2. தி³ட்டி²கதா²

122. கா தி³ட்டி², கதி தி³ட்டி²ட்டா²னானி, கதி தி³ட்டி²பரியுட்டா²னானி, கதி தி³ட்டி²யோ, கதி தி³ட்டா²பி⁴னிவேஸா, கதமோ தி³ட்டி²ட்டா²னஸமுக்³கா⁴தோதி?

[1] கா தி³ட்டீ²தி அபி⁴னிவேஸபராமாஸோ தி³ட்டி². [2] கதி தி³ட்டி²ட்டா²னானீதி அட்ட² தி³ட்டி²ட்டா²னானி. [3] கதி தி³ட்டி²பரியுட்டா²னானீதி அட்டா²ரஸ தி³ட்டி²பரியுட்டா²னானி. [4] கதி தி³ட்டி²யோதி ஸோளஸ தி³ட்டி²யோ. [5] கதி தி³ட்டா²பி⁴னிவேஸாதி தீணி ஸதம் தி³ட்டா²பி⁴னிவேஸா. [6] கதமோ தி³ட்டி²ட்டா²னஸமுக்³கா⁴தோதி ஸோதாபத்திமக்³கோ³ தி³ட்டி²ட்டா²னஸமுக்³கா⁴தோ.

123. கத²ம் அபி⁴னிவேஸபராமாஸோ தி³ட்டி²? [கதி அபி⁴னிவேஸபராமாஸோ தி³ட்டீ²தி (ஸ்யா.)] ரூபம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². வேத³னம் ஏதம் மம…பே… ஸஞ்ஞம் ஏதம் மம… ஸங்கா²ரே ஏதம் மம… விஞ்ஞாணம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². சக்கு²ம் ஏதம் மம…பே… ஸோதம் ஏதம் மம… கா⁴னம் ஏதம் மம… ஜிவ்ஹம் ஏதம் மம… காயம் ஏதம் மம… மனம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². ரூபே [ரூபம் (ஸ்யா.) ததா² பஞ்சஸு ஆரம்மணேஸு ஏகவசனேன] ஏதம் மம…பே… ஸத்³தே³ ஏதம் மம… க³ந்தே⁴ ஏதம் மம… ரஸே ஏதம் மம… போ²ட்ட²ப்³பே³ ஏதம் மம… த⁴ம்மே ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². சக்கு²விஞ்ஞாணம் ஏதம் மம…பே… ஸோதவிஞ்ஞாணம் ஏதம் மம… கா⁴னவிஞ்ஞாணம் ஏதம் மம… ஜிவ்ஹாவிஞ்ஞாணம் ஏதம் மம… காயவிஞ்ஞாணம் ஏதம் மம… மனோவிஞ்ஞாணம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². சக்கு²ஸம்ப²ஸ்ஸம் ஏதம் மம…பே… ஸோதஸம்ப²ஸ்ஸம் ஏதம் மம… கா⁴னஸம்ப²ஸ்ஸம் ஏதம் மம… ஜிவ்ஹாஸம்ப²ஸ்ஸம் ஏதம் மம… காயஸம்ப²ஸ்ஸம் ஏதம் மம… மனோஸம்ப²ஸ்ஸம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². சக்கு²ஸம்ப²ஸ்ஸஜம் வேத³னம்…பே… ஸோதஸம்ப²ஸ்ஸஜம் வேத³னம்… கா⁴னஸம்ப²ஸ்ஸஜம் வேத³னம்… ஜிவ்ஹாஸம்ப²ஸ்ஸஜம் வேத³னம்… காயஸம்ப²ஸ்ஸஜம் வேத³னம்… மனோஸம்ப²ஸ்ஸஜம் வேத³னம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

ரூபஸஞ்ஞம் ஏதம் மம…பே… ஸத்³த³ஸஞ்ஞம் ஏதம் மம… க³ந்த⁴ஸஞ்ஞம் ஏதம் மம… ரஸஸஞ்ஞம் ஏதம் மம… போ²ட்ட²ப்³ப³ஸஞ்ஞம் ஏதம் மம… த⁴ம்மஸஞ்ஞம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². ரூபஸஞ்சேதனம் ஏதம் மம…பே… ஸத்³த³ஸஞ்சேதனம் ஏதம் மம… க³ந்த⁴ஸஞ்சேதனம் ஏதம் மம… ரஸஸஞ்சேதனம் ஏதம் மம… போ²ட்ட²ப்³ப³ஸஞ்சேதனம் ஏதம் மம… த⁴ம்மஸஞ்சேதனம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². ரூபதண்ஹம் ஏதம் மம…பே… ஸத்³த³தண்ஹம் ஏதம் மம… க³ந்த⁴தண்ஹம் ஏதம் மம… ரஸதண்ஹம் ஏதம் மம… போ²ட்ட²ப்³ப³தண்ஹம் ஏதம் மம… த⁴ம்மதண்ஹம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². ரூபவிதக்கம் ஏதம் மம…பே… ஸத்³த³விதக்கம் ஏதம் மம… க³ந்த⁴விதக்கம் ஏதம் மம… ரஸவிதக்கம் ஏதம் மம… போ²ட்ட²ப்³ப³விதக்கம் ஏதம் மம… த⁴ம்மவிதக்கம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². ரூபவிசாரம் ஏதம் மம…பே… ஸத்³த³விசாரம் ஏதம் மம… க³ந்த⁴விசாரம் ஏதம் மம… ரஸவிசாரம் ஏதம் மம… போ²ட்ட²ப்³ப³விசாரம் ஏதம் மம… த⁴ம்மவிசாரம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

பத²வீதா⁴தும் ஏதம் மம…பே… ஆபோதா⁴தும் ஏதம் மம… தேஜோதா⁴தும் ஏதம் மம… வாயோதா⁴தும் ஏதம் மம… ஆகாஸதா⁴தும் ஏதம் மம… விஞ்ஞாணதா⁴தும் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². பத²வீகஸிணம் ஏதம் மம…பே… ஆபோகஸிணம்… தேஜோகஸிணம்… வாயோகஸிணம் … நீலகஸிணம்… பீதகஸிணம்… லோஹிதகஸிணம்… ஓதா³தகஸிணம்… ஆகாஸகஸிணம்… விஞ்ஞாணகஸிணம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

கேஸம் ஏதம் மம…பே… லோமம் ஏதம் மம… நக²ம் ஏதம் மம… த³ந்தம் ஏதம் மம… தசம் ஏதம் மம… மம்ஸம் ஏதம் மம… ந்ஹாரும் ஏதம் மம… அட்டி²ம் ஏதம் மம… அட்டி²மிஞ்ஜம் ஏதம் மம… வக்கம் ஏதம் மம… ஹத³யம் ஏதம் மம… யகனம் ஏதம் மம… கிலோமகம் ஏதம் மம… பிஹகம் ஏதம் மம… பப்பா²ஸம் ஏதம் மம… அந்தம் ஏதம் மம… அந்தகு³ணம் ஏதம் மம… உத³ரியம் ஏதம் மம… கரீஸம் ஏதம் மம… பித்தம் ஏதம் மம… ஸேம்ஹம் ஏதம் மம… புப்³ப³ம் ஏதம் மம … லோஹிதம் ஏதம் மம… ஸேத³ம் ஏதம் மம… மேத³ம் ஏதம் மம… அஸ்ஸும் ஏதம் மம… வஸம் ஏதம் மம … கே²ளம் ஏதம் மம… ஸிங்கா⁴ணிகம் ஏதம் மம… லஸிகம் ஏதம் மம… முத்தம் ஏதம் மம… மத்த²லுங்க³ம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

சக்கா²யதனம் ஏதம் மம…பே… ரூபாயதனம் ஏதம் மம… ஸோதாயதனம் ஏதம் மம… ஸத்³தா³யதனம் ஏதம் மம… கா⁴னாயதனம் ஏதம் மம… க³ந்தா⁴யதனம் ஏதம் மம… ஜிவ்ஹாயதனம் ஏதம் மம… ரஸாயதனம் ஏதம் மம… காயாயதனம் ஏதம் மம… போ²ட்ட²ப்³பா³யதனம் ஏதம் மம… மனாயதனம் ஏதம் மம… த⁴ம்மாயதனம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

சக்கு²தா⁴தும் ஏதம் மம…பே… ரூபதா⁴தும் ஏதம் மம… சக்கு²விஞ்ஞாணதா⁴தும் ஏதம் மம… ஸோததா⁴தும் ஏதம் மம… ஸத்³த³தா⁴தும் ஏதம் மம… ஸோதவிஞ்ஞாணதா⁴தும் ஏதம் மம… கா⁴னதா⁴தும் ஏதம் மம… க³ந்த⁴தா⁴தும் ஏதம் மம… கா⁴னவிஞ்ஞாணதா⁴தும் ஏதம் மம… ஜிவ்ஹாதா⁴தும் ஏதம் மம… ரஸதா⁴தும் ஏதம் மம… ஜிவ்ஹாவிஞ்ஞாணதா⁴தும் ஏதம் மம… காயதா⁴தும் ஏதம் மம… போ²ட்ட²ப்³ப³தா⁴தும் ஏதம் மம… காயவிஞ்ஞாணதா⁴தும் ஏதம் மம… மனோதா⁴தும் ஏதம் மம… த⁴ம்மதா⁴தும் ஏதம் மம… மனோவிஞ்ஞாணதா⁴தும் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

சக்கு²ந்த்³ரியம் ஏதம் மம…பே… ஸோதிந்த்³ரியம் ஏதம் மம… கா⁴னிந்த்³ரியம் ஏதம் மம… ஜிவ்ஹிந்த்³ரியம் ஏதம் மம… காயிந்த்³ரியம் ஏதம் மம… மனிந்த்³ரியம் ஏதம் மம… ஜீவிதிந்த்³ரியம் ஏதம் மம… இத்தி²ந்த்³ரியம் ஏதம் மம… புரிஸிந்த்³ரியம் ஏதம் மம… ஸுகி²ந்த்³ரியம் ஏதம் மம… து³க்கி²ந்த்³ரியம் ஏதம் மம… ஸோமனஸ்ஸிந்த்³ரியம் ஏதம் மம… தோ³மனஸ்ஸிந்த்³ரியம் ஏதம் மம… உபேக்கி²ந்த்³ரியம் ஏதம் மம… ஸத்³தி⁴ந்த்³ரியம் ஏதம் மம… வீரியிந்த்³ரியம் ஏதம் மம… ஸதிந்த்³ரியம் ஏதம் மம… ஸமாதி⁴ந்த்³ரியம் ஏதம் மம… பஞ்ஞிந்த்³ரியம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

காமதா⁴தும் ஏதம் மம…பே… ரூபதா⁴தும் ஏதம் மம… அரூபதா⁴தும் ஏதம் மம… காமப⁴வம் ஏதம் மம… ரூபப⁴வம் ஏதம் மம… அரூபப⁴வம் ஏதம் மம… ஸஞ்ஞாப⁴வம் ஏதம் மம… அஸஞ்ஞாப⁴வம் ஏதம் மம… நேவஸஞ்ஞானாஸஞ்ஞாப⁴வம் ஏதம் மம… ஏகவோகாரப⁴வம் ஏதம் மம… சதுவோகாரப⁴வம் ஏதம் மம… பஞ்சவோகாரப⁴வம் ஏதம் மம… பட²மஜ்ஜா²னம் ஏதம் மம… து³தியஜ்ஜா²னம் ஏதம் மம… ததியஜ்ஜா²னம் ஏதம் மம… சதுத்த²ஜ்ஜா²னம் ஏதம் மம… மேத்தம் சேதோவிமுத்திம் ஏதம் மம… கருணம் சேதோவிமுத்திம் ஏதம் மம… முதி³தம் சேதோவிமுத்திம் ஏதம் மம… உபேக்க²ம் சேதோவிமுத்திம் ஏதம் மம… ஆகாஸானஞ்சாயதனஸமாபத்திம் ஏதம் மம… விஞ்ஞாணஞ்சாயதனஸமாபத்திம் ஏதம் மம… ஆகிஞ்சஞ்ஞாயதனஸமாபத்திம் ஏதம் மம… நேவஸஞ்ஞானாஸஞ்ஞாயதனஸமாபத்திம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி².

அவிஜ்ஜம் ஏதம் மம…பே… ஸங்கா²ரே ஏதம் மம… விஞ்ஞாணம் ஏதம் மம… நாமரூபம் ஏதம் மம… ஸளாயதனம் ஏதம் மம… ப²ஸ்ஸம் ஏதம் மம… வேத³னம் ஏதம் மம… தண்ஹம் ஏதம் மம… உபாதா³னம் ஏதம் மம… ப⁴வம் ஏதம் மம … ஜாதிம் ஏதம் மம… ஜராமரணம் ஏதம் மம, ஏஸோஹமஸ்மி, ஏஸோ மே அத்தாதி – அபி⁴னிவேஸபராமாஸோ தி³ட்டி². ஏவம் அபி⁴னிவேஸபராமாஸோ தி³ட்டி².

124. கதமானி அட்ட² தி³ட்டி²ட்டா²னானி? க²ந்தா⁴பி தி³ட்டி²ட்டா²னம், அவிஜ்ஜாபி தி³ட்டி²ட்டா²னம், ப²ஸ்ஸோபி தி³ட்டி²ட்டா²னம், ஸஞ்ஞாபி தி³ட்டி²ட்டா²னம், விதக்கோபி [விதக்காபி (ஸ்யா.)] தி³ட்டி²ட்டா²னம், அயோனிஸோ மனஸிகாரோபி தி³ட்டி²ட்டா²னம், பாபமித்தோபி தி³ட்டி²ட்டா²னம், பரதோகோ⁴ஸோபி தி³ட்டி²ட்டா²னம்.

க²ந்தா⁴ ஹேது க²ந்தா⁴ பச்சயோ தி³ட்டி²ட்டா²னம் உபாதா³ய ஸமுட்டா²னட்டே²ன – ஏவம் க²ந்தா⁴பி தி³ட்டி²ட்டா²னம். அவிஜ்ஜா ஹேது அவிஜ்ஜா பச்சயோ தி³ட்டி²ட்டா²னம் உபாதா³ய ஸமுட்டா²னட்டே²ன – ஏவம் அவிஜ்ஜாபி தி³ட்டி²ட்டா²னம். ப²ஸ்ஸோ ஹேது ப²ஸ்ஸோ பச்சயோ தி³ட்டி²ட்டா²னம் உபாதா³ய ஸமுட்டா²னட்டே²ன – ஏவம் ப²ஸ்ஸோபி தி³ட்டி²ட்டா²னம். ஸஞ்ஞா ஹேது ஸஞ்ஞா பச்சயோ தி³ட்டி²ட்டா²னம் உபாதா³ய ஸமுட்டா²னட்டே²ன – ஏவம் ஸஞ்ஞாபி தி³ட்டி²ட்டா²னம். விதக்கோ ஹேது விதக்கோ பச்சயோ தி³ட்டி²ட்டா²னம் உபாதா³ய, ஸமுட்டா²னட்டே²ன – ஏவம் விதக்கோபி தி³ட்டி²ட்டா²னம். அயோனிஸோ மனஸிகாரோ ஹேது அயோனிஸோ மனஸிகாரோ பச்சயோ தி³ட்டி²ட்டா²னம் உபாதா³ய ஸமுட்டா²னட்டே²ன – ஏவம் அயோனிஸோ மனஸிகாரோபி தி³ட்டி²ட்டா²னம். பாபமித்தோ ஹேது பாபமித்தோ பச்சயோ தி³ட்டி²ட்டா²னம் உபாதா³ய, ஸமுட்டா²னட்டே²ன – ஏவம் பாபமித்தோபி தி³ட்டி²ட்டா²னம். பரதோகோ⁴ஸோ ஹேது பரதோகோ⁴ஸோ பச்சயோ தி³ட்டி²ட்டா²னம் உபாதா³ய ஸமுட்டா²னட்டே²ன – ஏவம் பரதோகோ⁴ஸோபி தி³ட்டி²ட்டா²னம். இமானி அட்ட² தி³ட்டி²ட்டா²னானி.

125. கதமானி அட்டா²ரஸ தி³ட்டி²பரியுட்டா²னானி? யா தி³ட்டி² தி³ட்டி²க³தம், தி³ட்டி²க³ஹனம், தி³ட்டி²கந்தாரம், தி³ட்டி²விஸூகம், தி³ட்டி²விப்ப²ந்தி³தம், தி³ட்டி²ஸஞ்ஞோஜனம், தி³ட்டி²ஸல்லம், தி³ட்டி²ஸம்பா³தோ⁴, தி³ட்டி²பலிபோ³தோ⁴, தி³ட்டி²ப³ந்த⁴னம், தி³ட்டி²பபாதோ, தி³ட்டா²னுஸயோ, தி³ட்டி²ஸந்தாபோ, தி³ட்டி²பரிளாஹோ, தி³ட்டி²க³ந்தோ², தி³ட்டு²பாதா³னம், தி³ட்டா²பி⁴னிவேஸோ, தி³ட்டி²பராமாஸோ – இமானி அட்டா²ரஸ தி³ட்டி²பரியுட்டா²னானி.

126. கதமா ஸோளஸ தி³ட்டி²யோ? அஸ்ஸாத³தி³ட்டி², அத்தானுதி³ட்டி², மிச்சா²தி³ட்டி², ஸக்காயதி³ட்டி², ஸக்காயவத்து²கா ஸஸ்ஸததி³ட்டி², ஸக்காயவத்து²கா உச்சே²த³தி³ட்டி², அந்தக்³கா³ஹிகாதி³ட்டி², புப்³ப³ந்தானுதி³ட்டி², அபரந்தானுதி³ட்டி², ஸஞ்ஞோஜனிகா தி³ட்டி², அஹந்தி மானவினிப³ந்தா⁴ தி³ட்டி², மமந்தி மானவினிப³ந்தா⁴ தி³ட்டி², அத்தவாத³படிஸம்யுத்தா தி³ட்டி², லோகவாத³படிஸம்யுத்தா தி³ட்டி², ப⁴வதி³ட்டி², விப⁴வதி³ட்டி² – இமா ஸோளஸ தி³ட்டி²யோ.

127. கதமே தீணி ஸதம் தி³ட்டா²பி⁴னிவேஸா? அஸ்ஸாத³தி³ட்டி²யா கதிஹாகாரேஹி அபி⁴னிவேஸோ ஹோதி? அத்தானுதி³ட்டி²யா கதிஹாகாரேஹி அபி⁴னிவேஸோ ஹோதி? மிச்சா²தி³ட்டி²யா கதிஹாகாரேஹி அபி⁴னிவேஸோ ஹோதி? ஸக்காயதி³ட்டி²யா கதிஹாகாரேஹி அபி⁴னிவேஸோ ஹோதி? ஸக்காயவத்து²காய ஸஸ்ஸததி³ட்டி²யா கதிஹாகாரேஹி அபி⁴னிவேஸோ ஹோதி? ஸக்காயவத்து²காய உச்சே²த³தி³ட்டி²யா கதிஹாகாரேஹி அபி⁴னிவேஸோ ஹோதி? அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி? புப்³ப³ந்தானுதி³ட்டி²யா கதிஹாகாரேஹி அபி⁴னிவேஸோ ஹோதி? அபரந்தானுதி³ட்டி²யா கதிஹாகாரேஹி அபி⁴னிவேஸோ ஹோதி? ஸஞ்ஞோஜனிகாய தி³ட்டி²யா கதிஹாகாரேஹி அபி⁴னிவேஸோ ஹோதி? அஹந்தி மானவினிப³ந்தா⁴ய தி³ட்டி²யா கதிஹாகாரேஹி அபி⁴னிவேஸோ ஹோதி? மமந்தி மானவினிப³ந்தா⁴ய தி³ட்டி²யா கதிஹாகாரேஹி அபி⁴னிவேஸோ ஹோதி? அத்தவாத³படிஸம்யுத்தாய தி³ட்டி²யா கதிஹாகாரேஹி அபி⁴னிவேஸோ ஹோதி? லோகவாத³படிஸம்யுத்தாய தி³ட்டி²யா கதிஹாகாரேஹி அபி⁴னிவேஸோ ஹோதி? ப⁴வதி³ட்டி²யா கதிஹாகாரேஹி அபி⁴னிவேஸோ ஹோதி? விப⁴வதி³ட்டி²யா கதிஹாகாரேஹி அபி⁴னிவேஸோ ஹோதி?

அஸ்ஸாத³தி³ட்டி²யா பஞ்சதிம்ஸாய ஆகாரேஹி அபி⁴னிவேஸோ ஹோதி. அத்தானுதி³ட்டி²யா வீஸதியா ஆகாரேஹி அபி⁴னிவேஸோ ஹோதி. மிச்சா²தி³ட்டி²யா த³ஸஹாகாரேஹி அபி⁴னிவேஸோ ஹோதி. ஸக்காயதி³ட்டி²யா வீஸதியா ஆகாரேஹி அபி⁴னிவேஸோ ஹோதி. ஸக்காயவத்து²காய ஸஸ்ஸததி³ட்டி²யா பன்னரஸஹி ஆகாரேஹி அபி⁴னிவேஸோ ஹோதி. ஸக்காயவத்து²காய உச்சே²த³தி³ட்டி²யா பஞ்சஹாகாரேஹி அபி⁴னிவேஸோ ஹோதி. அந்தக்³கா³ஹிகாய தி³ட்டி²யா பஞ்ஞாஸாய ஆகாரேஹி அபி⁴னிவேஸோ ஹோதி. புப்³ப³ந்தானுதி³ட்டி²யா அட்டா²ரஸஹி ஆகாரேஹி அபி⁴னிவேஸோ ஹோதி. அபரந்தானுதி³ட்டி²யா சதுசத்தாலீஸாய ஆகாரேஹி அபி⁴னிவேஸோ ஹோதி. ஸஞ்ஞோஜனிகாய தி³ட்டி²யா அட்டா²ரஸஹி ஆகாரேஹி அபி⁴னிவேஸோ ஹோதி. அஹந்தி மானவினிப³ந்தா⁴ய தி³ட்டி²யா அட்டா²ரஸஹி ஆகாரேஹி அபி⁴னிவேஸோ ஹோதி. மமந்தி மானவினிப³ந்தா⁴ய தி³ட்டி²யா அட்டா²ரஸஹி ஆகாரேஹி அபி⁴னிவேஸோ ஹோதி. அத்தவாத³படிஸம்யுத்தாய தி³ட்டி²யா வீஸதியா ஆகாரேஹி அபி⁴னிவேஸோ ஹோதி. லோகவாத³படிஸம்யுத்தாய தி³ட்டி²யா அட்ட²ஹி ஆகாரேஹி அபி⁴னிவேஸோ ஹோதி. ப⁴வதி³ட்டி²யா ஏகேன ஆகாரேன [ஏகூனவீஸதியா ஆகாரேன (ஸ்யா.)] அபி⁴னிவேஸோ ஹோதி. விப⁴வதி³ட்டி²யா ஏகேன ஆகாரேன அபி⁴னிவேஸோ ஹோதி.

1. அஸ்ஸாத³தி³ட்டி²னித்³தே³ஸோ

128. அஸ்ஸாத³தி³ட்டி²யா கதமேஹி பஞ்சதிம்ஸாய ஆகாரேஹி அபி⁴னிவேஸோ ஹோதி? யம் ரூபம் படிச்ச உப்பஜ்ஜதி ஸுக²ம் ஸோமனஸ்ஸம், அயம் ரூபஸ்ஸ அஸ்ஸாதோ³தி – அபி⁴னிவேஸபராமாஸோ தி³ட்டி². தி³ட்டி² ந அஸ்ஸாதோ³, அஸ்ஸாதோ³ ந தி³ட்டி². அஞ்ஞா தி³ட்டி², அஞ்ஞோ அஸ்ஸாதோ³. யா ச தி³ட்டி² யோ ச அஸ்ஸாதோ³ – அயம் வுச்சதி அஸ்ஸாத³தி³ட்டி².

அஸ்ஸாத³தி³ட்டி² மிச்சா²தி³ட்டி² தி³ட்டி²விபத்தி. தாய தி³ட்டி²விபத்தியா ஸமன்னாக³தோ புக்³க³லோ தி³ட்டி²விபன்னோ. தி³ட்டி²விபன்னோ புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தம் கிஸ்ஸ ஹேது? தி³ட்டி² ஹிஸ்ஸ பாபிகா. யோ தி³ட்டி²யா ராகோ³ [யா தி³ட்டி² யோ ராகோ³ (ஸ்யா.)], ஸோ ந தி³ட்டி². தி³ட்டி² ந ராகோ³. அஞ்ஞா தி³ட்டி², அஞ்ஞோ ராகோ³. யா ச தி³ட்டி² யோ ச ராகோ³ – அயம் வுச்சதி தி³ட்டி²ராகோ³. தாய ச தி³ட்டி²யா தேன ச ராகே³ன ஸமன்னாக³தோ புக்³க³லோ தி³ட்டி²ராக³ரத்தோ. தி³ட்டி²ராக³ரத்தே புக்³க³லே தி³ன்னம் தா³னம் ந மஹப்ப²லம் ஹோதி ந மஹானிஸம்ஸம். தம் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².

மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ – நிரயோ வா திரச்சா²னயோனி வா. மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மம் யதா²தி³ட்டி² ஸமத்தம் ஸமாதி³ன்னம், யஞ்ச வசீகம்மம்…பே… யஞ்ச மனோகம்மம் யதா²தி³ட்டி² ஸமத்தம் ஸமாதி³ன்னம், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸம்வத்தந்தி. தம் கிஸ்ஸ ஹேது? தி³ட்டி² ஹிஸ்ஸ பாபிகா. ஸேய்யதா²பி நிம்ப³பீ³ஜம் வா கோஸாதகீபீ³ஜம் வா தித்தகாலாபு³பீ³ஜம் வா அல்லாய பத²வியா நிக்கி²த்தம் யம் சேவ பத²விரஸம் உபாதி³யதி, யஞ்ச ஆபோரஸம் உபாதி³யதி, ஸப்³ப³ம் தம் தித்தகத்தாய கடுகத்தாய அஸாதத்தாய [அஸாரதாய (ஸ்யா.)] ஸம்வத்ததி. தம் கிஸ்ஸ ஹேது? பீ³ஜம் ஹிஸ்ஸ பாபிகம். ஏவமேவம் மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மம் யதா²தி³ட்டி² ஸமத்தம் ஸமாதி³ன்னம், யஞ்ச வசீகம்மம்…பே… யஞ்ச மனோகம்மம் யதா²தி³ட்டி² ஸமத்தம் ஸமாதி³ன்னம், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸம்வத்தந்தி. தம் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².

மிச்சா²தி³ட்டி² தி³ட்டி²க³தம், தி³ட்டி²க³ஹனம், தி³ட்டி²கந்தாரம், தி³ட்டி²விஸூகம், தி³ட்டி²விப்ப²ந்தி³தம், தி³ட்டி²ஸஞ்ஞோஜனம், தி³ட்டி²ஸல்லம், தி³ட்டி²ஸம்பா³தோ⁴, தி³ட்டி²பலிபோ³தோ⁴, தி³ட்டி²ப³ந்த⁴னம், தி³ட்டி²பபாதோ, தி³ட்டா²னுஸயோ, தி³ட்டி²ஸந்தாபோ, தி³ட்டி²பரிளாஹோ, தி³ட்டி²க³ந்தோ², தி³ட்டு²பாதா³னம், தி³ட்டா²பி⁴னிவேஸோ, தி³ட்டி²பராமாஸோ – இமேஹி அட்டா²ரஸஹி ஆகாரேஹி பரியுட்டி²தசித்தஸ்ஸ ஸஞ்ஞோகோ³.

129. அத்தி² ஸஞ்ஞோஜனானி சேவ தி³ட்டி²யோ ச, அத்தி² ஸஞ்ஞோஜனானி ந ச தி³ட்டி²யோ. கதமானி ஸஞ்ஞோஜனானி சேவ தி³ட்டி²யோ ச? ஸக்காயதி³ட்டி², ஸீலப்³ப³தபராமாஸோ – இமானி ஸஞ்ஞோஜனானி சேவ தி³ட்டி²யோ ச. கதமானி ஸஞ்ஞோஜனானி, ந ச தி³ட்டி²யோ? காமராக³ஸஞ்ஞோஜனம், படிக⁴ஸஞ்ஞோஜனம், மானஸஞ்ஞோஜனம், விசிகிச்சா²ஸஞ்ஞோஜனம், ப⁴வராக³ஸஞ்ஞோஜனம், இஸ்ஸாஸஞ்ஞோஜனம், மச்ச²ரியஸஞ்ஞோஜனம், அனுனயஸஞ்ஞோஜனம், அவிஜ்ஜாஸஞ்ஞோஜனம் – இமானி ஸஞ்ஞோஜனானி, ந ச தி³ட்டி²யோ.

யம் வேத³னம் படிச்ச…பே… யம் ஸஞ்ஞம் படிச்ச…பே… யம் ஸங்கா²ரே [யே ஸங்கா²ரே (க.) ஸம். நி. 3.28 பஸ்ஸிதப்³பா³] படிச்ச…பே… யம் விஞ்ஞாணம் படிச்ச… யம் சக்கு²ம் படிச்ச… யம் ஸோதம் படிச்ச… யம் கா⁴னம் படிச்ச… யம் ஜிவ்ஹம் படிச்ச… யம் காயம் படிச்ச… யம் மனம் படிச்ச… யம் ரூபே படிச்ச… யம் ஸத்³தே³ படிச்ச… யம் க³ந்தே⁴ படிச்ச … யம் ரஸே படிச்ச… யம் போ²ட்ட²ப்³பே³ படிச்ச… யம் த⁴ம்மே படிச்ச… யம் சக்கு²விஞ்ஞாணம் படிச்ச… யம் ஸோதவிஞ்ஞாணம் படிச்ச… யம் கா⁴னவிஞ்ஞாணம் படிச்ச… யம் ஜிவ்ஹாவிஞ்ஞாணம் படிச்ச… யம் காயவிஞ்ஞாணம் படிச்ச… யம் மனோவிஞ்ஞாணம் படிச்ச … யம் சக்கு²ஸம்ப²ஸ்ஸம் படிச்ச… யம் ஸோதஸம்ப²ஸ்ஸம் படிச்ச… யம் கா⁴னஸம்ப²ஸ்ஸம் படிச்ச… யம் ஜிவ்ஹாஸம்ப²ஸ்ஸம் படிச்ச… யம் காயஸம்ப²ஸ்ஸம் படிச்ச… யம் மனோஸம்ப²ஸ்ஸம் படிச்ச… யம் சக்கு²ஸம்ப²ஸ்ஸஜம் வேத³னம் படிச்ச… யம் ஸோதஸம்ப²ஸ்ஸஜம் வேத³னம் படிச்ச… யம் கா⁴னஸம்ப²ஸ்ஸஜம் வேத³னம் படிச்ச… யம் ஜிவ்ஹாஸம்ப²ஸ்ஸஜம் வேத³னம் படிச்ச… யம் காயஸம்ப²ஸ்ஸஜம் வேத³னம் படிச்ச… யம் மனோஸம்ப²ஸ்ஸஜம் வேத³னம் படிச்ச உப்பஜ்ஜதி ஸுக²ம் ஸோமனஸ்ஸம், அயம் மனோஸம்ப²ஸ்ஸஜாய வேத³னாய அஸ்ஸாதோ³தி – அபி⁴னிவேஸபராமாஸோ தி³ட்டி². தி³ட்டி² ந அஸ்ஸாதோ³, அஸ்ஸாதோ³ ந தி³ட்டி². அஞ்ஞா தி³ட்டி², அஞ்ஞோ அஸ்ஸாதோ³. யா ச தி³ட்டி² யோ ச அஸ்ஸாதோ³ – அயம் வுச்சதி அஸ்ஸாத³தி³ட்டி².

அஸ்ஸாத³தி³ட்டி² மிச்சா²தி³ட்டி² தி³ட்டி²விபத்தி. தாய தி³ட்டி²விபத்தியா ஸமன்னாக³தோ புக்³க³லோ தி³ட்டி²விபன்னோ. தி³ட்டி²விபன்னோ புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தம் கிஸ்ஸ ஹேது? தி³ட்டி² ஹிஸ்ஸ பாபிகா. யோ தி³ட்டி²யா ராகோ³, ஸோ ந தி³ட்டி². தி³ட்டி² ந ராகோ³. அஞ்ஞா தி³ட்டி², அஞ்ஞோ ராகோ³. யா ச தி³ட்டி² யோ ச ராகோ³, அயம் வுச்சதி தி³ட்டி²ராகோ³. தாய ச தி³ட்டி²யா தேன ச ராகே³ன ஸமன்னாக³தோ புக்³க³லோ தி³ட்டி²ராக³ரத்தோ. தி³ட்டி²ராக³ரத்தே புக்³க³லே தி³ன்னம் தா³னம் ந மஹப்ப²லம் ஹோதி ந மஹானிஸம்ஸம். தம் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².

மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ – நிரயோ வா திரச்சா²னயோனி வா. மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மம் யதா²தி³ட்டி² ஸமத்தம் ஸமாதி³ன்னம், யஞ்ச வசீகம்மம்…பே… யஞ்ச மனோகம்மம் யதா²தி³ட்டி² ஸமத்தம் ஸமாதி³ன்னம், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸம்வத்தந்தி. தம் கிஸ்ஸ ஹேது? தி³ட்டி² ஹிஸ்ஸ பாபிகா. ஸேய்யதா²பி நிம்ப³பீ³ஜம் வா கோஸாதகீபீ³ஜம் வா தித்தகாலாபு³பீ³ஜம் வா அல்லாய பத²வியா நிக்கி²த்தம் யஞ்சேவ பத²விரஸம் உபாதி³யதி யஞ்ச ஆபோரஸம் உபாதி³யதி, ஸப்³ப³ம் தம் தித்தகத்தாய கடுகத்தாய அஸாதத்தாய ஸம்வத்ததி. தம் கிஸ்ஸ ஹேது? பீ³ஜம் ஹிஸ்ஸ பாபிகம். ஏவமேவம் மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மம் யதா²தி³ட்டி² ஸமத்தம் ஸமாதி³ன்னம் யஞ்ச வசீகம்மம்…பே… யஞ்ச மனோகம்மம் யதா²தி³ட்டி² ஸமத்தம் ஸமாதி³ன்னம், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸம்வத்தந்தி. தம் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².

மிச்சா²தி³ட்டி² தி³ட்டி²க³தம் தி³ட்டி²க³ஹனம்…பே… தி³ட்டா²பி⁴னிவேஸோ தி³ட்டி²பராமாஸோ – இமேஹி அட்டா²ரஸஹி ஆகாரேஹி பரியுட்டி²தசித்தஸ்ஸ ஸஞ்ஞோகோ³.

அத்தி² ஸஞ்ஞோஜனானி சேவ தி³ட்டி²யோ ச, அத்தி² ஸஞ்ஞோஜனானி ந ச தி³ட்டி²யோ. கதமானி ஸஞ்ஞோஜனானி சேவ தி³ட்டி²யோ ச? ஸக்காயதி³ட்டி², ஸீலப்³ப³தபராமாஸோ – இமானி ஸஞ்ஞோஜனானி சேவ தி³ட்டி²யோ ச. கதமானி ஸஞ்ஞோஜனானி, ந ச தி³ட்டி²யோ? காமராக³ஸஞ்ஞோஜனம், படிக⁴ஸஞ்ஞோஜனம், மானஸஞ்ஞோஜனம், விசிகிச்சா²ஸஞ்ஞோஜனம், ப⁴வராக³ஸஞ்ஞோஜனம், இஸ்ஸாஸஞ்ஞோஜனம், மச்ச²ரியஸஞ்ஞோஜனம், அனுனயஸஞ்ஞோஜனம், அவிஜ்ஜாஸஞ்ஞோஜனம் – இமானி ஸஞ்ஞோஜனானி, ந ச தி³ட்டி²யோ. அஸ்ஸாத³தி³ட்டி²யா இமேஹி பஞ்சதிம்ஸாய ஆகாரேஹி அபி⁴னிவேஸோ ஹோதி.

அஸ்ஸாத³தி³ட்டி²னித்³தே³ஸோ பட²மோ.

2. அத்தானுதி³ட்டி²னித்³தே³ஸோ

130. அத்தானுதி³ட்டி²யா கதமேஹி வீஸதியா ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி ரூபவந்தம் வா அத்தானம் அத்தனி வா ரூபம் ரூபஸ்மிம் வா அத்தானம்; வேத³னம்…பே… ஸஞ்ஞம்…பே… ஸங்கா²ரே…பே… விஞ்ஞாணம் அத்ததோ ஸமனுபஸ்ஸதி விஞ்ஞாணவந்தம் வா அத்தானம் அத்தனி வா விஞ்ஞாணம் விஞ்ஞாணஸ்மிம் வா அத்தானம்.

131. கத²ம் ரூபம் அத்ததோ ஸமனுபஸ்ஸதி? இதே⁴கச்சோ பத²வீகஸிணம் அத்ததோ ஸமனுபஸ்ஸதி – ‘‘யம் பத²வீகஸிணம், ஸோ அஹம்; யோ அஹம், தம் பத²வீகஸிண’’ந்தி. பத²வீகஸிணஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவம் இதே⁴கச்சோ பத²வீகஸிணம் அத்ததோ ஸமனுபஸ்ஸதி – ‘‘யம் பத²வீகஸிணம், ஸோ அஹம்; யோ அஹம், தம் பத²வீகஸிண’’ந்தி. பத²வீகஸிணஞ்ச அத்தஞ்ச அத்³வயம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… அத்தானுதி³ட்டி² மிச்சா²தி³ட்டி². மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ…பே… இமானி ஸஞ்ஞோஜனானி, ந ச தி³ட்டி²யோ.

இதே⁴கச்சோ ஆபோகஸிணம்… தேஜோகஸிணம்… வாயோகஸிணம்… நீலகஸிணம்… பீதகஸிணம்… லோஹிதகஸிணம்… ஓதா³தகஸிணம் அத்ததோ ஸமனுபஸ்ஸதி – ‘‘யம் ஓதா³தகஸிணம், ஸோ அஹம்; யோ அஹம், தம் ஓதா³தகஸிண’’ந்தி. ஓதா³தகஸிணஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி, ஸோ வண்ணோ; யோ வண்ணோ, ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவ இதே⁴கச்சோ…பே… ஓதா³தகஸிணஞ்ச அத்தஞ்ச அத்³வயம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபம் அத்ததோ ஸமனுபஸ்ஸதி.

கத²ம் ரூபவந்தம் அத்தானம் ஸமனுபஸ்ஸதி? இதே⁴கச்சோ வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமினா ரூபேன ரூபவா’’தி. ரூபவந்தம் அத்தானம் ஸமனுபஸ்ஸதி. ஸேய்யதா²பி ருக்கோ² சா²யாஸம்பன்னோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் ருக்கோ², அயம் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயம் ருக்கோ² இமாய சா²யாய சா²யாவா’’தி. சா²யாவந்தம் ருக்க²ம் ஸமனுபஸ்ஸதி. ஏவமேவம் இதே⁴கச்சோ வேத³னம்…பே… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன அயம் அத்தா இமினா ரூபேன ரூபவா’’தி. ரூபவந்தம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் து³தியா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபவந்தம் அத்தானம் ஸமனுபஸ்ஸதி.

கத²ம் அத்தனி ரூபம் ஸமனுபஸ்ஸதி? இதே⁴கச்சோ வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி இத³ம் ரூப’’ந்தி. அத்தனி ரூபம் ஸமனுபஸ்ஸதி. ஸேய்யதா²பி புப்ப²ம் க³ந்த⁴ஸம்பன்னம் அஸ்ஸ. தமேனம் புரிஸோ ஏவம் வதே³ய்ய – ‘‘இத³ம் புப்ப²ம், அயம் க³ந்தோ⁴; அஞ்ஞம் புப்ப²ம், அஞ்ஞோ க³ந்தோ⁴. ஸோ கோ² பனாயம் க³ந்தோ⁴ இமஸ்மிம் புப்பே²’’தி. புப்ப²ஸ்மிம் க³ந்த⁴ம் ஸமனுபஸ்ஸதி. ஏவமேவம் இதே⁴கச்சோ வேத³னம்…பே… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி இத³ம் ரூப’’ந்தி. அத்தனி ரூபம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் ததியா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் அத்தனி ரூபம் ஸமனுபஸ்ஸதி.

கத²ம் ரூபஸ்மிம் அத்தானம் ஸமனுபஸ்ஸதி? இதே⁴கச்சோ வேத³னம்…பே… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமஸ்மிம் ரூபே’’தி. ரூபஸ்மிம் அத்தானம் ஸமனுபஸ்ஸதி. ஸேய்யதா²பி மணி கரண்ட³கே பக்கி²த்தோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் மணி, அயம் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயம் மணி இமஸ்மிம் கரண்ட³கே’’தி. கரண்ட³கஸ்மிம் மணிம் ஸமனுபஸ்ஸதி. ஏவமேவம் இதே⁴கச்சோ வேத³னம்…பே… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமஸ்மிம் ரூபே’’தி. ரூபஸ்மிம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் சதுத்தா² ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபஸ்மிம் அத்தானம் ஸமனுபஸ்ஸதி.

132. கத²ம் வேத³னம் அத்ததோ ஸமனுபஸ்ஸதி? இதே⁴கச்சோ சக்கு²ஸம்ப²ஸ்ஸஜம் வேத³னம் ஸோதஸம்ப²ஸ்ஸஜம் வேத³னம் கா⁴னஸம்ப²ஸ்ஸஜம் வேத³னம் ஜிவ்ஹாஸம்ப²ஸ்ஸஜம் வேத³னம் காயஸம்ப²ஸ்ஸஜம் வேத³னம் மனோஸம்ப²ஸ்ஸஜம் வேத³னம் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா வேத³னா ஸோ அஹம், யோ அஹம் ஸா மனோஸம்ப²ஸ்ஸஜா வேத³னா’’தி – மனோஸம்ப²ஸ்ஸஜம் வேத³னஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவம் இதே⁴கச்சோ மனோஸம்ப²ஸ்ஸஜம் வேத³னம் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா வேத³னா ஸோ அஹம், யோ அஹம் ஸா மனோஸம்ப²ஸ்ஸஜா வேத³னா’’தி – மனோஸம்ப²ஸ்ஸஜம் வேத³னஞ்ச அத்தஞ்ச அத்³வயம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் வேத³னம் அத்ததோ ஸமனுபஸ்ஸதி.

கத²ம் வேத³னாவந்தம் அத்தானம் ஸமனுபஸ்ஸதி? இதே⁴கச்சோ ஸஞ்ஞம்…பே… ஸங்கா²ரே… விஞ்ஞாணம்… ரூபம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய வேத³னாய வேத³னாவா’’தி. வேத³னாவந்தம் அத்தானம் ஸமனுபஸ்ஸதி. ஸேய்யதா²பி ருக்கோ² சா²யாஸம்பன்னோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் ருக்கோ², அயம் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயம் ருக்கோ² இமாய சா²யாய சா²யாவா’’தி. சா²யாவந்தம் ருக்க²ம் ஸமனுபஸ்ஸதி. ஏவமேவம் இதே⁴கச்சோ ஸஞ்ஞம்…பே… ஸங்கா²ரே… விஞ்ஞாணம்… ரூபம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய வேத³னாய வேத³னாவா’’தி. வேத³னாவந்தம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் து³தியா வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் வேத³னாவந்தம் அத்தானம் ஸமனுபஸ்ஸதி.

கத²ம் அத்தனி வேத³னம் ஸமனுபஸ்ஸதி? இதே⁴கச்சோ ஸஞ்ஞம்…பே… ஸங்கா²ரே… விஞ்ஞாணம்… ரூபம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி அயம் வேத³னா’’தி. அத்தனி வேத³னம் ஸமனுபஸ்ஸதி. ஸேய்யதா²பி புப்ப²ம் க³ந்த⁴ஸம்பன்னம் அஸ்ஸ. தமேனம் புரிஸோ ஏவம் வதே³ய்ய – ‘‘இத³ம் புப்ப²ம், அயம் க³ந்தோ⁴; அஞ்ஞம் புப்ப²ம், அஞ்ஞோ க³ந்தோ⁴. ஸோ கோ² பனாயம் க³ந்தோ⁴ இமஸ்மிம் புப்பே²’’தி. புப்ப²ஸ்மிம் க³ந்த⁴ம் ஸமனுபஸ்ஸதி. ஏவமேவம் இதே⁴கச்சோ ஸஞ்ஞம்…பே… ஸங்கா²ரே… விஞ்ஞாணம்… ரூபம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி அயம் வேத³னா’’தி. அத்தனி வேத³னம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் ததியா வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் அத்தனி வேத³னம் ஸமனுபஸ்ஸதி.

கத²ம் வேத³னாய அத்தானம் ஸமனுபஸ்ஸதி? இதே⁴கச்சோ ஸஞ்ஞம்…பே… ஸங்கா²ரே… விஞ்ஞாணம்… ரூபம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய வேத³னாயா’’தி. வேத³னாய அத்தானம் ஸமனுபஸ்ஸதி. ஸேய்யதா²பி மணி கரண்ட³கே பக்கி²த்தோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் மணி, அயம் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயம் மணி இமஸ்மிம் கரண்ட³கே’’தி. கரண்ட³கஸ்மிம் மணிம் ஸமனுபஸ்ஸதி. ஏவமேவம் இதே⁴கச்சோ ஸஞ்ஞம்… ஸங்கா²ரே… விஞ்ஞாணம்… ரூபம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய வேத³னாயா’’தி. வேத³னாய அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் சதுத்தா² வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் வேத³னாய அத்தானம் ஸமனுபஸ்ஸதி.

133. கத²ம் ஸஞ்ஞம் அத்ததோ ஸமனுபஸ்ஸதி? இதே⁴கச்சோ சக்கு²ஸம்ப²ஸ்ஸஜம் ஸஞ்ஞம்…பே… ஸோதஸம்ப²ஸ்ஸஜம் ஸஞ்ஞம்… கா⁴னஸம்ப²ஸ்ஸஜம் ஸஞ்ஞம்… ஜிவ்ஹாஸம்ப²ஸ்ஸஜம் ஸஞ்ஞம்… காயஸம்ப²ஸ்ஸஜம் ஸஞ்ஞம்… மனோஸம்ப²ஸ்ஸஜம் ஸஞ்ஞம் அத்ததோ ஸமனுபஸ்ஸதி. யா மனோஸம்ப²ஸ்ஸஜா ஸஞ்ஞா ஸோ அஹம், யோ அஹம் ஸா மனோஸம்ப²ஸ்ஸஜா ஸஞ்ஞா’’தி. மனோஸம்ப²ஸ்ஸஜம் ஸஞ்ஞஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவம் இதே⁴கச்சோ மனோஸம்ப²ஸ்ஸஜம் ஸஞ்ஞம் அத்ததோ ஸமனுபஸ்ஸதி – ‘‘யா மனோஸம்ப²ஸ்ஸஜா ஸஞ்ஞா ஸோ அஹம், யோ அஹம் ஸா மனோஸம்ப²ஸ்ஸஜா ஸஞ்ஞா’’தி. மனோஸம்ப²ஸ்ஸஜம் ஸஞ்ஞஞ்ச அத்தஞ்ச அத்³வயம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ஏவம் ஸஞ்ஞம் அத்ததோ ஸமனுபஸ்ஸதி.

கத²ம் ஸஞ்ஞாவந்தம் அத்தானம் ஸமனுபஸ்ஸதி? இதே⁴கச்சோ ஸங்கா²ரே…பே… விஞ்ஞாணம்… ரூபம்… வேத³னம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய ஸஞ்ஞாய ஸஞ்ஞாவா’’தி. ஸஞ்ஞாவந்தம் அத்தானம் ஸமனுபஸ்ஸதி. ஸேய்யதா²பி ருக்கோ² சா²யாஸம்பன்னோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் ருக்கோ², அயம் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயம் ருக்கோ² இமாய சா²யாய சா²யாவா’’தி. சா²யாவந்தம் ருக்க²ம் ஸமனுபஸ்ஸதி. ஏவமேவம் இதே⁴கச்சோ ஸங்கா²ரே… விஞ்ஞாணம்… ரூபம்… வேத³னம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய ஸஞ்ஞாய ஸஞ்ஞாவா’’தி. ஸஞ்ஞாவந்தம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் து³தியா ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ஸஞ்ஞாவந்தம் அத்தானம் ஸமனுபஸ்ஸதி.

கத²ம் அத்தனி ஸஞ்ஞம் ஸமனுபஸ்ஸதி? இதே⁴கச்சோ ஸங்கா²ரே…பே… விஞ்ஞாணம்… ரூபம்… வேத³னம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி அயம் ஸஞ்ஞா’’தி. அத்தனி ஸஞ்ஞம் ஸமனுபஸ்ஸதி. ஸேய்யதா²பி புப்ப²ம் க³ந்த⁴ஸம்பன்னம் அஸ்ஸ. தமேனம் புரிஸோ ஏவம் வதே³ய்ய – ‘‘இத³ம் புப்ப²ம், அயம் க³ந்தோ⁴. அஞ்ஞம் புப்ப²ம், அஞ்ஞோ க³ந்தோ⁴. ஸோ கோ² பனாயம் க³ந்தோ⁴ இமஸ்மிம் புப்பே²’’தி. புப்ப²ஸ்மிம் க³ந்த⁴ம் ஸமனுபஸ்ஸதி. ஏவமேவம் இதே⁴கச்சோ ஸங்கா²ரே… விஞ்ஞாணம்… ரூபம்… வேத³னம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி அயம் ஸஞ்ஞா’’தி. அத்தனி ஸஞ்ஞம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் ததியா ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் அத்தனி ஸஞ்ஞம் ஸமனுபஸ்ஸதி.

கத²ம் ஸஞ்ஞாய அத்தானம் ஸமனுபஸ்ஸதி? இதே⁴கச்சோ ஸங்கா²ரே …பே… விஞ்ஞாணம்… ரூபம்… வேத³னம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய ஸஞ்ஞாயா’’தி. ஸஞ்ஞாய அத்தானம் ஸமனுபஸ்ஸதி. ஸேய்யதா²பி மணி கரண்ட³கே பக்கி²த்தோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் மணி, அயம் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயம் மணி இமஸ்மிம் கரண்ட³கே’’தி. கரண்ட³கஸ்மிம் மணிம் ஸமனுபஸ்ஸதி. ஏவமேவ இதே⁴கச்சோ ஸங்கா²ரே… விஞ்ஞாணம்… ரூபம்… வேத³னம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமாய ஸஞ்ஞாயா’’தி. ஸஞ்ஞாய அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் சதுத்தா² ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி ந ச தி³ட்டி²யோ. ஏவம் ஸஞ்ஞாய அத்தானம் ஸமனுபஸ்ஸதி.

134. கத²ம் ஸங்கா²ரே அத்ததோ ஸமனுபஸ்ஸதி? இதே⁴கச்சோ சக்கு²ஸம்ப²ஸ்ஸஜம் சேதனம் ஸோதஸம்ப²ஸ்ஸஜம் சேதனம் கா⁴னஸம்ப²ஸ்ஸஜம் சேதனம் ஜிவ்ஹாஸம்ப²ஸ்ஸஜம் சேதனம் காயஸம்ப²ஸ்ஸஜம் சேதனம் மனோஸம்ப²ஸ்ஸஜம் சேதனம் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா சேதனா, ஸோ அஹம்; யோ அஹம் ஸா மனோஸம்ப²ஸ்ஸஜா சேதனா’’தி – மனோஸம்ப²ஸ்ஸஜம் சேதனஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவம் இதே⁴கச்சோ மனோஸம்ப²ஸ்ஸஜம் சேதனம் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா சேதனா ஸோ அஹம், யோ அஹம் ஸா மனோஸம்ப²ஸ்ஸஜா சேதனா’’தி – மனோஸம்ப²ஸ்ஸஜம் சேதனஞ்ச அத்தஞ்ச அத்³வயம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ஸங்கா²ரே அத்ததோ ஸமனுபஸ்ஸதி.

கத²ம் ஸங்கா²ரவந்தம் அத்தானம் ஸமனுபஸ்ஸதி? இதே⁴கச்சோ விஞ்ஞாணம்… ரூபம்… வேத³னம்… ஸஞ்ஞம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமேஹி ஸங்கா²ரேஹி ஸங்கா²ரவா’’தி. ஸங்கா²ரவந்தம் அத்தானம் ஸமனுபஸ்ஸதி. ஸேய்யதா²பி ருக்கோ² சா²யாஸம்பன்னோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் ருக்கோ², அயம் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயம் ருக்கோ² இமாய சா²யாய சா²யாவா’’தி. சா²யாவந்தம் ருக்க²ம் ஸமனுபஸ்ஸதி. ஏவமேவ இதே⁴கச்சோ விஞ்ஞாணம்… ரூபம்… வேத³னம்… ஸஞ்ஞம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா. இமேஹி ஸங்கா²ரேஹி ஸங்கா²ரவா’’தி. ஸங்கா²ரவந்தம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் து³தியா ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ஸங்கா²ரவந்தம் அத்தானம் ஸமனுபஸ்ஸதி.

கத²ம் அத்தனி ஸங்கா²ரே ஸமனுபஸ்ஸதி? இதே⁴கச்சோ விஞ்ஞாணம்… ரூபம்… வேத³னம்… ஸஞ்ஞம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி இமே ஸங்கா²ரா’’தி. அத்தனி ஸங்கா²ரே ஸமனுபஸ்ஸதி. ஸேய்யதா²பி புப்ப²ம் க³ந்த⁴ஸம்பன்னம் அஸ்ஸ. தமேனம் புரிஸோ ஏவம் வதே³ய்ய – ‘‘இத³ம் புப்ப²ம், அயம் க³ந்தோ⁴; அஞ்ஞம் புப்ப²ம், அஞ்ஞோ க³ந்தோ⁴. ஸோ கோ² பனாயம் க³ந்தோ⁴ இமஸ்மிம் புப்பே²’’தி. புப்ப²ஸ்மிம் க³ந்த⁴ம் ஸமனுபஸ்ஸதி. ஏவமேவம் இதே⁴கச்சோ விஞ்ஞாணம்… ரூபம்… வேத³னம்… ஸஞ்ஞம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி இமே ஸங்கா²ரா’’தி. அத்தனி ஸங்கா²ரே ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் ததியா ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் அத்தனி ஸங்கா²ரே ஸமனுபஸ்ஸதி.

கத²ம் ஸங்கா²ரேஸு அத்தானம் ஸமனுபஸ்ஸதி? இதே⁴கச்சோ விஞ்ஞாணம்… ரூபம்… வேத³னம்… ஸஞ்ஞம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமேஸு ஸங்கா²ரேஸூ’’தி. ஸங்கா²ரேஸு அத்தானம் ஸமனுபஸ்ஸதி. ஸேய்யதா²பி மணி கரண்ட³கே பக்கி²த்தோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் மணி, அயம் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயம் மணி இமஸ்மிம் கரண்ட³கே’’தி. கரண்ட³கஸ்மிம் மணிம் ஸமனுபஸ்ஸதி. ஏவமேவ இதே⁴கச்சோ விஞ்ஞாணம்… ரூபம்… வேத³னம்… ஸஞ்ஞம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமேஸு ஸங்கா²ரேஸூ’’தி. ஸங்கா²ரேஸு அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் சதுத்தா² ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ஸங்கா²ரேஸு அத்தானம் ஸமனுபஸ்ஸதி.

135. கத²ம் விஞ்ஞாணம் அத்ததோ ஸமனுபஸ்ஸதி? இதே⁴கச்சோ சக்கு²விஞ்ஞாணம்… ஸோதவிஞ்ஞாணம்… கா⁴னவிஞ்ஞாணம்… ஜிவ்ஹாவிஞ்ஞாணம் காயவிஞ்ஞாணம்… மனோவிஞ்ஞாணம் அத்ததோ ஸமனுபஸ்ஸதி. ‘‘யம் மனோவிஞ்ஞாணம், ஸோ அஹம்; யோ அஹம், தம் மனோவிஞ்ஞாண’’ந்தி – மனோவிஞ்ஞாணஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவம் இதே⁴கச்சோ மனோவிஞ்ஞாணம் அத்ததோ ஸமனுபஸ்ஸதி. ‘‘யம் மனோவிஞ்ஞாணம், ஸோ அஹம்; யோ அஹம் தம் மனோவிஞ்ஞாண’’ந்தி – மனோவிஞ்ஞாணஞ்ச அத்தஞ்ச அத்³வயம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் விஞ்ஞாணம் அத்ததோ ஸமனுபஸ்ஸதி.

கத²ம் விஞ்ஞாணவந்தம் அத்தானம் ஸமனுபஸ்ஸதி? இதே⁴கச்சோ ரூபம்… வேத³னம்… ஸஞ்ஞம்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமினா விஞ்ஞாணேன விஞ்ஞாணவா’’தி. விஞ்ஞாணவந்தம் அத்தானம் ஸமனுபஸ்ஸதி. ஸேய்யதா²பி ருக்கோ² சா²யாஸம்பன்னோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் ருக்கோ², அயம் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயம் ருக்கோ² இமாய சா²யாய சா²யாவா’’தி. சா²யாவந்தம் ருக்க²ம் ஸமனுபஸ்ஸதி. ஏவமேவம் இதே⁴கச்சோ ரூபம்… வேத³னம்… ஸஞ்ஞம்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமினா விஞ்ஞாணேன விஞ்ஞாணவா’’தி. விஞ்ஞாணவந்தம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் து³தியா விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் விஞ்ஞாணவந்தம் அத்தானம் ஸமனுபஸ்ஸதி.

கத²ம் அத்தனி விஞ்ஞாணம் ஸமனுபஸ்ஸதி? இதே⁴கச்சோ ரூபம்… வேத³னம்… ஸஞ்ஞம்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி இத³ம் விஞ்ஞாண’’ந்தி. அத்தனி விஞ்ஞாணம் ஸமனுபஸ்ஸதி. ஸேய்யதா²பி புப்ப²ம் க³ந்த⁴ஸம்பன்னம் அஸ்ஸ. தமேனம் புரிஸோ ஏவம் வதே³ய்ய – ‘‘இத³ம் புப்ப²ம், அயம் க³ந்தோ⁴; அஞ்ஞம் புப்ப²ம், அஞ்ஞோ க³ந்தோ⁴. ஸோ கோ² பனாயம் க³ந்தோ⁴ இமஸ்மிம் புப்பே²’’தி. புப்ப²ஸ்மிம் க³ந்த⁴ம் ஸமனுபஸ்ஸதி. ஏவமேவம் இதே⁴கச்சோ ரூபம்… வேத³னம்… ஸஞ்ஞம்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. இமஸ்மிஞ்ச பன அத்தனி இத³ம் விஞ்ஞாண’’ந்தி. அத்தனி விஞ்ஞாணம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் ததியா விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் அத்தனி விஞ்ஞாணம் ஸமனுபஸ்ஸதி.

கத²ம் விஞ்ஞாணஸ்மிம் அத்தானம் ஸமனுபஸ்ஸதி? இதே⁴கச்சோ ரூபம்… வேத³னம்… ஸஞ்ஞம்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமஸ்மிம் விஞ்ஞாணே’’தி. விஞ்ஞாணஸ்மிம் அத்தானம் ஸமனுபஸ்ஸதி. ஸேய்யதா²பி மணி கரண்ட³கே பக்கி²த்தோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் மணி, அயம் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயம் மணி இமஸ்மிம் கரண்ட³கே’’தி. கரண்ட³கஸ்மிம் மணிம் ஸமனுபஸ்ஸதி. ஏவமேவம் இதே⁴கச்சோ ரூபம்… வேத³னம்… ஸஞ்ஞம்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமஸ்மிம் விஞ்ஞாணே’’தி. விஞ்ஞாணஸ்மிம் அத்தானம் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் சதுத்தா² விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் விஞ்ஞாணஸ்மிம் அத்தானம் ஸமனுபஸ்ஸதி. அத்தானுதி³ட்டி²யா இமேஹி வீஸதியா ஆகாரேஹி அபி⁴னிவேஸோ ஹோதி.

அத்தானுதி³ட்டி²னித்³தே³ஸோ து³தியோ.

3. மிச்சா²தி³ட்டி²னித்³தே³ஸோ

136. மிச்சா²தி³ட்டி²யா கதமேஹி த³ஸஹாகாரேஹி அபி⁴னிவேஸோ ஹோதி? ‘‘நத்தி² தி³ன்ன’’ந்தி – வத்து² [வத்து²ம் (ஸ்யா.) ஏவமுபரிபி]. ஏவம்வாதோ³ மிச்சா²பி⁴னிவேஸபராமாஸோ [மிச்சா²தி³ட்டா²பி⁴னிவேஸபராமாஸோ (ஸ்யா.)] தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா மிச்சா²வத்து²கா மிச்சா²தி³ட்டி². மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ. ‘‘நத்தி² யிட்ட²’’ந்தி – வத்து²…பே… ‘‘நத்தி² ஹுத’’ந்தி – வத்து²… ‘‘நத்தி² ஸுகதது³க்கடானம் கம்மானம் ப²லம் விபாகோ’’தி – வத்து²… ‘‘நத்தி² அயம் லோகோ’’தி – வத்து²… ‘‘நத்தி² பரோ லோகோ’’தி – வத்து²… ‘‘நத்தி² மாதா’’தி – வத்து²… ‘‘நத்தி² பிதா’’தி – வத்து²… ‘‘நத்தி² ஸத்தா ஓபபாதிகா’’தி – வத்து²… ‘‘நத்தி² லோகே ஸமணப்³ராஹ்மணா ஸம்மக்³க³தா [ஸமக்³க³தா (க.)] ஸம்மாபடிபன்னா, யே இமஞ்ச லோகம், பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’’தி – வத்து². ஏவம்வாதோ³ மிச்சா²பி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் த³ஸமா மிச்சா²வத்து²கா மிச்சா²தி³ட்டி². மிச்சா²தி³ட்டி² தி³ட்டி²விபத்தி…பே… மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ…பே… இமானி ஸஞ்ஞோஜனானி, ந ச தி³ட்டி²யோ. மிச்சா²தி³ட்டி²யா இமேஹி த³ஸஹாகாரேஹி அபி⁴னிவேஸோ ஹோதி.

மிச்சா²தி³ட்டி²னித்³தே³ஸோ ததியோ.

4. ஸக்காயதி³ட்டி²னித்³தே³ஸோ

137. ஸக்காயதி³ட்டி²யா கதமேஹி வீஸதியா ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி ரூபவந்தம் வா அத்தானம் அத்தனி வா ரூபம் ரூபஸ்மிம் வா அத்தானம். வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி விஞ்ஞாணவந்தம் வா அத்தானம் அத்தனி வா விஞ்ஞாணம் விஞ்ஞாணஸ்மிம் வா அத்தானம்.

கத²ம் ரூபம் அத்ததோ ஸமனுபஸ்ஸதி? இதே⁴கச்சோ பத²வீகஸிணம்…பே… ஓதா³தகஸிணம் அத்ததோ ஸமனுபஸ்ஸதி. ‘‘யம் ஓதா³தகஸிணம், ஸோ அஹம்; யோ அஹம், தம் ஓதா³தகஸிண’’ந்தி – ஓதா³தகஸிணஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ…பே… ஏவமேவம் இதே⁴கச்சோ ஓதா³தகஸிணம் அத்ததோ ஸமனுபஸ்ஸதி. அபி⁴னிவேஸபராமாஸோ தி³ட்டி²…பே… அயம் பட²மா ரூபவத்து²கா ஸக்காயதி³ட்டி². ஸக்காயதி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபம் அத்ததோ ஸமனுபஸ்ஸதி…பே… ஸக்காயதி³ட்டி²யா இமேஹி வீஸதியா ஆகாரேஹி அபி⁴னிவேஸோ ஹோதி.

ஸக்காயதி³ட்டி²னித்³தே³ஸோ சதுத்தோ².

5. ஸஸ்ஸததி³ட்டி²னித்³தே³ஸோ

138. ஸக்காயவத்து²காய ஸஸ்ஸததி³ட்டி²யா கதமேஹி பன்னரஸஹி ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபவந்தம் வா அத்தானம் அத்தனி வா ரூபம் ரூபஸ்மிம் வா அத்தானம். வேத³னாவந்தம் வா அத்தானம்…பே… ஸஞ்ஞாவந்தம் வா அத்தானம்… ஸங்கா²ரவந்தம் வா அத்தானம்… விஞ்ஞாணவந்தம் வா அத்தானம் அத்தனி வா விஞ்ஞாணம் விஞ்ஞாணஸ்மிம் வா அத்தானம்.

கத²ம் ரூபவந்தம் அத்தானம் ஸமனுபஸ்ஸதி? இதே⁴கச்சோ வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி. தஸ்ஸ ஏவம் ஹோதி – ‘‘அயம் கோ² மே அத்தா. ஸோ கோ² பன மே அயம் அத்தா இமினா ரூபேன ரூபவா’’தி. ரூபவந்தம் அத்தானம் ஸமனுபஸ்ஸதி. ஸேய்யதா²பி ருக்கோ² சா²யாஸம்பன்னோ அஸ்ஸ. தமேனம் புரிஸோ ஏவம் வதே³ய்ய – ‘‘அயம் ருக்கோ², அயம் சா²யா; அஞ்ஞோ ருக்கோ², அஞ்ஞா சா²யா. ஸோ கோ² பனாயம் ருக்கோ² இமாய சா²யாய சா²யாவா’’தி. சா²யாவந்தம் ருக்க²ம் ஸமனுபஸ்ஸதி. ஏவமேவம் இதே⁴கச்சோ வேத³னம்…பே… அயம் பட²மா ஸக்காயவத்து²கா ஸஸ்ஸததி³ட்டி². ஸஸ்ஸததி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபவந்தம் அத்தானம் ஸமனுபஸ்ஸதி…பே… ஸக்காயவத்து²காய ஸஸ்ஸததி³ட்டி²யா இமேஹி பன்னரஸஹி ஆகாரேஹி அபி⁴னிவேஸோ ஹோதி.

ஸஸ்ஸததி³ட்டி²னித்³தே³ஸோ பஞ்சமோ.

6. உச்சே²த³தி³ட்டி²னித்³தே³ஸோ

139. ஸக்காயவத்து²காய உச்சே²த³தி³ட்டி²யா கதமேஹி பஞ்சஹி ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி, வேத³னம் அத்ததோ ஸமனுபஸ்ஸதி, ஸஞ்ஞம் அத்ததோ ஸமனுபஸ்ஸதி, ஸங்கா²ரே அத்ததோ ஸமனுபஸ்ஸதி, விஞ்ஞாணம் அத்ததோ ஸமனுபஸ்ஸதி.

கத²ம் ரூபம் அத்ததோ ஸமனுபஸ்ஸதி? இதே⁴கச்சோ பத²வீகஸிணம்…பே… ஓதா³தகஸிணம் அத்ததோ ஸமனுபஸ்ஸதி. ‘‘யம் ஓதா³தகஸிணம், ஸோ அஹம்; யோ அஹம், தம் ஓதா³தகஸிண’’ந்தி – ஓதா³தகஸிணஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ…பே… அயம் பட²மா ஸக்காயவத்து²கா உச்சே²த³தி³ட்டி². உச்சே²த³தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபம் அத்ததோ ஸமனுபஸ்ஸதி…பே… ஸக்காயவத்து²காய உச்சே²த³தி³ட்டி²யா இமேஹி பஞ்சஹி ஆகாரேஹி அபி⁴னிவேஸோ ஹோதி.

உச்சே²த³தி³ட்டி²னித்³தே³ஸோ ச²ட்டோ².

7. அந்தக்³கா³ஹிகாதி³ட்டி²னித்³தே³ஸோ

140. அந்தக்³கா³ஹிகாய தி³ட்டி²யா கதமேஹி பஞ்ஞாஸாய ஆகாரேஹி அபி⁴னிவேஸோ ஹோதி? ‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி? ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி? ‘‘அந்தவா லோகோ’’தி – அந்தக்³கா³ஹிகாய தி³ட்டி²யா… ‘‘அனந்தவா லோகோ’’தி – அந்தக்³கா³ஹிகாய தி³ட்டி²யா… ‘‘தம் ஜீவம் தம் ஸரீர’’ந்தி – அந்தக்³கா³ஹிகாய தி³ட்டி²யா… ‘‘அஞ்ஞம் ஜீவம் அஞ்ஞம் ஸரீர’’ந்தி – அந்தக்³கா³ஹிகாய தி³ட்டி²யா… ‘‘ஹோதி ததா²க³தோ பரம் மரணா’’தி…பே… ந ஹோதி ததா²க³தோ பரம் மரணா’’தி… ‘‘ஹோதி ச ந ச ஹோதி ததா²க³தோ பரம் மரணா’’தி… ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி?

‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஹோதி…பே… ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஹோதி.

[க] ‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் லோகோ சேவ ஸஸ்ஸதம் சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘ஸஸ்ஸதோ லோகோ’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி² …பே… இமானி ஸஞ்ஞோஜனானி, ந ச தி³ட்டி²யோ.

வேத³னா லோகோ சேவ ஸஸ்ஸதா சாதி…பே… ஸஞ்ஞா லோகோ சேவ ஸஸ்ஸதா சாதி…பே… ஸங்கா²ரா லோகோ சேவ ஸஸ்ஸதா சாதி…பே… விஞ்ஞாணம் லோகோ சேவ ஸஸ்ஸதஞ்சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பஞ்சமீ ஸஸ்ஸதோ லோகோதி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[க²] ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் லோகோ சேவ அஸஸ்ஸதஞ்சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… அயம் பட²மா ‘‘அஸஸ்ஸதோ லோகோ’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி² தி³ட்டி²விபத்தி…பே… இமானி ஸஞ்ஞோஜனானி, ந ச தி³ட்டி²யோ.

வேத³னா லோகோ சேவ அஸஸ்ஸதா சாதி…பே… ஸஞ்ஞா லோகோ சேவ அஸஸ்ஸதா சாதி…பே… ஸங்கா²ரா லோகோ சேவ அஸஸ்ஸதா சாதி…பே… விஞ்ஞாணம் லோகோ சேவ அஸஸ்ஸதஞ்சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[க³] ‘‘அந்தவா லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? இதே⁴கச்சோ பரித்தம் ஓகாஸம் நீலகதோ ப²ரதி. தஸ்ஸ ஏவம் ஹோதி – ‘‘அந்தவா அயம் லோகோ பரிவடுமோ’’தி. அந்தஸஞ்ஞீ ஹோதி. யம் ப²ரதி, தம் வத்து² சேவ லோகோ ச. யேன ப²ரதி, ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘அந்தவா லோகோ’’தி அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

இதே⁴கச்சோ பரித்தம் ஓகாஸம் பீதகதோ ப²ரதி… லோஹிதகதோ ப²ரதி… ஓதா³தகதோ ப²ரதி… ஓபா⁴ஸகதோ ப²ரதி. தஸ்ஸ ஏவம் ஹோதி – ‘‘அந்தவா அயம் லோகோ பரிவடுமோ’’தி. அந்தஸஞ்ஞீ ஹோதி. யம் ப²ரதி தம் வத்து² சேவ லோகோ ச. யேன ப²ரதி ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… அந்தவா லோகோதி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[க⁴] ‘‘அனந்தவா லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? இதே⁴கச்சோ விபுலம் ஓகாஸம் நீலகதோ ப²ரதி. தஸ்ஸ ஏவம் ஹோதி – ‘‘அனந்தவா அயம் லோகோ அபரியந்தோ’’தி. அனந்தஸஞ்ஞீ ஹோதி. யம் ப²ரதி தம் வத்து² சேவ லோகோ ச; யேன ப²ரதி ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘அனந்தவா லோகோ’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

இதே⁴கச்சோ விபுலம் ஓகாஸம் பீதகதோ ப²ரதி… லோஹிதகதோ ப²ரதி… ஓதா³தகதோ ப²ரதி… ஓபா⁴ஸகதோ ப²ரதி. தஸ்ஸ ஏவம் ஹோதி – ‘‘அனந்தவா அயம் லோகோ அபரியந்தோ’’தி. அனந்தஸஞ்ஞீ ஹோதி. யம் ப²ரதி தம் வத்து² சேவ லோகோ ச; யேன ப²ரதி ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… அனந்தவா லோகோதி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[ங] ‘‘தம் ஜீவம் தம் ஸரீர’’ந்தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் ஜீவஞ்சேவ ஸரீரஞ்ச; யம் ஜீவம் தம் ஸரீரம், யம் ஸரீரம் தம் ஜீவந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘தம் ஜீவம் தம் ஸரீர’’ந்தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

வேத³னா ஜீவா சேவ ஸரீரம் ச… ஸஞ்ஞா ஜீவா சேவ ஸரீரம் ச… ஸங்கா²ரா ஜீவா சேவ ஸரீரம் ச… விஞ்ஞாணம் ஜீவஞ்சேவ ஸரீரஞ்ச; யம் ஜீவம் தம் ஸரீரம், யம் ஸரீரம் தம் ஜீவந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… ‘‘தம் ஜீவம் தம் ஸரீர’’ந்தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[ச] ‘‘அஞ்ஞம் ஜீவம் அஞ்ஞம் ஸரீர’’ந்தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் ஸரீரம், ந ஜீவம்; ஜீவம் ந ஸரீரம். அஞ்ஞம் ஜீவம் அஞ்ஞம் ஸரீரந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘அஞ்ஞம் ஜீவம் அஞ்ஞம் ஸரீர’’ந்தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

வேத³னா ஸரீரம், ந ஜீவம்… ஸஞ்ஞா ஸரீரம், ந ஜீவம்… ஸங்கா²ரா ஸரீரம், ந ஜீவம்… விஞ்ஞாணம் ஸரீரம், ந ஜீவம்; ஜீவம் ந ஸரீரம். அஞ்ஞம் ஜீவம், அஞ்ஞம் ஸரீரந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… அஞ்ஞம் ஜீவம், அஞ்ஞம் ஸரீரந்தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[ச²] ‘‘ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் இதே⁴வ மரணத⁴ம்மம். ததா²க³தோ காயஸ்ஸ பே⁴தா³ ஹோதிபி திட்ட²திபி உப்பஜ்ஜதிபி நிப்³ப³த்ததிபீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘ஹோதி ததா²க³தோ பரம் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

வேத³னா இதே⁴வ மரணத⁴ம்மா…பே… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணம் இதே⁴வ மரணத⁴ம்மம். ததா²க³தோ காயஸ்ஸ பே⁴தா³ ஹோதிபி திட்ட²திபி உப்பஜ்ஜதிபி நிப்³ப³த்ததிபீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… ‘‘ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[ஜ] ‘‘ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் இதே⁴வ மரணத⁴ம்மம். ததா²க³தோபி காயஸ்ஸ பே⁴தா³ உச்சி²ஜ்ஜதி வினஸ்ஸதி; ந ஹோதி ததா²க³தோ பரம் மரணாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘ந ஹோதி ததா²க³தோ பரம் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

வேத³னா இதே⁴வ மரணத⁴ம்மா…பே… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணம் இதே⁴வ மரணத⁴ம்மம். ததா²க³தோபி காயஸ்ஸ பே⁴தா³ உச்சி²ஜ்ஜதி வினஸ்ஸதி. ‘‘ந ஹோதி ததா²க³தோ பரம் மரணா’’தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… ‘‘ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[ஜ²] ‘‘ஹோதி ச ந ச ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் இதே⁴வ மரணத⁴ம்மம். ததா²க³தோ காயஸ்ஸ பே⁴தா³ ஹோதி ச ந ச ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘ஹோதி ச ந ச ஹோதி ததா²க³தோ பரம் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி ந ச தி³ட்டி²யோ.

வேத³னா இதே⁴வ மரணத⁴ம்மா…பே… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணம் இதே⁴வ மரணத⁴ம்மம். ததா²க³தோ காயஸ்ஸ பே⁴தா³ ஹோதி ச ந ச ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே… ‘‘ஹோதி ச ந ச ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.

[ஞ] ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபம் இதே⁴வ மரணத⁴ம்மம். ததா²க³தோ காயஸ்ஸ பே⁴தா³ பரம் மரணா நேவ ஹோதி ந ந ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி², அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

வேத³னா இதே⁴வ மரணத⁴ம்மா…பே… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணம் இதே⁴வ மரணத⁴ம்மம். ததா²க³தோ காயஸ்ஸ பே⁴தா³ பரம் மரணா நேவ ஹோதி ந ந ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பஞ்சமீ ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி. அந்தக்³கா³ஹிகாய தி³ட்டி²யா இமேஹி பஞ்ஞாஸாய ஆகாரேஹி அபி⁴னிவேஸோ ஹோதி.

அந்தக்³கா³ஹிகாதி³ட்டி²னித்³தே³ஸோ ஸத்தமோ.

8. புப்³ப³ந்தானுதி³ட்டி²னித்³தே³ஸோ

141. புப்³ப³ந்தானுதி³ட்டி²யா கதமேஹி அட்டா²ரஸஹி ஆகாரேஹி அபி⁴னிவேஸோ ஹோதி? சத்தாரோ ஸஸ்ஸதவாதா³, சத்தாரோ ஏகச்சஸஸ்ஸதிகா, சத்தாரோ அந்தானந்திகா, சத்தாரோ அமராவிக்கே²பிகா, த்³வே அதி⁴ச்சஸமுப்பன்னிகா – புப்³ப³ந்தானுதி³ட்டி²யா இமேஹி அட்டா²ரஸஹி ஆகாரேஹி அபி⁴னிவேஸோ ஹோதி.

புப்³ப³ந்தானுதி³ட்டி²னித்³தே³ஸோ அட்ட²மோ.

9. அபரந்தானுதி³ட்டி²னித்³தே³ஸோ

142. அபரந்தானுதி³ட்டி²யா கதமேஹி சதுசத்தாலீஸாய ஆகாரேஹி அபி⁴னிவேஸோ ஹோதி? ஸோளஸ ஸஞ்ஞீவாதா³, அட்ட² அஸஞ்ஞீவாதா³, அட்ட² நேவஸஞ்ஞீனாஸஞ்ஞீவாதா³, ஸத்த உச்சே²த³வாதா³, பஞ்ச தி³ட்ட²த⁴ம்மனிப்³பா³னவாதா³ – அபரந்தானுதி³ட்டி²யா இமேஹி சதுசத்தாலீஸாய ஆகாரேஹி அபி⁴னிவேஸோ ஹோதி.

அபரந்தானுதி³ட்டி²னித்³தே³ஸோ நவமோ.

10-12. ஸஞ்ஞோஜனிகாதி³தி³ட்டி²னித்³தே³ஸோ

143. ஸஞ்ஞோஜனிகாய தி³ட்டி²யா கதமேஹி அட்டா²ரஸஹி ஆகாரேஹி அபி⁴னிவேஸோ ஹோதி? யா தி³ட்டி² தி³ட்டி²க³தம் தி³ட்டி²க³ஹனம்…பே… தி³ட்டா²பி⁴னிவேஸோ தி³ட்டி²பராமாஸோ – ஸஞ்ஞோஜனிகாய தி³ட்டி²யா இமேஹி அட்டா²ரஸஹி ஆகாரேஹி அபி⁴னிவேஸோ ஹோதி.

144. ‘‘அஹ’’ந்தி – மானவினிப³ந்தா⁴ய தி³ட்டி²யா கதமேஹி அட்டா²ரஸஹி ஆகாரேஹி அபி⁴னிவேஸோ ஹோதி? சக்கு² அஹந்தி – அபி⁴னிவேஸபராமாஸோ. அஹந்தி – மானவினிப³ந்தா⁴ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘அஹ’’ந்தி – மானவினிப³ந்தா⁴ தி³ட்டி². மானவினிப³ந்தா⁴ தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

ஸோதம் அஹந்தி…பே… கா⁴னம் அஹந்தி…பே… ஜிவ்ஹா அஹந்தி…பே… காயோ அஹந்தி…பே… மனோ அஹந்தி…பே… ரூபா அஹந்தி…பே… த⁴ம்மா அஹந்தி… சக்கு²விஞ்ஞாணம் அஹந்தி…பே… மனோவிஞ்ஞாணம் அஹந்தி – அபி⁴னிவேஸபராமாஸோ. அஹந்தி – மானவினிப³ந்தா⁴ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் அட்டா²ரஸமீ ‘‘அஹ’’ந்தி – மானவினிப³ந்தா⁴ தி³ட்டி². மானவினிப³ந்தா⁴ தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ‘‘அஹ’’ந்தி – மானவினிப³ந்தா⁴ய தி³ட்டி²யா இமேஹி அட்டா²ரஸஹி ஆகாரேஹி அபி⁴னிவேஸோ ஹோதி.

145. ‘‘மம’’ந்தி – மானவினிப³ந்தா⁴ய தி³ட்டி²யா கதமேஹி அட்டா²ரஸஹி ஆகாரேஹி அபி⁴னிவேஸோ ஹோதி? சக்கு² மமந்தி – அபி⁴னிவேஸபராமாஸோ. மமந்தி – மானவினிப³ந்தா⁴ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா ‘‘மம’’ந்தி – மானவினிப³ந்தா⁴ தி³ட்டி². மானவினிப³ந்தா⁴ தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

ஸோதம் மமந்தி…பே… கா⁴னம் மமந்தி…பே… ஜிவ்ஹா மமந்தி…பே… காயோ மமந்தி…பே… மனோ மமந்தி…பே… ரூபா மமந்தி…பே… த⁴ம்மா மமந்தி…பே… சக்கு²விஞ்ஞாணம் மமந்தி…பே… மனோவிஞ்ஞாணம் மமந்தி அபி⁴னிவேஸபராமாஸோ. மமந்தி மானவினிப³ந்தா⁴ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் அட்டா²ரஸமீ ‘‘மம’’ந்தி – மானவினிப³ந்தா⁴ தி³ட்டி². மானவினிப³ந்தா⁴ தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ‘‘மம’’ந்தி – மானவினிப³ந்தா⁴ய தி³ட்டி²யா இமேஹி அட்டா²ரஸஹி ஆகாரேஹி அபி⁴னிவேஸோ ஹோதி.

ஸஞ்ஞோஜனிகாதி³தி³ட்டி²னித்³தே³ஸோ த்³வாத³ஸமோ.

13. அத்தவாத³படிஸம்யுத்ததி³ட்டி²னித்³தே³ஸோ

146. அத்தவாத³படிஸம்யுத்தாய தி³ட்டி²யா கதமேஹி வீஸதியா ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி ரூபவந்தம் வா அத்தானம் அத்தனி வா ரூபம் ரூபஸ்மிம் வா அத்தானம்…பே… வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி விஞ்ஞாணவந்தம் வா அத்தானம் அத்தனி வா விஞ்ஞாணம் விஞ்ஞாணஸ்மிம் வா அத்தானம்…பே….

கத²ம் ரூபம் அத்ததோ ஸமனுபஸ்ஸதி? இதே⁴கச்சோ பத²வீகஸிணம்…பே… ஓதா³தகஸிணம் அத்ததோ ஸமனுபஸ்ஸதி. ‘‘யம் ஓதா³தகஸிணம், ஸோ அஹம்; யோ அஹம், தம் ஓதா³தகஸிண’’ந்தி – ஓதா³தகஸிணஞ்ச அத்தஞ்ச அத்³வயம் ஸமனுபஸ்ஸதி. ஸேய்யதா²பி தேலப்பதீ³பஸ்ஸ ஜா²யதோ ‘‘யா அச்சி, ஸோ வண்ணோ; யோ வண்ணோ, ஸா அச்சீ’’தி – அச்சிஞ்ச வண்ணஞ்ச அத்³வயம் ஸமனுபஸ்ஸதி. ஏவமேவம் இதே⁴கச்சோ ஓதா³தகஸிணம் அத்ததோ ஸமனுபஸ்ஸதி…பே… அயம் பட²மா ரூபவத்து²கா அத்தவாத³படிஸம்யுத்தா தி³ட்டி². அத்தவாத³படிஸம்யுத்தா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ. ஏவம் ரூபம் அத்ததோ ஸமனுபஸ்ஸதி…பே… அத்தவாத³படிஸம்யுத்தாய தி³ட்டி²யா இமேஹி வீஸதியா ஆகாரேஹி அபி⁴னிவேஸோ ஹோதி.

அத்தவாத³படிஸம்யுத்ததி³ட்டி²னித்³தே³ஸோ தேரஸமோ.

14. லோகவாத³படிஸம்யுத்ததி³ட்டி²னித்³தே³ஸோ

147. லோகவாத³படிஸம்யுத்தாய தி³ட்டி²யா கதமேஹி அட்ட²ஹி ஆகாரேஹி அபி⁴னிவேஸோ ஹோதி? ஸஸ்ஸதோ அத்தா ச லோகோ சாதி – அபி⁴னிவேஸபராமாஸோ லோகவாத³படிஸம்யுத்தா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா, தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் பட²மா லோகவாத³படிஸம்யுத்தா தி³ட்டி². லோகவாத³படிஸம்யுத்தா தி³ட்டி² மிச்சா²தி³ட்டி²…பே… இமானி ஸஞ்ஞோஜனானி, ந ச தி³ட்டி²யோ.

அஸஸ்ஸதோ அத்தா ச லோகோ சாதி…பே… ஸஸ்ஸதோ ச அஸஸ்ஸதோ ச அத்தா ச லோகோ சாதி…பே… நேவ ஸஸ்ஸதோ நாஸஸ்ஸதோ அத்தா ச லோகோ சாதி… அந்தவா அத்தா ச லோகோ சாதி… அனந்தவா அத்தா ச லோகோ சாதி… அந்தவா ச அனந்தவா ச அத்தா ச லோகோ சாதி… நேவ அந்தவா ந அனந்தவா அத்தா ச லோகோ சாதி அபி⁴னிவேஸபராமாஸோ லோகவாத³படிஸம்யுத்தா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞம் வத்து². யா ச தி³ட்டி² யஞ்ச வத்து² – அயம் அட்ட²மீ லோகவாத³படிஸம்யுத்தா தி³ட்டி². லோகவாத³படிஸம்யுத்தா தி³ட்டி² மிச்சா²தி³ட்டி² …பே… இமானி ஸஞ்ஞோஜனானி, ந ச தி³ட்டி²யோ. லோகவாத³படிஸம்யுத்தாய தி³ட்டி²யா இமேஹி அட்ட²ஹி ஆகாரேஹி அபி⁴னிவேஸோ ஹோதி.

லோகவாத³படிஸம்யுத்ததி³ட்டி²னித்³தே³ஸோ சுத்³த³ஸமோ.

15-16. ப⁴வ-விப⁴வதி³ட்டி²னித்³தே³ஸோ

148. ஓலீயனாபி⁴னிவேஸோ ப⁴வதி³ட்டி². அதிதா⁴வனாபி⁴னிவேஸோ விப⁴வதி³ட்டி². அஸ்ஸாத³தி³ட்டி²யா பஞ்சதிம்ஸாய ஆகாரேஹி அபி⁴னிவேஸோ கதி ப⁴வதி³ட்டி²யோ, கதி விப⁴வதி³ட்டி²யோ? அத்தானுதி³ட்டி²யா வீஸதியா ஆகாரேஹி அபி⁴னிவேஸோ கதி ப⁴வதி³ட்டி²யோ கதி விப⁴வதி³ட்டி²யோ…பே… லோகவாத³படிஸம்யுத்தாய தி³ட்டி²யா அட்ட²ஹி ஆகாரேஹி அபி⁴னிவேஸோ கதி ப⁴வதி³ட்டி²யோ கதி விப⁴வதி³ட்டி²யோ?

அஸ்ஸாத³தி³ட்டி²யா பஞ்சதிம்ஸாய ஆகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ. அத்தானுதி³ட்டி²யா வீஸதியா ஆகாரேஹி அபி⁴னிவேஸோ பன்னரஸ ப⁴வதி³ட்டி²யோ, பஞ்ச விப⁴வதி³ட்டி²யோ. மிச்சா²தி³ட்டி²யா த³ஸஹி ஆகாரேஹி அபி⁴னிவேஸோ ஸப்³பா³வ தா விப⁴வதி³ட்டி²யோ. ஸக்காயதி³ட்டி²யா வீஸதியா ஆகாரேஹி அபி⁴னிவேஸோ பன்னரஸ ப⁴வதி³ட்டி²யோ, பஞ்ச விப⁴வதி³ட்டி²யோ. ஸக்காயவத்து²காய ஸஸ்ஸததி³ட்டி²யா பன்னரஸஹி ஆகாரேஹி அபி⁴னிவேஸோ ஸப்³பா³வ தா ப⁴வதி³ட்டி²யோ. ஸக்காயவத்து²காய உச்சே²த³தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா விப⁴வதி³ட்டி²யோ.

‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா ப⁴வதி³ட்டி²யோ. ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா விப⁴வதி³ட்டி²யோ. ‘‘அந்தவா லோகோ’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ. ‘‘அனந்தவா லோகோ’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ. ‘‘தம் ஜீவம் தம் ஸரீர’’ந்தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா விப⁴வதி³ட்டி²யோ. ‘‘அஞ்ஞம் ஜீவம் அஞ்ஞம் ஸரீர’’ந்தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா ப⁴வதி³ட்டி²யோ. ‘‘ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா ப⁴வதி³ட்டி²யோ. ‘‘ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸப்³பா³வ தா விப⁴வதி³ட்டி²யோ. ‘‘ஹோதி ச ந ச ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ ‘‘நேவ ஹோதி ந ந ஹோதி ததா²க³தோ பரம் மரணா’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ.

புப்³ப³ந்தானுதி³ட்டி²யா அட்டா²ரஸஹி ஆகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ. அபரந்தானுதி³ட்டி²யா சதுசத்தாரீஸாய ஆகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ. ஸஞ்ஞோஜனிகாய தி³ட்டி²யா அட்டா²ரஸஹி ஆகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ. அஹந்தி – மானவினிப³ந்தா⁴ய தி³ட்டி²யா அட்டா²ரஸஹி ஆகாரேஹி அபி⁴னிவேஸோ ஸப்³பா³வ தா விப⁴வதி³ட்டி²யோ. மமந்தி – மானவினிப³ந்தா⁴ய தி³ட்டி²யா அட்டா²ரஸஹி ஆகாரேஹி அபி⁴னிவேஸோ ஸப்³பா³வ தா ப⁴வதி³ட்டி²யோ. அத்தவாத³படிஸம்யுத்தாய தி³ட்டி²யா வீஸதியா ஆகாரேஹி அபி⁴னிவேஸோ பன்னரஸ ப⁴வதி³ட்டி²யோ, பஞ்ச விப⁴வதி³ட்டி²யோ. லோகவாத³படிஸம்யுத்தாய தி³ட்டி²யா அட்ட²ஹி ஆகாரேஹி அபி⁴னிவேஸோ ஸியா ப⁴வதி³ட்டி²யோ, ஸியா விப⁴வதி³ட்டி²யோ.

ஸப்³பா³வ தா தி³ட்டி²யோ அஸ்ஸாத³தி³ட்டி²யோ. ஸப்³பா³வ தா தி³ட்டி²யோ அத்தானுதி³ட்டி²யோ. ஸப்³பா³வ தா தி³ட்டி²யோ மிச்சா²தி³ட்டி²யோ. ஸப்³பா³வ தா தி³ட்டி²யோ ஸக்காயதி³ட்டி²யோ. ஸப்³பா³வ தா தி³ட்டி²யோ அந்தக்³கா³ஹிகா தி³ட்டி²யோ. ஸப்³பா³வ தா தி³ட்டி²யோ ஸஞ்ஞோஜனிகா தி³ட்டி²யோ. ஸப்³பா³வ தா தி³ட்டி²யோ அத்தவாத³படிஸம்யுத்தா தி³ட்டி²யோ.

ப⁴வஞ்ச தி³ட்டி²ம் விப⁴வஞ்ச தி³ட்டி²ம், ஏதம் த்³வயம் தக்கிகா நிஸ்ஸிதாஸே;

தேஸம் நிரோத⁴ம்ஹி ந ஹத்தி² ஞாணம், யத்தா²யம் லோகோ விபரீதஸஞ்ஞீதி.

149. ‘‘த்³வீஹி, பி⁴க்க²வே, தி³ட்டி²க³தேஹி பரியுட்டி²தா தே³வமனுஸ்ஸா ஓலீயந்தி [ஓலியந்தி (ஸ்யா. க.) இதிவு. 49 பஸ்ஸிதப்³பா³] ஏகே, அதிதா⁴வந்தி ஏகே; சக்கு²மந்தோ ச பஸ்ஸந்தி. கத²ஞ்ச, பி⁴க்க²வே, ஓலீயந்தி ஏகே? ப⁴வாராமா, பி⁴க்க²வே, தே³வமனுஸ்ஸா ப⁴வரதா ப⁴வஸம்முதி³தா. தேஸம் ப⁴வனிரோதா⁴ய த⁴ம்மே தே³ஸியமானே சித்தம் ந பக்க²ந்த³தி ந பஸீத³தி ந ஸந்திட்ட²தி நாதி⁴முச்சதி. ஏவம் கோ², பி⁴க்க²வே, ஓலீயந்தி ஏகே.

‘‘கத²ஞ்ச, பி⁴க்க²வே, அதிதா⁴வந்தி ஏகே? ப⁴வேனேவ கோ² பனேகே அட்டீயமானா [அட்டியமானா (ஸ்யா. க.) இதிவு. 49 பஸ்ஸிதப்³பா³] ஹராயமானா ஜிகு³ச்ச²மானா விப⁴வம் அபி⁴னந்த³ந்தி – ‘‘யதோ கிர, போ⁴, அயம் அத்தா காயஸ்ஸ பே⁴தா³ பரம் மரணா உச்சி²ஜ்ஜதி வினஸ்ஸதி ந ஹோதி பரம் மரணா, ஏதம் ஸந்தம் ஏதம் பணீதம் ஏதம் யாதா²வந்தி. ஏவம் கோ², பி⁴க்க²வே, அதிதா⁴வந்தி ஏகே.

‘‘கத²ஞ்ச, பி⁴க்க²வே, சக்கு²மந்தோ ச பஸ்ஸந்தி? இத⁴, பி⁴க்க²வே, பி⁴க்கு² பூ⁴தம் பூ⁴ததோ பஸ்ஸதி. பூ⁴தம் பூ⁴ததோ தி³ஸ்வா பூ⁴தஸ்ஸ நிப்³பி³தா³ய விராகா³ய நிரோதா⁴ய படிபன்னோ ஹோதி. ஏவம் கோ², பி⁴க்க²வே, சக்கு²மந்தோ ச பஸ்ஸந்தி.

‘‘யோ [அயம் கா³தா² இதிவு. 49 தி³ஸ்ஸதி] பூ⁴தம் பூ⁴ததோ தி³ஸ்வா, பூ⁴தஸ்ஸ ச அதிக்கமம்;

யதா²பூ⁴தேதி⁴முச்சதி, ப⁴வதண்ஹா பரிக்க²யா.

‘‘ஸ வே பூ⁴தபரிஞ்ஞாதோ, வீததண்ஹோ ப⁴வாப⁴வே;

பூ⁴தஸ்ஸ விப⁴வா பி⁴க்கு², நாக³ச்ச²தி புனப்³ப⁴வ’’ந்தி.

150. தயோ புக்³க³லா விபன்னதி³ட்டீ², தயோ புக்³க³லா ஸம்பன்னதி³ட்டீ². கதமே தயோ புக்³க³லா விபன்னதி³ட்டீ²? தித்தி²யோ ச, தித்தி²யஸாவகோ ச, யோ ச மிச்சா²தி³ட்டி²கோ – இமே தயோ புக்³க³லா விபன்னதி³ட்டீ².

கதமே தயோ புக்³க³லா ஸம்பன்னதி³ட்டீ²? ததா²க³தோ ச, ததா²க³தஸாவகோ ச, யோ ச ஸம்மாதி³ட்டி²கோ – இமே தயோ புக்³க³லா ஸம்பன்னதி³ட்டீ².

‘‘கோத⁴னோ உபனாஹீ ச, பாபமக்கீ² ச யோ நரோ;

விபன்னதி³ட்டி² மாயாவீ, தம் ஜஞ்ஞா வஸலோ இதி’’ [இமே (ஸ்யா.) ஸு. நி. 116 பஸ்ஸிதப்³பா³].

அக்கோத⁴னோ அனுபனாஹீ, விஸுத்³தோ⁴ [அமக்கீ² (ஸ்யா.) அட்ட²கதா² ஓலோகேதப்³பா³] ஸுத்³த⁴தம் க³தோ;

ஸம்பன்னதி³ட்டி² மேதா⁴வீ, தம் ஜஞ்ஞா அரியோ இதீதி.

திஸ்ஸோ விபன்னதி³ட்டி²யோ, திஸ்ஸோ ஸம்பன்னதி³ட்டி²யோ. கதமா திஸ்ஸோ விபன்னதி³ட்டி²யோ? ஏதம் மமாதி – விபன்னதி³ட்டி². ஏஸோஹமஸ்மீதி – விபன்னதி³ட்டி². ஏஸோ மே அத்தாதி – விபன்னதி³ட்டி². இமா திஸ்ஸோ விபன்னதி³ட்டி²யோ.

கதமா திஸ்ஸோ ஸம்பன்னதி³ட்டி²யோ? நேதம் மமாதி – ஸம்பன்னதி³ட்டி². நேஸோஹமஸ்மீதி – ஸம்பன்னதி³ட்டி². ந மேஸோ அத்தாதி – ஸம்பன்னதி³ட்டி². இமா திஸ்ஸோ ஸம்பன்னதி³ட்டி²யோ.

ஏதம் மமாதி – கா தி³ட்டி², கதி தி³ட்டி²யோ, கதமந்தானுக்³க³ஹிதா தா தி³ட்டி²யோ? ஏஸோஹமஸ்மீதி – கா தி³ட்டி², கதி தி³ட்டி²யோ, கதமந்தானுக்³க³ஹிதா தா தி³ட்டி²யோ? ஏஸோ மே அத்தாதி – கா தி³ட்டி², கதி தி³ட்டி²யோ, கதமந்தானுக்³க³ஹிதா தா தி³ட்டி²யோ?

ஏதம் மமாதி – புப்³ப³ந்தானுதி³ட்டி². அட்டா²ரஸ தி³ட்டி²யோ. புப்³ப³ந்தானுக்³க³ஹிதா தா தி³ட்டி²யோ. ஏஸோஹமஸ்மீதி – அபரந்தானுதி³ட்டி². சதுசத்தாரீஸம் தி³ட்டி²யோ. அபரந்தானுக்³க³ஹிதா தா தி³ட்டி²யோ. ஏஸோ மே அத்தாதி – வீஸதிவத்து²கா அத்தானுதி³ட்டி². வீஸதிவத்து²கா ஸக்காயதி³ட்டி². ஸக்காயதி³ட்டி²ப்பமுகா²னி [ஸக்காயதி³ட்டி²ப்பமுகே²ன (ஸ்யா.)] த்³வாஸட்டி² தி³ட்டி²க³தானி. புப்³ப³ந்தாபரந்தானுக்³க³ஹிதா தா தி³ட்டி²யோ.

151. ‘‘யே கேசி, பி⁴க்க²வே, மயி நிட்ட²ம் க³தா, ஸப்³பே³ தே தி³ட்டி²ஸம்பன்னா. தேஸம் தி³ட்டி²ஸம்பன்னானம் பஞ்சன்னம் இத⁴ நிட்டா², பஞ்சன்னம் இத⁴ விஹாய நிட்டா². கதமேஸம் பஞ்சன்னம் இத⁴ நிட்டா²? ஸத்தக்க²த்துபரமஸ்ஸ, கோலம்கோலஸ்ஸ, ஏகபீ³ஜிஸ்ஸ, ஸகதா³கா³மிஸ்ஸ, யோ ச தி³ட்டே²வ த⁴ம்மே அரஹா – இமேஸம் பஞ்சன்னம் இத⁴ நிட்டா².

‘‘கதமேஸம் பஞ்சன்னம் இத⁴ விஹாய நிட்டா²? அந்தராபரினிப்³பா³யிஸ்ஸ, உபஹச்சபரினிப்³பா³யிஸ்ஸ, அஸங்கா²ரபரினிப்³பா³யிஸ்ஸ, ஸஸங்கா²ரபரினிப்³பா³யிஸ்ஸ, உத்³த⁴ம்ஸோதஸ்ஸ, அகனிட்ட²கா³மினோ – இமேஸம் பஞ்சன்னம் இத⁴ விஹாய நிட்டா².

‘‘யே கேசி, பி⁴க்க²வே, மயி நிட்ட²ம் க³தா, ஸப்³பே³ தே தி³ட்டி²ஸம்பன்னா. தேஸம் தி³ட்டி²ஸம்பன்னானம் இமேஸம் பஞ்சன்னம் இத⁴ நிட்டா², இமேஸம் பஞ்சன்னம் இத⁴ விஹாய நிட்டா².

‘‘யே கேசி, பி⁴க்க²வே, மயி அவேச்சப்பஸன்னா, ஸப்³பே³ தே ஸோதாபன்னா. தேஸம் ஸோதாபன்னானம் பஞ்சன்னம் இத⁴ நிட்டா², பஞ்சன்னம் இத⁴ விஹாய நிட்டா². கதமேஸம் பஞ்சன்னம் இத⁴ நிட்டா²? ஸத்தக்க²த்துபரமஸ்ஸ, கோலம்கோலஸ்ஸ, ஏகபீ³ஜிஸ்ஸ, ஸகதா³கா³மிஸ்ஸ, யோ ச தி³ட்டே²வ த⁴ம்மே அரஹா – இமேஸம் பஞ்சன்னம் இத⁴ நிட்டா².

‘‘கதமேஸம் பஞ்சன்னம் இத⁴ விஹாய நிட்டா²? அந்தராபரினிப்³பா³யிஸ்ஸ, உபஹச்சபரினிப்³பா³யிஸ்ஸ, அஸங்கா²ரபரினிப்³பா³யிஸ்ஸ, ஸஸங்கா²ரபரினிப்³பா³யிஸ்ஸ, உத்³த⁴ம்ஸோதஸ்ஸ, அகனிட்ட²கா³மினோ – இமேஸம் பஞ்சன்னம் இத⁴ விஹாய நிட்டா².

‘‘யே கேசி, பி⁴க்க²வே, மயி அவேச்சப்பஸன்னா, ஸப்³பே³ தே ஸோதாபன்னா. தேஸம் ஸோதாபன்னானம் இமேஸம் பஞ்சன்னம் இத⁴ நிட்டா². இமேஸம் பஞ்சன்னம் இத⁴ விஹாய நிட்டா²தி’’.

ப⁴வவிப⁴வதி³ட்டி²னித்³தே³ஸோ ஸோளஸமோ.

தி³ட்டி²கதா² நிட்டி²தா.