5. தோ⁴தகமாணவபுச்சா²னித்³தே³ஸோ

30. புச்சா²மி தம் ப⁴க³வா ப்³ரூஹி மேதம், [இச்சாயஸ்மா தோ⁴தகோ]

வாசாபி⁴கங்கா²மி மஹேஸி துய்ஹம்;

தவ ஸுத்வான நிக்³கோ⁴ஸம், ஸிக்கே² நிப்³பா³னமத்தனோ.

புச்சா²மி தம் ப⁴க³வா ப்³ரூஹி மேதந்தி. புச்சா²மீதி திஸ்ஸோ புச்சா² – அதி³ட்ட²ஜோதனா புச்சா², தி³ட்ட²ஸம்ஸந்த³னா புச்சா², விமதிச்சே²த³னா புச்சா²…பே… இமா திஸ்ஸோ புச்சா²…பே… நிப்³பா³னபுச்சா². புச்சா²மி தந்தி புச்சா²மி தம் யாசாமி தம் அஜ்ஜே²ஸாமி தம் பஸாதே³மி தம், கத²யஸ்ஸு மேதி – புச்சா²மி தம். ப⁴க³வாதி கா³ரவாதி⁴வசனமேதம்…பே… ஸச்சி²கா பஞ்ஞத்தி, யதி³த³ம் ப⁴க³வாதி. ப்³ரூஹி மேதந்தி ப்³ரூஹி ஆசிக்கா²ஹி தே³ஸேஹி பஞ்ஞபேஹி பட்ட²பேஹி விவராஹி விப⁴ஜாஹி உத்தானீகரோஹி பகாஸேஹீதி – புச்சா²மி தம் ப⁴க³வா ப்³ரூஹி மேதம்.

இச்சாயஸ்மா தோ⁴தகோதி. இச்சாதி பத³ஸந்தி⁴…பே… ஆயஸ்மாதி பியவசனம் க³ருவசனம் ஸகா³ரவஸப்பதிஸ்ஸாதி⁴வசனமேதம் ஆயஸ்மாதி. தோ⁴தகோதி தஸ்ஸ ப்³ராஹ்மணஸ்ஸ நாமம் ஸங்கா² ஸமஞ்ஞா பஞ்ஞத்தி வோஹாரோ நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோதி – இச்சாயஸ்மா தோ⁴தகோ.

வாசாபி⁴கங்கா²மி மஹேஸி துய்ஹந்தி துய்ஹம் வசனம் ப்³யப்பத²ம் தே³ஸனம் அனுஸாஸனம் அனுஸிட்ட²ம் கங்கா²மி அபி⁴கங்கா²மி இச்சா²மி ஸாதி³யாமி பத்த²யாமி பிஹயாமி அபி⁴ஜப்பாமி. மஹேஸீதி கிம் மஹேஸி ப⁴க³வா? மஹந்தம் ஸீலக்க²ந்த⁴ம் ஏஸீ க³வேஸீ பரியேஸீதி மஹேஸி…பே… கஹம் நராஸபோ⁴தி மஹேஸீதி – வாசாபி⁴கங்கா²மி மஹேஸி துய்ஹம்.

தவ ஸுத்வான நிக்³கோ⁴ஸந்தி துய்ஹம் வசனம் ப்³யப்பத²ம் தே³ஸனம் அனுஸாஸனம் அனுஸிட்ட²ம் ஸுத்வா ஸுணித்வா உக்³க³ஹேத்வா உபதா⁴ரயித்வா உபலக்க²யித்வாதி – தவ ஸுத்வான நிக்³கோ⁴ஸம்.

ஸிக்கே² நிப்³பா³னமத்தனோதி. ஸிக்கா²தி திஸ்ஸோ ஸிக்கா² – அதி⁴ஸீலஸிக்கா², அதி⁴சித்தஸிக்கா², அதி⁴பஞ்ஞாஸிக்கா²…பே… அயம் அதி⁴பஞ்ஞாஸிக்கா². நிப்³பா³னமத்தனோதி அத்தனோ ராக³ஸ்ஸ நிப்³பா³பனாய, தோ³ஸஸ்ஸ நிப்³பா³பனாய, மோஹஸ்ஸ நிப்³பா³பனாய, கோத⁴ஸ்ஸ நிப்³பா³பனாய, உபனாஹஸ்ஸ நிப்³பா³பனாய…பே… ஸப்³பா³குஸலாபி⁴ஸங்கா²ரானம் ஸமாய உபஸமாய வூபஸமாய நிப்³பா³பனாய படினிஸ்ஸக்³கா³ய படிபஸ்ஸத்³தி⁴யா அதி⁴ஸீலம்பி ஸிக்கே²ய்ய, அதி⁴சித்தம்பி ஸிக்கே²ய்ய, அதி⁴பஞ்ஞம்பி ஸிக்கே²ய்ய. இமா திஸ்ஸோ ஸிக்கா²யோ ஆவஜ்ஜந்தோ ஸிக்கே²ய்ய, ஜானந்தோ ஸிக்கே²ய்ய, பஸ்ஸந்தோ ஸிக்கே²ய்ய, பச்சவேக்க²ந்தோ ஸிக்கே²ய்ய, சித்தம் பத³ஹந்தோ ஸிக்கே²ய்ய, ஸத்³தா⁴ய அதி⁴முச்சந்தோ ஸிக்கே²ய்ய, வீரியம் பக்³க³ண்ஹந்தோ ஸிக்கே²ய்ய, ஸதிம் உபட்ட²பேந்தோ ஸிக்கே²ய்ய, சித்தம் ஸமாத³ஹந்தோ ஸிக்கே²ய்ய, பஞ்ஞாய பஜானந்தோ ஸிக்கே²ய்ய, அபி⁴ஞ்ஞேய்யம் அபி⁴ஜானந்தோ ஸிக்கே²ய்ய, பரிஞ்ஞேய்யம் பரிஜானந்தோ ஸிக்கே²ய்ய, பஹாதப்³ப³ம் பஜஹந்தோ ஸிக்கே²ய்ய, பா⁴வேதப்³ப³ம் பா⁴வேந்தோ ஸிக்கே²ய்ய, ஸச்சி²காதப்³ப³ம் ஸச்சி²கரோந்தோ ஸிக்கே²ய்ய, ஆசரேய்ய ஸமாசரேய்ய ஸமாதா³ய வத்தேய்யாதி – ஸிக்கே² நிப்³பா³னமத்தனோ. தேனாஹ ஸோ ப்³ராஹ்மணோ –

‘‘புச்சா²மி தம் ப⁴க³வா ப்³ரூஹி மேதம், [இச்சாயஸ்மா தோ⁴தகோ]

வாசாபி⁴கங்கா²மி மஹேஸி துய்ஹம்;

தவ ஸுத்வான நிக்³கோ⁴ஸம், ஸிக்கே² நிப்³பா³னமத்தனோ’’தி.

31. தேனஹாதப்பம் கரோஹி, [தோ⁴தகாதி ப⁴க³வா]

இதே⁴வ நிபகோ ஸதோ;

இதோ ஸுத்வான நிக்³கோ⁴ஸம், ஸிக்கே² நிப்³பா³னமத்தனோ.

தேனஹாதப்பம் கரோஹீதி ஆதப்பம் கரோஹி, உஸ்ஸாஹம் கரோஹி, உஸ்ஸோள்ஹிம் கரோஹி, தா²மம் கரோஹி, தி⁴திம் கரோஹி, வீரியம் கரோஹி, ச²ந்த³ம் ஜனேஹி ஸஞ்ஜனேஹி உபட்ட²பேஹி ஸமுட்ட²பேஹி நிப்³ப³த்தேஹி அபி⁴னிப்³ப³த்தேஹீதி – தேனஹாதப்பம் கரோஹி.

தோ⁴தகாதி ப⁴க³வா தம் ப்³ராஹ்மணம் நாமேன ஆலபதி. ப⁴க³வாதி கா³ரவாதி⁴வசனமேதம்…பே… ஸச்சி²கா பஞ்ஞத்தி, யதி³த³ம் ப⁴க³வாதி – தோ⁴தகாதி ப⁴க³வா.

இதே⁴வ நிபகோ ஸதோதி. இதா⁴தி இமிஸ்ஸா தி³ட்டி²யா இமிஸ்ஸா க²ந்தியா இமிஸ்ஸா ருசியா இமஸ்மிம் ஆதா³யே இமஸ்மிம் த⁴ம்மே இமஸ்மிம் வினயே இமஸ்மிம் த⁴ம்மவினயே இமஸ்மிம் பாவசனே இமஸ்மிம் ப்³ரஹ்மசரியே இமஸ்மிம் ஸத்து²ஸாஸனே இமஸ்மிம் அத்தபா⁴வே இமஸ்மிம் மனுஸ்ஸலோகே. நிபகோதி நிபகோ பண்டி³தோ பஞ்ஞவா பு³த்³தி⁴மா ஞாணீ விபா⁴வீ மேதா⁴வீ. ஸதோதி சதூஹி காரணேஹி ஸதோ – காயே காயானுபஸ்ஸனாஸதிபட்டா²னம் பா⁴வேந்தோ ஸதோ…பே… ஸோ வுச்சதி ஸதோதி – இதே⁴வ நிபகோ ஸதோ.

இதோ ஸுத்வான நிக்³கோ⁴ஸந்தி இதோ மய்ஹம் வசனம் ப்³யப்பத²ம் தே³ஸனம் அனுஸாஸனம் அனுஸிட்ட²ம் ஸுத்வா ஸுணித்வா உக்³க³ண்ஹித்வா உபதா⁴ரயித்வா உபலக்க²யித்வாதி – இதோ ஸுத்வான நிக்³கோ⁴ஸம்.

ஸிக்கே² நிப்³பா³னமத்தனோதி. ஸிக்கா²தி திஸ்ஸோ ஸிக்கா² – அதி⁴ஸீலஸிக்கா², அதி⁴சித்தஸிக்கா², அதி⁴பஞ்ஞாஸிக்கா²…பே… அயம் அதி⁴பஞ்ஞாஸிக்கா². நிப்³பா³னமத்தனோதி அத்தனோ ராக³ஸ்ஸ நிப்³பா³பனாய, தோ³ஸஸ்ஸ நிப்³பா³பனாய, மோஹஸ்ஸ நிப்³பா³பனாய, கோத⁴ஸ்ஸ நிப்³பா³பனாய, உபனாஹஸ்ஸ நிப்³பா³பனாய…பே… ஸப்³பா³குஸலாபி⁴ஸங்கா²ரானம் ஸமாய உபஸமாய வூபஸமாய நிப்³பா³பனாய படினிஸ்ஸக்³கா³ய படிபஸ்ஸத்³தி⁴யா அதி⁴ஸீலம்பி ஸிக்கே²ய்ய, அதி⁴சித்தம்பி ஸிக்கே²ய்ய, அதி⁴பஞ்ஞம்பி ஸிக்கே²ய்ய. இமா திஸ்ஸோ ஸிக்கா²யோ ஆவஜ்ஜந்தோ ஸிக்கே²ய்ய, ஜானந்தோ ஸிக்கே²ய்ய…பே… ஸச்சி²காதப்³ப³ம் ஸச்சி²கரோந்தோ ஸிக்கே²ய்ய, ஆசரேய்ய ஸமாசரேய்ய ஸமாதா³ய வத்தேய்யாதி – ஸிக்கே² நிப்³பா³னமத்தனோ. தேனாஹ ப⁴க³வா –

‘‘தேனஹாதப்பம் கரோஹி, [தோ⁴தகாதி ப⁴க³வா]

இதே⁴வ நிபகோ ஸதோ;

இதோ ஸுத்வான நிக்³கோ⁴ஸம், ஸிக்கே² நிப்³பா³னமத்தனோ’’தி.

32. பஸ்ஸாமஹம் தே³வமனுஸ்ஸலோகே,அகிஞ்சனம் ப்³ராஹ்மணமிரியமானம்;

தம் தம் நமஸ்ஸாமி ஸமந்தசக்கு², பமுஞ்ச மம் ஸக்க கத²ம்கதா²ஹி.

பஸ்ஸாமஹம் தே³வமனுஸ்ஸலோகேதி. தே³வாதி தயோ தே³வா – ஸம்முதிதே³வா, உபபத்திதே³வா, விஸுத்³தி⁴தே³வா. கதமே ஸம்முதிதே³வா? ஸம்முதிதே³வா வுச்சந்தி ராஜானோ ச ராஜகுமாரா ச தே³வியோ ச. இமே வுச்சந்தி ஸம்முதிதே³வா. கதமே உபபத்திதே³வா? உபபத்திதே³வா வுச்சந்தி சாதுமஹாராஜிகா தே³வா தாவதிம்ஸா தே³வா யாமா தே³வா துஸிதா தே³வா நிம்மானரதீ தே³வா பரனிம்மிதவஸவத்தீ தே³வா ப்³ரஹ்மகாயிகா தே³வா யே ச தே³வா தது³த்தரி [தத்ருபரி (ஸ்யா.)]. இமே வுச்சந்தி உபபத்திதே³வா. கதமே விஸுத்³தி⁴தே³வா? விஸுத்³தி⁴தே³வா வுச்சந்தி ததா²க³தஸாவகா அரஹந்தோ கீ²ணாஸவா யே ச பச்சேகபு³த்³தா⁴. இமே வுச்சந்தி விஸுத்³தி⁴தே³வா. ப⁴க³வா ஸம்முதிதே³வானஞ்ச உபபத்திதே³வானஞ்ச விஸுத்³தி⁴தே³வானஞ்ச தே³வோ ச அதிதே³வோ ச தே³வாதிதே³வோ ச ஸீஹஸீஹோ நாக³னாகோ³ க³ணிக³ணீ முனிமுனீ ராஜராஜா. பஸ்ஸாமஹம் தே³வமனுஸ்ஸலோகேதி மனுஸ்ஸலோகே தே³வம் பஸ்ஸாமி அதிதே³வம் பஸ்ஸாமி தே³வாதிதே³வம் பஸ்ஸாமி த³க்கா²மி ஓலோகேமி நிஜ்ஜா²யாமி உபபரிக்கா²மீதி – பஸ்ஸாமஹம் தே³வமனுஸ்ஸலோகே.

ஆகிஞ்சனம் ப்³ராஹ்மணமிரியமானந்தி. அகிஞ்சனந்தி ராக³கிஞ்சனம் தோ³ஸகிஞ்சனம் மோஹகிஞ்சனம் மானகிஞ்சனம் தி³ட்டி²கிஞ்சனம் கிலேஸகிஞ்சனம் து³ச்சரிதகிஞ்சனம், தே கிஞ்சனா பு³த்³த⁴ஸ்ஸ ப⁴க³வதோ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா, தஸ்மா பு³த்³தோ⁴ அகிஞ்சனோ. ப்³ராஹ்மணோதி ப⁴க³வா ஸத்தன்னம் த⁴ம்மானம் பா³ஹிதத்தா ப்³ராஹ்மணோ – ஸக்காயதி³ட்டி² பா³ஹிதா ஹோதி, விசிகிச்சா² பா³ஹிதா ஹோதி, ஸீலப்³ப³தபராமாஸோ பா³ஹிதோ ஹோதி, ராகோ³ பா³ஹிதோ ஹோதி, தோ³ஸோ பா³ஹிதோ ஹோதி, மோஹோ பா³ஹிதோ ஹோதி, மானோ பா³ஹிதோ ஹோதி, பா³ஹிதாஸ்ஸ ஹோந்தி பாபகா அகுஸலா த⁴ம்மா ஸம்கிலேஸிகா போனோப⁴விகா ஸத³ரா து³க்க²விபாகா ஆயதிம் ஜாதிஜராமரணியா.

பா³ஹித்வா ஸப்³ப³பாபகானி, [ஸபி⁴யாதி ப⁴க³வா]

விமலோ ஸாது⁴ஸமாஹிதோ டி²தத்தோ;

ஸம்ஸாரமதிச்ச கேவலீ ஸோ, அஸிதோ தாதி³ பவுச்சதே ஸ ப்³ரஹ்மாதி.

இரியமானந்தி சரந்தம் விஹரந்தம் இரியந்தம் வத்தேந்தம் பாலேந்தம் யபேந்தம் யாபேந்தந்தி – அகிஞ்சனம் ப்³ராஹ்மணமிரியமானம்.

தம் தம் நமஸ்ஸாமி ஸமந்தசக்கூ²தி. தந்தி ப⁴க³வந்தம் ப⁴ணதி. நமஸ்ஸாமீதி காயேன வா நமஸ்ஸாமி, வாசாய வா நமஸ்ஸாமி, சித்தேன வா நமஸ்ஸாமி, அன்வத்த²படிபத்தியா வா நமஸ்ஸாமி, த⁴ம்மானுத⁴ம்மபடிபத்தியா வா நமஸ்ஸாமி ஸக்கரோமி க³ரும் கரோமி மானேமி பூஜேமி. ஸமந்தசக்கூ²தி ஸமந்தசக்கு² வுச்சதி ஸப்³ப³ஞ்ஞுதஞாணம். ப⁴க³வா ஸப்³ப³ஞ்ஞுதஞாணேன உபேதோ ஸமுபேதோ உபாக³தோ ஸமுபாக³தோ உபபன்னோ ஸமுபபன்னோ ஸமன்னாக³தோ.

‘‘ந தஸ்ஸ அத்³தி³ட்ட²மித⁴த்தி² [அதி³ட்ட²மித⁴த்தி² (ஸ்யா. க.) மஹானி. 156] கிஞ்சி, அதோ² அவிஞ்ஞாதமஜானிதப்³ப³ம்;

ஸப்³ப³ம் அபி⁴ஞ்ஞாஸி யத³த்தி² நேய்யம், ததா²க³தோ தேன ஸமந்தசக்கூ²’’தி.

தம் தம் நமஸ்ஸாமி ஸமந்தசக்கு².

பமுஞ்ச மம் ஸக்க கத²ம்கதா²ஹீதி. ஸக்காதி ஸக்கோ ப⁴க³வா ஸக்யகுலா பப்³ப³ஜிதோதிபி ஸக்கோ. அத² வா, அட்³டோ⁴ [அத்³தோ⁴ (ஸ்யா. க.)] மஹத்³த⁴னோ த⁴னவாதிபி ஸக்கோ. தஸ்ஸிமானி த⁴னானி, ஸேய்யதி²த³ம் – ஸத்³தா⁴த⁴னம் ஸீலத⁴னம் ஹிரித⁴னம் ஓத்தப்பத⁴னம் ஸுதத⁴னம் சாக³த⁴னம் பஞ்ஞாத⁴னம் ஸதிபட்டா²னத⁴னம் ஸம்மப்பதா⁴னத⁴னம் இத்³தி⁴பாத³த⁴னம் இந்த்³ரியத⁴னம் ப³லத⁴னம் போ³ஜ்ஜ²ங்க³த⁴னம் மக்³க³த⁴னம் ப²லத⁴னம் நிப்³பா³னத⁴னம். இமேஹி அனேகவிதே⁴ஹி த⁴னரதனேஹி அட்³டோ⁴ மஹத்³த⁴னோ த⁴னவாதிபி ஸக்கோ. அத² வா, ஸக்கோ பஹு விஸவீ அலமத்தோ ஸூரோ வீரோ விக்கந்தோ அபீ⁴ரூ அச்ச²ம்பீ⁴ அனுத்ராஸீ அபலாயீ பஹீனப⁴யபே⁴ரவோ விக³தலோமஹம்ஸோதிபி ஸக்கோ. கத²ம்கதா² வுச்சதி விசிகிச்சா². து³க்கே² கங்கா², து³க்க²ஸமுத³யே கங்கா², து³க்க²னிரோதே⁴ கங்கா², து³க்க²னிரோத⁴கா³மினியா படிபதா³ய கங்கா², புப்³ப³ந்தே கங்கா², அபரந்தே கங்கா², புப்³ப³ந்தாபரந்தே கங்கா², இத³ப்பச்சயதாபடிச்சஸமுப்பன்னேஸு த⁴ம்மேஸு கங்கா². யா ஏவரூபா கங்கா² கங்கா²யனா கங்கா²யிதத்தம் விமதி விசிகிச்சா² த்³வேள்ஹகம் த்³வேதா⁴பதோ² ஸம்ஸயோ அனேகம்ஸக்³கா³ஹோ ஆஸப்பனா பரிஸப்பனா அபரியோகா³ஹனா ச²ம்பி⁴தத்தம் சித்தஸ்ஸ மனோவிலேகோ². பமுஞ்ச மம் ஸக்க கத²ம்கதா²ஹீதி முஞ்ச மம் பமுஞ்ச மம் மோசேஹி மம் பமோசேஹி மம் உத்³த⁴ர மம் ஸமுத்³த⁴ர மம் வுட்டா²பேஹி மம் கத²ம்கதா²ஸல்லதோதி – பமுஞ்ச மம் ஸக்க கத²ம்கதா²ஹி. தேனாஹ ஸோ ப்³ராஹ்மணோ –

‘‘பஸ்ஸாமஹம் தே³வமனுஸ்ஸலோகே, அகிஞ்சனம் ப்³ராஹ்மணமிரியமானம்;

தம் தம் நமஸ்ஸாமி ஸமந்தசக்கு², பமுஞ்ச மம் ஸக்க கத²ம்கதா²ஹீ’’தி.

33. நாஹம் ஸஹிஸ்ஸாமி பமோசனாய, கத²ம்கதி²ம் தோ⁴தக கஞ்சி லோகே;

த⁴ம்மஞ்ச ஸேட்ட²ம் ஆஜானமானோ, ஏவம் துவம் ஓக⁴மிமம் தரேஸி.

நாஹம் ஸஹிஸ்ஸாமி [ஸமீஹாமி (க.)] பமோசனாயாதி நாஹம் தம் ஸக்கோமி முஞ்சிதும் பமுஞ்சிதும் மோசேதும் பமோசேதும் உத்³த⁴ரிதும் ஸமுத்³த⁴ரிதும் உட்டா²பேதும் ஸமுட்டா²பேதும் கத²ம்கதா²ஸல்லதோதி. ஏவம்பி நாஹம் ஸஹிஸ்ஸாமி பமோசனாய. அத² வா, ந ஈஹாமி ந ஸமீஹாமி ந உஸ்ஸஹாமி ந வாயமாமி ந உஸ்ஸாஹம் கரோமி ந உஸ்ஸோள்ஹிம் கரோமி ந தா²மம் கரோமி ந தி⁴திம் கரோமி ந வீரியம் கரோமி ந ச²ந்த³ம் ஜனேமி ந ஸஞ்ஜனேமி ந நிப்³ப³த்தேமி ந அபி⁴னிப்³ப³த்தேமி அஸ்ஸத்³தே⁴ புக்³க³லே அச்ச²ந்தி³கே குஸீதே ஹீனவீரியே அப்படிபஜ்ஜமானே த⁴ம்மதே³ஸனாயாதி. ஏவம்பி நாஹம் ஸஹிஸ்ஸாமி பமோசனாய. அத² வா, நத்த²ஞ்ஞோ கோசி மோசேதா. தே யதி³ மோசேய்யும் ஸகேன தா²மேன ஸகேன ப³லேன ஸகேன வீரியேன ஸகேன பரக்கமேன ஸகேன புரிஸதா²மேன ஸகேன புரிஸப³லேன ஸகேன புரிஸவீரியேன ஸகேன புரிஸபரக்கமேன அத்தனா ஸம்மாபடிபத³ம் அனுலோமபடிபத³ம் அபச்சனீகபடிபத³ம் அன்வத்த²படிபத³ம் த⁴ம்மானுத⁴ம்மபடிபத³ம் படிபஜ்ஜமானா மோசேய்யுந்தி. ஏவம்பி நாஹம் ஸஹிஸ்ஸாமி பமோசனாய.

வுத்தஞ்ஹேதம் ப⁴க³வதா – ‘‘ஸோ வத, சுந்த³, அத்தனா பலிபபலிபன்னோ பரம் பலிபபலிபன்னம் உத்³த⁴ரிஸ்ஸதீதி நேதம் டா²னம் விஜ்ஜதி. ஸோ வத, சுந்த³, அத்தனா அத³ந்தோ அவினீதோ அபரினிப்³பு³தோ பரம் த³மேஸ்ஸதி வினேஸ்ஸதி பரினிப்³பா³பேஸ்ஸதீதி நேதம் டா²னம் விஜ்ஜதீதி. ஏவம்பி நாஹம் ஸஹிஸ்ஸாமி பமோசனாய.

வுத்தஞ்ஹேதம் ப⁴க³வதா –

‘‘அத்தனா ஹி [அத்தனாவ (ப³ஹூஸு) த⁴. ப. 165] கதம் பாபம், அத்தனா ஸம்கிலிஸ்ஸதி;

அத்தனா அகதம் பாபம், அத்தனாவ விஸுஜ்ஜ²தி;

ஸுத்³தி⁴ அஸுத்³தி⁴ பச்சத்தம், நாஞ்ஞோ அஞ்ஞம் விஸோத⁴யே’’தி.

ஏவம்பி நாஹம் ஸஹிஸ்ஸாமி பமோசனாய.

வுத்தஞ்ஹேதம் ப⁴க³வதா – ‘‘ஏவமேவ கோ², ப்³ராஹ்மண, திட்ட²தேவ நிப்³பா³னம் திட்ட²தி நிப்³பா³னகா³மிமக்³கோ³ திட்டா²மஹம் ஸமாத³பேதா, அத² ச பன மம ஸாவகா மயா ஏவம் ஓவதி³யமானா ஏவம் அனுஸாஸியமானா அப்பேகச்சே அச்சந்தனிட்ட²ம் நிப்³பா³னம் ஆராதே⁴ந்தி ஏகச்சே நாராதே⁴ந்தீதி. ஏத்த² க்யாஹம், ப்³ராஹ்மண கரோமி? மக்³க³க்கா²யீ, ப்³ராஹ்மண, ததா²க³தோ. மக்³க³ம் பு³த்³தோ⁴ ஆசிக்க²தி. அத்தனா படிபஜ்ஜமானா முச்சேய்யுந்தி [முஞ்சேய்யுந்தி (ஸ்யா.)]. ஏவம்பி நாஹம் ஸஹிஸ்ஸாமி பமோசனாய’’.

கத²ம்கதி²ம் தோ⁴தக கஞ்சி லோகேதி கத²ம்கதி²ம் புக்³க³லம் ஸகங்க²ம் ஸகி²லம் ஸத்³வேள்ஹகம் ஸவிசிகிச்ச²ம். கஞ்சீதி கஞ்சி க²த்தியம் வா ப்³ராஹ்மணம் வா வேஸ்ஸம் வா ஸுத்³த³ம் வா க³ஹட்ட²ம் வா பப்³ப³ஜிதம் வா தே³வம் வா மனுஸ்ஸம் வா. லோகேதி அபாயலோகே…பே… ஆயதனலோகேதி – கத²ம்கதி²ம் தோ⁴தக கஞ்சி லோகே.

த⁴ம்மஞ்ச ஸேட்ட²ம் ஆஜானமானோதி த⁴ம்மம் ஸேட்ட²ம் வுச்சதி அமதம் நிப்³பா³னம். யோ ஸோ ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹக்க²யோ விராகோ³ நிரோதோ⁴ நிப்³பா³னம். ஸேட்ட²ந்தி அக்³க³ம் ஸேட்ட²ம் விஸேட்ட²ம் பாமோக்க²ம் உத்தமம் பவரம் த⁴ம்மம் ஆஜானமானோ விஜானமானோ படிவிஜானமானோ படிவிஜ்ஜ²மானோதி – த⁴ம்மஞ்ச ஸேட்ட²ம் ஆஜானமானோ.

ஏவம் துவம் ஓக⁴மிமம் தரேஸீதி ஏவம் காமோக⁴ம் ப⁴வோக⁴ம் தி³ட்டோ²க⁴ம் அவிஜ்ஜோக⁴ம் தரேய்யாஸி உத்தரேய்யாஸி பதரேய்யாஸி ஸமதிக்கமேய்யாஸி வீதிவத்தேய்யாஸீதி – ஏவம் துவம் ஓக⁴மிமம் தரேஸி. தேனாஹ ப⁴க³வா –

‘‘நாஹம் ஸஹிஸ்ஸாமி பமோசனாய, கத²ம்கதி²ம் தோ⁴தக கஞ்சி லோகே;

த⁴ம்மஞ்ச ஸேட்ட²ம் ஆஜானமானோ, ஏவம் துவம் ஓக⁴மிமம் தரேஸீ’’தி.

34. அனுஸாஸ ப்³ரஹ்மே கருணாயமானோ, விவேகத⁴ம்மம் யமஹம் விஜஞ்ஞம்;

யதா²ஹம் ஆகாஸோவ [ஆகாஸோ ச (ஸ்யா.)] அப்³யாபஜ்ஜமானோ [அப்³யாபஜ்ஜ²மானோ (ஸ்யா.)], இதே⁴வ ஸந்தோ அஸிதோ சரேய்யம்.

அனுஸாஸ ப்³ரஹ்மே கருணாயமானோதி அனுஸாஸ ப்³ரஹ்மே அனுக்³க³ண்ஹ ப்³ரஹ்மே அனுகம்ப ப்³ரஹ்மேதி – அனுஸாஸ ப்³ரஹ்மே. கருணாயமானோதி கருணாயமானோ அனுத³யமானோ [அனுத்³த³யமானோ (ப³ஹூஸு)] அனுரக்க²மானோ அனுக்³க³ண்ஹமானோ அனுகம்பமானோதி – அனுஸாஸ ப்³ரஹ்மே கருணாயமானோ.

விவேகத⁴ம்மம் யமஹம் விஜஞ்ஞந்தி விவேகத⁴ம்மம் வுச்சதி அமதம் நிப்³பா³னம். யோ ஸோ ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹக்க²யோ விராகோ³ நிரோதோ⁴ நிப்³பா³னம். யமஹம் விஜஞ்ஞந்தி யமஹம் ஜானேய்யம் ஆஜானேய்யம் விஜானேய்யம் படிவிஜானேய்யம் படிவிஜ்ஜே²ய்யம் அதி⁴க³ச்சே²ய்யம் ப²ஸ்ஸேய்யம் ஸச்சி²கரேய்யந்தி – விவேகத⁴ம்மம் யமஹம் விஜஞ்ஞம்.

யதா²ஹம் ஆகாஸோவ அப்³யாபஜ்ஜமானோதி யதா² ஆகாஸோ ந பஜ்ஜதி ந க³ண்ஹதி [நத்தி²… ஸ்யா. … போத்த²கே] ந ப³ஜ்ஜ²தி ந பலிப³ஜ்ஜ²தி, ஏவம் அபஜ்ஜமானோ அக³ண்ஹமானோ அப³ஜ்ஜ²மானோ அபலிப³ஜ்ஜ²மானோதி – ஏவம்பி ஆகாஸோவ அப்³யாபஜ்ஜமானோ. யதா² ஆகாஸோ ந ரஜ்ஜதி லாகா²ய வா ஹலித்³தி³யா [ஹலித்³தே³ன (ஸ்யா.)] வா நீலியா [நீலேன (ஸ்யா.)] வா மஞ்ஜேட்டா²ய வா ஏவம் அரஜ்ஜமானோ அது³ஸ்ஸமானோ அமுய்ஹமானோ அகிலிஸ்ஸமானோதி [அகிலியமானோ (ஸ்யா.)] – ஏவம்பி ஆகாஸோவ அப்³யாபஜ்ஜமானோ. யதா² ஆகாஸோ ந குப்பதி ந ப்³யாபஜ்ஜதி ந பதிலீயதி [பதிட்டி²யதி (க.)] ந படிஹஞ்ஞதி, ஏவம் அகுப்பமானோ அப்³யாபஜ்ஜமானோ அப்பதிலீயமானோ அப்படிஹஞ்ஞமானோ அப்படிஹதமானோதி – ஏவம்பி ஆகாஸோவ அப்³யாபஜ்ஜமானோ.

இதே⁴வ ஸந்தோ அஸிதோ சரேய்யந்தி. இதே⁴வ ஸந்தோதி இதே⁴வ ஸந்தோ இதே⁴வ ஸமானோ இதே⁴வ நிஸின்னோ ஸமானோ இமஸ்மிம்யேவ ஆஸனே நிஸின்னோ ஸமானோ இமிஸ்ஸாயேவ பரிஸாய நிஸின்னோ ஸமானோதி, ஏவம்பி – இதே⁴வ ஸந்தோ. அத² வா, இதே⁴வ ஸந்தோ உபஸந்தோ வூபஸந்தோ நிப்³பு³தோ படிப்பஸ்ஸத்³தோ⁴தி, ஏவம்பி – இதே⁴வ ஸந்தோ. அஸிதோதி த்³வே நிஸ்ஸயா – தண்ஹானிஸ்ஸயோ ச தி³ட்டி²னிஸ்ஸயோ ச…பே… அயம் தண்ஹானிஸ்ஸயோ…பே… அயம் தி³ட்டி²னிஸ்ஸயோ… தண்ஹானிஸ்ஸயம் பஹாய தி³ட்டி²னிஸ்ஸயம் படினிஸ்ஸஜ்ஜித்வா சக்கு²ம் அனிஸ்ஸிதோ, ஸோதம் அனிஸ்ஸிதோ, கா⁴னம் அனிஸ்ஸிதோ, ஜிவ்ஹம் அனிஸ்ஸிதோ, காயம் அனிஸ்ஸிதோ, மனம் அனிஸ்ஸிதோ, ரூபே… ஸத்³தே³… க³ந்தே⁴ … ரஸே… போ²ட்ட²ப்³பே³… த⁴ம்மே… குலம்… க³ணம்… ஆவாஸம்… லாப⁴ம்… யஸம்… பஸம்ஸம்… ஸுக²ம்… சீவரம்… பிண்ட³பாதம்… ஸேனாஸனம்… கி³லானபச்சயபே⁴ஸஜ்ஜபரிக்கா²ரம்… காமதா⁴தும்… ரூபதா⁴தும்… அரூபதா⁴தும்… காமப⁴வம்… ரூபப⁴வம்… அரூபப⁴வம்… ஸஞ்ஞாப⁴வம்… அஸஞ்ஞாப⁴வம்… நேவஸஞ்ஞானாஸஞ்ஞாப⁴வம்… ஏகவோகாரப⁴வம்… சதுவோகாரப⁴வம்… பஞ்சவோகாரப⁴வம்… அதீதம்… அனாக³தம்… பச்சுப்பன்னம்… தி³ட்ட²ஸுதமுதவிஞ்ஞாதப்³பே³ [தி³ட்ட²ம், ஸுதம், முதம், விஞ்ஞாதம், ஸப்³பே³. மஹானி. 46 பஸ்ஸிதப்³ப³ம்] த⁴ம்மே அஸிதோ அனிஸ்ஸிதோ அனல்லீனோ அனுபக³தோ அனஜ்ஜோ²ஸிதோ அனதி⁴முத்தோ நிக்க²ந்தோ நிஸ்ஸடோ [நிஸ்ஸட்டோ² (ஸ்யா.)] விப்பமுத்தோ விஸம்யுத்தோ விமரியாதி³கதேன சேதஸா. சரேய்யந்தி சரேய்யம் விஹரேய்யம் இரியேய்யம் வத்தேய்யம் யபேய்யம் யாபேய்யந்தி – இதே⁴வ ஸந்தோ அஸிதோ சரேய்யம். தேனாஹ ஸோ ப்³ராஹ்மணோ –

‘‘அனுஸாஸ ப்³ரஹ்மே கருணாயமானோ, விவேகத⁴ம்மம் யமஹம் விஜஞ்ஞம்;

யதா²ஹம் ஆகாஸோவ அப்³யாபஜ்ஜமானோ, இதே⁴வ ஸந்தோ அஸிதோ சரேய்ய’’ந்தி.

35. கித்தயிஸ்ஸாமி தே ஸந்திம், [தோ⁴தகாதி ப⁴க³வா]

தி³ட்டே² த⁴ம்மே அனீதிஹம்;

யம் விதி³த்வா ஸதோ சரம், தரே லோகே விஸத்திகம்.

கித்தயிஸ்ஸாமி தே ஸந்திந்தி ராக³ஸ்ஸ ஸந்திம், தோ³ஸஸ்ஸ ஸந்திம், மோஹஸ்ஸ ஸந்திம், கோத⁴ஸ்ஸ ஸந்திம், உபனாஹஸ்ஸ…பே… மக்க²ஸ்ஸ… பளாஸஸ்ஸ… இஸ்ஸாய… மச்ச²ரியஸ்ஸ… மாயாய… ஸாடே²ய்யஸ்ஸ… த²ம்ப⁴ஸ்ஸ… ஸாரம்ப⁴ஸ்ஸ… மானஸ்ஸ… அதிமானஸ்ஸ… மத³ஸ்ஸ… பமாத³ஸ்ஸ… ஸப்³ப³கிலேஸானம்… ஸப்³ப³து³ச்சரிதானம்… ஸப்³ப³த³ரதா²னம்… ஸப்³ப³பரிளாஹானம்… ஸப்³ப³ஸந்தாபானம்… ஸப்³பா³குஸலாபி⁴ஸங்கா²ரானம் ஸந்திம் உபஸந்திம் வூபஸந்திம் நிப்³பு³திம் படிப்பஸ்ஸத்³தி⁴ம் கித்தயிஸ்ஸாமி பகித்தயிஸ்ஸாமி ஆசிக்கி²ஸ்ஸாமி தே³ஸேஸ்ஸாமி பஞ்ஞபேஸ்ஸாமி பட்ட²பேஸ்ஸாமி விவரிஸ்ஸாமி விப⁴ஜிஸ்ஸாமி உத்தானீகரிஸ்ஸாமி பகாஸிஸ்ஸாமீதி – கித்தயிஸ்ஸாமி தே ஸந்திம்.

தோ⁴தகாதி ப⁴க³வாதி. தோ⁴தகாதி ப⁴க³வா தம் ப்³ராஹ்மணம் நாமேன ஆலபதி. ப⁴க³வாதி கா³ரவாதி⁴வசனமேதம்…பே… ஸச்சி²கா பஞ்ஞத்தி, யதி³த³ம் ப⁴க³வாதி – தோ⁴தகாதி ப⁴க³வா.

தி³ட்டே² த⁴ம்மே அனீதிஹந்தி. தி³ட்டே² த⁴ம்மேதி தி³ட்டே² த⁴ம்மே ஞாதே த⁴ம்மே துலிதே த⁴ம்மே தீரிதே த⁴ம்மே விபூ⁴தே த⁴ம்மே விபா⁴விதே த⁴ம்மே ஸப்³பே³ ஸங்கா²ரா அனிச்சாதி…பே… யம் கிஞ்சி ஸமுத³யத⁴ம்மம் ஸப்³ப³ம் தம் நிரோத⁴த⁴ம்மந்தி தி³ட்டே² த⁴ம்மே ஞாதே த⁴ம்மே துலிதே த⁴ம்மே தீரிதே த⁴ம்மே விபா⁴விதே த⁴ம்மே விபூ⁴தே த⁴ம்மேதி, ஏவம்பி – தி³ட்டே² த⁴ம்மே…பே…. அத² வா, து³க்கே² தி³ட்டே² து³க்க²ம் கத²யிஸ்ஸாமி, ஸமுத³யே தி³ட்டே² ஸமுத³யம் கத²யிஸ்ஸாமி, மக்³கே³ தி³ட்டே² மக்³க³ம் கத²யிஸ்ஸாமி, நிரோதே⁴ தி³ட்டே² நிரோத⁴ம் கத²யிஸ்ஸாமீதி, ஏவம்பி – தி³ட்டே² த⁴ம்மே…பே…. அத² வா, ஸந்தி³ட்டி²கம் அகாலிகம் ஏஹிபஸ்ஸிகம் ஓபனேய்யிகம் [ஓபனயிகம் (ஸ்யா. க.)] பச்சத்தம் வேதி³தப்³ப³ம் விஞ்ஞூஹீதி, ஏவம்பி – தி³ட்டே² த⁴ம்மே. அனீதிஹந்தி ந இதிஹீதிஹம் ந இதிகிராய ந பரம்பராய ந பிடகஸம்பதா³ய ந தக்கஹேது ந நயஹேது ந ஆகாரபரிவிதக்கேன ந தி³ட்டி²னிஜ்ஜா²னக்க²ந்தியா ஸாமம் ஸயமபி⁴ஞ்ஞாதம் அத்தபச்சக்க²த⁴ம்மம், தம் கத²யிஸ்ஸாமீதி – தி³ட்டே² த⁴ம்மே அனீதிஹம்.

யம் விதி³த்வா ஸதோ சரந்தி யம் விதி³தம் கத்வா துலயித்வா தீரயித்வா விபா⁴வயித்வா விபூ⁴தம் கத்வா; ‘‘ஸப்³பே³ ஸங்கா²ரா அனிச்சா’’தி விதி³தம் கத்வா துலயித்வா தீரயித்வா விபா⁴வயித்வா விபூ⁴தம் கத்வா; ‘‘ஸப்³பே³ ஸங்கா²ரா து³க்கா²’’தி…பே… ‘‘ஸப்³பே³ த⁴ம்மா அனத்தா’’தி…பே… ‘‘யம் கிஞ்சி ஸமுத³யத⁴ம்மம் ஸப்³ப³ம் தம் நிரோத⁴த⁴ம்ம’’ந்தி விதி³தம் கத்வா துலயித்வா தீரயித்வா விபா⁴வயித்வா விபூ⁴தம் கத்வா. ஸதோதி சதூஹி காரணேஹி ஸதோ – காயே காயானுபஸ்ஸனாஸதிபட்டா²னம் பா⁴வேந்தோ ஸதோ…பே… ஸோ வுச்சதி ஸதோ. சரந்தி சரந்தோ விஹரந்தோ இரியந்தோ வத்தேந்தோ பாலேந்தோ யபேந்தோ யாபேந்தோதி – யம் விதி³த்வா ஸதோ சரம்.

தரே லோகே விஸத்திகந்தி விஸத்திகா வுச்சதி தண்ஹா. யோ ராகோ³ ஸாராகோ³…பே… அபி⁴ஜ்ஜா² லோபோ⁴ அகுஸலமூலம். விஸத்திகாதி கேனட்டே²ன விஸத்திகா…பே… விஸடா வித்த²தாதி விஸத்திகா. லோகேதி அபாயலோகே…பே… ஆயதனலோகே. தரே லோகே விஸத்திகந்தி லோகே வேஸா விஸத்திகா, லோகே வேதம் விஸத்திகம் ஸதோ தரேய்ய உத்தரேய்ய பதரேய்ய ஸமதிக்கமேய்ய வீதிவத்தேய்யாதி – தரே லோகே விஸத்திகம். தேனாஹ ப⁴க³வா –

‘‘கித்தயிஸ்ஸாமி தே ஸந்திம், [தோ⁴தகாதி ப⁴க³வா]

தி³ட்டே² த⁴ம்மே அனீதிஹம்;

யம் விதி³த்வா ஸதோ சரம், தரே லோகே விஸத்திக’’ந்தி.

36. தஞ்சாஹம் அபி⁴னந்தா³மி, மஹேஸி ஸந்திமுத்தமம்;

யம் விதி³த்வா ஸதோ சரம், தரே லோகே விஸத்திகம்.

தஞ்சாஹம் அபி⁴னந்தா³மீதி. தந்தி துய்ஹம் வசனம் ப்³யப்பத²ம் தே³ஸனம் அனுஸாஸனம் அனுஸிட்ட²ம் நந்தா³மி அபி⁴னந்தா³மி மோதா³மி அனுமோதா³மி இச்சா²மி ஸாதி³யாமி பத்த²யாமி பிஹயாமி அபி⁴ஜப்பாமீதி – தஞ்சாஹம் அபி⁴னந்தா³மி.

மஹேஸிஸந்திமுத்தமந்தி. மஹேஸீதி கிம் மஹேஸி ப⁴க³வா? மஹந்தம் ஸீலக்க²ந்த⁴ம் ஏஸீ க³வேஸீ பரியேஸீதி மஹேஸி, மஹந்தம் ஸமாதி⁴க்க²ந்த⁴ம்…பே… கஹம் நராஸபோ⁴தி மஹேஸி. ஸந்திமுத்தமந்தி ஸந்தி வுச்சதி அமதம் நிப்³பா³னம். யோ ஸோ ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹக்க²யோ விராகோ³ நிரோதோ⁴ நிப்³பா³னம். உத்தமந்தி அக்³க³ம் ஸேட்ட²ம் விஸேட்ட²ம் பாமோக்க²ம் உத்தமம் பவரந்தி – மஹேஸி ஸந்திமுத்தமம்.

யம் விதி³த்வா ஸதோ சரந்தி யம் விதி³தம் கத்வா…பே… ‘‘ஸப்³பே³ ஸங்கா²ரா அனிச்சா’’தி விதி³தம் கத்வா துலயித்வா தீரயித்வா விபா⁴வயித்வா விபூ⁴தம் கத்வா; ‘‘ஸப்³பே³ ஸங்கா²ரா து³க்கா²’’தி… ‘‘ஸப்³பே³ த⁴ம்மா அனத்தா’’தி…பே… ‘‘யம் கிஞ்சி ஸமுத³யத⁴ம்மம் ஸப்³ப³ம் தம் நிரோத⁴த⁴ம்ம’’ந்தி விதி³தம் கத்வா துலயித்வா தீரயித்வா விபா⁴வயித்வா விபூ⁴தம் கத்வா. ஸதோதி சதூஹி காரணேஹி ஸதோ – காயே காயானுபஸ்ஸனாஸதிபட்டா²னம் பா⁴வேந்தோ ஸதோ…பே… ஸோ வுச்சதி ஸதோ. சரந்தி சரந்தோ…பே… யாபேந்தோதி – யம் விதி³த்வா ஸதோ சரம்.

தரே லோகே விஸத்திகந்தி. விஸத்திகா வுச்சதி தண்ஹா. யோ ராகோ³ ஸாராகோ³…பே… அபி⁴ஜ்ஜா² லோபோ⁴ அகுஸலமூலம். விஸத்திகாதி கேனட்டே²ன விஸத்திகா…பே… விஸடா வித்த²தாதி விஸத்திகா. லோகேதி அபாயலோகே…பே… ஆயதனலோகே. தரே லோகே விஸத்திகந்தி லோகே வேஸா விஸத்திகா, லோகே வேதம் விஸத்திகம் ஸதோ தரேய்யம் உத்தரேய்யம்…பே… வீதிவத்தேய்யந்தி – தரே லோகே விஸத்திகம். தேனாஹ ஸோ ப்³ராஹ்மணோ –

‘‘தஞ்சாஹம் அபி⁴னந்தா³மி, மஹேஸி ஸந்திமுத்தமம்;

யம் விதி³த்வா ஸதோ சரம், தரே லோகே விஸத்திக’’ந்தி.

37. யம் கிஞ்சி ஸம்பஜானாஸி, [தோ⁴தகாதி ப⁴க³வா]

உத்³த⁴ம் அதோ⁴ திரியஞ்சாபி மஜ்ஜே²;

ஏதம் விதி³த்வா ஸங்கோ³தி லோகே, ப⁴வாப⁴வாய மாகாஸி தண்ஹம்.

யம் கிஞ்சி ஸம்பஜானாஸீதி யம் கிஞ்சி ஸம்பஜானாஸி ஆஜானாஸி படிவிஜானாஸி படிவிஜ்ஜ²ஸீதி – யம் கிஞ்சி ஸம்பஜானாஸி. தோ⁴தகாதி ப⁴க³வாதி. தோ⁴தகாதி ப⁴க³வா தம் ப்³ராஹ்மணம் நாமேன ஆலபதி. ப⁴க³வாதி கா³ரவாதி⁴வசனமேதம்…பே… ஸச்சி²கா பஞ்ஞத்தி, யதி³த³ம் ப⁴க³வாதி – தோ⁴தகாதி ப⁴க³வா.

உத்³த⁴ம் அதோ⁴ திரியஞ்சாபி மஜ்ஜே²தி. உத்³த⁴ந்தி அனாக³தம்; அதோ⁴தி அதீதம்; திரியஞ்சாபி மஜ்ஜே²தி பச்சுப்பன்னம். உத்³த⁴ந்தி தே³வலோகோ; அதோ⁴தி அபாயலோகோ; திரியஞ்சாபி மஜ்ஜே²தி மனுஸ்ஸலோகோ. அத² வா, உத்³த⁴ந்தி குஸலா த⁴ம்மா; அதோ⁴தி அகுஸலா த⁴ம்மா; திரியஞ்சாபி மஜ்ஜே²தி அப்³யாகதா த⁴ம்மா. உத்³த⁴ந்தி அரூபதா⁴து; அதோ⁴தி காமதா⁴து; திரியஞ்சாபி மஜ்ஜே²தி ரூபதா⁴து. உத்³த⁴ந்தி ஸுகா² வேத³னா; அதோ⁴தி து³க்கா² வேத³னா; திரியஞ்சாபி மஜ்ஜே²தி அது³க்க²மஸுகா² வேத³னா. உத்³த⁴ந்தி உத்³த⁴ம் பாத³தலா; அதோ⁴தி அதோ⁴ கேஸமத்த²கா; திரியஞ்சாபி மஜ்ஜே²தி வேமஜ்ஜே²தி – உத்³த⁴ம் அதோ⁴ திரியஞ்சாபி மஜ்ஜே².

ஏதம் விதி³த்வா ஸங்கோ³தி லோகேதி ஸங்கோ³ ஏஸோ லக்³க³னம் ஏதம் ப³ந்த⁴னம் ஏதம் பலிபோ³தோ⁴ ஏஸோதி ஞத்வா ஜானித்வா துலயித்வா தீரயித்வா விபா⁴வயித்வா விபூ⁴தம் கத்வாதி – ஏதம் விதி³த்வா ஸங்கோ³தி லோகே.

ப⁴வாப⁴வாய மாகாஸி தண்ஹந்தி. தண்ஹாதி ரூபதண்ஹா ஸத்³த³தண்ஹா…பே… த⁴ம்மதண்ஹா. ப⁴வாப⁴வாயாதி ப⁴வாப⁴வாய கம்மப⁴வாய புனப்³ப⁴வாய காமப⁴வாய, கம்மப⁴வாய காமப⁴வாய புனப்³ப⁴வாய ரூபப⁴வாய, கம்மப⁴வாய ரூபப⁴வாய புனப்³ப⁴வாய அரூபப⁴வாய, கம்மப⁴வாய அரூபப⁴வாய புனப்³ப⁴வாய புனப்புனப்³ப⁴வாய, புனப்புனக³தியா புனப்புனஉபபத்தியா புனப்புனபடிஸந்தி⁴யா புனப்புனஅத்தபா⁴வாபி⁴னிப்³ப³த்தியா தண்ஹம் மாகாஸி மா ஜனேஸி மா ஸஞ்ஜனேஸி மா நிப்³ப³த்தேஸி மாபி⁴னிப்³ப³த்தேஸி, பஜஹ வினோதே³ஹி ப்³யந்தீகரோஹி அனபா⁴வம் க³மேஹீதி – ப⁴வாப⁴வாய மாகாஸி தண்ஹந்தி. தேனாஹ ப⁴க³வா –

‘‘யம் கிஞ்சி ஸம்பஜானாஸி, [தோ⁴தகாதி ப⁴க³வா]

உத்³த⁴ம் அதோ⁴ திரியஞ்சாபி மஜ்ஜே²;

ஏதம் விதி³த்வா ஸங்கோ³தி லோகே, ப⁴வாப⁴வாய மாகாஸி தண்ஹ’’ந்தி.

ஸஹ கா³தா²பரியோஸானா…பே… ஸத்தா² மே, ப⁴ந்தே ப⁴க³வா, ஸாவகோஹமஸ்மீதி.

தோ⁴தகமாணவபுச்சா²னித்³தே³ஸோ பஞ்சமோ.