3. பு³த்³த⁴ஸ்ஸ அனுத்தரபா⁴வஜானனபஞ்ஹோ

3. ராஜா ஆஹ ‘‘ப⁴ந்தே நாக³ஸேன, ஸக்கா ஜானிதும் ‘பு³த்³தோ⁴ அனுத்தரோ’’’தி? ‘‘ஆம, மஹாராஜ, ஸக்கா ஜானிதும் ‘ப⁴க³வா அனுத்தரோ’’’தி. ‘‘கத²ம், ப⁴ந்தே நாக³ஸேன, ஸக்கா ஜானிதும் ‘பு³த்³தோ⁴ அனுத்தரோ’’’தி. ‘‘பூ⁴தபுப்³ப³ம், மஹாராஜ, திஸ்ஸத்தே²ரோ நாம லேகா²சரியோ அஹோஸி, ப³ஹூனி வஸ்ஸானி அப்³ப⁴தீதானி காலங்கதஸ்ஸ கத²ம் ஸோ ஞாயதீ’’தி. ‘‘லேகே²ன ப⁴ந்தே’’தி. ‘‘ஏவமேவ கோ², மஹாராஜ, யோ த⁴ம்மம் பஸ்ஸதி, ஸோ ப⁴க³வந்தம் பஸ்ஸதி, த⁴ம்மோ ஹி, மஹாராஜ, ப⁴க³வதா தே³ஸிதோ’’தி.

‘‘கல்லோஸி, ப⁴ந்தே நாக³ஸேனா’’தி.

பு³த்³த⁴ஸ்ஸ அனுத்தரபா⁴வஜானனபஞ்ஹோ ததியோ.