5. ஸம்மஸனஞாணனித்³தே³ஸோ

48. கத²ம் அதீதானாக³தபச்சுப்பன்னானம் த⁴ம்மானம் ஸங்கி²பித்வா வவத்தா²னே பஞ்ஞா ஸம்மஸனே ஞாணம்?

யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் அனிச்சதோ வவத்தே²தி ஏகம் ஸம்மஸனம், து³க்க²தோ வவத்தே²தி ஏகம் ஸம்மஸனம், அனத்ததோ வவத்தே²தி ஏகம் ஸம்மஸனம்.

யா காசி வேத³னா…பே… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் அனிச்சதோ வவத்தே²தி ஏகம் ஸம்மஸனம், து³க்க²தோ வவத்தே²தி ஏகம் ஸம்மஸனம், அனத்ததோ வவத்தே²தி ஏகம் ஸம்மஸனம்.

சக்கு²ம்…பே… ஜராமரணம் அதீதானாக³தபச்சுப்பன்னம் அனிச்சதோ வவத்தே²தி ஏகம் ஸம்மஸனம், து³க்க²தோ வவத்தே²தி ஏகம் ஸம்மஸனம், அனத்ததோ வவத்தே²தி ஏகம் ஸம்மஸனம்.

ரூபம் அதீதானாக³தபச்சுப்பன்னம் அனிச்சம் க²யட்டே²ன, து³க்க²ம் ப⁴யட்டே²ன அனத்தா அஸாரகட்டே²னாதி ஸங்கி²பித்வா வவத்தா²னே பஞ்ஞா ஸம்மஸனே ஞாணம். வேத³னா…பே… ஸஞ்ஞா…பே… ஸங்கா²ரா…பே… விஞ்ஞாணம்…பே… சக்கு²…பே… ஜராமரணம் அதீதானாக³தபச்சுப்பன்னம் அனிச்சம் க²யட்டே²ன, து³க்க²ம் ப⁴யட்டே²ன, அனத்தா அஸாரகட்டே²னாதி ஸங்கி²பித்வா வவத்தா²னே பஞ்ஞா ஸம்மஸனே ஞாணம்.

ரூபம் அதீதானாக³தபச்சுப்பன்னம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணம். வேத³னா…பே… ஸஞ்ஞா… ஸங்கா²ரா… விஞ்ஞாணம்… சக்கு²…பே… ஜராமரணம் அதீதானாக³தபச்சுப்பன்னம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணம்.

ஜாதிபச்சயா ஜராமரணம், அஸதி ஜாதியா நத்தி² ஜராமரணந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணம். அதீதம்பி அத்³தா⁴னம்… அனாக³தம்பி அத்³தா⁴னம் ஜாதிபச்சயா ஜராமரணம், அஸதி ஜாதியா நத்தி² ஜராமரணந்தி ஸங்கி²பித்வா வவத்தா²னே பஞ்ஞா ஸம்மஸனே ஞாணம். ப⁴வபச்சயா ஜாதி, அஸதி…பே… உபாதா³னபச்சயா ப⁴வோ, அஸதி…பே… தண்ஹாபச்சயா உபாதா³னம், அஸதி…பே… வேத³னாபச்சயா தண்ஹா, அஸதி…பே… ப²ஸ்ஸபச்சயா வேத³னா, அஸதி…பே… ஸளாயதனபச்சயா ப²ஸ்ஸோ, அஸதி…பே… நாமரூபபச்சயா ஸளாயதனம், அஸதி…பே… விஞ்ஞாணபச்சயா நாமரூபம், அஸதி…பே… ஸங்கா²ரபச்சயா விஞ்ஞாணம், அஸதி…பே… அவிஜ்ஜாபச்சயா ஸங்கா²ரா, அஸதி அவிஜ்ஜாய நத்தி² ஸங்கா²ராதி ஸங்கி²பித்வா வவத்தா²னே பஞ்ஞா ஸம்மஸனே ஞாணம். அதீதம்பி அத்³தா⁴னம்… அனாக³தம்பி அத்³தா⁴னம் அவிஜ்ஜாபச்சயா ஸங்கா²ரா, அஸதி அவிஜ்ஜாய நத்தி² ஸங்கா²ராதி ஸங்கி²பித்வா வவத்தா²னே பஞ்ஞா ஸம்மஸனே ஞாணம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘அதீதானாக³தபச்சுப்பன்னானம் த⁴ம்மானம் ஸங்கி²பித்வா வவத்தா²னே பஞ்ஞா ஸம்மஸனே ஞாணம்’’.

ஸம்மஸனஞாணனித்³தே³ஸோ பஞ்சமோ.