9. ஸூரியதபனபஞ்ஹோ

9. ‘‘ப⁴ந்தே நாக³ஸேன, அயம் ஸூரியோ ஸப்³ப³காலம் கடி²னம் தபதி, உதா³ஹு கிஞ்சிகாலம் மந்த³ம் தபதீ’’தி? ‘‘ஸப்³ப³காலம், மஹாராஜ, ஸூரியோ கடி²னம் தபதி, ந கிஞ்சிகாலம் மந்த³ம் தபதீ’’தி. ‘‘யதி³, ப⁴ந்தே நாக³ஸேன, ஸூரியோ ஸப்³ப³காலம் கடி²னம் தபதி, கிஸ்ஸ பன அப்பேகதா³ ஸூரியோ கடி²னம் தபதி, அப்பேகதா³ மந்த³ம் தபதீ’’தி? ‘‘சத்தாரோமே, மஹாராஜ, ஸூரியஸ்ஸ ரோகா³, யேஸம் அஞ்ஞதரேன ரோகே³ன படிபீளிதோ ஸூரியோ மந்த³ம் தபதி. கதமே சத்தாரோ? அப்³ப⁴ம், மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ம் தபதி. மஹிகா, மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ம் தபதி. மேகோ⁴, மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ம் தபதி. ராஹு, மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ம் தபதி. இமே கோ², மஹாராஜ, சத்தாரோ ஸூரியஸ்ஸ ரோகா³, யேஸம் அஞ்ஞதரேன ரோகே³ன படிபீளிதோ ஸூரியோ மந்த³ம் தபதீ’’தி. ‘‘அச்ச²ரியம், ப⁴ந்தே நாக³ஸேன, அப்³பு⁴தம், ப⁴ந்தே நாக³ஸேன, ஸூரியஸ்ஸபி தாவ தேஜோஸம்பன்னஸ்ஸ ரோகோ³ உப்பஜ்ஜிஸ்ஸதி, கிமங்க³ம் பன அஞ்ஞேஸம் ஸத்தானம், நத்தி², ப⁴ந்தே, ஏஸா விப⁴த்தி அஞ்ஞஸ்ஸ அஞ்ஞத்ர தவாதி³ஸேன பு³த்³தி⁴மதா’’தி.

ஸூரியதபனபஞ்ஹோ நவமோ.