11. மக்³க³ஞாணனித்³தே³ஸோ

61. கத²ம் து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்? ஸோதாபத்திமக்³க³க்க²ணே த³ஸ்ஸனட்டே²ன ஸம்மாதி³ட்டி² மிச்சா²தி³ட்டி²யா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’. அபி⁴னிரோபனட்டே²ன ஸம்மாஸங்கப்போ மிச்சா²ஸங்கப்பா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

பரிக்³க³ஹட்டே²ன ஸம்மாவாசா மிச்சா²வாசாய வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

ஸமுட்டா²னட்டே²ன ஸம்மாகம்மந்தோ மிச்சா²கம்மந்தா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

வோதா³னட்டே²ன ஸம்மாஆஜீவோ மிச்சா²ஆஜீவா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

பக்³க³ஹட்டே²ன ஸம்மாவாயாமோ மிச்சா²வாயாமா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

உபட்டா²னட்டே²ன ஸம்மாஸதி மிச்சா²ஸதியா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

அவிக்கே²பட்டே²ன ஸம்மாஸமாதி⁴ மிச்சா²ஸமாதி⁴தோ வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

ஸகதா³கா³மிமக்³க³க்க²ணே த³ஸ்ஸனட்டே²ன ஸம்மாதி³ட்டி² …பே… அவிக்கே²பட்டே²ன ஸம்மாஸமாதி⁴ ஓளாரிகா காமராக³ஸஞ்ஞோஜனா படிக⁴ஸஞ்ஞோஜனா ஓளாரிகா காமராகா³னுஸயா படிகா⁴னுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

அனாகா³மிமக்³க³க்க²ணே த³ஸ்ஸனட்டே²ன ஸம்மாதி³ட்டி²…பே… அவிக்கே²பட்டே²ன ஸம்மாஸமாதி⁴ அனுஸஹக³தா காமராக³ஸஞ்ஞோஜனா படிக⁴ஸஞ்ஞோஜனா அனுஸஹக³தா காமராகா³னுஸயா படிகா⁴னுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

அரஹத்தமக்³க³க்க²ணே த³ஸ்ஸனட்டே²ன ஸம்மாதி³ட்டி²…பே… அவிக்கே²பட்டே²ன ஸம்மாஸமாதி⁴ ரூபராகா³ அரூபராகா³ மானா உத்³த⁴ச்சா அவிஜ்ஜாய மானானுஸயா ப⁴வராகா³னுஸயா அவிஜ்ஜானுஸயா வுட்டா²தி, தத³னுவத்தககிலேஸேஹி ச க²ந்தே⁴ஹி ச வுட்டா²தி, ப³ஹித்³தா⁴ ச ஸப்³ப³னிமித்தேஹி வுட்டா²தி. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

62. அஜாதம் ஜா²பேதி ஜாதேன, ஜா²னம் தேன பவுச்சதி;

ஜா²னவிமோக்கே² குஸலதா, நானாதி³ட்டீ²ஸு ந கம்பதி.

ஸமாத³ஹித்வா யதா² சே விபஸ்ஸதி, விபஸ்ஸமானோ ததா² சே ஸமாத³ஹே;

விபஸ்ஸனா ச ஸமதோ² ததா³ அஹு, ஸமானபா⁴கா³ யுக³னத்³தா⁴ வத்தரே.

து³க்கா² ஸங்கா²ரா ஸுகோ², நிரோதோ⁴ இதி த³ஸ்ஸனம் [நிரோதோ⁴தி த³ஸ்ஸனம் (ஸ்யா. க.)];

து³ப⁴தோ வுட்டி²தா பஞ்ஞா, ப²ஸ்ஸேதி அமதம் பத³ம்.

விமோக்க²சரியம் ஜானாதி, நானத்தேகத்தகோவிதோ³;

த்³வின்னம் ஞாணானம் குஸலதா, நானாதி³ட்டீ²ஸு ந கம்பதீதி.

தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘து³ப⁴தோ வுட்டா²னவிவட்டனே பஞ்ஞா மக்³கே³ ஞாணம்’’.

மக்³க³ஞாணனித்³தே³ஸோ ஏகாத³ஸமோ.