்தி. கருணாஸஹக³தேன சேதஸா…பே… கருணாய பா⁴விதத்தா ஸத்தா அப்படிகூலா ஹோந்தி. முதி³தாஸஹக³தேன சேதஸா…பே… முதி³தாய பா⁴விதத்தா ஸத்தா அப்படிகூலா ஹோந்தி. உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரதி…பே… உபேக்கா²ய பா⁴விதத்தா ஸத்தா அப்படிகூலா ஹோந்தி. ஏவம் ‘‘ஸுப⁴ம்’’ தேவ அதி⁴முத்தோ ஹோதீதி – விமோக்கோ².

213. கதமோ ஆகாஸானஞ்சாயதனஸமாபத்தி விமோக்கோ²? இத⁴ பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘‘அனந்தோ ஆகாஸோ’’தி ஆகாஸானஞ்சாயதனம் உபஸம்பஜ்ஜ விஹரதி – அயம் ஆகாஸானஞ்சாயதனஸமாபத்தி விமோக்கோ².

கதமோ விஞ்ஞாணஞ்சாயதனஸமாபத்தி விமோக்கோ²? இத⁴ பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘‘அனந்தம் விஞ்ஞாண’’ந்தி விஞ்ஞாணஞ்சாயதனம் உபஸம்பஜ்ஜ விஹரதி – அயம் விஞ்ஞாணஞ்சாயதனஸமாபத்தி விமோக்கோ².

கதமோ ஆகிஞ்சஞ்ஞாயதனஸமாபத்தி விமோக்கோ²? இத⁴ பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘‘நத்தி² கிஞ்சீ’’தி ஆகிஞ்சஞ்ஞாயதனம் உபஸம்பஜ்ஜ விஹரதி – அயம் ஆகிஞ்சஞ்ஞாயதனஸமாபத்தி விமோக்கோ².

கதமோ நேவஸஞ்ஞானாஸஞ்ஞாயதனஸமாபத்தி விமோக்கோ²? இத⁴ பி⁴க்கு² ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி – அயம் நேவஸஞ்ஞானாஸஞ்ஞாயதனஸமாபத்தி விமோக்கோ².

கதமோ ஸஞ்ஞாவேத³யிதனிரோத⁴ஸமாபத்தி விமோக்கோ²? இத⁴ பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி – அயம் ஸஞ்ஞாவேத³யிதனிரோத⁴ஸமாபத்தி விமோக்கோ².

கதமோ ஸமயவிமோக்கோ²? சத்தாரி ச ஜா²னானி சதஸ்ஸோ ச அரூபஸமாபத்தியோ – அயம் ஸமயவிமோக்கோ².

கதமோ அஸமயவிமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் அஸமயவிமோக்கோ².

கதமோ ஸாமயிகோ விமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் ஸாமயிகோ விமோக்கோ².

கதமோ அஸாமயிகோ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் அஸாமயிகோ விமோக்கோ².

கதமோ குப்போ விமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் குப்போ விமோக்கோ².

கதமோ அகுப்போ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் அகுப்போ விமோக்கோ².

கதமோ லோகியோ விமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் லோகியோ விமோக்கோ².

கதமோ லோகுத்தரோ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் லோகுத்தரோ விமோக்கோ².

கதமோ ஸாஸவோ விமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் ஸாஸவோ விமோக்கோ².

கதமோ அனாஸவோ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் அனாஸவோ விமோக்கோ².

கதமோ ஸாமிஸோ விமோக்கோ²? ரூபப்படிஸஞ்ஞுத்தோ விமோக்கோ² – அயம் ஸாமிஸோ விமோக்கோ².

கதமோ நிராமிஸோ விமோக்கோ²? அரூபப்படிஸஞ்ஞுத்தோ விமோக்கோ² – அயம் நிராமிஸோ விமோக்கோ².

கதமோ நிராமிஸா நிராமிஸதரோ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் நிராமிஸானிராமிஸதரோ விமோக்கோ².

கதமோ பணிஹிதோ விமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் பணிஹிதோ விமோக்கோ². கதமோ அப்பணிஹிதோ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் அப்பணிஹிதோ விமோக்கோ².

கதமோ பணிஹிதப்படிப்பஸ்ஸத்³தி⁴ விமோக்கோ²? பட²மஸ்ஸ ஜா²னஸ்ஸ படிலாபோ⁴ வா விபாகோ வா …பே… நேவஸஞ்ஞானாஸஞ்ஞாயதனஸமாபத்தியா படிலாபோ⁴ வா விபாகோ வா – அயம் பணிஹிதப்படிப்பஸ்ஸத்³தி⁴ விமோக்கோ².

கதமோ ஸஞ்ஞுத்தோ விமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் ஸஞ்ஞுத்தோ விமோக்கோ².

கதமோ விஸஞ்ஞுத்தோ விமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் விஸஞ்ஞுத்தோ விமோக்கோ².

கதமோ ஏகத்தவிமோக்கோ²? சத்தாரோ ச அரியமக்³கா³, சத்தாரி ச ஸாமஞ்ஞப²லானி, நிப்³பா³னஞ்ச – அயம் ஏகத்தவிமோக்கோ².

கதமோ நானத்தவிமோக்கோ²? சத்தாரி ச ஜா²னானி, சதஸ்ஸோ ச அரூபஸமாபத்தியோ – அயம் நானத்தவிமோக்கோ².

214. கதமோ ஸஞ்ஞாவிமோக்கோ²? ஸியா ஏகோ ஸஞ்ஞாவிமோக்கோ² த³ஸ ஸஞ்ஞாவிமோக்கா² ஹோந்தி, த³ஸ ஸஞ்ஞாவிமோக்கா² ஏகோ ஸஞ்ஞாவிமோக்கோ² ஹோதி, வத்து²வஸேன பரியாயேன. கத²ஞ்ச ஸியா? அனிச்சானுபஸ்ஸனாஞாம் நிச்சதோ ஸஞ்ஞாய முச்சதீதி – ஸஞ்ஞாவிமோக்கோ². து³க்கா²னுபஸ்ஸனாஞாம் ஸுக²தோ ஸஞ்ஞாய முச்சதீதி – ஸஞ்ஞாவிமோக்கோ². அனத்தானுபஸ்ஸனாஞாணம் அத்ததோ ஸஞ்ஞாய முச்சதீதி – ஸஞ்ஞாவிமோக்கோ². நிப்³பி³தா³னுபஸ்ஸனாஞாணம் நந்தி³யா ஸஞ்ஞாய முச்சதீதி – ஸஞ்ஞாவிமோக்கோ². விராகா³னுபஸ்ஸனாஞாணம் ராக³தோ ஸஞ்ஞாய முச்சதீதி – ஸஞ்ஞாவிமோக்கோ². நிரோதா⁴னுபஸ்ஸனாஞாணம் ஸமுத³யதோ ஸஞ்ஞாய முச்சதீதி – ஸஞ்ஞாவிமோக்கோ². படினிஸ்ஸக்³கா³னுபஸ்ஸனாஞாணம் ஆதா³னதோ ஸஞ்ஞாய முச்சதீதி – ஸஞ்ஞாவிமோக்கோ². அனிமித்தானுபஸ்ஸனாஞாணம் நிமித்ததோ ஸஞ்ஞாய முச்சதீதி – ஸஞ்ஞாவிமோக்கோ². அப்பணிஹிதானுபஸ்ஸனாஞாணம் பணிதி⁴யா ஸஞ்ஞாய முச்சதீதி – ஸஞ்ஞாவிமோக்கோ². ஸுஞ்ஞதானுபஸ்ஸனாஞாணம் அபி⁴னிவேஸதோ ஸஞ்ஞாய முச்சதீதி – ஸஞ்ஞாவிமோக்கோ². ஏவம் ஸியா ஏகோ ஸஞ்ஞாவிமோக்கோ² த³ஸ ஸஞ்ஞாவிமோக்கா² ஹோந்தி, த³ஸ ஸஞ்ஞாவிமோக்கா² ஏகோ ஸஞ்ஞாவிமோக்கோ² ஹோதி வத்து²வஸேன பரியாயேன.

ரூபே அனிச்சானுபஸ்ஸனாஞாணம் நிச்சதோ ஸஞ்ஞாய முச்சதீதி – ஸஞ்ஞாவிமோக்கோ²…பே… ரூபே ஸுஞ்ஞதானுபஸ்ஸனாஞாணம் அபி⁴னிவேஸதோ ஸஞ்ஞாய முச்சதீதி – ஸஞ்ஞாவிமோக்கோ². ஏவம் ஸியா ஏகோ ஸஞ்ஞாவிமோக்கோ² த³ஸ ஸஞ்ஞாவிமோக்கா² ஹோந்தி, த³ஸ ஸஞ்ஞாவிமோக்கா² ஏகோ ஸஞ்ஞாவிமோக்கோ² ஹோதி வத்து²வஸேன பரியாயேன.

வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனாஞாணம் நிச்சதோ ஸஞ்ஞாய முச்சதீதி – ஸஞ்ஞாவிமோக்கோ²…பே… ஜராமரணே ஸுஞ்ஞதானுபஸ்ஸனாஞாணம் அபி⁴னிவேஸதோ ஸஞ்ஞாய முச்சதீதி – ஸஞ்ஞாவிமோக்கோ². ஏவம் ஸியா, ஏகோ ஸஞ்ஞாவிமோக்கோ² த³ஸ ஸஞ்ஞாவிமோக்கா² ஹோந்தி, த³ஸ ஸஞ்ஞாவிமோக்கா² ஏகோ ஸஞ்ஞாவிமோக்கோ² ஹோதி வத்து²வஸேன பரியாயேன – அயம் ஸஞ்ஞாவிமோக்கோ².

215. கதமோ ஞாணவிமோக்கோ²? ஸியா ஏகோ ஞாணவிமோக்கோ² த³ஸ ஞாணவிமோக்கா² ஹோந்தி, த³ஸ ஞாணவிமோக்கா² ஏகோ ஞாணவிமோக்கோ² ஹோதி வத்து²வஸேன பரியாயேன ஸியாதி. கத²ஞ்ச ஸியா? அனிச்சானுபஸ்ஸனா யதா²பூ⁴தம் ஞாணம் நிச்சதோ ஸம்மோஹா அஞ்ஞாணா முச்சதீதி – ஞாணவிமோக்கோ². து³க்கா²னுபஸ்ஸனா யதா²பூ⁴தம் ஞாணம் ஸுக²தோ ஸம்மோஹா அஞ்ஞாணா முச்சதீதி – ஞாணவிமோக்கோ². அனத்தானுபஸ்ஸனா யதா²பூ⁴தம் ஞாணம் அத்ததோ ஸம்மோஹா அஞ்ஞாணா முச்சதீதி – ஞாணவிமோக்கோ². நிப்³பி³தா³னுபஸ்ஸனா யதா²பூ⁴தம் ஞாணம் நந்தி³யா ஸம்மோஹா அஞ்ஞாணா முச்சதீதி – ஞாணவிமோக்கோ². விராகா³னுபஸ்ஸனா யதா²பூ⁴தம் ஞாணம் ராக³தோ ஸம்மோஹா அஞ்ஞாணா முச்சதீதி – ஞாணவிமோக்கோ². நிரோதா⁴னுபஸ்ஸனா யதா²பூ⁴தம் ஞாணம் ஸமுத³யதோ ஸம்மோஹா அஞ்ஞாணா முச்சதீதி – ஞாணவிமோக்கோ². படினிஸ்ஸக்³கா³னுபஸ்ஸனா யதா²பூ⁴தம் ஞாணம் ஆதா³னதோ ஸம்மோஹா அஞ்ஞாணா முச்சதீதி – ஞாணவிமோக்கோ². அனிமித்தானுபஸ்ஸனா யதா²பூ⁴தம் ஞாணம் நிமித்ததோ ஸம்மோஹா அஞ்ஞாணா முச்சதீதி – ஞாணவிமோக்கோ². அப்பணிஹிதானுபஸ்ஸனா தா²பூ⁴தம் ஞாணம் பணிதி⁴யா ஸம்மோஹா அஞ்ஞாணா முச்சதீதி – ஞாணவிமோக்கோ². ஸுஞ்ஞதானுபஸ்ஸனா யதா²பூ⁴தம் ஞாணம் அபி⁴னிவேஸதோ ஸம்மோஹா அஞ்ஞாணா முச்சதீதி – ஞாணவிமோக்கோ². ஏவம் ஸியா ஏகோ ஞாணவிமோக்கோ² த³ஸ ஞாணவிமோக்கா² ஹோந்தி, த³ஸ ஞாணவிமோக்கா² ஏகோ ஞாணவிமோக்கோ² ஹோதி வத்து²வஸேன பரியாயேன.

ரூபே அனிச்சானுபஸ்ஸனா யதா²பூ⁴தம் ஞாணம் நிச்சதோ ஸம்மோஹா அஞ்ஞாணா முச்சதீதி – ஞாணவிமோக்கோ²…பே… ரூபே ஸுஞ்ஞதானுபஸ்ஸனா யதா²பூ⁴தம் ஞாணம் அபி⁴னிவேஸதோ ஸம்மோஹா அஞ்ஞாணா முச்சதீதி – ஞாணவிமோக்கோ². ஏவம் ஸியா ஏகோ ஞாணவிமோக்கோ² த³ஸ ஞாணவிமோக்கா² ஹோந்தி, த³ஸ ஞாணவிமோக்கா² ஏகோ ஞாணவிமோக்கோ² ஹோதி வத்து²வஸேன பரியாயேன.

வேத³னாய …பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனா யதா²பூ⁴தம் ஞாணம் நிச்சதோ ஸம்மோஹா அஞ்ஞாணா முச்சதீதி – ஞாணவிமோக்கோ²…பே… ஜராமரணே ஸுஞ்ஞதானுபஸ்ஸனா யதா²பூ⁴தம் ஞாணம் அபி⁴னிவேஸதோ ஸம்மோஹா அஞ்ஞாணா முச்சதீதி – ஞாணவிமோக்கோ². ஏவம் ஸியா ஏகோ ஞாணவிமோக்கோ² த³ஸ ஞாணவிமோக்கா² ஹோந்தி, த³ஸ ஞாணவிமோக்கா² ஏகோ ஞாணவிமோக்கோ² ஹோதி வத்து²வஸேன பரியாயேன – அயம் ஞாணவிமோக்கோ².

216. கதமோ ஸீதிஸியாவிமோக்கோ²? ஸியா ஏகோ ஸீதிஸியாவிமோக்கோ² த³ஸ ஸீதிஸியாவிமோக்கா² ஹோந்தி, த³ஸ ஸீதிஸியாவிமோக்கா² ஏகோ ஸீதிஸியாவிமோக்கோ² ஹோதி வத்து²வஸேன பரியாயேன ஸியாதி. கத²ஞ்ச ஸியா? அனிச்சானுபஸ்ஸனா அனுத்தரம் ஸீதிபா⁴வம் ஞாணம் நிச்சதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². து³க்கா²னுபஸ்ஸனா அனுத்தரம் ஸீதிபா⁴வம் ஞாணம் ஸுக²தோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². அனத்தானுபஸ்ஸனா அனுத்தரம் ஸீதிபா⁴வம் ஞாணம் அத்ததோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². நிப்³பி³தா³னுபஸ்ஸனா அனுத்தரம் ஸீதிபா⁴வம் ஞாணம் நந்தி³யா ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². விராகா³னுபஸ்ஸனா அனுத்தரம் ஸீதிபா⁴வம் ஞாணம் ராக³தோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². நிரோதா⁴னுபஸ்ஸனா அனுத்தரம் ஸீதிபா⁴வம் ஞாணம் ஸமுத³யதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². படினிஸ்ஸக்³கா³னுபஸ்ஸனா அனுத்தரம் ஸீதிபா⁴வம் ஞாணம் ஆதா³னதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². அனிமித்தானுபஸ்ஸனா அனுத்தரம் ஸீதிபா⁴வம் ஞாணம் நிமித்ததோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². அப்பணிஹிதானுபஸ்ஸனா அனுத்தரம் ஸீதிபா⁴வம் ஞாணம் பணிதி⁴யா ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². ஸுஞ்ஞதானுபஸ்ஸனா அனுத்தரம் ஸீதிபா⁴வம் ஞாணம் அபி⁴னிவேஸதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². ஏவம் ஸியா ஏகோ ஸீதிஸியாவிமோக்கோ² த³ஸ ஸீதிஸியாவிமோக்கா² ஹோந்தி, த³ஸ ஸீதிஸியாவிமோக்கா² ஏகோ ஸீதிஸியாவிமோக்கோ² ஹோதி வத்து²வஸேன பரியாயேன.

ரூபே அனிச்சானுபஸ்ஸனா அனுத்தரம் ஸீதிபா⁴வம் ஞாணம் நிச்சதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ²…பே… ரூபே ஸுஞ்ஞதானுபஸ்ஸனா அனுத்தரம் ஸீதிபா⁴வம் ஞாணம் அபி⁴னிவேஸதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². ஏவம் ஸியா ஏகோ ஸீதிஸியாவிமோக்கோ² த³ஸ ஸீதிஸியாவிமோக்கா² ஹோந்தி, த³ஸ ஸீதிஸியாவிமோக்கா² ஏகோ ஸீதிஸியாவிமோக்கோ² ஹோதி வத்து²வஸேன பரியாயேன.

வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனா அனுத்தரம் ஸீதிபா⁴வம் ஞாணம் நிச்சதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ²…பே… ஜராமரணே ஸுஞ்ஞதானுபஸ்ஸனா அனுத்தரம் ஸீதிபா⁴வம் ஞாணம் அபி⁴னிவேஸதோ ஸந்தாபபரிளாஹத³ரதா² முச்சதீதி – ஸீதிஸியாவிமோக்கோ². ஏவம் ஸியா ஏகோ ஸீதிஸியாவிமோக்கோ² த³ஸ ஸீதிஸியாவிமோக்கா² ஹோந்தி, த³ஸ ஸீதிஸியாவிமோக்கா² ஏகோ ஸீதிஸியாவிமோக்கோ² ஹோதி வத்து²வஸேன பரியாயேன – அயம் ஸீதிஸியாவிமோக்கோ².

217. கதமோ ஜா²னவிமோக்கோ²? நேக்க²ம்மம் ஜா²யதீதி [ஜாயதீதி (ஸ்யா.)] ஜா²னம். காமச்ச²ந்த³ம் ஜா²பேதீதி – ஜா²னம். ஜா²யந்தோ [ஜாயந்தோ (ஸ்யா.)] முச்சதீதி – ஜா²னவிமோக்கோ². ஜா²பேந்தோ முச்சதீதி – ஜா²னவிமோக்கோ². ஜா²யந்தீதி – த⁴ம்மா. ஜா²பேதீதி – கிலேஸே. ஜா²தே ச ஜா²பே ச ஜானாதீதி – ஜா²னவிமோக்கோ². அப்³யாபாதோ³ ஜா²யதீதி – ஜா²னம். ப்³யாபாத³ம் ஜா²பேதீதி – ஜா²னம். ஜா²யந்தோ முச்சதீதி – ஜா²னவிமோக்கோ². ஜா²பேந்தோ முச்சதீதி – ஜா²னவிமோக்கோ². ஜா²யந்தீதி – த⁴ம்மா. ஜா²பேதீதி – கிலேஸே. ஜா²தே ச ஜா²பே ச ஜானாதீதி – ஜா²னவிமோக்கோ². ஆலோகஸஞ்ஞா ஜா²யதீதி – ஜா²னம். தி²னமித்³த⁴ம் ஜா²பேதீதி – ஜா²னம்…பே… அவிக்கே²போ ஜா²யதீதி – ஜா²னம். உத்³த⁴ச்சம் ஜா²பேதீதி – ஜா²னம். த⁴ம்மவவத்தா²னம் ஜா²யதீதி – ஜா²னம். விசிகிச்ச²ம் ஜா²பேதீதி – ஜா²னம். ஞாணம் ஜா²யதீதி – ஜா²னம். அவிஜ்ஜம் ஜா²பேதீதி – ஜா²னம். பாமோஜ்ஜம் ஜா²யதீதி – ஜா²னம். அரதிம் ஜா²பேதீதி – ஜா²னம். பட²மம் ஜா²னம் ஜா²யதீதி – ஜா²னம். நீவரணே ஜா²பேதீதி – ஜா²னம்…பே… அரஹத்தமக்³கோ³ ஜா²யதீதி – ஜா²னம். ஸப்³ப³கிலேஸே ஜா²பேதீதி – ஜா²னம். ஜா²யந்தோ முச்சதீதி – ஜா²னவிமோக்கோ². ஜா²பேந்தோ முச்சதீதி – ஜா²னவிமோக்கோ². ஜா²யந்தீதி – த⁴ம்மா. ஜா²பேதீதி – கிலேஸே. ஜா²தே ச ஜா²பே ச ஜானாதீதி – ஜா²னவிமோக்கோ² – அயம் ஜா²னவிமோக்கோ².

218. கதமோ அனுபாதா³ சித்தஸ்ஸ விமோக்கோ²? ஸியா ஏகோ அனுபாதா³சித்தஸ்ஸ விமோக்கோ² த³ஸ அனுபாதா³சித்தஸ்ஸ விமோக்கா² ஹோந்தி, த³ஸ அனுபாதா³சித்தஸ்ஸ விமோக்கா² ஏகோ அனுபாதா³சித்தஸ்ஸ விமோக்கோ² ஹோதி வத்து²வஸேன பரியாயேன ஸியாதி. கத²ஞ்ச ஸியா? அனிச்சானுபஸ்ஸனாஞாணம் நிச்சதோ உபாதா³னா முச்சதீதி – அனுபாதா³சித்தஸ்ஸ விமோக்கோ². து³க்கா²னுபஸ்ஸனாஞாணம் ஸுக²தோ உபாதா³னா முச்சதீதி – அனுபாதா³சித்தஸ்ஸ விமோக்கோ². அனத்தானுபஸ்ஸனாஞாணம் அத்ததோ உபாதா³னா முச்சதீதி – அனுபாதா³சித்தஸ்ஸ விமோக்கோ². நிப்³பி³தா³னுபஸ்ஸனாஞாணம் நந்தி³யா உபாதா³னா முச்சதீதி – அனுபாதா³சித்தஸ்ஸ விமோக்கோ². விராகா³னுபஸ்ஸனாஞாணம் ராக³தோ உபாதா³னா முச்சதீதி – அனுபாதா³சித்தஸ்ஸ விமோக்கோ². நிரோதா⁴னுபஸ்ஸனாஞாணம் ஸமுத³யதோ உபாதா³னா முச்சதீதி – அனுபாதா³சித்தஸ்ஸ விமோக்கோ². படினிஸ்ஸக்³கா³னுபஸ்ஸனாஞாணம் ஆதா³னதோ உபாதா³னா முச்சதீதி – அனுபாதா³சித்தஸ்ஸ விமோக்கோ². அனிமித்தானுபஸ்ஸனாஞாணம் நிமித்ததோ உபாதா³னா முச்சதீதி – அனுபாதா³சித்தஸ்ஸ விமோக்கோ². அப்பணிஹிதானுபஸ்ஸனாஞாணம் பணிதி⁴யா உபாதா³னா முச்சதீதி – அனுபாதா³சித்தஸ்ஸ விமோக்கோ². ஸுஞ்ஞதானுபஸ்ஸனாஞாணம் அபி⁴னிவேஸதோ உபாதா³னா முச்சதீதி – அனுபாதா³சித்தஸ்ஸ விமோக்கோ². ஏவம் ஸியா ஏகோ அனுபாதா³சித்தஸ்ஸ விமோக்கோ² த³ஸ அனுபாதா³சித்தஸ்ஸ விமோக்கா² ஹோந்தி, த³ஸ அனுபாதா³சித்தஸ்ஸ விமோக்கா² ஏகோ அனுபாதா³சித்தஸ்ஸ விமோக்கோ² ஹோதி வத்து²வஸேன பரியாயேன.

ரூபே அனிச்சானுபஸ்ஸனாஞாணம் நிச்சதோ உபாதா³னா முச்சதீதி – அனுபாதா³சித்தஸ்ஸ விமோக்கோ²…பே… ரூபே ஸுஞ்ஞதானுபஸ்ஸனாஞாணம் அபி⁴னிவேஸதோ உபாதா³னா முச்சதீதி – அனுபாதா³சித்தஸ்ஸ விமோக்கோ². ஏவம் ஸியா ஏகோ அனுபாதா³சித்தஸ்ஸ விமோக்கோ² த³ஸ அனுபாதா³சித்தஸ்ஸ விமோக்கா² ஹோந்தி, த³ஸ அனுபாதா³சித்தஸ்ஸ விமோக்கா² ஏகோ அனுபாதா³சித்தஸ்ஸ விமோக்கோ² ஹோதி வத்து²வஸேன பரியாயேன.

வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனாஞாணம் நிச்சதோ உபாதா³னா முச்சதீதி – அனுபாதா³சித்தஸ்ஸ விமோக்கோ²…பே… ஜராமரணே ஸுஞ்ஞதானுபஸ்ஸனாஞாணம் அபி⁴னிவேஸதோ உபாதா³னா முச்சதீதி – அனுபாதா³சித்தஸ்ஸ விமோக்கோ². ஏவம் ஸியா ஏகோ அனுபாதா³சித்தஸ்ஸ விமோக்கோ² த³ஸ அனுபாதா³சித்தஸ்ஸ விமோக்கா² ஹோந்தி, த³ஸ அனுபாதா³சித்தஸ்ஸ விமோக்கா² ஏகோ அனுபாதா³சித்தஸ்ஸ விமோக்கோ² ஹோதி வத்து²வஸேன பரியாயேன.

அனிச்சானுபஸ்ஸனாஞாணம் கதிஹுபாதா³னேஹி முச்சதி? து³க்கா²னுபஸ்ஸனாஞாணம் கதிஹுபாதா³னேஹி முச்சதி? அனத்தானுபஸ்ஸனாஞாணம் கதிஹுபாதா³னேஹி முச்சதி? நிப்³பி³தா³னுபஸ்ஸனாஞாணம்…பே… விராகா³னுபஸ்ஸனாஞாணம்… நிரோதா⁴னுபஸ்ஸனாஞாணம்… படினிஸ்ஸக்³கா³னுபஸ்ஸனாஞாணம்… அனிமித்தானுபஸ்ஸனாஞாணம்… அப்பணிஹிதானுபஸ்ஸனாஞாணம்… ஸுஞ்ஞதானுபஸ்ஸனாஞாணம் கதிஹுபாதா³னேஹி முச்சதீதி?

அனிச்சானுபஸ்ஸனாஞாணம் தீஹுபாதா³னேஹி முச்சதி. து³க்கா²னுபஸ்ஸனாஞாணம் ஏகுபாதா³னா முச்சதி. அனத்தானுபஸ்ஸனாஞாணம் தீஹுபாதா³னேஹி முச்சதி. நிப்³பி³தா³னுபஸ்ஸனாஞாணம் ஏகுபாதா³னா முச்சதி. விராகா³னுபஸ்ஸனாஞாணம் ஏகுபாதா³னா முச்சதி. நிரோதா⁴னுபஸ்ஸனாஞாணம் சதூஹுபாதா³னேஹி முச்சதி. படினிஸ்ஸக்³கா³னுபஸ்ஸனாஞாணம் சதூஹுபாதா³னேஹி முச்சதி. அனிமித்தானுபஸ்ஸனாஞாணம் தீஹுபாதா³னேஹி முச்சதி. அப்பணிஹிதானுபஸ்ஸனாஞாணம் ஏகுபாதா³னா முச்சதி. ஸுஞ்ஞதானுபஸ்ஸனாஞாணம் தீஹுபாதா³னேஹி முச்சதி.

அனிச்சானுபஸ்ஸனாஞாணம் கதமேஹி தீஹுபாதா³னேஹி முச்சதி? தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – அனிச்சானுபஸ்ஸனாஞாணம் இமேஹி தீஹுபாதா³னேஹி முச்சதி. து³க்கா²னுபஸ்ஸனாஞாணம் கதமா ஏகுபாதா³னா [ஏகூபாதா³னா (ஸீ. அட்ட².)] முச்சதி? காமுபாதா³னா – து³க்கா²னுபஸ்ஸனாஞாணம் இத³ம் ஏகுபாதா³னா முச்சதி. [இமா ஏகுபாதா³னா (ஸ்யா.)] அனத்தானுபஸ்ஸனாஞாணம் கதமேஹி தீஹுபாதா³னேஹி முச்சதி? தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – அனத்தானுபஸ்ஸனாஞாணம் இமேஹி தீஹுபாதா³னேஹி முச்சதி. நிப்³பி³தா³னுபஸ்ஸனாஞாணம் கதமா ஏகுபாதா³னா முச்சதி? காமுபாதா³னா – நிப்³பி³தா³னுபஸ்ஸனாஞாணம் இத³ம் ஏகுபாதா³னா முச்சதி. விராகா³னுபஸ்ஸனாஞாணம் கதமா ஏகுபாதா³னா முச்சதி? காமுபாதா³னா – விராகா³னுபஸ்ஸனாஞாணம் இத³ம் ஏகுபாதா³னா முச்சதி. நிரோதா⁴னுபஸ்ஸனாஞாணம் கதமேஹி சதூஹுபாதா³னேஹி முச்சதி? காமுபாதா³னா, தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – நிரோதா⁴னுபஸ்ஸனாஞாணம் இமேஹி சதூஹுபாதா³னேஹி முச்சதி. படினிஸ்ஸக்³கா³னுபஸ்ஸனாஞாணம் கதமேஹி சதூஹுபாதா³னேஹி முச்சதி? காமுபாதா³னா, தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – படினிஸ்ஸக்³கா³னுபஸ்ஸனாஞாணம் இமேஹி சதூஹுபாதா³னேஹி முச்சதி. அனிமித்தானுபஸ்ஸனாஞாணம் கதமேஹி தீஹுபாதா³னேஹி முச்சதி? தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – அனிமித்தானுபஸ்ஸனாஞாணம் இமேஹி தீஹுபாதா³னேஹி முச்சதி. அப்பணிஹிதானுபஸ்ஸனாஞாணம் கதமா ஏகுபாதா³னா முச்சதி? காமுபாதா³னா – அப்பணிஹிதானுபஸ்ஸனாஞாணம் இத³ம் ஏகுபாதா³னா முச்சதி. ஸுஞ்ஞதானுபஸ்ஸனாஞாணம் கதமேஹி தீஹுபாதா³னேஹி முச்சதி? தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – ஸுஞ்ஞதானுபஸ்ஸனாஞாணம் இமேஹி தீஹுபாதா³னேஹி முச்சதி.

யஞ்ச அனிச்சானுபஸ்ஸனாஞாணம், யஞ்ச அனத்தானுபஸ்ஸனாஞாணம், யஞ்ச அனிமித்தானுபஸ்ஸனாஞாணம், யஞ்ச ஸுஞ்ஞதானுபஸ்ஸனாஞாணம் – இமானி சத்தாரி ஞாணானி தீஹுபாதா³னேஹி முச்சந்தி – தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா. யஞ்ச து³க்கா²னுபஸ்ஸனாஞாணம், யம் ச நிப்³பி³தா³னுபஸ்ஸனாஞாணம், யஞ்ச விராகா³னுபஸ்ஸனாஞாணம், யஞ்ச அப்பணிஹிதானுபஸ்ஸனாஞாணம் – இமானி சத்தாரி ஞாணானி ஏகுபாதா³னா முச்சந்தி – காமுபாதா³னா. யஞ்ச நிரோதா⁴னுபஸ்ஸனாஞாணம், யஞ்ச படினிஸ்ஸக்³கா³னுபஸ்ஸனாஞாணம் – இமானி த்³வே ஞாணானி சதூஹுபாதா³னேஹி முச்சந்தி – காமுபாதா³னா, தி³ட்டு²பாதா³னா, ஸீலப்³ப³துபாதா³னா, அத்தவாது³பாதா³னா – அயம் அனுபாதா³சித்தஸ்ஸ விமோக்கோ².

விமோக்க²கதா²ய பட²மபா⁴ணவாரோ.

219. தீணி கோ² பனிமானி விமோக்க²முகா²னி லோகனிய்யானாய ஸம்வத்தந்தி. ஸப்³ப³ஸங்கா²ரே பரிச்சே²த³பரிவடுமதோ [பரிச்சே²த³பரிவட்டுமதோ (ஸ்யா.)] ஸமனுபஸ்ஸனதாய அனிமித்தாய ச தா⁴துயா சித்தஸம்பக்க²ந்த³னதாய, ஸப்³ப³ஸங்கா²ரேஸு மனோஸமுத்தேஜனதாய அப்பணிஹிதாய ச தா⁴துயா சித்தஸம்பக்க²ந்த³னதாய, ஸப்³ப³த⁴ம்மே பரதோ ஸமனுபஸ்ஸனதாய ஸுஞ்ஞதாய ச தா⁴துயா சித்தஸம்பக்க²ந்த³னதாய – இமானி தீணி விமோக்க²முகா²னி லோகனிய்யானாய ஸம்வத்தந்தி.

அனிச்சதோ மனஸிகரோதோ கத²ம் ஸங்கா²ரா உபட்ட²ந்தி? து³க்க²தோ மனஸிகரோதோ கத²ம் ஸங்கா²ரா உபட்ட²ந்தி? அனத்ததோ மனஸிகரோதோ கத²ம் ஸங்கா²ரா உபட்ட²ந்தி? அனிச்சதோ மனஸிகரோதோ க²யதோ ஸங்கா²ரா உபட்ட²ந்தி, து³க்க²தோ மனஸிகரோதோ ப⁴யதோ ஸங்கா²ரா உபட்ட²ந்தி, அனத்ததோ மனஸிகரோதோ ஸுஞ்ஞதோ ஸங்கா²ரா உபட்ட²ந்தி.

அனிச்சதோ மனஸிகரோதோ கிம் ப³ஹுலம் சித்தம் ஹோதி? து³க்க²தோ மனஸிகரோதோ கிம் ப³ஹுலம் சித்தம் ஹோதி? அனத்ததோ மனஸிகரோதோ கிம் ப³ஹுலம் சித்தம் ஹோதி? அனிச்சதோ மனஸிகரோதோ அதி⁴மோக்க²ப³ஹுலம் சித்தம் ஹோதி. து³க்க²தோ மனஸிகரோதோ பஸ்ஸத்³தி⁴ப³ஹுலம் சித்தம் ஹோதி. அனத்ததோ மனஸிகரோதோ வேத³ப³ஹுலம் சித்தம் ஹோதி.

அனிச்சதோ மனஸிகரோந்தோ அதி⁴மோக்க²ப³ஹுலோ கதமிந்த்³ரியம் படிலப⁴தி? து³க்க²தோ மனஸிகரோந்தோ பஸ்ஸத்³தி⁴ப³ஹுலோ கதமிந்த்³ரியம் படிலப⁴தி? அனத்ததோ மனஸிகரோந்தோ வேத³ப³ஹுலோ கதமிந்த்³ரியம் படிலப⁴தி? அனிச்சதோ மனஸிகரோந்தோ அதி⁴மோக்க²ப³ஹுலோ ஸத்³தி⁴ந்த்³ரியம் படிலப⁴தி. து³க்க²தோ மனஸிகரோந்தோ பஸ்ஸத்³தி⁴ப³ஹுலோ ஸமாதி⁴ந்த்³ரியம் படிலப⁴தி. அனத்ததோ மனஸிகரோந்தோ வேத³ப³ஹுலோ பஞ்ஞிந்த்³ரியம் படிலப⁴தி.

அனிச்சதோ மனஸிகரோதோ அதி⁴மோக்க²ப³ஹுலஸ்ஸ கதமிந்த்³ரியம் ஆதி⁴பதேய்யம் ஹோதி, பா⁴வனாய கதிந்த்³ரியானி தத³ன்வயா [தத³ன்வயானி (ஸ்யா.)] ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கோ பா⁴வேதி? து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ கதமிந்த்³ரியம் ஆதி⁴பதேய்யம் ஹோதி, பா⁴வனாய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கோ பா⁴வேதி? அனத்ததோ மனஸிகரோதோ வேத³ப³ஹுலஸ்ஸ கதமிந்த்³ரியம் ஆதி⁴பதேய்யம் ஹோதி, பா⁴வனாய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கோ பா⁴வேதி? அனிச்சதோ மனஸிகரோதோ அதி⁴மோக்க²ப³ஹுலஸ்ஸ ஸத்³தி⁴ந்த்³ரியம் ஆதி⁴பதேய்யம் ஹோதி. பா⁴வனாய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. யோ ஸம்மாபடிபன்னோ ஸோ பா⁴வேதி; நத்தி² மிச்சா²படிபன்னஸ்ஸ இந்த்³ரியபா⁴வனா. து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ ஸமாதி⁴ந்த்³ரியம் ஆதி⁴பதேய்யம் ஹோதி. பா⁴வனாய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. யோ ஸம்மாபடிபன்னோ ஸோ பா⁴வேதி; நத்தி² மிச்சா²படிபன்னஸ்ஸ இந்த்³ரியபா⁴வனா. அனத்ததோ மனஸிகரோதோ வேத³ப³ஹுலஸ்ஸ பஞ்ஞிந்த்³ரியம் ஆதி⁴பதேய்யம் ஹோதி. பா⁴வனாய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. யோ ஸம்மாபடிபன்னோ ஸோ பா⁴வேதி; நத்தி² மிச்சா²படிபன்னஸ்ஸ இந்த்³ரியபா⁴வனா.

220. அனிச்சதோ மனஸிகரோதோ அதி⁴மோக்க²ப³ஹுலஸ்ஸ கதமிந்த்³ரியம் ஆதி⁴பதேய்யம் ஹோதி? பா⁴வனாய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி? படிவேத⁴காலே கதமிந்த்³ரியம் ஆதி⁴பதேய்யம் ஹோதி? படிவேதா⁴ய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி? கேனட்டே²ன பா⁴வனா? கேனட்டே²ன படிவேதோ⁴? து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ கதமிந்த்³ரியம் ஆதி⁴பதேய்யம் ஹோதி? பா⁴வனாய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி? படிவேத⁴காலே கதமிந்த்³ரியம் ஆதி⁴பதேய்யம் ஹோதி? படிவேதா⁴ய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி? கேனட்டே²ன பா⁴வனா? கேனட்டே²ன படிவேதோ⁴? அனத்ததோ மனஸிகரோதோ வேத³ப³ஹுலஸ்ஸ கதமிந்த்³ரியம் ஆதி⁴பதேய்யம் ஹோதி? பா⁴வனாய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி? படிவேத⁴காலே கதமிந்த்³ரியம் ஆதி⁴பதேய்யம் ஹோதி? படிவேதா⁴ய கதிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி? கேனட்டே²ன பா⁴வனா? கேனட்டே²ன படிவேதோ⁴?

அனிச்சதோ மனஸிகரோதோ அதி⁴மோக்க²ப³ஹுலஸ்ஸ ஸத்³தி⁴ந்த்³ரியம் ஆதி⁴பதேய்யம் ஹோதி. பா⁴வனாய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. படிவேத⁴காலே பஞ்ஞிந்த்³ரியம் ஆதி⁴பதேய்யம் ஹோதி. படிவேதா⁴ய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. த³ஸ்ஸனட்டே²ன படிவேதோ⁴. ஏவம் படிவிஜ்ஜ²ந்தோபி பா⁴வேதி, பா⁴வேந்தோபி படிவிஜ்ஜ²தி. து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ ஸமாதி⁴ந்த்³ரியம் ஆதி⁴பதேய்யம் ஹோதி. பா⁴வனாய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. படிவேத⁴காலே பஞ்ஞிந்த்³ரியம் ஆதி⁴பதேய்யம் ஹோதி. படிவேதா⁴ய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. த³ஸ்ஸனட்டே²ன படிவேதோ⁴. ஏவம் படிவிஜ்ஜ²ந்தோபி பா⁴வேதி, பா⁴வேந்தோபி படிவிஜ்ஜ²தி. அனத்ததோ மனஸிகரோதோ வேத³ப³ஹுலஸ்ஸ பஞ்ஞிந்த்³ரியம் ஆதி⁴பதேய்யம் ஹோதி. பா⁴வனாய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. படிவேத⁴காலேபி பஞ்ஞிந்த்³ரியம் ஆதி⁴பதேய்யம் ஹோதி. படிவேதா⁴ய சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. த³ஸ்ஸனட்டே²ன படிவேதோ⁴. ஏவம் படிவிஜ்ஜ²ந்தோபி பா⁴வேதி, பா⁴வேந்தோபி படிவிஜ்ஜ²தி.

221. அனிச்சதோ மனஸிகரோதோ கதமிந்த்³ரியம் அதி⁴மத்தம் ஹோதி? கதமிந்த்³ரியஸ்ஸ அதி⁴மத்தத்தா ஸத்³தா⁴விமுத்தோ [ஸத்³தா⁴தி⁴முத்தோ (ஸ்யா.)] ஹோதி? து³க்க²தோ மனஸிகரோதோ கதமிந்த்³ரியம் அதி⁴மத்தம் ஹோதி? கதமிந்த்³ரியஸ்ஸ அதி⁴மத்தத்தா காயஸக்கீ² [காயஸக்கி² (ஸ்யா. க.) அபி⁴. பு. ப. 95 பஸ்ஸிதப்³பா³] ஹோதி? அனத்ததோ மனஸிகரோதோ கதமிந்த்³ரியம் அதி⁴மத்தம் ஹோதி? கதமிந்த்³ரியஸ்ஸ அதி⁴மத்தத்தா தி³ட்டி²ப்பத்தோ ஹோதி?

அனிச்சதோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி. ஸத்³தி⁴ந்த்³ரியஸ்ஸ அதி⁴மத்தத்தா ஸத்³தா⁴விமுத்தோ ஹோதி. து³க்க²தோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி. ஸமாதி⁴ந்த்³ரியஸ்ஸ அதி⁴மத்தத்தா காயஸக்கீ² ஹோதி. அனத்ததோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி. பஞ்ஞிந்த்³ரியஸ்ஸ அதி⁴மத்தத்தா தி³ட்டி²ப்பத்தோ ஹோதி.

ஸத்³த³ஹந்தோ விமுத்தோதி – ஸத்³தா⁴விமுத்தோ. பு²ட்ட²த்தா ஸச்சி²கதோதி [ஸச்சி²கரோதீதி (ஸ்யா. பீ.)] – காயஸக்கீ². தி³ட்ட²த்தா பத்தோதி – தி³ட்டி²ப்பத்தோ. ஸத்³த³ஹந்தோ விமுச்சதீதி – ஸத்³தா⁴விமுத்தோ. ஜா²னப²ஸ்ஸம் பட²மம் பு²ஸதி, பச்சா² நிரோத⁴ம் நிப்³பா³னம் ஸச்சி²கரோதீதி – காயஸக்கீ². ‘‘து³க்கா² ஸங்கா²ரா, ஸுகோ² நிரோதோ⁴’’தி ஞாதம் ஹோதி தி³ட்ட²ம் விதி³தம் ஸச்சி²கதம் ப²ஸ்ஸிதம் பஞ்ஞாயாதி – தி³ட்டி²ப்பத்தோ. யோ சாயம் புக்³க³லோ ஸத்³தா⁴விமுத்தோ, யோ ச காயஸக்கீ², யோ ச தி³ட்டி²ப்பத்தோ, ஸியா இமே தயோ புக்³க³லா ஸத்³தா⁴விமுத்தாபி காயஸக்கீ²பி தி³ட்டி²ப்பத்தாபி வத்து²வஸேன பரியாயேன ஸியாதி. கத²ஞ்ச ஸியா? அனிச்சதோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி. ஸத்³தி⁴ந்த்³ரியஸ்ஸ அதி⁴மத்தத்தா ஸத்³தா⁴விமுத்தோ ஹோதி. து³க்க²தோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி. ஸத்³தி⁴ந்த்³ரியஸ்ஸ அதி⁴மத்தத்தா ஸத்³தா⁴விமுத்தோ ஹோதி. அனத்ததோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி. ஸத்³தி⁴ந்த்³ரியஸ்ஸ அதி⁴மத்தத்தா ஸத்³தா⁴விமுத்தோ ஹோதி. ஏவம் இமே தயோ புக்³க³லா ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா.

து³க்க²தோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி. ஸமாதி⁴ந்த்³ரியஸ்ஸ அதி⁴மத்தத்தா காயஸக்கீ² ஹோதி. அனத்ததோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி. ஸமாதி⁴ந்த்³ரியஸ்ஸ அதி⁴மத்தத்தா காயஸக்கீ² ஹோதி. அனிச்சதோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி. ஸமாதி⁴ந்த்³ரியஸ்ஸ அதி⁴மத்தத்தா காயஸக்கீ² ஹோதி. ஏவம் இமே தயோ புக்³க³லா ஸமாதி⁴ந்த்³ரியஸ்ஸ வஸேன காயஸக்கீ².

அனத்ததோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி. பஞ்ஞிந்த்³ரியஸ்ஸ அதி⁴மத்தத்தா தி³ட்டி²ப்பத்தோ ஹோதி. அனிச்சதோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி. பஞ்ஞிந்த்³ரியஸ்ஸ அதி⁴மத்தத்தா தி³ட்டி²ப்பத்தோ ஹோதி. து³க்க²தோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி. பஞ்ஞிந்த்³ரியஸ்ஸ அதி⁴மத்தத்தா தி³ட்டி²ப்பத்தோ ஹோதி. ஏவம் இமே தயோ புக்³க³லா பஞ்ஞிந்த்³ரியஸ்ஸ வஸேன தி³ட்டி²ப்பத்தா.

யோ சாயம் புக்³க³லோ ஸத்³தா⁴விமுத்தோ, யோ ச காயஸக்கீ², யோ ச தி³ட்டி²ப்பத்தோ, ஏவம் ஸியா இமே தயோ புக்³க³லா ஸத்³தா⁴விமுத்தாபி காயஸக்கீ²பி தி³ட்டி²ப்பத்தாபி வத்து²வஸேன பரியாயேன. யோ சாயம் புக்³க³லோ ஸத்³தா⁴விமுத்தோ, யோ ச காயஸக்கீ², யோ ச தி³ட்டி²ப்பத்தோ, ஸியா இமே தயோ புக்³க³லா…பே… அஞ்ஞோயேவ ஸத்³தா⁴விமுத்தோ, அஞ்ஞோ காயஸக்கீ², அஞ்ஞோ தி³ட்டி²ப்பத்தோ ஸியாதி. கத²ஞ்ச ஸியா? அனிச்சதோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி. ஸத்³தி⁴ந்த்³ரியஸ்ஸ அதி⁴மத்தத்தா ஸத்³தா⁴விமுத்தோ ஹோதி. து³க்க²தோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி. ஸமாதி⁴ந்த்³ரியஸ்ஸ அதி⁴மத்தத்தா காயஸக்கீ² ஹோதி. அனத்ததோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி. பஞ்ஞிந்த்³ரியஸ்ஸ அதி⁴மத்தத்தா தி³ட்டி²ப்பத்தோ ஹோதி. யோ சாயம் புக்³க³லோ ஸத்³தா⁴விமுத்தோ, யோ ச காயஸக்கீ², யோ ச தி³ட்டி²ப்பத்தோ, ஏவம் ஸியா இமே தயோ புக்³க³லா ஸத்³தா⁴விமுத்தாபி காயஸக்கீ²பி தி³ட்டி²ப்பத்தாபி வத்து²வஸேன பரியாயேன. அஞ்ஞோயேவ ஸத்³தா⁴விமுத்தோ, அஞ்ஞோ காயஸக்கீ², அஞ்ஞோ தி³ட்டி²ப்பத்தோ.

அனிச்சதோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி, ஸத்³தி⁴ந்த்³ரியஸ்ஸ அதி⁴மத்தத்தா ஸோதாபத்திமக்³க³ம் படிலப⁴தி; தேன வுச்சதி – ‘‘ஸத்³தா⁴னுஸாரீ’’. சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. ஸத்³தி⁴ந்த்³ரியஸ்ஸ வஸேன சதுன்னம் இந்த்³ரியானம் பா⁴வனா ஹோதி. யே ஹி கேசி ஸத்³தி⁴ந்த்³ரியஸ்ஸ வஸேன ஸோதாபத்திமக்³க³ம் படிலப⁴ந்தி, ஸப்³பே³ தே ஸத்³தா⁴னுஸாரினோ.

அனிச்சதோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி, ஸத்³தி⁴ந்த்³ரியஸ்ஸ அதி⁴மத்தத்தா ஸோதாபத்திப²லம் ஸச்சி²கதம் ஹோதி; தேன வுச்சதி – ‘‘ஸத்³தா⁴விமுத்தோ’’. சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. ஸத்³தி⁴ந்த்³ரியஸ்ஸ வஸேன சத்தாரிந்த்³ரியானி பா⁴விதானி ஹோந்தி ஸுபா⁴விதானி. யேஹி கேசி ஸத்³தி⁴ந்த்³ரியஸ்ஸ வஸேன ஸோதாபத்திப²லம் ஸச்சி²கதா, ஸப்³பே³ தே ஸத்³தா⁴விமுத்தா.

அனிச்சதோ மனஸிகரோதோ ஸத்³தி⁴ந்த்³ரியம் அதி⁴மத்தம் ஹோதி, ஸத்³தி⁴ந்த்³ரியஸ்ஸ அதி⁴மத்தத்தா ஸகதா³கா³மிமக்³க³ம் படிலப⁴தி…பே… ஸகதா³கா³மிப²லம் ஸச்சி²கதம் ஹோதி…பே… அனாகா³மிமக்³க³ம் படிலப⁴தி… அனாகா³மிப²லம் ஸச்சி²கதம் ஹோதி…பே… அரஹத்தமக்³க³ம் படிலப⁴தி… அரஹத்தம் [அரஹத்தப²லம் (ஸ்யா. க.) அட்ட²கதா² ஓலோகேதப்³பா³] ஸச்சி²கதம் ஹோதி; தேன வுச்சதி – ‘‘ஸத்³தா⁴விமுத்தோ’’. சத்தாரிந்த்³ரியானி தத³ன்வயா ஹோந்தி…பே… ஸம்பயுத்தபச்சயா ஹோந்தி. ஸத்³தி⁴ந்த்³ரியஸ்ஸ வஸேன சத்தாரிந்த்³ரியானி பா⁴விதானி ஹோந்தி ஸுபா⁴விதானி. யேஹி கேசி ஸத்³தி⁴ந்த்³ரியஸ்ஸ வஸேன அரஹத்தம் ஸச்சி²கதா, ஸப்³பே³ தே ஸத்³தா⁴விமுத்தா.

து³க்க²தோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி, ஸமாதி⁴ந்த்³ரியஸ்ஸ அதி⁴மத்தத்தா ஸோதாபத்திமக்³க³ம் படிலப⁴தி; தேன வுச்சதி – ‘‘காயஸக்கீ²’’. சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. ஸமாதி⁴ந்த்³ரியஸ்ஸ வஸேன சதுன்னம் இந்த்³ரியானம் பா⁴வனா ஹோதி. யே ஹி கேசி ஸமாதி⁴ந்த்³ரியஸ்ஸ வஸேன ஸோதாபத்திமக்³க³ம் படிலப⁴ந்தி, ஸப்³பே³ தே காயஸக்கீ².

து³க்க²தோ மனஸிகரோதோ ஸமாதி⁴ந்த்³ரியம் அதி⁴மத்தம் ஹோதி, ஸமாதி⁴ந்த்³ரியஸ்ஸ அதி⁴மத்தத்தா ஸோதாபத்திப²லம் ஸச்சி²கதம் ஹோதி…பே… ஸகதா³கா³மிமக்³க³ம் படிலப⁴தி…பே… ஸகதா³கா³மிப²லம் ஸச்சி²கதம் ஹோதி…பே… அனாகா³மிமக்³க³ம் படிலப⁴தி…பே… அனாகா³மிப²லம் ஸச்சி²கதம் ஹோதி…பே… அரஹத்தமக்³க³ம் படிலப⁴தி…பே… அரஹத்தம் ஸச்சி²கதம் ஹோதி; தேன வுச்சதி – ‘‘காயஸக்கீ²’’. சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. ஸமாதி⁴ந்த்³ரியஸ்ஸ வஸேன சத்தாரிந்த்³ரியானி பா⁴விதானி ஹோந்தி ஸுபா⁴விதானி. யேஹி கேசி ஸமாதி⁴ந்த்³ரியஸ்ஸ வஸேன அரஹத்தம் ஸச்சி²கதா, ஸப்³பே³ தே காயஸக்கீ².

அனத்ததோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி, பஞ்ஞிந்த்³ரியஸ்ஸ அதி⁴மத்தத்தா ஸோதாபத்திமக்³க³ம் படிலப⁴தி; தேன வுச்சதி – ‘‘த⁴ம்மானுஸாரீ’’. சத்தாரிந்த்³ரியானி தத³ன்வயா ஹோந்தி…பே… ஸம்பயுத்தபச்சயா ஹோந்தி. பஞ்ஞிந்த்³ரியஸ்ஸ வஸேன சதுன்னம் இந்த்³ரியானம் பா⁴வனா ஹோதி. யே ஹி கேசி பஞ்ஞிந்த்³ரியஸ்ஸ வஸேன ஸோதாபத்திமக்³க³ம் படிலப⁴ந்தி, ஸப்³பே³ தே த⁴ம்மானுஸாரினோ.

அனத்ததோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி, பஞ்ஞிந்த்³ரியஸ்ஸ அதி⁴மத்தத்தா ஸோதாபத்திப²லம் ஸச்சி²கதம் ஹோதி; தேன வுச்சதி – ‘‘தி³ட்டி²ப்பத்தோ’’. சத்தாரிந்த்³ரியானி தத³ன்வயா ஹோந்தி…பே… ஸம்பயுத்தபச்சயா ஹோந்தி. பஞ்ஞிந்த்³ரியஸ்ஸ வஸேன சத்தாரிந்த்³ரியானி பா⁴விதானி ஹோந்தி ஸுபா⁴விதானி. யேஹி கேசி பஞ்ஞிந்த்³ரியஸ்ஸ வஸேன ஸோதாபத்திப²லம் ஸச்சி²கதா, ஸப்³பே³ தே தி³ட்டி²ப்பத்தா.

அனத்ததோ மனஸிகரோதோ பஞ்ஞிந்த்³ரியம் அதி⁴மத்தம் ஹோதி, பஞ்ஞிந்த்³ரியஸ்ஸ அதி⁴மத்தத்தா ஸகதா³கா³மிமக்³க³ம் படிலப⁴தி…பே… ஸகதா³கா³மிப²லம் ஸச்சி²கதம் ஹோதி…பே… அனாகா³மிமக்³க³ம் படிலப⁴தி…பே… அனாகா³மிப²லம் ஸச்சி²கதம் ஹோதி…பே… அரஹத்தமக்³க³ம் படிலப⁴தி…பே… அரஹத்தம் ஸச்சி²கதம் ஹோதி; தேன வுச்சதி – ‘‘தி³ட்டி²ப்பத்தோ’’. சத்தாரிந்த்³ரியானி தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி. பஞ்ஞிந்த்³ரியஸ்ஸ வஸேன சத்தாரிந்த்³ரியானி பா⁴விதானி ஹோந்தி ஸுபா⁴விதானி. யேஹி கேசி பஞ்ஞிந்த்³ரியஸ்ஸ வஸேன அரஹத்தம் ஸச்சி²கதா, ஸப்³பே³ தே தி³ட்டி²ப்பத்தா.

222. யே ஹி கேசி நேக்க²ம்மம் பா⁴விதா வா பா⁴வேந்தி வா பா⁴விஸ்ஸந்தி வா, அதி⁴க³தா வா அதி⁴க³ச்ச²ந்தி வா அதி⁴க³மிஸ்ஸந்தி வா, பத்தா வா பாபுணந்தி வா பாபுணிஸ்ஸந்தி வா, படிலத்³தா⁴ வா படிலப⁴ந்தி வா படிலபி⁴ஸ்ஸந்தி வா, படிவித்³தா⁴ வா படிவிஜ்ஜ²ந்தி வா படிவிஜ்ஜி²ஸ்ஸந்தி வா, ஸச்சி²கதா வா ஸச்சி²கரோந்தி வா ஸச்சி²கரிஸ்ஸந்தி வா, ப²ஸ்ஸிதா வா ப²ஸ்ஸந்தி வா ப²ஸ்ஸிஸ்ஸந்தி வா, வஸிப்பத்தா வா பாபுணந்தி வா பாபுணிஸ்ஸந்தி வா, பாரமிப்பத்தா வா பாபுணந்தி வா பாபுணிஸ்ஸந்தி வா, வேஸாரஜ்ஜப்பத்தா வா பாபுணந்தி வா பாபுணிஸ்ஸந்தி வா, ஸப்³பே³ தே ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தா.

யே ஹி கேசி அப்³யாபாத³ம்…பே… ஆலோகஸஞ்ஞம்… அவிக்கே²பம்… த⁴ம்மவவத்தா²னம்… ஞாணம்… பாமோஜ்ஜம்… பட²மம் ஜா²னம்… து³தியம் ஜா²னம்… ததியம் ஜா²னம்… சதுத்த²ம் ஜா²னம்… ஆகாஸானஞ்சாயதனஸமாபத்திம்… விஞ்ஞாணஞ்சாயதனஸமாபத்திம் … ஆகிஞ்சஞ்ஞாயதனஸமாபத்திம்… நேவஸஞ்ஞானாஸஞ்ஞாயதனஸமாபத்திம்… அனிச்சானுபஸ்ஸனம்… து³க்கா²னுபஸ்ஸனம்… அனத்தானுபஸ்ஸனம்… நிப்³பி³தா³னுபஸ்ஸனம்… விராகா³னுபஸ்ஸனம் … நிரோதா⁴னுபஸ்ஸனம்… படினிஸ்ஸக்³கா³னுபஸ்ஸனம்… க²யானுபஸ்ஸனம்… வயானுபஸ்ஸனம்… விபரிணாமானுபஸ்ஸனம்… அனிமித்தானுபஸ்ஸனம்… அப்பணிஹிதானுபஸ்ஸனம்… ஸுஞ்ஞதானுபஸ்ஸனம்… அதி⁴பஞ்ஞாத⁴ம்மவிபஸ்ஸனம்… யதா²பூ⁴தஞாணத³ஸ்ஸனம்… ஆதீ³னவானுபஸ்ஸனம்… படிஸங்கா²னுபஸ்ஸனம்… விவட்டனானுபஸ்ஸனம்… ஸோதாபத்திமக்³க³ம்… ஸகதா³கா³மிமக்³க³ம்… அனாகா³மிமக்³க³ம்… அரஹத்தமக்³க³ம்….

யே ஹி கேசி சத்தாரோ ஸதிபட்டா²னே… சத்தாரோ ஸம்மப்பதா⁴னே… சத்தாரோ இத்³தி⁴பாதே³… பஞ்சிந்த்³ரியானி… பஞ்ச ப³லானி… ஸத்த போ³ஜ்ஜ²ங்கே³… அரியம் அட்ட²ங்கி³கம் மக்³க³ம்… யே ஹி கேசி அட்ட² விமோக்கே² பா⁴விதா வா பா⁴வேந்தி வா பா⁴விஸ்ஸந்தி வா, அதி⁴க³தா வா அதி⁴க³ச்ச²ந்தி வா அதி⁴க³மிஸ்ஸந்தி வா, பத்தா வா பாபுணந்தி வா பாபுணிஸ்ஸந்தி வா, படிலத்³தா⁴ வா படிலப⁴ந்தி வா படிலபி⁴ஸ்ஸந்தி வா, படிவித்³தா⁴ வா படிவிஜ்ஜ²ந்தி வா படிவிஜ்ஜி²ஸ்ஸந்தி வா, ஸச்சி²கதா வா ஸச்சி²கரோந்தி வா ஸச்சி²கரிஸ்ஸந்தி வா, ப²ஸ்ஸிதா வா ப²ஸ்ஸந்தி வா ப²ஸ்ஸிஸ்ஸந்தி வா, வஸிப்பத்தா வா பாபுணந்தி வா பாபுணிஸ்ஸந்தி வா பாரமிப்பத்தா வா பாபுணந்தி வா பாபுணிஸ்ஸந்தி வா, வேஸாரஜ்ஜப்பத்தா வா பாபுணந்தி வா பாபுணிஸ்ஸந்தி வா, ஸப்³பே³ தே ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தா.

யே ஹி கேசி சதஸ்ஸோ படிஸம்பி⁴தா³ பத்தா வா பாபுணந்தி வா பாபுணிஸ்ஸந்தி வா…பே… ஸப்³பே³ தே ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தா.

யே ஹி கேசி திஸ்ஸோ விஜ்ஜா படிவித்³தா⁴ வா படிவிஜ்ஜ²ந்தி வா படிவிஜ்ஜி²ஸ்ஸந்தி வா…பே… ஸப்³பே³ தே ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தா.

யே ஹி கேசி திஸ்ஸோ ஸிக்கா² ஸிக்கி²தா வா ஸிக்க²ந்தி வா ஸிக்கி²ஸ்ஸந்தி வா, ஸச்சி²கதா வா ஸச்சி²கரோந்தி வா ஸச்சி²கரிஸ்ஸந்தி வா, ப²ஸ்ஸிதா வா ப²ஸ்ஸந்தி வா ப²ஸ்ஸிஸ்ஸந்தி வா, வஸிப்பத்தா வா பாபுணந்தி வா பாபுணிஸ்ஸந்தி வா, பாரமிப்பத்தா வா பாபுணந்தி வா பாபுணிஸ்ஸந்தி வா, வேஸாரஜ்ஜப்பத்தா வா பாபுணந்தி வா பாபுணிஸ்ஸந்தி வா, ஸப்³பே³ தே ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தா.

யே ஹி கேசி து³க்க²ம் பரிஜானந்தி ஸமுத³யம் பஜஹந்தி நிரோத⁴ம் ஸச்சி²கரோந்தி மக்³க³ம் பா⁴வேந்தி, ஸப்³பே³ தே ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தா, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தா.

கதிஹாகாரேஹி ஸச்சப்படிவேதோ⁴ ஹோதி? கதிஹாகாரேஹி ஸச்சானி படிவிஜ்ஜ²தி? சதூஹாகாரேஹி ஸச்சப்படிவேதோ⁴ ஹோதி. சதூஹாகாரேஹி ஸச்சானி படிவிஜ்ஜ²தி. து³க்க²ஸச்சம் பரிஞ்ஞாபடிவேத⁴ம் படிவிஜ்ஜ²தி, ஸமுத³யஸச்சம் பஹானப்படிவேத⁴ம் படிவிஜ்ஜ²தி, நிரோத⁴ஸச்சம் ஸச்சி²கிரியாபடிவேத⁴ம் படிவிஜ்ஜ²தி, மக்³க³ஸச்சம் பா⁴வனாபடிவேத⁴ம் படிவிஜ்ஜ²தி. இமேஹி சதூஹாகாரேஹி ஸச்சப்படிவேதோ⁴ ஹோதி. இமேஹி சதூஹாகாரேஹி ஸச்சானி படிவிஜ்ஜ²ந்தோ ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தோ, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தோ.

கதிஹாகாரேஹி ஸச்சப்படிவேதோ⁴ ஹோதி? கதிஹாகாரேஹி ஸச்சானி படிவிஜ்ஜ²தி? நவஹாகாரேஹி ஸச்சப்படிவேதோ⁴ ஹோதி, நவஹாகாரேஹி ஸச்சானி படிவிஜ்ஜ²தி. து³க்க²ஸச்சம் பரிஞ்ஞாபடிவேத⁴ம் படிவிஜ்ஜ²தி, ஸமுத³யஸச்சம் பஹானப்படிவேத⁴ம் படிவிஜ்ஜ²தி, நிரோத⁴ஸச்சம் ஸச்சி²கிரியாபடிவேத⁴ம் படிவிஜ்ஜ²தி, மக்³க³ஸச்சம் பா⁴வனாபடிவேத⁴ம் படிவிஜ்ஜ²தி. அபி⁴ஞ்ஞாபடிவேதோ⁴ ச ஸப்³ப³த⁴ம்மானம், பரிஞ்ஞாபடிவேதோ⁴ ச ஸப்³ப³ஸங்கா²ரானம், பஹானப்படிவேதோ⁴ ச ஸப்³பா³குஸலானம், பா⁴வனாபடிவேதோ⁴ ச சதுன்னம் மக்³கா³னம், ஸச்சி²கிரியாபடிவேதோ⁴ ச நிரோத⁴ஸ்ஸ. இமேஹி நவஹாகாரேஹி ஸச்சப்படிவேதோ⁴ ஹோதி. இமேஹி நவஹாகாரேஹி ஸச்சானி படிவிஜ்ஜ²ந்தோ ஸத்³தி⁴ந்த்³ரியஸ்ஸ வஸேன ஸத்³தா⁴விமுத்தோ, ஸமாதி⁴ந்த்³ரியஸ்ஸ வஸேன காயஸக்கீ², பஞ்ஞிந்த்³ரியஸ்ஸ வஸேன தி³ட்டி²ப்பத்தோ.

து³தியபா⁴ணவாரோ.

223. அனிச்சதோ மனஸிகரோதோ கத²ம் ஸங்கா²ரா உபட்ட²ந்தி? து³க்க²தோ மனஸிகரோதோ கத²ம் ஸங்கா²ரா உபட்ட²ந்தி? அனத்ததோ மனஸிகரோதோ கத²ம் ஸங்கா²ரா உபட்ட²ந்தி? அனிச்சதோ மனஸிகரோதோ க²யதோ ஸங்கா²ரா உபட்ட²ந்தி. து³க்க²தோ மனஸிகரோதோ ப⁴யதோ ஸங்கா²ரா உபட்ட²ந்தி. அனத்ததோ மனஸிகரோதோ ஸுஞ்ஞதோ ஸங்கா²ரா உபட்ட²ந்தி.

அனிச்சதோ மனஸிகரோதோ கிம் ப³ஹுலம் சித்தம் ஹோதி? து³க்க²தோ மனஸிகரோதோ கிம் ப³ஹுலம் சித்தம் ஹோதி? அனத்ததோ மனஸிகரோதோ கிம் ப³ஹுலம் சித்தம் ஹோதி? அனிச்சதோ மனஸிகரோதோ அதி⁴மோக்க²ப³ஹுலம் சித்தம் ஹோதி. து³க்க²தோ மனஸிகரோதோ பஸ்ஸத்³தி⁴ப³ஹுலம் சித்தம் ஹோதி. அனத்ததோ மனஸிகரோதோ வேத³ப³ஹுலம் சித்தம் ஹோதி.

அனிச்சதோ மனஸிகரோந்தோ அதி⁴மோக்க²ப³ஹுலோ கதமம் விமோக்க²ம் படிலப⁴தி? து³க்க²தோ மனஸிகரோந்தோ பஸ்ஸத்³தி⁴ப³ஹுலோ கதமம் விமோக்க²ம் படிலப⁴தி? அனத்ததோ மனஸிகரோந்தோ வேத³ப³ஹுலோ கதமம் விமோக்க²ம் படிலப⁴தி? அனிச்சதோ மனஸிகரோந்தோ அதி⁴மோக்க²ப³ஹுலோ அனிமித்தம் விமோக்க²ம் படிலப⁴தி. து³க்க²தோ மனஸிகரோந்தோ பஸ்ஸத்³தி⁴ப³ஹுலோ அப்பணிஹிதம் விமோக்க²ம் படிலப⁴தி. அனத்ததோ மனஸிகரோந்தோ வேத³ப³ஹுலோ ஸுஞ்ஞதம் விமோக்க²ம் படிலப⁴தி.

224. அனிச்சதோ மனஸிகரோதோ அதி⁴மோக்க²ப³ஹுலஸ்ஸ கதமோ விமோக்கோ² ஆதி⁴பதேய்யோ ஹோதி, பா⁴வனாய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கோ பா⁴வேதி? து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ கதமோ விமோக்கோ² ஆதி⁴பதேய்யோ ஹோதி, பா⁴வனாய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கோ பா⁴வேதி? அனத்ததோ மனஸிகரோதோ வேத³ப³ஹுலஸ்ஸ கதமோ விமோக்கோ² ஆதி⁴பதேய்யோ ஹோதி, பா⁴வனாய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கோ பா⁴வேதி?

அனிச்சதோ மனஸிகரோதோ அதி⁴மோக்க²ப³ஹுலஸ்ஸ அனிமித்தோ விமோக்கோ² ஆதி⁴பதேய்யோ ஹோதி. பா⁴வனாய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. யோ ஸம்மாபடிபன்னோ ஸோ பா⁴வேதி; நத்தி² மிச்சா²படிபன்னஸ்ஸ விமோக்க²பா⁴வனா. து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ அப்பணிஹிதோ விமோக்கோ² ஆதி⁴பதேய்யோ ஹோதி. பா⁴வனாய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. யோ ஸம்மாபடிபன்னோ ஸோ பா⁴வேதி; நத்தி² மிச்சா²படிபன்னஸ்ஸ விமோக்க²பா⁴வனா. அனத்ததோ மனஸிகரோதோ வேத³ப³ஹுலஸ்ஸ ஸுஞ்ஞதோ விமோக்கோ² ஆதி⁴பதேய்யோ ஹோதி. பா⁴வனாய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி. ஏகரஸட்டே²ன பா⁴வனா. யோ ஸம்மாபடிபன்னோ ஸோ பா⁴வேதி; நத்தி² மிச்சா²படிபன்னஸ்ஸ விமோக்க²பா⁴வனா.

அனிச்சதோ மனஸிகரோதோ அதி⁴மோக்க²ப³ஹுலஸ்ஸ கதமோ விமோக்கோ² ஆதி⁴பதேய்யோ ஹோதி, பா⁴வனாய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, படிவேத⁴காலே கதமோ விமோக்கோ² ஆதி⁴பதேய்யோ ஹோதி, படிவேதா⁴ய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கேனட்டே²ன படிவேதோ⁴? து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ கதமோ விமோக்கோ² ஆதி⁴பதேய்யோ ஹோதி, பா⁴வனாய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, படிவேத⁴காலே கதமோ விமோக்கோ² ஆதி⁴பதேய்யோ ஹோதி, படிவேதா⁴ய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கேனட்டே²ன படிவேதோ⁴? அனத்ததோ மனஸிகரோதோ வேத³ப³ஹுலஸ்ஸ கதமோ விமோக்கோ² ஆதி⁴பதேய்யோ ஹோதி, பா⁴வனாய கதி விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, படிவேத⁴காலே கதமோ விமோக்கோ² ஆதி⁴பதேய்யோ ஹோதி, படிவேதா⁴ய கதிவிமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, கேனட்டே²ன பா⁴வனா, கேனட்டே²ன படிவேதோ⁴?

225. அனிச்சதோ மனஸிகரோதோ அதி⁴மோக்க²ப³ஹுலஸ்ஸ அனிமித்தோ விமோக்கோ² ஆதி⁴பதேய்யோ ஹோதி, பா⁴வனாய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, படிவேத⁴காலேபி அனிமித்தோ விமோக்கோ² ஆதி⁴பதேய்யோ ஹோதி, படிவேதா⁴ய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, ஏகரஸட்டே²ன பா⁴வனா, த³ஸ்ஸனட்டே²ன படிவேதோ⁴, ஏவம் படிவிஜ்ஜ²ந்தோபி பா⁴வேதி, பா⁴வேந்தோபி படிவிஜ்ஜ²தி. து³க்க²தோ மனஸிகரோதோ பஸ்ஸத்³தி⁴ப³ஹுலஸ்ஸ அப்பணிஹிதோ விமோக்கோ² ஆதி⁴பதேய்யோ ஹோதி, பா⁴வனாய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, படிவேத⁴காலேபி அப்பணிஹிதோ விமோக்கோ² ஆதி⁴பதேய்யோ ஹோதி, படிவேதா⁴ய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, ஏகரஸட்டே²ன பா⁴வனா, த³ஸ்ஸனட்டே²ன படிவேதோ⁴, ஏவம் படிவிஜ்ஜ²ந்தோபி பா⁴வேதி, பா⁴வேந்தோபி படிவிஜ்ஜ²தி. அனத்ததோ மனஸிகரோதோ வேத³ப³ஹுலஸ்ஸ ஸுஞ்ஞதோ விமோக்கோ² ஆதி⁴பதேய்யோ ஹோதி, பா⁴வனாய த்³வே விமோக்கா² தத³ன்வயா ஹோந்தி ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, படிவேத⁴காலேபி ஸுஞ்ஞதோ விமோக்கோ² ஆதி⁴பதேய்யோ ஹோதி, படிவேதா⁴ய த்³வே விமோக்கா² தத³ன்வயா ஹோந்தி, ஸஹஜாதபச்சயா ஹோந்தி, அஞ்ஞமஞ்ஞபச்சயா ஹோந்தி, நிஸ்ஸயபச்சயா ஹோந்தி, ஸம்பயுத்தபச்சயா ஹோந்தி, ஏகரஸா ஹோந்தி, ஏகரஸட்டே²ன பா⁴வனா, த³ஸ்ஸனட்டே²ன படிவேதோ⁴, ஏவம் படிவிஜ்ஜ²ந்தோபி பா⁴வேதி, பா⁴வேந்தோபி படிவிஜ்ஜ²தி.

226. அனிச்சதோ மனஸிகரோதோ கதமோ விமோக்கோ² அதி⁴மத்தோ ஹோதி? கதமவிமோக்க²ஸ்ஸ அதி⁴மத்தத்தா ஸத்³தா⁴விமுத்தோ ஹோதி? து³க்க²தோ மனஸிகரோதோ கதமோ விமோக்கோ² அதி⁴மத்தோ ஹோதி? கதமவிமோக்க²ஸ்ஸ அதி⁴மத்தத்தா காயஸக்கீ² ஹோதி? அனத்ததோ மனஸிகரோதோ கதமோ விமோக்கோ² அதி⁴மத்தோ ஹோதி? கதமவிமோக்க²ஸ்ஸ அதி⁴மத்தத்தா தி³ட்டி²ப்பத்தோ ஹோதி?

அனிச்சதோ மனஸிகரோதோ அனிமித்தோ விமோக்கோ² அதி⁴மத்தோ ஹோதி. அனிமித்தவிமோக்க²ஸ்ஸ அதி⁴மத்தத்தா ஸத்³தா⁴விமுத்தோ ஹோதி. து³க்க²தோ மனஸிகரோதோ அப்பணிஹிதோ விமோக்கோ² அதி⁴மத்தோ ஹோதி. அப்பணிஹிதவிமோக்க²ஸ்ஸ அதி⁴மத்தத்தா காயஸக்கீ² ஹோதி. அனத்ததோ மனஸிகரோதோ ஸுஞ்ஞதோ விமோக்கோ² அதி⁴மத்தோ ஹோதி. ஸுஞ்ஞதவிமோக்க²ஸ்ஸ அதி⁴மத்தத்தா தி³ட்டி²ப்பத்தோ ஹோதி.

ஸத்³த³ஹந்தோ விமுத்தோதி – ஸத்³தா⁴விமுத்தோ. பு²ட்ட²த்தா ஸச்சி²கதோதி – காயஸக்கீ². தி³ட்ட²த்தா பத்தோதி – தி³ட்டி²ப்பத்தோ. ஸத்³த³ஹந்தோ விமுச்சதீதி – ஸத்³தா⁴விமுத்தோ. ஜா²னப²ஸ்ஸம் பட²மம் பு²ஸதி, பச்சா² நிரோத⁴ம் நிப்³பா³னம் ஸச்சி²கரோதீதி – காயஸக்கீ². ‘‘து³க்கா² ஸங்கா²ரா, ஸுகோ² நிரோதோ⁴’’தி விஞ்ஞாதம் ஹோதி தி³ட்ட²ம் விதி³தம் ஸச்சி²கதம் ப²ஸ்ஸிதம் பஞ்ஞாயாதி – தி³ட்டி²ப்பத்தோ…பே… யே ஹி கேசி நேக்க²ம்மம் பா⁴விதா வா பா⁴வேந்தி வா பா⁴விஸ்ஸந்தி வா…பே… ஸப்³பே³ தே அனிமித்தவிமோக்க²ஸ்ஸ வஸேன ஸத்³தா⁴விமுத்தா, அப்பணிஹிதவிமோக்க²ஸ்ஸ வஸேன காயஸக்கீ², ஸுஞ்ஞதவிமோக்க²ஸ்ஸ வஸேன தி³ட்டி²ப்பத்தா.

யே ஹி கேசி அப்³யாபாத³ம்… ஆலோகஸஞ்ஞம்… அவிக்கே²பம்… யே ஹி கேசி து³க்க²ம் பரிஜானந்தி, ஸமுத³யம் பஜஹந்தி, நிரோத⁴ம் ஸச்சி²கரோந்தி, மக்³க³ம் பா⁴வேந்தி, ஸப்³பே³ தே அனிமித்தவிமோக்க²ஸ்ஸ வஸேன ஸத்³தா⁴விமுத்தா, அப்பணிஹிதவிமோக்க²ஸ்ஸ வஸேன காயஸக்கீ², ஸுஞ்ஞதவிமோக்க²ஸ்ஸ வஸேன தி³ட்டி²ப்பத்தா.

கதிஹாகாரேஹி ஸச்சப்படிவேதோ⁴ ஹோதி? கதிஹாகாரேஹி ஸச்சானி படிவிஜ்ஜ²தி? சதூஹாகாரேஹி ஸச்சப்படிவேதோ⁴ ஹோதி. சதூஹாகாரேஹி ஸச்சானி படிவிஜ்ஜ²தி. து³க்க²ஸச்சம் பரிஞ்ஞாபடிவேத⁴ம் படிவிஜ்ஜ²தி, ஸமுத³யஸச்சம் பஹானபடிவேத⁴ம் படிவிஜ்ஜ²தி. நிரோத⁴ஸச்சம் ஸச்சி²கிரியாபடிவேத⁴ம் படிவிஜ்ஜ²தி. மக்³க³ஸச்சம் பா⁴வனாபடிவேத⁴ம் படிவிஜ்ஜ²தி. இமேஹி சதூஹாகாரேஹி ஸச்சப்படிவேதோ⁴ ஹோதி. இமேஹி சதூஹாகாரேஹி ஸச்சானி படிவிஜ்ஜ²ந்தோ அனிமித்தவிமோக்க²ஸ்ஸ வஸேன ஸத்³தா⁴விமுத்தோ, அப்பணிஹிதவிமோக்க²ஸ்ஸ வஸேன காயஸக்கீ², ஸுஞ்ஞதவிமோக்க²ஸ்ஸ வஸேன தி³ட்டி²ப்பத்தோ.

கதிஹாகாரேஹி ஸச்சப்படிவேதோ⁴ ஹோதி? கதிஹாகாரேஹி ஸச்சானி படிவிஜ்ஜ²தி? நவஹாகாரேஹி ஸச்சப்படிவேதோ⁴ ஹோதி. நவஹாகாரேஹி ஸச்சானி படிவிஜ்ஜ²தி. து³க்க²ஸச்சம் பரிஞ்ஞாபடிவேத⁴ம் படிவிஜ்ஜ²தி…பே… ஸச்சி²கிரியாபடிவேதோ⁴ ச நிரோத⁴ஸ்ஸ. இமேஹி நவஹாகாரேஹி ஸச்சப்படிவேதோ⁴ ஹோதி. இமேஹி நவஹாகாரேஹி ஸச்சானி படிவிஜ்ஜ²ந்தோ அனிமித்தவிமோக்க²ஸ்ஸ வஸேன ஸத்³தா⁴விமுத்தோ, அப்பணிஹிதவிமோக்க²ஸ்ஸ வஸேன காயஸக்கீ², ஸுஞ்ஞதவிமோக்க²ஸ்ஸ வஸேன தி³ட்டி²ப்பத்தோ.

227. அனிச்சதோ மனஸிகரோந்தோ கதமே த⁴ம்மே யதா²பூ⁴தம் ஜானாதி பஸ்ஸதி? கத²ம் ஸம்மாத³ஸ்ஸனம் ஹோதி? கத²ம் தத³ன்வயேன ஸப்³பே³ ஸங்கா²ரா அனிச்சதோ ஸுதி³ட்டா² ஹோந்தி? கத்த² கங்கா² பஹீயதி? து³க்க²தோ மனஸிகரோந்தோ கதமே த⁴ம்மே யதா²பூ⁴தம் ஜானாதி பஸ்ஸதி? கத²ம் ஸம்மாத³ஸ்ஸனம் ஹோதி? கத²ம் தத³ன்வயேன ஸப்³பே³ ஸங்கா²ரா து³க்க²தோ ஸுதி³ட்டா² ஹோந்தி? கத்த² கங்கா² பஹீயதி? அனத்ததோ மனஸிகரோந்தோ கதமே த⁴ம்மே யதா²பூ⁴தம் ஜானாதி பஸ்ஸதி? கத²ம் ஸம்மாத³ஸ்ஸனம் ஹோதி? கத²ம் தத³ன்வயேன ஸப்³பே³ த⁴ம்மா அனத்ததோ ஸுதி³ட்டா² ஹோந்தி? கத்த² கங்கா² பஹீயதி?

அனிச்சதோ மனஸிகரோந்தோ நிமித்தம் யதா²பூ⁴தம் ஜானாதி பஸ்ஸதி; தேன வுச்சதி – ஸம்மாத³ஸ்ஸனம். ஏவம் தத³ன்வயேன ஸப்³பே³ ஸங்கா²ரா அனிச்சதோ ஸுதி³ட்டா² ஹோந்தி. ஏத்த² கங்கா² பஹீயதி. து³க்க²தோ மனஸிகரோந்தோ பவத்தம் யதா²பூ⁴தம் ஜானாதி பஸ்ஸதி; தேன வுச்சதி – ஸம்மாத³ஸ்ஸனம். ஏவம் தத³ன்வயேன ஸப்³பே³ ஸங்கா²ரா து³க்க²தோ ஸுதி³ட்டா² ஹோந்தி. ஏத்த² கங்கா² பஹீயதி. அனத்ததோ மனஸிகரோந்தோ நிமித்தஞ்ச பவத்தஞ்ச யதா²பூ⁴தம் ஜானாதி பஸ்ஸதி; தேன வுச்சதி – ஸம்மாத³ஸ்ஸனம். ஏவம் தத³ன்வயேன ஸப்³பே³ த⁴ம்மா அனத்ததோ ஸுதி³ட்டா² ஹோந்தி. ஏத்த² கங்கா² பஹீயதி.

யஞ்ச யதா²பூ⁴தம் ஞாணம் யஞ்ச ஸம்மாத³ஸ்ஸனம் யா ச கங்கா²விதரணா, இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா², ப்³யஞ்ஜனமேவ நானந்தி? யஞ்ச யதா²பூ⁴தம் ஞாணம் யஞ்ச ஸம்மாத³ஸ்ஸனம் யா ச கங்கா²விதரணா, இமே த⁴ம்மா ஏகத்தா², ப்³யஞ்ஜனமேவ நானம்.

அனிச்சதோ மனஸிகரோதோ கிம் ப⁴யதோ உபட்டா²தி? து³க்க²தோ மனஸிகரோதோ கிம் ப⁴யதோ உபட்டா²தி? அனத்ததோ மனஸிகரோதோ கிம் ப⁴யதோ உபட்டா²தி? அனிச்சதோ மனஸிகரோதோ நிமித்தம் ப⁴யதோ உபட்டா²தி. து³க்க²தோ மனஸிகரோதோ பவத்தம் ப⁴யதோ உபட்டா²தி. அனத்ததோ மனஸிகரோதோ நிமித்தஞ்ச பவத்தஞ்ச ப⁴யதோ உபட்டா²தி.

யா ச ப⁴யதுபட்டா²னே பஞ்ஞா யஞ்ச ஆதீ³னவே ஞாணம் யா ச நிப்³பி³தா³, இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா², ப்³யஞ்ஜனமேவ நானந்தி? யா ச ப⁴யதுபட்டா²னே பஞ்ஞா யஞ்ச ஆதீ³னவே ஞாணம் யா ச நிப்³பி³தா³, இமே த⁴ம்மா ஏகத்தா², ப்³யஞ்ஜனமேவ நானம்.

யா ச அனத்தானுபஸ்ஸனா யா ச ஸுஞ்ஞதானுபஸ்ஸனா, இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா², ப்³யஞ்ஜனமேவ நானந்தி? யா ச அனத்தானுபஸ்ஸனா யா ச ஸுஞ்ஞதானுபஸ்ஸனா, இமே த⁴ம்மா ஏகத்தா², ப்³யஞ்ஜனமேவ நானம்.

அனிச்சதோ மனஸிகரோதோ கிம் படிஸங்கா² ஞாணம் உப்பஜ்ஜதி? து³க்க²தோ மனஸிகரோதோ கிம் படிஸங்கா² ஞாணம் உப்பஜ்ஜதி? அனத்ததோ மனஸிகரோதோ கிம் படிஸங்கா² ஞாணம் உப்பஜ்ஜதி? அனிச்சதோ மனஸிகரோதோ நிமித்தம் படிஸங்கா² ஞாணம் உப்பஜ்ஜதி. து³க்க²தோ மனஸிகரோதோ பவத்தம் படிஸங்கா² ஞாணம் உப்பஜ்ஜதி. அனத்ததோ மனஸிகரோதோ நிமித்தஞ்ச பவத்தஞ்ச படிஸங்கா² ஞாணம் உப்பஜ்ஜதி.

யா ச முச்சிதுகம்யதா யா ச படிஸங்கா²னுபஸ்ஸனா யா ச ஸங்கா²ருபேக்கா², இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா², ப்³யஞ்ஜனமேவ நானந்தி? யா ச முச்சிதுகம்யதா யா ச படிஸங்கா²னுபஸ்ஸனா யா ச ஸங்கா²ருபேக்கா², இமே த⁴ம்மா ஏகத்தா², ப்³யஞ்ஜனமேவ நானம்.

அனிச்சதோ மனஸிகரோதோ குதோ சித்தம் வுட்டா²தி, கத்த² சித்தம் பக்க²ந்த³தி? து³க்க²தோ மனஸிகரோதோ குதோ சித்தம் வுட்டா²தி, கத்த² சித்தம் பக்க²ந்த³தி? அனத்ததோ மனஸிகரோதோ குதோ சித்தம் வுட்டா²தி, கத்த² சித்தம் பக்க²ந்த³தி? அனிச்சதோ மனஸிகரோதோ நிமித்தா சித்தம் வுட்டா²தி, அனிமித்தே சித்தம் பக்க²ந்த³தி. து³க்க²தோ மனஸிகரோதோ பவத்தா சித்தம் வுட்டா²தி, அப்பவத்தே சித்தம் பக்க²ந்த³தி. அனத்ததோ மனஸிகரோதோ நிமித்தா ச பவத்தா ச சித்தம் வுட்டா²தி, அனிமித்தே அப்பவத்தே நிரோதே⁴ நிப்³பா³னதா⁴துயா [நிரோத⁴னிப்³பா³னதா⁴துயா (ஸீ.)] சித்தம் பக்க²ந்த³தி.

யா ச ப³ஹித்³தா⁴வுட்டா²னவிவட்டனே பஞ்ஞா யே ச கோ³த்ரபூ⁴ த⁴ம்மா, இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா², ப்³யஞ்ஜனமேவ நானந்தி? யா ச ப³ஹித்³தா⁴வுட்டா²னவிவட்டனே பஞ்ஞா யே ச கோ³த்ரபூ⁴ த⁴ம்மா, இமே த⁴ம்மா ஏகத்தா², ப்³யஞ்ஜனமேவ நானம்.

அனிச்சதோ மனஸிகரோந்தோ கதமேன விமோக்கே²ன விமுச்சதி? து³க்க²தோ மனஸிகரோந்தோ கதமேன விமோக்கே²ன விமுச்சதி? அனத்ததோ மனஸிகரோந்தோ கதமேன விமோக்கே²ன விமுச்சதி? அனிச்சதோ மனஸிகரோந்தோ அனிமித்தவிமோக்கே²ன விமுச்சதி. து³க்க²தோ மனஸிகரோந்தோ அப்பணிஹிதவிமோக்கே²ன விமுச்சதி. அனத்ததோ மனஸிகரோந்தோ ஸுஞ்ஞதவிமோக்கே²ன விமுச்சதி. யா ச து³ப⁴தோவுட்டா²னவிவட்டனே பஞ்ஞா யஞ்ச மக்³கே³ ஞாணம், இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா², ப்³யஞ்ஜனமேவ நானந்தி? யா ச து³ப⁴தோவுட்டா²னவிவட்டனே பஞ்ஞா யஞ்ச மக்³கே³ ஞாணம், இமே த⁴ம்மா ஏகத்தா², ப்³யஞ்ஜனமேவ நானம்.

228. கதிஹாகாரேஹி தயோ விமோக்கா² நானாக்க²ணே [நானாக²ணே (ஸ்யா. க.)] ஹோந்தி? கதிஹாகாரேஹி தயோ விமோக்கா² ஏகக்க²ணே ஹோந்தி? சதூஹாகாரேஹி தயோ விமோக்கா² நானாக்க²ணே ஹோந்தி. ஸத்தஹாகாரேஹி தயோ விமோக்கா² ஏகக்க²ணே ஹோந்தி.

கதமேஹி சதூஹாகாரேஹி தயோ விமோக்கா² நானாக்க²ணே ஹோந்தி? ஆதி⁴பதேய்யட்டே²ன, அதி⁴ட்டா²னட்டே²ன, அபி⁴னீஹாரட்டே²ன, நிய்யானட்டே²ன. கத²ம் ஆதி⁴பதேய்யட்டே²ன தயோ விமோக்கா² நானாக்க²ணே ஹோந்தி? அனிச்சதோ மனஸிகரோதோ அனிமித்தோ விமோக்கோ² ஆதி⁴பதேய்யோ ஹோதி, து³க்க²தோ மனஸிகரோதோ அப்பணிஹிதோ விமோக்கோ² ஆதி⁴பதேய்யோ ஹோதி, அனத்ததோ மனஸிகரோதோ ஸுஞ்ஞதோ விமோக்கோ² ஆதி⁴பதேய்யோ ஹோதி. ஏவம் ஆதி⁴பதேய்யட்டே²ன தயோ விமோக்கா² நானாக்க²ணே ஹோந்தி.

கத²ம் அதி⁴ட்டா²னட்டே²ன தயோ விமோக்கா² நானாக்க²ணே ஹோந்தி? அனிச்சதோ மனஸிகரோந்தோ அனிமித்தவிமோக்க²ஸ்ஸ வஸேன சித்தம் அதி⁴ட்டா²தி, து³க்க²தோ மனஸிகரோந்தோ அப்பணிஹிதவிமோக்க²ஸ்ஸ வஸேன சித்தம் அதி⁴ட்டா²தி, அனத்ததோ மனஸிகரோந்தோ ஸுஞ்ஞதவிமோக்க²ஸ்ஸ வஸேன சித்தம் அதி⁴ட்டா²தி. ஏவம் அதி⁴ட்டா²னட்டே²ன தயோ விமோக்கா² நானாக்க²ணே ஹோந்தி.

கத²ம் அபி⁴னீஹாரட்டே²ன தயோ விமோக்கா² நானாக்க²ணே ஹோந்தி? அனிச்சதோ மனஸிகரோந்தோ அனிமித்தவிமோக்க²ஸ்ஸ வஸேன சித்தம் அபி⁴னீஹரதி, து³க்க²தோ மனஸிகரோந்தோ அப்பணிஹிதவிமோக்க²ஸ்ஸ வஸேன சித்தம் அபி⁴னீஹரதி, அனத்ததோ மனஸிகரோந்தோ ஸுஞ்ஞதவிமோக்க²ஸ்ஸ வஸேன சித்தம் அபி⁴னீஹரதி. ஏவம் அபி⁴னீஹாரட்டே²ன தயோ விமோக்கா² நானாக்க²ணே ஹோந்தி.

கத²ம் நிய்யானட்டே²ன தயோ விமோக்கா² நானாக்க²ணே ஹோந்தி? அனிச்சதோ மனஸிகரோந்தோ அனிமித்தவிமோக்க²ஸ்ஸ வஸேன நிரோத⁴ம் நிப்³பா³னம் நிய்யாதி, து³க்க²தோ மனஸிகரோந்தோ அப்பணிஹிதவிமோக்க²ஸ்ஸ வஸேன நிரோத⁴ம் நிப்³பா³னம் நிய்யாதி, அனத்ததோ மனஸிகரோந்தோ ஸுஞ்ஞதவிமோக்க²ஸ்ஸ வஸேன நிரோத⁴ம் நிப்³பா³னம் நிய்யாதி. ஏவம் நிய்யானட்டே²ன தயோ விமோக்கா² நானாக்க²ணே ஹோந்தி. இமேஹி சதூஹாகாரேஹி தயோ விமோக்கா² நானாக்க²ணே ஹோந்தி.

கதமேஹி ஸத்தஹாகாரேஹி தயோ விமோக்கா² ஏகக்க²ணே ஹோந்தி? ஸமோதா⁴னட்டே²ன, அதி⁴க³மனட்டே²ன, படிலாப⁴ட்டே²ன படிவேத⁴ட்டே²ன, ஸச்சி²கிரியட்டே²ன, ப²ஸ்ஸனட்டே²ன, அபி⁴ஸமயட்டே²ன. கத²ம் ஸமோதா⁴னட்டே²ன அதி⁴க³மனட்டே²ன படிலாப⁴ட்டே²ன படிவேத⁴ட்டே²ன ஸச்சி²கிரியட்டே²ன ப²ஸ்ஸனட்டே²ன அபி⁴ஸமயட்டே²ன தயோ விமோக்கா² ஏகக்க²ணே ஹோந்தி? அனிச்சதோ மனஸிகரோந்தோ நிமித்தா முச்சதீதி – அனிமித்தோ விமோக்கோ². யதோ முச்சதி, தத்த² ந பணித³ஹதீதி – அப்பணிஹிதோ விமோக்கோ². யத்த² ந பணித³ஹதி, தேன ஸுஞ்ஞோதி – ஸுஞ்ஞதோ விமோக்கோ². யேன ஸுஞ்ஞோ, தேன நிமித்தேன அனிமித்தோதி – அனிமித்தோ விமோக்கோ². ஏவம் ஸமோதா⁴னட்டே²ன அதி⁴க³மனட்டே²ன படிலாப⁴ட்டே²ன படிவேத⁴ட்டே²ன ஸச்சி²கிரியட்டே²ன ப²ஸ்ஸனட்டே²ன அபி⁴ஸமயட்டே²ன தயோ விமோக்கா² ஏகக்க²ணே ஹோந்தி.

து³க்க²தோ மனஸிகரோந்தோ பணிதி⁴யா முச்சதீதி – அப்பணிஹிதோ விமோக்கோ². யத்த² ந பணித³ஹதி, தேன ஸுஞ்ஞோதி – ஸுஞ்ஞதோ விமோக்கோ². யேன ஸுஞ்ஞோ, தேன நிமித்தேன அனிமித்தோதி – அனிமித்தோ விமோக்கோ². யேன நிமித்தேன அனிமித்தோ, தத்த² ந பணித³ஹதீதி – அப்பணிஹிதோ விமோக்கோ². ஏவம் ஸமோதா⁴னட்டே²ன அதி⁴க³மனட்டே²ன படிலாப⁴ட்டே²ன படிவேத⁴ட்டே²ன ஸச்சி²கிரியட்டே²ன ப²ஸ்ஸனட்டே²ன அபி⁴ஸமயட்டே²ன தயோ விமோக்கா² ஏகக்க²ணே ஹோந்தி.

அனத்ததோ மனஸிகரோந்தோ அபி⁴னிவேஸா முச்சதீதி – ஸுஞ்ஞதோ விமோக்கோ². யேன ஸுஞ்ஞோ, தேன நிமித்தேன அனிமித்தோதி – அனிமித்தோ விமோக்கோ². யேன நிமித்தேன அனிமித்தோ, தத்த² ந பணித³ஹதீதி – அப்பணிஹிதோ விமோக்கோ². யத்த² ந பணித³ஹதி, தேன ஸுஞ்ஞோதி – ஸுஞ்ஞதோ விமோக்கோ². ஏவம் ஸமோதா⁴னட்டே²ன அதி⁴க³மனட்டே²ன படிலாப⁴ட்டே²ன படிவேத⁴ட்டே²ன ஸச்சி²கிரியட்டே²ன ப²ஸ்ஸனட்டே²ன அபி⁴ஸமயட்டே²ன தயோ விமோக்கா² ஏகக்க²ணே ஹோந்தி. இமேஹி ஸத்தஹாகாரேஹி தயோ விமோக்கா² ஏகக்க²ணே ஹோந்தி.

229. அத்தி² விமோக்கோ², அத்தி² முக²ம், அத்தி² விமோக்க²முக²ம், அத்தி² விமோக்க²பச்சனீகம், அத்தி² விமோக்கா²னுலோமம், அத்தி² விமோக்க²விவட்டோ, அத்தி² விமோக்க²பா⁴வனா, அத்தி² விமோக்க²ப்படிப்பஸ்ஸத்³தி⁴.

கதமோ விமோக்கோ²? ஸுஞ்ஞதோ விமோக்கோ², அனிமித்தோ விமோக்கோ², அப்பணிஹிதோ விமோக்கோ². கதமோ ஸுஞ்ஞதோ விமோக்கோ²? அனிச்சானுபஸ்ஸனாஞாணம் நிச்சதோ அபி⁴னிவேஸா முச்சதீதி – ஸுஞ்ஞதோ விமோக்கோ². து³க்கா²னுபஸ்ஸனாஞாணம் ஸுக²தோ அபி⁴னிவேஸா முச்சதீதி – ஸுஞ்ஞதோ விமோக்கோ². அனத்தானுபஸ்ஸனாஞாணம் அத்ததோ அபி⁴னிவேஸா முச்சதீதி – ஸுஞ்ஞதோ விமோக்கோ². நிப்³பி³தா³னுபஸ்ஸனாஞாணம் நந்தி³யா அபி⁴னிவேஸா முச்சதீதி – ஸுஞ்ஞதோ விமோக்கோ². விராகா³னுபஸ்ஸனாஞாணம் ராக³தோ அபி⁴னிவேஸா முச்சதீதி – ஸுஞ்ஞதோ விமோக்கோ². நிரோதா⁴னுபஸ்ஸனாஞாணம் ஸமுத³யதோ அபி⁴னிவேஸா முச்சதீதி – ஸுஞ்ஞதோ விமோக்கோ². படினிஸ்ஸக்³கா³னுபஸ்ஸனாஞாணம் ஆதா³னதோ அபி⁴னிவேஸா முச்சதீதி – ஸுஞ்ஞதோ விமோக்கோ². அனிமித்தானுபஸ்ஸனாஞாணம் நிமித்ததோ அபி⁴னிவேஸா முச்சதீதி – ஸுஞ்ஞதோ விமோக்கோ². அப்பணிஹிதானுபஸ்ஸனாஞாணம் பணிதி⁴யா அபி⁴னிவேஸா முச்சதீதி – ஸுஞ்ஞதோ விமோக்கோ². ஸுஞ்ஞதானுபஸ்ஸனாஞாணம் ஸப்³பா³பி⁴னிவேஸேஹி முச்சதீதி – ஸுஞ்ஞதோ விமோக்கோ².

ரூபே அனிச்சானுபஸ்ஸனாஞாணம் நிச்சதோ அபி⁴னிவேஸா முச்சதீதி – ஸுஞ்ஞதோ விமோக்கோ²…பே… ரூபே ஸுஞ்ஞதானுபஸ்ஸனாஞாணம் ஸப்³பா³பி⁴னிவேஸேஹி முச்சதீதி – ஸுஞ்ஞதோ விமோக்கோ². வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனாஞாணம் நிச்சதோ அபி⁴னிவேஸா முச்சதீதி – ஸுஞ்ஞதோ விமோக்கோ²…பே… ஜராமரணே ஸுஞ்ஞதானுபஸ்ஸனாஞாணம் ஸப்³பா³பி⁴னிவேஸேஹி முச்சதீதி – ஸுஞ்ஞதோ விமோக்கோ². அயம் ஸுஞ்ஞதோ விமோக்கோ².

கதமோ அனிமித்தோ விமோக்கோ²? அனிச்சானுபஸ்ஸனாஞாணம் நிச்சதோ நிமித்தா முச்சதீதி – அனிமித்தோ விமோக்கோ². து³க்கா²னுபஸ்ஸனாஞாணம் ஸுக²தோ நிமித்தா முச்சதீதி – அனிமித்தோ விமோக்கோ². அனத்தானுபஸ்ஸனாஞாணம் அத்ததோ நிமித்தா முச்சதீதி – அனிமித்தோ விமோக்கோ². நிப்³பி³தா³னுபஸ்ஸனாஞாணம் நந்தி³யா நிமித்தா முச்சதீதி – அனிமித்தோ விமோக்கோ². விராகா³னுபஸ்ஸனாஞாணம் ராக³தோ நிமித்தா முச்சதீதி – அனிமித்தோ விமோக்கோ². நிரோதா⁴னுபஸ்ஸனாஞாணம் ஸமுத³யதோ நிமித்தா முச்சதீதி – அனிமித்தோ விமோக்கோ². படினிஸ்ஸக்³கா³னுபஸ்ஸனாஞாணம் ஆதா³னதோ நிமித்தா முச்சதீதி – அனிமித்தோ விமோக்கோ². அனிமித்தானுபஸ்ஸனாஞாணம் ஸப்³ப³னிமித்தேஹி முச்சதீதி – அனிமித்தோ விமோக்கோ². அப்பணிஹிதானுபஸ்ஸனாஞாணம் பணிதி⁴யா நிமித்தா முச்சதீதி – அனிமித்தோ விமோக்கோ². ஸுஞ்ஞதானுபஸ்ஸனாஞாணம் அபி⁴னிவேஸதோ நிமித்தா முச்சதீதி – அனிமித்தோ விமோக்கோ².

ரூபே அனிச்சானுபஸ்ஸனாஞாணம் நிச்சதோ நிமித்தா முச்சதீதி – அனிமித்தோ விமோக்கோ² …பே… ரூபே அனிமித்தானுபஸ்ஸனாஞாணம் ஸப்³ப³னிமித்தேஹி முச்சதீதி – அனிமித்தோ விமோக்கோ². ரூபே அப்பணிஹிதானுபஸ்ஸனாஞாணம் பணிதி⁴யா நிமித்தா முச்சதீதி – அனிமித்தோ விமோக்கோ². ரூபே ஸுஞ்ஞதானுபஸ்ஸனாஞாணம் அபி⁴னிவேஸதோ நிமித்தா முச்சதீதி – அனிமித்தோ விமோக்கோ². வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனாஞாணம் நிச்சதோ நிமித்தா முச்சதீதி – அனிமித்தோ விமோக்கோ²…பே… ஜராமரணே அனிச்சானுபஸ்ஸனாஞாணம் ஸப்³ப³னிமித்தேஹி முச்சதீதி – அனிமித்தோ விமோக்கோ². ஜராமரணே அப்பணிஹிதானுபஸ்ஸனாஞாணம் பணிதி⁴யா நிமித்தா முச்சதீதி – அனிமித்தோ விமோக்கோ². ஜராமரணே ஸுஞ்ஞதானுபஸ்ஸனாஞாணம் அபி⁴னிவேஸதோ நிமித்தா முச்சதீதி – அனிமித்தோ விமோக்கோ². அயம் அனிமித்தோ விமோக்கோ².

கதமோ அப்பணிஹிதோ விமோக்கோ²? அனிச்சானுபஸ்ஸனாஞாணம் நிச்சதோ பணிதி⁴யா முச்சதீதி – அப்பணிஹிதோ விமோக்கோ². து³க்கா²னுபஸ்ஸனாஞாணம் ஸுக²தோ பணிதி⁴யா முச்சதீதி – அப்பணிஹிதோ விமோக்கோ². அனத்தானுபஸ்ஸனாஞாணம் அத்ததோ பணிதி⁴யா முச்சதீதி – அப்பணிஹிதோ விமோக்கோ². நிப்³பி³தா³னுபஸ்ஸனாஞாணம் நந்தி³யா பணிதி⁴யா முச்சதீதி – அப்பணிஹிதோ விமோக்கோ². விராகா³னுபஸ்ஸனாஞாணம் ராக³தோ பணிதி⁴யா முச்சதீதி – அப்பணிஹிதோ விமோக்கோ². நிரோதா⁴னுபஸ்ஸனாஞாணம் ஸமுத³யதோ பணிதி⁴யா முச்சதீதி – அப்பணிஹிதோ விமோக்கோ². படினிஸ்ஸக்³கா³னுபஸ்ஸனாஞாணம் ஆதா³னதோ பணிதி⁴யா முச்சதீதி – அப்பணிஹிதோ விமோக்கோ². அனிமித்தானுபஸ்ஸனாஞாணம் நிமித்ததோ பணிதி⁴யா முச்சதீதி – அப்பணிஹிதோ விமோக்கோ². அப்பணிஹிதானுபஸ்ஸனாஞாணம் ஸப்³ப³பணிதீ⁴ஹி முச்சதீதி – அப்பணிஹிதோ விமோக்கோ². ஸுஞ்ஞதானுபஸ்ஸனாஞாணம் அபி⁴னிவேஸதோ பணிதி⁴யா முச்சதீதி – அப்பணிஹிதோ விமோக்கோ².

ரூபே அனிச்சானுபஸ்ஸனாஞாணம் நிச்சதோ பணிதி⁴யா முச்சதீதி – அப்பணிஹிதோ விமோக்கோ²…பே… ரூபே அப்பணிஹிதானுபஸ்ஸனாஞாணம் ஸப்³ப³பணிதீ⁴ஹி முச்சதீதி – அப்பணிஹிதோ விமோக்கோ². ரூபே ஸுஞ்ஞதானுபஸ்ஸனாஞாணம் அபி⁴னிவேஸதோ பணிதி⁴யா முச்சதீதி – அப்பணிஹிதோ விமோக்கோ². வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனாஞாணம் நிச்சதோ பணிதி⁴யா முச்சதீதி – அப்பணிஹிதோ விமோக்கோ²…பே… ஜராமரணே அப்பணிஹிதானுபஸ்ஸனாஞாணம் ஸப்³ப³பணிதீ⁴ஹி முச்சதீதி – அப்பணிஹிதோ விமோக்கோ². ஜராமரணே ஸுஞ்ஞதானுபஸ்ஸனாஞாணம் அபி⁴னிவேஸதோ பணிதி⁴யா முச்சதீதி – அப்பணிஹிதோ விமோக்கோ². அயம் அப்பணிஹிதோ விமோக்கோ². அயம் விமோக்கோ².

230. கதமம் முக²ம்? யே தத்த² ஜாதா அனவஜ்ஜா குஸலா போ³தி⁴பக்கி²யாத⁴ம்மா, இத³ம் முக²ம்.

கதமம் விமோக்க²முக²ம்? யம் தேஸம் த⁴ம்மானம் ஆரம்மணம் நிரோதோ⁴ நிப்³பா³னம், இத³ம் விமோக்க²முக²ம். விமோக்க²ஞ்ச முக²ஞ்ச விமோக்க²முக²ம், இத³ம் விமோக்க²முக²ம்.

கதமம் விமோக்க²பச்சனீகம்? தீணி அகுஸலமூலானி விமோக்க²பச்சனீகானி, தீணி து³ச்சரிதானி விமோக்க²பச்சனீகானி, ஸப்³பே³பி அகுஸலா த⁴ம்மா விமோக்க²பச்சனீகா, இத³ம் விமோக்க²பச்சனீகம்.

கதமம் விமோக்கா²னுலோமம்? தீணி குஸலமூலானி விமோக்கா²னுலோமானி, தீணி ஸுசரிதானி விமோக்கா²னுலோமானி, ஸப்³பே³பி குஸலா த⁴ம்மா விமோக்கா²னுலோமா, இத³ம் விமோக்கா²னுலோமம்.

கதமோ விமோக்க²விவட்டோ? ஸஞ்ஞாவிவட்டோ, சேதோவிவட்டோ, சித்தவிவட்டோ, ஞாணவிவட்டோ, விமோக்க²விவட்டோ, ஸச்சவிவட்டோ. ஸஞ்ஜானந்தோ விவட்டதீதி – ஸஞ்ஞாவிவட்டோ. சேதயந்தோ விவட்டதீதி – சேதோவிவட்டோ. விஜானந்தோ விவட்டதீதி – சித்தவிவட்டோ. ஞாணம் கரோந்தோ விவட்டதீதி – ஞாணவிவட்டோ. வோஸஜ்ஜந்தோ விவட்டதீதி – விமோக்க²விவட்டோ. தத²ட்டே²ன விவட்டதீதி – ஸச்சவிவட்டோ.

யத்த² ஸஞ்ஞாவிவட்டோ தத்த² சேதோவிவட்டோ, யத்த² சேதோவிவட்டோ தத்த² ஸஞ்ஞாவிவட்டோ, யத்த² ஸஞ்ஞாவிவட்டோ சேதோவிவட்டோ தத்த² சித்தவிவட்டோ, யத்த² சித்தவிவட்டோ தத்த² ஸஞ்ஞாவிவட்டோ சேதோவிவட்டோ. யத்த² ஸஞ்ஞாவிவட்டோ சேதோவிவட்டோ சித்தவிவட்டோ தத்த² ஞாணவிவட்டோ, யத்த² ஞாணவிவட்டோ தத்த² ஸஞ்ஞாவிவட்டோ சேதோவிவட்டோ சித்தவிவட்டோ. யத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ தத்த² விமோக்க²விவட்டோ, யத்த² விமோக்க²விவட்டோ தத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ. யத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ விமோக்க²விவட்டோ தத்த² ஸச்சவிவட்டோ, யத்த² ஸச்சவிவட்டோ தத்த² ஸஞ்ஞாவிவட்டோ சேதோவிவட்டோ சித்தவிவட்டோ ஞாணவிவட்டோ விமோக்க²விவட்டோ. அயம் விமோக்க²விவட்டோ.

கதமா விமோக்க²பா⁴வனா? பட²மஸ்ஸ ஜா²னஸ்ஸ ஆஸேவனா பா⁴வனா ப³ஹுலீகம்மம், து³தியஸ்ஸ ஜா²னஸ்ஸ ஆஸேவனா பா⁴வனா ப³ஹுலீகம்மம், ததியஸ்ஸ ஜா²னஸ்ஸ ஆஸேவனா பா⁴வனா ப³ஹுலீகம்மம், சதுத்த²ஸ்ஸ ஜா²னஸ்ஸ ஆஸேவனா பா⁴வனா ப³ஹுலீகம்மம், ஆகாஸானஞ்சாயதனஸமாபத்தியா ஆஸேவனா பா⁴வனா ப³ஹுலீகம்மம், விஞ்ஞாணஞ்சாயதனஸமாபத்தியா…பே… ஆகிஞ்சஞ்ஞாயதனஸமாபத்தியா… நேவஸஞ்ஞானாஸஞ்ஞாயதனஸமாபத்தியா ஆஸேவனா பா⁴வனா ப³ஹுலீகம்மம், ஸோதாபத்திமக்³க³ஸ்ஸ ஆஸேவனா பா⁴வனா ப³ஹுலீகம்மம், ஸகதா³கா³மிமக்³க³ஸ்ஸ ஆஸேவனா பா⁴வனா ப³ஹுலீகம்மம், அனாகா³மிமக்³க³ஸ்ஸ ஆஸேவனா பா⁴வனா ப³ஹுலீகம்மம், அரஹத்தமக்³க³ஸ்ஸ ஆஸேவனா பா⁴வனா ப³ஹுலீகம்மம், அயம் விமோக்க²பா⁴வனா.

கதமா விமோக்க²ப்படிப்பஸ்ஸத்³தி⁴? பட²மஸ்ஸ ஜா²னஸ்ஸ படிலாபோ⁴ வா விபாகோ வா, து³தியஸ்ஸ ஜா²னஸ்ஸ படிலாபோ⁴ வா விபாகோ வா, ததியஸ்ஸ ஜா²னஸ்ஸ…பே… சதுத்த²ஸ்ஸ ஜா²னஸ்ஸ… ஆகாஸானஞ்சாயதனஸமாபத்தியா… விஞ்ஞாணஞ்சாயதனஸமாபத்தியா… ஆகிஞ்சஞ்ஞாயதனஸமாபத்தியா… நேவஸஞ்ஞானாஸஞ்ஞாயதனஸமாபத்தியா படிலாபோ⁴ வா விபாகோ வா, ஸோதாபத்திமக்³க³ஸ்ஸ ஸோதாபத்திப²லம், ஸகதா³கா³மிமக்³க³ஸ்ஸ ஸகதா³கா³மிப²லம், அனாகா³மிமக்³க³ஸ்ஸ அனாகா³மிப²லம், அரஹத்தமக்³க³ஸ்ஸ அரஹத்தப²லம், அயம் விமோக்க²ப்படிப்பஸ்ஸத்³தீ⁴தி.

ததியபா⁴ணவாரோ.

விமோக்க²கதா² நிட்டி²தா.