37. ஸல்லேக²ட்ட²ஞாணனித்³தே³ஸோ

88. கத²ம் புது²னானத்தேகத்ததேஜபரியாதா³னே பஞ்ஞா ஸல்லேக²ட்டே² [புது²னானத்தேகத்ததேஜபரியாதா³னே (க.)] ஞாணம்? புதூ²தி – ராகோ³ புது², தோ³ஸோ புது², மோஹோ புது², கோதோ⁴…பே… உபனாஹோ… மக்கோ²… பளாஸோ… இஸ்ஸா… மச்ச²ரியம்… மாயா… ஸாடே²ய்யம்… த²ம்போ⁴… ஸாரம்போ⁴… மானோ… அதிமானோ… மதோ³… பமாதோ³… ஸப்³பே³ கிலேஸா… ஸப்³பே³ து³ச்சரிதா… ஸப்³பே³ அபி⁴ஸங்கா²ரா… ஸப்³பே³ ப⁴வகா³மிகம்மா.

நானத்தேகத்தந்தி காமச்ச²ந்தோ³ நானத்தம், நேக்க²ம்மம் ஏகத்தம். ப்³யாபாதோ³ நானத்தம், அப்³யாபாதோ³ ஏகத்தம். தி²னமித்³த⁴ம் நானத்தம், ஆலோகஸஞ்ஞா ஏகத்தம். உத்³த⁴ச்சம் நானத்தம், அவிக்கே²போ ஏகத்தம். விசிகிச்சா² நானத்தம், த⁴ம்மவவத்தா²னம் ஏகத்தம். அவிஜ்ஜா நானத்தம், ஞாணம் ஏகத்தம். அரதி நானத்தம், பாமோஜ்ஜம் ஏகத்தம். நீவரணா நானத்தம், பட²மம் ஜா²னம் ஏகத்தம்…பே… ஸப்³பே³ கிலேஸா நானத்தம், அரஹத்தமக்³கோ³ ஏகத்தம்.

தேஜோதி பஞ்ச தேஜா – சரணதேஜோ, கு³ணதேஜோ, பஞ்ஞாதேஜோ, புஞ்ஞதேஜோ, த⁴ம்மதேஜோ. சரணதேஜேன தேஜிதத்தா து³ஸ்ஸீல்யதேஜம் பரியாதி³யதி. கு³ணதேஜேன தேஜிதத்தா அகு³ணதேஜம் பரியாதி³யதி. பஞ்ஞாதேஜேன தேஜிதத்தா து³ப்பஞ்ஞதேஜம் பரியாதி³யதி. புஞ்ஞதேஜேன தேஜிதத்தா அபுஞ்ஞதேஜம் பரியாதி³யதி. த⁴ம்மதேஜேன தேஜிதத்தா அத⁴ம்மதேஜம் பரியாதி³யதி.

ஸல்லேகோ²தி காமச்ச²ந்தோ³ அஸல்லேகோ², நேக்க²ம்மம் ஸல்லேகோ². ப்³யாபாதோ³ அஸல்லேகோ², அப்³யாபாதோ³ ஸல்லேகோ². தி²னமித்³த⁴ம் அஸல்லேகோ², ஆலோகஸஞ்ஞா ஸல்லேகோ². உத்³த⁴ச்சம் அஸல்லேகோ², அவிக்கே²போ ஸல்லேகோ². விசிகிச்சா² அஸல்லேகோ², த⁴ம்மவவத்தா²னம் ஸல்லேகோ². அவிஜ்ஜா அஸல்லேகோ², ஞாணம் ஸல்லேகோ². அரதி அஸல்லேகோ², பாமோஜ்ஜம் ஸல்லேகோ². நீவரணா அஸல்லேகோ², பட²மம் ஜா²னம் ஸல்லேகோ²…பே… ஸப்³ப³கிலேஸா அஸல்லேகோ², அரஹத்தமக்³கோ³ ஸல்லேகோ². தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘புது²னானத்ததேஜபரியாதா³னே பஞ்ஞா ஸல்லேக²ட்டே² ஞாணம்’’.

ஸல்லேக²ட்ட²ஞாணனித்³தே³ஸோ ஸத்ததிம்ஸதிமோ.