70. யமகபாடிஹீரஞாணனித்³தே³ஸோ

116. கதமம் ததா²க³தஸ்ஸ யமகபாடிஹீரே ஞாணம்? இத⁴ ததா²க³தோ யமகபாடிஹீரம் கரோதி அஸாதா⁴ரணம் ஸாவகேஹி. உபரிமகாயதோ அக்³கி³க்க²ந்தோ⁴ பவத்ததி, ஹேட்டி²மகாயதோ உத³கதா⁴ரா பவத்ததி; ஹேட்டி²மகாயதோ அக்³கி³க்க²ந்தோ⁴ பவத்ததி, உபரிமகாயதோ உத³கதா⁴ரா பவத்ததி; புரத்தி²மகாயதோ அக்³கி³க்க²ந்தோ⁴ பவத்ததி, பச்சி²மகாயதோ உத³கதா⁴ரா பவத்ததி; பச்சி²மகாயதோ அக்³கி³க்க²ந்தோ⁴ பவத்ததி, புரத்தி²மகாயதோ உத³கதா⁴ரா பவத்ததி; த³க்கி²ணஅக்கி²தோ அக்³கி³க்க²ந்தோ⁴ பவத்ததி, வாமஅக்கி²தோ உத³கதா⁴ரா பவத்ததி; வாமஅக்கி²தோ அக்³கி³க்க²ந்தோ⁴ பவத்ததி, த³க்கி²ணஅக்கி²தோ உத³கதா⁴ரா பவத்ததி; த³க்கி²ணகண்ணஸோததோ அக்³கி³க்க²ந்தோ⁴ பவத்ததி, வாமகண்ணஸோததோ உத³கதா⁴ரா பவத்ததி; வாமகண்ணஸோததோ அக்³கி³க்க²ந்தோ⁴ பவத்ததி, த³க்கி²ணகண்ணஸோததோ உத³கதா⁴ரா பவத்ததி; த³க்கி²ணனாஸிகாஸோததோ அக்³கி³க்க²ந்தோ⁴ பவத்ததி, வாமனாஸிகாஸோததோ உத³கதா⁴ரா பவத்ததி; வாமனாஸிகாஸோததோ அக்³கி³க்க²ந்தோ⁴ பவத்ததி, த³க்கி²ணனாஸிகாஸோததோ உத³கதா⁴ரா பவத்ததி; த³க்கி²ணஅம்ஸகூடதோ அக்³கி³க்க²ந்தோ⁴ பவத்ததி, வாமஅம்ஸகூடதோ உத³கதா⁴ரா பவத்ததி; வாமஅம்ஸகூடதோ அக்³கி³க்க²ந்தோ⁴ பவத்ததி, த³க்கி²ணஅம்ஸகூடதோ உத³கதா⁴ரா பவத்ததி; த³க்கி²ணஹத்த²தோ அக்³கி³க்க²ந்தோ⁴ பவத்ததி, வாமஹத்த²தோ உத³கதா⁴ரா பவத்ததி; வாமஹத்த²தோ அக்³கி³க்க²ந்தோ⁴ பவத்ததி, த³க்கி²ணஹத்த²தோ உத³கதா⁴ரா பவத்ததி; த³க்கி²ணபஸ்ஸதோ அக்³கி³க்க²ந்தோ⁴ பவத்ததி, வாமபஸ்ஸதோ உத³கதா⁴ரா பவத்ததி; வாமபஸ்ஸதோ அக்³கி³க்க²ந்தோ⁴ பவத்ததி, த³க்கி²ணபஸ்ஸதோ உத³கதா⁴ரா பவத்ததி; த³க்கி²ணபாத³தோ அக்³கி³க்க²ந்தோ⁴ பவத்ததி, வாமபாத³தோ உத³கதா⁴ரா பவத்ததி; வாமபாத³தோ அக்³கி³க்க²ந்தோ⁴ பவத்ததி, த³க்கி²ணபாத³தோ உத³கதா⁴ரா பவத்ததி; அங்கு³லங்கு³லேஹி அக்³கி³க்க²ந்தோ⁴ பவத்ததி, அங்கு³லந்தரிகாஹி உத³கதா⁴ரா பவத்ததி; அங்கு³லந்தரிகாஹி அக்³கி³க்க²ந்தோ⁴ பவத்ததி, அங்கு³லங்கு³லேஹி உத³கதா⁴ரா பவத்ததி; ஏகேகலோமதோ அக்³கி³க்க²ந்தோ⁴ பவத்ததி, ஏகேகலோமதோ உத³கதா⁴ரா பவத்ததி; லோமகூபதோ லோமகூபதோ அக்³கி³க்க²ந்தோ⁴ பவத்ததி, லோமகூபதோ லோமகூபதோ உத³கதா⁴ரா பவத்ததி.

ச²ன்னம் வண்ணானம் – நீலானம், பீதகானம், லோஹிதகானம், ஓதா³தானம், மஞ்ஜிட்டா²னம் [மஞ்ஜேட்டா²னம் (ஸ்யா. க.)], பப⁴ஸ்ஸரானம் ப⁴க³வா சங்கமதி, நிம்மிதோ திட்ட²தி வா நிஸீத³தி வா ஸேய்யம் வா கப்பேதி. ப⁴க³வா திட்ட²தி, நிம்மிதோ சங்கமதி வா நிஸீத³தி வா ஸேய்யம் வா கப்பேதி. ப⁴க³வா நிஸீத³தி, நிம்மிதோ சங்கமதி வா திட்ட²தி வா ஸேய்யம் வா கப்பேதி. ப⁴க³வா ஸேய்யம் கப்பேதி, நிம்மிதோ சங்கமதி வா திட்ட²தி வா நிஸீத³தி வா. நிம்மிதோ சங்கமதி, ப⁴க³வா திட்ட²தி வா நிஸீத³தி வா ஸேய்யம் வா கப்பேதி. நிம்மிதோ திட்ட²தி, ப⁴க³வா சங்கமதி வா நிஸீத³தி வா ஸேய்யம் வா கப்பேதி. நிம்மிதோ நிஸீத³தி, ப⁴க³வா சங்கமதி வா திட்ட²தி வா ஸேய்யம் வா கப்பேதி. நிம்மிதோ ஸேய்யம் கப்பேதி, ப⁴க³வா சங்கமதி வா திட்ட²தி வா நிஸீத³தி வா. இத³ம் ததா²க³தஸ்ஸ யமகபாடிஹீரே ஞாணம்.

யமகபாடிஹீரஞாணனித்³தே³ஸோ ஸத்ததிமோ.