13. விமுத்திஞாணனித்³தே³ஸோ

64. கத²ம் சி²ன்னவடுமானுபஸ்ஸனே பஞ்ஞா விமுத்திஞாணம்? ஸோதாபத்திமக்³கே³ன ஸக்காயதி³ட்டி², விசிகிச்சா², ஸீலப்³ப³தபராமாஸோ, தி³ட்டா²னுஸயோ, விசிகிச்சா²னுஸயோ அத்தனோ சித்தஸ்ஸ உபக்கிலேஸா ஸம்மா ஸமுச்சி²ன்னா ஹோந்தி. இமேஹி பஞ்சஹி உபக்கிலேஸேஹி ஸபரியுட்டா²னேஹி சித்தம் விமுத்தம் ஹோதி ஸுவிமுத்தம். தம்விமுத்தி ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சி²ன்னவடுமானுபஸ்ஸனே பஞ்ஞா விமுத்திஞாணம்’’.

ஸகதா³கா³மிமக்³கே³ன ஓளாரிகம் காமராக³ஸஞ்ஞோஜனம், படிக⁴ஸஞ்ஞோஜனம், ஓளாரிகோ காமராகா³னுஸயோ, படிகா⁴னுஸயோ – அத்தனோ சித்தஸ்ஸ உபக்கிலேஸா ஸம்மா ஸமுச்சி²ன்னா ஹோந்தி. இமேஹி சதூஹி உபக்கிலேஸேஹி ஸபரியுட்டா²னேஹி சித்தம் விமுத்தம் ஹோதி ஸுவிமுத்தம். தம்விமுத்தி ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சி²ன்னவடுமானுபஸ்ஸனே பஞ்ஞா விமுத்திஞாணம்’’.

அனாகா³மிமக்³கே³ன அனுஸஹக³தம் காமராக³ஸஞ்ஞோஜனம், படிக⁴ஸஞ்ஞோஜனம், அனுஸஹக³தோ காமராகா³னுஸயோ, படிகா⁴னுஸயோ – அத்தனோ சித்தஸ்ஸ உபக்கிலேஸா ஸம்மா ஸமுச்சி²ன்னா ஹோந்தி. இமேஹி சதூஹி உபக்கிலேஸேஹி ஸபரியுட்டா²னேஹி சித்தம் விமுத்தம் ஹோதி ஸுவிமுத்தம். தம்விமுத்தி ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சி²ன்னவடுமானுபஸ்ஸனே பஞ்ஞா விமுத்திஞாணம்’’.

அரஹத்தமக்³கே³ன ரூபராகோ³, அரூபராகோ³, மானோ, உத்³த⁴ச்சம், அவிஜ்ஜா, மானானுஸயோ, ப⁴வராகா³னுஸயோ, அவிஜ்ஜானுஸயோ – அத்தனோ சித்தஸ்ஸ உபக்கிலேஸா ஸம்மா ஸமுச்சி²ன்னா ஹோந்தி. இமேஹி அட்ட²ஹி உபக்கிலேஸேஹி ஸபரியுட்டா²னேஹி சித்தம் விமுத்தம் ஹோதி ஸுவிமுத்தம். தம்விமுத்தி ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சி²ன்னவடுமானுபஸ்ஸனே பஞ்ஞா விமுத்திஞாணம்’’. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சி²ன்னவடுமானுபஸ்ஸனே பஞ்ஞா விமுத்திஞாணம்’’.

விமுத்திஞாணனித்³தே³ஸோ தேரஸமோ.