7. ப⁴ங்கா³னுபஸ்ஸனாஞாணனித்³தே³ஸோ

51. கத²ம் ஆரம்மணம் படிஸங்கா² ப⁴ங்கா³னுபஸ்ஸனே பஞ்ஞா விபஸ்ஸனே ஞாணம்? ரூபாரம்மணதா சித்தம் உப்பஜ்ஜித்வா பி⁴ஜ்ஜதி. தம் ஆரம்மணம் படிஸங்கா² தஸ்ஸ சித்தஸ்ஸ ப⁴ங்க³ம் அனுபஸ்ஸதி. அனுபஸ்ஸதீதி, கத²ம் அனுபஸ்ஸதி? அனிச்சதோ அனுபஸ்ஸதி, நோ நிச்சதோ. து³க்க²தோ அனுபஸ்ஸதி, நோ ஸுக²தோ. அனத்ததோ அனுபஸ்ஸதி, நோ அத்ததோ. நிப்³பி³ந்த³தி, நோ நந்த³தி, விரஜ்ஜதி, நோ ரஜ்ஜதி. நிரோதே⁴தி, நோ ஸமுதே³தி. படினிஸ்ஸஜ்ஜதி, நோ ஆதி³யதி.

52. அனிச்சதோ அனுபஸ்ஸந்தோ நிச்சஸஞ்ஞம் பஜஹதி. து³க்க²தோ அனுபஸ்ஸந்தோ ஸுக²ஸஞ்ஞம் பஜஹதி. அனத்ததோ அனுபஸ்ஸந்தோ அத்தஸஞ்ஞம் பஜஹதி. நிப்³பி³ந்த³ந்தோ நந்தி³ம் பஜஹதி. விரஜ்ஜந்தோ ராக³ம் பஜஹதி. நிரோதே⁴ந்தோ ஸமுத³யம் பஜஹதி. படினிஸ்ஸஜ்ஜந்தோ ஆதா³னம் பஜஹதி.

வேத³னாரம்மணதா…பே… ஸஞ்ஞாரம்மணதா… ஸங்கா²ராரம்மணதா… விஞ்ஞாணாரம்மணதா… சக்கு²…பே… ஜராமரணாரம்மணதா சித்தம் உப்பஜ்ஜித்வா பி⁴ஜ்ஜதி. தம் ஆரம்மணம் படிஸங்கா² தஸ்ஸ சித்தஸ்ஸ ப⁴ங்க³ம் அனுபஸ்ஸதி. அனுபஸ்ஸதீதி, கத²ம் அனுபஸ்ஸதி? அனிச்சதோ அனுபஸ்ஸதி, நோ நிச்சதோ. து³க்க²தோ அனுபஸ்ஸதி, நோ ஸுக²தோ. அனத்ததோ அனுபஸ்ஸதி, நோ அத்ததோ. நிப்³பி³ந்த³தி, நோ நந்த³தி. விரஜ்ஜதி, நோ ரஜ்ஜதி. நிரோதே⁴தி, நோ ஸமுதே³தி. படினிஸ்ஸஜ்ஜதி, நோ ஆதி³யதி.

அனிச்சதோ அனுபஸ்ஸந்தோ நிச்சஸஞ்ஞம் பஜஹதி. து³க்க²தோ அனுபஸ்ஸந்தோ ஸுக²ஸஞ்ஞம் பஜஹதி. அனத்ததோ அனுபஸ்ஸந்தோ அத்தஸஞ்ஞம் பஜஹதி. நிப்³பி³ந்த³ந்தோ நந்தி³ம் பஜஹதி. விரஜ்ஜந்தோ ராக³ம் பஜஹதி. நிரோதே⁴ந்தோ ஸமுத³யம் பஜஹதி. படினிஸ்ஸஜ்ஜந்தோ ஆதா³னம் பஜஹதி.

வத்து²ஸங்கமனா சேவ, பஞ்ஞாய ச விவட்டனா;

ஆவஜ்ஜனா ப³லஞ்சேவ, படிஸங்கா² விபஸ்ஸனா.

ஆரம்மணஅன்வயேன , உபோ⁴ ஏகவவத்த²னா [ஏகவவத்தா²னா (க.)];

நிரோதே⁴ அதி⁴முத்ததா, வயலக்க²ணவிபஸ்ஸனா.

ஆரம்மணஞ்ச படிஸங்கா², ப⁴ங்க³ஞ்ச அனுபஸ்ஸதி;

ஸுஞ்ஞதோ ச உபட்டா²னம், அதி⁴பஞ்ஞா விபஸ்ஸனா.

குஸலோ தீஸு அனுபஸ்ஸனாஸு, சதஸ்ஸோ ச [சதூஸு ச (ஸ்யா.)] விபஸ்ஸனாஸு;

தயோ உபட்டா²னே குஸலதா, நானாதி³ட்டீ²ஸு ந கம்பதீதி.

தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘ஆரம்மணம் படிஸங்கா² ப⁴ங்கா³னுபஸ்ஸனே பஞ்ஞா விபஸ்ஸனே ஞாணம்’’.

ப⁴ங்கா³னுபஸ்ஸனாஞாணனித்³தே³ஸோ ஸத்தமோ.