40. த³ஸ்ஸனவிஸுத்³தி⁴ஞாணனித்³தே³ஸோ

91. கத²ம் ஸப்³ப³த⁴ம்மானம் ஏகஸங்க³ஹதானானத்தேகத்தபடிவேதே⁴ பஞ்ஞா த³ஸ்ஸனவிஸுத்³தி⁴ஞாணம்? ஸப்³ப³த⁴ம்மானந்தி பஞ்சக்க²ந்தா⁴…பே… அபரியாபன்னா த⁴ம்மா.

ஏகஸங்க³ஹதாதி த்³வாத³ஸஹி ஆகாரேஹி ஸப்³பே³ த⁴ம்மா ஏகஸங்க³ஹிதா. தத²ட்டே²ன, அனத்தட்டே²ன, ஸச்சட்டே²ன, படிவேத⁴ட்டே²ன, அபி⁴ஜானனட்டே²ன, பரிஜானனட்டே²ன, த⁴ம்மட்டே²ன, தா⁴துட்டே²ன, ஞாதட்டே²ன, ஸச்சி²கிரியட்டே²ன, பு²ஸனட்டே²ன, அபி⁴ஸமயட்டே²ன – இமேஹி த்³வாத³ஸஹி ஆகாரேஹி ஸப்³பே³ த⁴ம்மா ஏகஸங்க³ஹிதா.

நானத்தேகத்தந்தி காமச்ச²ந்தோ³ நானத்தம், நேக்க²ம்மம் ஏகத்தம்…பே… ஸப்³ப³கிலேஸா நானத்தம், அரஹத்தமக்³கோ³ ஏகத்தம்.

படிவேதே⁴தி து³க்க²ஸச்சம் பரிஞ்ஞாபடிவேத⁴ம் படிவிஜ்ஜ²தி. ஸமுத³யஸச்சம் பஹானபடிவேத⁴ம் படிவிஜ்ஜ²தி. நிரோத⁴ஸச்சம் ஸச்சி²கிரியாபடிவேத⁴ம் படிவிஜ்ஜ²தி. மக்³க³ஸச்சம் பா⁴வனாபடிவேத⁴ம் படிவிஜ்ஜ²தி.

த³ஸ்ஸனவிஸுத்³தீ⁴தி ஸோதாபத்திமக்³க³க்க²ணே த³ஸ்ஸனம் விஸுஜ்ஜ²தி; ஸோதாபத்திப²லக்க²ணே த³ஸ்ஸனம் விஸுத்³த⁴ம். ஸகதா³கா³மிமக்³க³க்க²ணே த³ஸ்ஸனம் விஸுஜ்ஜ²தி; ஸகதா³கா³மிப²லக்க²ணே த³ஸ்ஸனம் விஸுத்³த⁴ம். அனாகா³மிமக்³க³க்க²ணே த³ஸ்ஸனம் விஸுஜ்ஜ²தி; அனாகா³மிப²லக்க²ணே த³ஸ்ஸனம் விஸுத்³த⁴ம். அரஹத்தமக்³க³க்க²ணே த³ஸ்ஸனம் விஸுஜ்ஜ²தி; அரஹத்தப²லக்க²ணே த³ஸ்ஸனம் விஸுத்³த⁴ம். தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘ஸப்³ப³த⁴ம்மானம் ஏகஸங்க³ஹதானானத்தேகத்தபடிவேதே⁴ பஞ்ஞா த³ஸ்ஸனவிஸுத்³தி⁴ஞாணம்’’.

த³ஸ்ஸனவிஸுத்³தி⁴ஞாணனித்³தே³ஸோ சத்தாலீஸமோ.