4. மக்³கு³ப்பாத³னபஞ்ஹோ

4. ‘‘ப⁴ந்தே நாக³ஸேன, பா⁴ஸிதம்பேதம் ப⁴க³வதா ‘ததா²க³தோ பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி. புன ச ப⁴ணிதம் ‘அத்³த³ஸம் க்²வாஹம், பி⁴க்க²வே, புராணம் மக்³க³ம் புராணம் அஞ்ஜஸம் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி. யதி³, ப⁴ந்தே நாக³ஸேன, ததா²க³தோ அனுப்பன்னஸ்ஸ மக்³க³ஸ்ஸ உப்பாதே³தா, தேன ஹி ‘அத்³த³ஸம் க்²வாஹம், பி⁴க்க²வே, புராணம் மக்³க³ம் புராணம் அஞ்ஜஸம் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி யம் வசனம், தம் மிச்சா². யதி³ ததா²க³தேன ப⁴ணிதம் ‘அத்³த³ஸம் க்²வாஹம், பி⁴க்க²வே, புராணம் மக்³க³ம் புராணம் அஞ்ஜஸம் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி, தேன ஹி ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி தம்பி வசனம் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.

‘‘பா⁴ஸிதம்பேதம், மஹாராஜ, ப⁴க³வதா ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி. ப⁴ணிதஞ்ச ‘அத்³த³ஸம் க்²வாஹம், பி⁴க்க²வே, புராணம் மக்³க³ம் புராணம் அஞ்ஜஸம் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி, தம் த்³வயம்பி ஸபா⁴வவசனமேவ, புப்³ப³கானம், மஹாராஜ, ததா²க³தானம் அந்தரதா⁴னேன அஸதி அனுஸாஸகே மக்³கோ³ அந்தரதா⁴யி, தம் [ஸோ தம் (ஸீ. பீ. க.)] ததா²க³தோ மக்³க³ம் லுக்³க³ம் பலுக்³க³ம் கூ³ள்ஹம் பிஹிதம் படிச்ச²ன்னம் அஸஞ்சரணம் பஞ்ஞாசக்கு²னா ஸம்பஸ்ஸமானோ [ஸம்மஸமானோ (ஸீ. பீ.)] அத்³த³ஸ புப்³ப³கேஹி ஸம்மாஸம்பு³த்³தே⁴ஹி அனுயாதம், தம்காரணா ஆஹ ‘அத்³த³ஸம் க்²வாஹம், பி⁴க்க²வே, புராணம் மக்³க³ம் புராணம் அஞ்ஜஸம் புப்³ப³கேஹி ஸம்மாஸம்பு³த்³தே⁴ஹி அனுயாத’ந்தி.

‘‘புப்³ப³கானம், மஹாராஜ, ததா²க³தானம் அந்தரதா⁴னேன அஸதி அனுஸாஸகே லுக்³க³ம் பலுக்³க³ம் கூ³ள்ஹம் பிஹிதம் படிச்ச²ன்னம் அஸஞ்சரணம் மக்³க³ம் யம் தா³னி ததா²க³தோ ஸஞ்சரணம் அகாஸி, தம்காரணா ஆஹ ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.

‘‘இத⁴, மஹாராஜ, ரஞ்ஞோ சக்கவத்திஸ்ஸ அந்தரதா⁴னேன மணிரதனம் கி³ரிஸிக²ந்தரே நிலீயதி, அபரஸ்ஸ சக்கவத்திஸ்ஸ ஸம்மாபடிபத்தியா உபக³ச்ச²தி, அபி நு கோ² தம், மஹாராஜ, மணிரதனம் தஸ்ஸ பகத’’ந்தி? ‘‘ந ஹி, ப⁴ந்தே, பாகதிகம் யேவ தம் மணிரதனம், தேன பன நிப்³ப³த்தித’’ந்தி [நிப்³ப³த்தந்தி (ஸீ. பீ.)]. ‘‘ஏவமேவ கோ², மஹாராஜ, பாகதிகம் புப்³ப³கேஹி ததா²க³தேஹி அனுசிண்ணம் அட்ட²ங்கி³கம் ஸிவம் மக்³க³ம் அஸதி அனுஸாஸகே லுக்³க³ம் பலுக்³க³ம் கூ³ள்ஹம் பிஹிதம் படிச்ச²ன்னம் அஸஞ்சரணம் ப⁴க³வா பஞ்ஞாசக்கு²னா ஸம்பஸ்ஸமானோ உப்பாதே³ஸி, ஸஞ்சரணம் அகாஸி, தம்காரணா ஆஹ ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.

‘‘யதா² வா பன, மஹாராஜ, ஸந்தம் யேவ புத்தம் யோனியா ஜனயித்வா மாதா ‘ஜனிகா’தி வுச்சதி, ஏவமேவ கோ², மஹாராஜ, ததா²க³தோ ஸந்தம் யேவ மக்³க³ம் லுக்³க³ம் பலுக்³க³ம் கூ³ள்ஹம் பிஹிதம் படிச்ச²ன்னம் அஸஞ்சரணம் பஞ்ஞாசக்கு²னா ஸம்பஸ்ஸமானோ உப்பாதே³ஸி, ஸஞ்சரணம் அகாஸி, தம்காரணா ஆஹ ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.

‘‘யதா² வா பன, மஹாராஜ, கோசி புரிஸோ யம் கிஞ்சி நட்ட²ம் பஸ்ஸதி, ‘தேன தம் ப⁴ண்ட³ம் நிப்³ப³த்தித’ந்தி ஜனோ வோஹரதி, ஏவமேவ கோ², மஹாராஜ, ததா²க³தோ ஸந்தம் யேவ மக்³க³ம் லுக்³க³ம் பலுக்³க³ம் கூ³ள்ஹம் பிஹிதம் படிச்ச²ன்னம் அஸஞ்சரணம் பஞ்ஞாசக்கு²னா ஸம்பஸ்ஸமானோ உப்பாதே³ஸி, ஸஞ்சரணம் அகாஸி, தம்காரணா ஆஹ ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’தி.

‘‘யதா² வா பன, மஹாராஜ, கோசி புரிஸோ வனம் ஸோதே⁴த்வா பூ⁴மிம் நீஹரதி, ‘தஸ்ஸ ஸா பூ⁴மீ’தி ஜனோ வோஹரதி, ந சேஸா பூ⁴மி தேன பவத்திதா, தம் பூ⁴மிம் காரணம் கத்வா பூ⁴மிஸாமிகோ நாம ஹோதி, ஏவமேவ கோ², மஹாராஜ, ததா²க³தோ ஸந்தம் யேவ மக்³க³ம் லுக்³க³ம் பலுக்³க³ம் கூ³ள்ஹம் பிஹிதம் படிச்ச²ன்னம் அஸஞ்சரணம் பஞ்ஞாய ஸம்பஸ்ஸமானோ உப்பாதே³ஸி, ஸஞ்சரணம் அகாஸி, தம்காரணா ஆஹ ‘ததா²க³தோ, பி⁴க்க²வே, அரஹம் ஸம்மாஸம்பு³த்³தோ⁴ அனுப்பன்னஸ்ஸ மக்³க³ஸ்ஸ உப்பாதே³தா’’’தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

மக்³கு³ப்பாத³னபஞ்ஹோ சதுத்தோ².