1. நிப்பபஞ்சபஞ்ஹோ

1. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா ‘நிப்பபஞ்சாராமா, பி⁴க்க²வே, விஹரத² நிப்பபஞ்சரதினோ’தி, கதமம் தம் நிப்பபஞ்ச’’ந்தி? ‘‘ஸோதாபத்திப²லம், மஹாராஜ, நிப்பபஞ்சம், ஸகதா³கா³மிப²லம் நிப்பபஞ்சம், அனாகா³மிப²லம் நிப்பபஞ்சம், அரஹத்தப²லம் நிப்பபஞ்ச’’ந்தி.

‘‘யதி³, ப⁴ந்தே நாக³ஸேன, ஸோதாபத்திப²லம் நிப்பபஞ்சம், ஸகதா³கா³மிஅனாகா³மிஅரஹத்தப²லம் நிப்பபஞ்சம், கிஸ்ஸ பன இமே பி⁴க்கூ² உத்³தி³ஸந்தி பரிபுச்ச²ந்தி ஸுத்தம் கே³ய்யம் வேய்யாகரணம் கா³த²ம் உதா³னம் இதிவுத்தகம் ஜாதகம் அப்³பு⁴தத⁴ம்மம் வேத³ல்லம், நவகம்மேன பலிபு³ஜ்ஜ²ந்தி தா³னேன ச பூஜாய ச, நனு தே ஜினப்படிக்கி²த்தம் கம்மம் கரோதீ’’தி?

‘‘யே தே, மஹாராஜ, பி⁴க்கூ² உத்³தி³ஸந்தி பரிபுச்ச²ந்தி ஸுத்தம் கே³ய்யம் வேய்யாகரணம் கா³த²ம் உதா³னம் இதிவுத்தகம் ஜாதகம் அப்³பு⁴தத⁴ம்மம் வேத³ல்லம், நவகம்மேன பலிபு³ஜ்ஜ²ந்தி தா³னேன ச பூஜாய ச, ஸப்³பே³ தே நிப்பபஞ்சஸ்ஸ பத்தியா கரோந்தி. யே தே, மஹாராஜ, ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன நிப்பபச ஹோந்தி. யே பன தே பி⁴க்கூ² மஹாரஜக்கா², தே இமேஹி பயோகே³ஹி நிப்பபஞ்சா ஹோந்தி.

‘‘யதா², மஹாராஜ, ஏகோ புரிஸோ கே²த்தே பீ³ஜம் ரோபேத்வா அத்தனோ யதா²ப³லவீரியேன வினா பாகாரவதியா த⁴ஞ்ஞம் உத்³த⁴ரேய்ய, ஏகோ புரிஸோ கே²த்தே பீ³ஜம் ரோபேத்வா வனம் பவிஸித்வா கட்ட²ஞ்ச ஸாக²ஞ்ச சி²ந்தி³த்வா வதிபாகாரம் கத்வா த⁴ஞ்ஞம் உத்³த⁴ரேய்ய. யா தத்த² தஸ்ஸ வதிபாகாரபரியேஸனா, ஸா த⁴ஞ்ஞத்தா²ய. ஏவமேவ கோ², மஹாராஜ, யே தே ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன நிப்பபஞ்சா ஹோந்தி, வினா வதிபாகாரம் புரிஸோ விய த⁴ஞ்ஞுத்³தா⁴ரோ. யே பன தே பி⁴க்கூ² மஹாரஜக்கா², தே இமேஹி பயோகே³ஹி நிப்பபஞ்சா ஹோந்தி, வதிபாகாரம் கத்வா புரிஸோ விய த⁴ஞ்ஞுத்³தா⁴ரோ.

‘‘யதா² வா பன, மஹாராஜ, புரிஸோ மஹதிமஹந்தே அம்ப³ருக்க²மத்த²கே ப²லபிண்டி³ ப⁴வேய்ய, அத² தத்த² யோ கோசி இத்³தி⁴மா ஆக³ந்த்வா தஸ்ஸ ப²லம் ஹரேய்ய, யோ பன தத்த² அனித்³தி⁴மா, ஸோ கட்ட²ஞ்ச வல்லிஞ்ச சி²ந்தி³த்வா நிஸ்ஸேணிம் ப³ந்தி⁴த்வா தாய தம் ருக்க²ம் அபி⁴ருஹித்வா ப²லம் ஹரேய்ய. யா தத்த² தஸ்ஸ நிஸ்ஸேணிபரியேஸனா, ஸா ப²லத்தா²ய. ஏவமேவ கோ², மஹாராஜ, யே தே ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன நிப்பபஞ்சா ஹோந்தி, இத்³தி⁴மா விய ருக்க²ப²லம் ஹரந்தோ. யே பன தே பி⁴க்கூ² மஹாரஜக்கா², தே இமினா பயோகே³ன ஸச்சானி அபி⁴ஸமேந்தி, நிஸ்ஸேணியா விய புரிஸோ ருக்க²ப²லம் ஹரந்தோ.

‘‘யதா² வா பன, மஹாராஜ, ஏகோ புரிஸோ அத்த²கரணிகோ ஏககோ யேவ ஸாமிகம் உபக³ந்த்வா அத்த²ம் ஸாதே⁴தி. ஏகோ த⁴னவா த⁴னவஸேன பரிஸம் வட்³டே⁴த்வா பரிஸாய அத்த²ம் ஸாதே⁴தி. யா தத்த² தஸ்ஸ பரிஸபரியேஸனா, ஸா அத்த²த்தா²ய. ஏவமேவ கோ², மஹாராஜ, யே தே ஸபா⁴வபரிஸுத்³தா⁴ புப்³பே³ வாஸிதவாஸனா, தே ஏகசித்தக்க²ணேன ச²ஸு அபி⁴ஞ்ஞாஸு வஸிபா⁴வம் பாபுணந்தி, புரிஸோ விய ஏககோ அத்த²ஸித்³தி⁴ம் கரோந்தோ. யே பன தே பி⁴க்கூ² மஹாரஜக்கா², தே இமேஹி பயோகே³ஹி ஸாமஞ்ஞத்த²மபி⁴ஸாதே⁴ந்தி, பரிஸாய விய புரிஸோ அத்த²ஸித்³தி⁴ம் கரோந்தோ.

‘‘உத்³தே³ஸோபி, மஹாராஜ, ப³ஹுகாரோ, பரிபுச்சா²பி ப³ஹுகாரா, நவகம்மம்பி ப³ஹுகாரம், தா³னம்பி ப³ஹுகாரம், பூஜாபி ப³ஹுகாரா தேஸு தேஸு கரணீயேஸு. யதா², மஹாராஜ, புரிஸோ ராஜூபஸேவீ கதாவீ அமச்சப⁴டப³லதோ³வாரிகஅனீகட்ட²பாரிஸஜ்ஜஜனேஹி, தே தஸ்ஸ கரணீயே அனுப்பத்தே ஸப்³பே³பி உபகாரா ஹோந்தி. ஏவமேவ கோ², மஹாராஜ, உத்³தே³ஸோபி ப³ஹுகாரோ, பரிபுச்சா²பி ப³ஹுகாரா, நவகம்மம்பி ப³ஹுகாரம், தா³னம்பி ப³ஹுகாரம், பூஜாபி ப³ஹுகாரா தேஸு தேஸு கரணீயேஸு. யதி³, மஹாராஜ, ஸப்³பே³பி அபி⁴ஜாதிபரிஸுத்³தா⁴ ப⁴வேய்யும், அனுஸாஸனேன [அனுஸாஸகேன (ஸீ. பீ.)] கரணீயம் ந ப⁴வேய்ய. யஸ்மா ச கோ², மஹாராஜ, ஸவனேன கரணீயம் ஹோதி, தே²ரோ, மஹாராஜ, ஸாரிபுத்தோ அபரிமிதமஸங்கே²ய்யகப்பம் உபாதா³ய உபசிதகுஸலமூலோ பஞ்ஞாய கோடிம் க³தோ, ஸோபி வினா ஸவனேன நாஸக்கி² ஆஸவக்க²யம் பாபுணிதும். தஸ்மா, மஹாராஜ, ப³ஹுகாரம் ஸவனம், ததா² உத்³தே³ஸோபி பரிபுச்சா²பி. தஸ்மா உத்³தே³ஸபரிபுச்சா²பி நிப்பபஞ்சா ஸங்க²தா’’தி. ‘‘ஸுனிஜ்ஜா²பிதோ, ப⁴ந்தே நாக³ஸேன, பஞ்ஹோ, ஏவமேதம் ததா² ஸம்படிச்சா²மீ’’தி.

நிப்பபஞ்சபஞ்ஹோ பட²மோ.