5. ஸிவிராஜசக்கு²தா³னபஞ்ஹோ

5. ‘‘ப⁴ந்தே நாக³ஸேன, தும்ஹே ஏவம் ப⁴ணத² ‘ஸிவிராஜேன யாசகஸ்ஸ சக்கூ²னி தி³ன்னானி, அந்த⁴ஸ்ஸ ஸதோ புன தி³ப்³ப³சக்கூ²னி உப்பன்னானீ’தி, ஏதம்பி வசனம் ஸகஸடம் ஸனிக்³க³ஹம் ஸதோ³ஸம் ‘ஹேதுஸமுக்³கா⁴தே அஹேதுஸ்மிம் அவத்து²ஸ்மிம் நத்தி² தி³ப்³ப³சக்கு²ஸ்ஸ உப்பாதோ³’தி ஸுத்தே வுத்தம், யதி³, ப⁴ந்தே நாக³ஸேன, ஸிவிராஜேன யாசகஸ்ஸ சக்கூ²னி தி³ன்னானி, தேன ஹி ‘புன தி³ப்³ப³சக்கூ²னி உப்பன்னானீ’தி யம் வசனம், தம் மிச்சா²; யதி³ தி³ப்³ப³சக்கூ²னி உப்பன்னானி, தேன ஹி ‘ஸிவிராஜேன யாசகஸ்ஸ சக்கூ²னி தி³ன்னானீ’தி யம் வசனம், தம்பி மிச்சா². அயம்பி உப⁴தோ கோடிகோ பஞ்ஹோ க³ண்டி²தோபி க³ண்டி²தரோ வேட²தோபி வேட²தரோ க³ஹனதோபி க³ஹனதரோ, ஸோ தவானுப்பத்தோ, தத்த² ச²ந்த³மபி⁴ஜனேஹி நிப்³பா³ஹனாய பரவாதா³னம் நிக்³க³ஹாயா’’தி.

‘‘தி³ன்னானி, மஹாராஜ, ஸிவிராஜேன யாசகஸ்ஸ சக்கூ²னி, தத்த² மா விமதிம் உப்பாதே³ஹி, புன தி³ப்³பா³னி ச சக்கூ²னி உப்பன்னானி, தத்தா²பி மா விமதிம் ஜனேஹீ’’தி. ‘‘அபி நு கோ², ப⁴ந்தே நாக³ஸேன, ஹேதுஸமுக்³கா⁴தே அஹேதுஸ்மிம் அவத்து²ஸ்மிம் தி³ப்³ப³சக்கு² உப்பஜ்ஜதீ’’தி? ‘‘ந ஹி, மஹாராஜா’’தி. ‘‘கிம் பன, ப⁴ந்தே, ஏத்த² காரணம், யேன காரணேன ஹேதுஸமுக்³கா⁴தே அஹேதுஸ்மிம் அவத்து²ஸ்மிம் தி³ப்³ப³சக்கு² உப்பஜ்ஜதி, இங்க⁴ தாவ காரணேன மம் ஸஞ்ஞாபேஹீ’’தி?

‘‘கிம் பன, மஹாராஜ, அத்தி² லோகே ஸச்சம் நாம, யேன ஸச்சவாதி³னோ ஸச்சகிரியம் கரோந்தீ’’தி? ‘‘ஆம, ப⁴ந்தே, அத்தி² லோகே ஸச்சம் நாம, ஸச்சேன, ப⁴ந்தே நாக³ஸேன, ஸச்சவாதி³னோ ஸச்சகிரியம் கத்வா தே³வம் வஸ்ஸாபேந்தி, அக்³கி³ம் நிப்³பா³பேந்தி, விஸம் படிஹனந்தி, அஞ்ஞம்பி விவித⁴ம் கத்தப்³ப³ம் கரோந்தீ’’தி. ‘‘தேன ஹி, மஹாராஜ, யுஜ்ஜதி ஸமேதி ஸிவிராஜஸ்ஸ ஸச்சப³லேன தி³ப்³ப³சக்கூ²னி உப்பன்னானீதி, ஸச்சப³லேன, மஹாராஜ, அவத்து²ஸ்மிம் தி³ப்³ப³சக்கு² உப்பஜ்ஜதி, ஸச்சம் யேவ தத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³ய.

‘‘யதா², மஹாராஜ, யே கேசி ஸத்தா ஸச்சமனுகா³யந்தி ‘மஹாமேகோ⁴ பவஸ்ஸதூ’தி, தேஸம் ஸஹ ஸச்சமனுகீ³தேன மஹாமேகோ⁴ பவஸ்ஸதி, அபி நு கோ², மஹாராஜ, அத்தி² ஆகாஸே வஸ்ஸஹேது ஸன்னிசிதோ ‘யேன ஹேதுனா மஹாமேகோ⁴ பவஸ்ஸதீ’’’தி? ‘‘ந ஹி, ப⁴ந்தே, ஸச்சம் யேவ தத்த² ஹேது ப⁴வதி மஹதோ மேக⁴ஸ்ஸ பவஸ்ஸனாயா’’தி. ‘‘ஏவமேவ கோ², மஹாராஜ, நத்தி² தஸ்ஸ பகதிஹேது, ஸச்சம் யேவேத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³யாதி.

‘‘யதா² வா பன, மஹாராஜ, யே கேசி ஸத்தா ஸச்சமனுகா³யந்தி ‘ஜலிதபஜ்ஜலிதமஹாஅக்³கி³க்க²ந்தோ⁴ படினிவத்ததூ’தி, தேஸம் ஸஹ ஸச்சமனுகீ³தேன ஜலிதபஜ்ஜலிதமஹாஅக்³கி³க்க²ந்தோ⁴ க²ணேன படினிவத்ததி. அபி நு கோ², மஹாராஜ, அத்தி² தஸ்மிம் ஜலிதபஜ்ஜலிதே மஹாஅக்³கி³க்க²ந்தே⁴ ஹேது ஸன்னிசிதோ ‘யேன ஹேதுனா ஜலிதபஜ்ஜலிதமஹாஅக்³கி³க்க²ந்தோ⁴ க²ணேன படினிவத்ததீ’’தி? ‘‘ந ஹி, ப⁴ந்தே, ஸச்சம் யேவ தத்த² வத்து² ஹோதி தஸ்ஸ ஜலிதபஜ்ஜலிதஸ்ஸ மஹாஅக்³கி³க்க²ந்த⁴ஸ்ஸ க²ணேன படினிவத்தனாயா’’தி. ‘‘ஏவமேவ கோ², மஹாராஜ, நத்தி² தஸ்ஸ பகதிஹேது, ஸச்சம் யேவேத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³யாதி.

‘‘யதா² வா பன, மஹாராஜ, யே கேசி ஸத்தா ஸச்சமனுகா³யந்தி ‘விஸம் ஹலாஹலம் அக³த³ம் ப⁴வதூ’தி. தேஸம் ஸஹ ஸச்சமனுகீ³தேன விஸம் ஹலாஹலம் க²ணேன அக³த³ம் ப⁴வதி, அபி நு கோ², மஹாராஜ, அத்தி² தஸ்மிம் ஹலாஹலவிஸே ஹேது ஸன்னிசிதோ ‘யேன ஹேதுனா விஸம் ஹலாஹலம் க²ணேன அக³த³ம் ப⁴வதீ’’’தி? ‘‘ந ஹி, ப⁴ந்தே, ஸச்சம் யேவ தத்த² ஹேது ப⁴வதி விஸஸ்ஸ ஹலாஹலஸ்ஸ க²ணேன படிகா⁴தாயா’’தி. ‘‘ஏவமேவ கோ², மஹாராஜ, வினா பகதிஹேதும் ஸச்சம் யேவேத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³யாதி.

‘‘சதுன்னம்பி, மஹாராஜ, அரியஸச்சானம் படிவேதா⁴ய நத்த²ஞ்ஞம் வத்து², ஸச்சம் வத்து²ம் கத்வா சத்தாரி அரியஸச்சானி படிவிஜ்ஜ²ந்தீதி. அத்தி², மஹாராஜ, சீனவிஸயே சீனராஜா, ஸோ மஹாஸமுத்³தே³ கீளிதுகாமோ [ப³லிம் காதுகாமோ (ஸீ. பீ.)] சதுமாஸே சதுமாஸே ஸச்சகிரியம் கத்வா ஸஹ ரதே²ன அந்தோமஹாஸமுத்³தே³ யோஜனம் பவிஸதி, தஸ்ஸ ரத²ஸீஸஸ்ஸ புரதோ புரதோ மஹாவாரிக்க²ந்தோ⁴ படிக்கமதி, நிக்க²ந்தஸ்ஸ புன ஓத்த²ரதி, அபி நு கோ², மஹாராஜ, ஸோ மஹாஸமுத்³தோ³ ஸதே³வமனுஸ்ஸேனபி லோகேன பகதிகாயப³லேன ஸக்கா படிக்கமாபேது’’ந்தி? ‘‘அதிபரித்தகேபி, ப⁴ந்தே, தளாகே உத³கம் ந ஸக்கா ஸதே³வமனுஸ்ஸேனபி லோகேன பகதிகாயப³லேன படிக்கமாபேதும், கிம் பன மஹாஸமுத்³தே³ உத³க’’ந்தி? ‘‘இமினாபி, மஹாராஜ, காரணேன ஸச்சப³லம் ஞாதப்³ப³ம் ‘நத்தி² தம் டா²னம், யம் ஸச்சேன ந பத்தப்³ப³’ந்தி.

‘‘நக³ரே, மஹாராஜ, பாடலிபுத்தே அஸோகோ த⁴ம்மராஜா ஸனேக³மஜானபத³அமச்சப⁴டப³லமஹாமத்தேஹி பரிவுதோ க³ங்க³ம் நதி³ம் [க³ங்கா³னதி³ம் (ஸீ.)] நவஸலிலஸம்புண்ணம் ஸமதித்தி²கம் ஸம்ப⁴ரிதம் பஞ்சயோஜனஸதாயாமம் யோஜனபுது²லம் ஸந்த³மானம் தி³ஸ்வா அமச்சே ஏவமாஹ ‘அத்தி² கோசி, ப⁴ணே, ஸமத்தோ², யோ இமம் மஹாக³ங்க³ம் படிஸோதம் ஸந்தா³பேது’ந்தி. அமச்சா ஆஹம்ஸு ‘து³க்கரம் தே³வா’தி.

‘‘தஸ்மிம் யேவ க³ங்கா³கூலே டி²தா ப³ந்து⁴மதீ நாம க³ணிகா அஸ்ஸோஸி ரஞ்ஞா கிர ஏவம் வுத்தம் ‘ஸக்கா நு கோ² இமம் மஹாக³ங்க³ம் படிஸோதம் ஸந்தா³பேது’ந்தி, ஸா ஏவமாஹ ‘அஹஞ்ஹி நக³ரே பாடலிபுத்தே க³ணிகா ரூபூபஜீவினீ அந்திமஜீவிகா, மம தாவ ராஜா ஸச்சகிரியம் பஸ்ஸதூ’தி. அத² ஸா ஸச்சகிரியம் அகாஸி, ஸஹ தஸ்ஸா ஸச்சகிரியாய க²ணேன ஸா மஹாக³ங்கா³ க³ளக³ளாயந்தீ படிஸோதம் ஸந்தி³த்த² மஹதோ ஜனகாயஸ்ஸ பஸ்ஸதோ.

‘‘அத² ராஜா க³ங்கா³ய ஆவட்டஊமிவேக³ஜனிதம் ஹலாஹலஸத்³த³ம் ஸுத்வா விம்ஹிதோ அச்ச²ரியப்³பு⁴தஜாதோ அமச்சே ஏவமாஹ ‘கிஸ்ஸாயம், ப⁴ணே, மஹாக³ங்கா³ படிஸோதம் ஸந்த³தீ’தி? ‘ப³ந்து⁴மதீ, மஹாராஜ, க³ணிகா தவ வசனம் ஸுத்வா ஸச்சகிரியம் அகாஸி, தஸ்ஸா ஸச்சகிரியாய மஹாக³ங்கா³ உத்³த⁴ம்முகா² ஸந்த³தீ’தி.

‘‘அத² ஸம்விக்³க³ஹத³யோ ராஜா துரிததுரிதோ ஸயம் க³ந்த்வா தம் க³ணிகம் புச்சி² ‘ஸச்சம் கிர, ஜே, தயா ஸச்சகிரியாய அயம் க³ங்கா³ படிஸோதம் ஸந்தா³பிதா’தி? ‘ஆம தே³வா’தி. ராஜா ஆஹ ‘கிம் தே தத்த² ப³லம் அத்தி², கோ வா தே வசனம் ஆதி³யதி அனும்மத்தோ, கேன த்வம் ப³லேன இமம் மஹாக³ங்க³ம் படிஸோதம் ஸந்தா³பேஸீ’தி? ஸா ஆஹ ‘ஸச்சப³லேனாஹம், மஹாராஜ, இமம் மஹாக³ங்க³ம் படிஸோதம் ஸந்தா³பேஸி’ந்தி. ராஜா ஆஹ ‘கிம் தே ஸச்சப³லம் அத்தி² சோரியா து⁴த்தியா அஸதியா சி²ன்னிகாய பாபியா பி⁴ன்னஸீலாய [பாபிகாய பி⁴ன்னஸீமாய (ஸீ.)] ஹிரிஅதிக்கந்திகாய அந்த⁴ஜனபலோபி⁴காயா’தி. ‘ஸச்சம், மஹாராஜ, தாதி³ஸிகா அஹம், தாதி³ஸிகாயபி மே, மஹாராஜ, ஸச்சகிரியா அத்தி², யாயாஹம் இச்ச²மானா ஸதே³வகம்பி லோகம் பரிவத்தேய்ய’ந்தி. ராஜா ஆஹ ‘கதமா பன ஸா ஹோதி ஸச்சகிரியா, இங்க⁴ மம் ஸாவேஹீ’தி. ‘யோ மே, மஹாராஜ, த⁴னம் தே³தி க²த்தியோ வா ப்³ராஹ்மணோ வா வேஸ்ஸோ வா ஸுத்³தோ³ வா அஞ்ஞோ வா கோசி, தேஸம் ஸமகம் யேவ உபட்ட²ஹாமி, ‘‘க²த்தியோ’’தி விஸேஸோ நத்தி², ‘‘ஸுத்³தோ³’’தி அதிமஞ்ஞனா [அதிமஞ்ஞமானோ (க.)] நத்தி², அனுனயப்படிக⁴விப்பமுத்தா த⁴னஸ்ஸாமிகம் பரிசராமி, ஏஸா மே தே³வ ஸச்சகிரியா, யாயாஹம் இமம் மஹாக³ங்க³ம் படிஸோதம் ஸந்தா³பேஸி’ந்தி.

‘‘இதிபி, மஹாராஜ, ஸச்சே டி²தா ந கிஞ்சி அத்த²ம் ந விந்த³ந்தி. தி³ன்னானி ச, மஹாராஜ, ஸிவிராஜேன யாசகஸ்ஸ சக்கூ²னி, தி³ப்³ப³சக்கூ²னி ச உப்பன்னானி, தஞ்ச ஸச்சகிரியாய. யம் பன ஸுத்தே வுத்தம் ‘மம்ஸசக்கு²ஸ்மிம் நட்டே² அஹேதுஸ்மிம் அவத்து²ஸ்மிம் நத்தி² தி³ப்³ப³சக்கு²ஸ்ஸ உப்பாதோ³’தி. தம் பா⁴வனாமயம் சக்கு²ம் ஸந்தா⁴ய வுத்தம், ஏவமேதம், மஹாராஜ, தா⁴ரேஹீ’’தி. ‘‘ஸாது⁴, ப⁴ந்தே நாக³ஸேன, ஸுனிப்³பே³டி²தோ பஞ்ஹோ, ஸுனித்³தி³ட்டோ² நிக்³க³ஹோ, ஸுமத்³தி³தா பரவாதா³, ஏவமேதம் ததா² ஸம்படிச்சா²மீ’’தி.

ஸிவிராஜசக்கு²தா³னபஞ்ஹோ பஞ்சமோ.