7. சக்கு²விஞ்ஞாணாதி³பஞ்ஹோ

7. ராஜா ஆஹ ‘‘ப⁴ந்தே நாக³ஸேன, யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதீ’’தி? ‘‘ஆம, மஹாராஜ, யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதீ’’தி.

‘‘கிம் நு கோ², ப⁴ந்தே நாக³ஸேன, பட²மம் சக்கு²விஞ்ஞாணம் உப்பஜ்ஜதி, பச்சா² மனோவிஞ்ஞாணம், உதா³ஹு மனோவிஞ்ஞாணம் பட²மம் உப்பஜ்ஜதி, பச்சா² சக்கு²விஞ்ஞாண’’ந்தி? ‘‘பட²மம், மஹாராஜ, சக்கு²விஞ்ஞாணம் உப்பஜ்ஜதி, பச்சா² மனோவிஞ்ஞாண’’ந்தி.

‘‘கிம் நு கோ², ப⁴ந்தே நாக³ஸேன, சக்கு²விஞ்ஞாணம் மனோவிஞ்ஞாணம் ஆணாபேதி ‘யத்தா²ஹம் உப்பஜ்ஜாமி, த்வம்பி தத்த² உப்பஜ்ஜாஹீ’தி, உதா³ஹு மனோவிஞ்ஞாணம் சக்கு²விஞ்ஞாணம் ஆணாபேதி ‘யத்த² த்வம் உப்பஜ்ஜிஸ்ஸஸி, அஹம்பி தத்த² உப்பஜ்ஜிஸ்ஸாமீ’’’தி? ‘‘ந ஹி, மஹாராஜ, அனாலாபோ தேஸம் அஞ்ஞமஞ்ஞேஹீ’’தி.

‘‘கத²ம், ப⁴ந்தே நாக³ஸேன, யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதீ’’தி? ‘‘நின்னத்தா ச, மஹாராஜ, த்³வாரத்தா ச சிண்ணத்தா ச ஸமுதா³சரிதத்தா சா’’தி.

‘‘கத²ம், ப⁴ந்தே நாக³ஸேன, நின்னத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி? ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, தே³வே வஸ்ஸந்தே கதமேன உத³கம் க³ச்சே²ய்யா’’தி? ‘‘யேன, ப⁴ந்தே, நின்னம், தேன க³ச்சே²ய்யா’’தி. ‘‘அதா²பரேன ஸமயேன தே³வோ வஸ்ஸேய்ய, கதமேன தம் உத³கம் க³ச்சே²ய்யா’’தி. ‘‘யேன, ப⁴ந்தே, புரிமம் உத³கம் க³தம், தம்பி தேன க³ச்சே²ய்யா’’தி.

‘‘கிம் நும் கோ², மஹாராஜ, புரிமம் உத³கம் பச்சி²மம் உத³கம் ஆணாபேதி ‘யேனாஹம் க³ச்சா²மி, த்வம்பி தேன க³ச்சா²ஹீ’தி, பச்சி²மம் வா உத³கம் புரிமம் உத³கம் ஆணாபேதி ‘யேன த்வம் க³ச்சி²ஸ்ஸஸி, அஹம்பி தேன க³ச்சி²ஸ்ஸாமீ’’’தி. ‘‘ந ஹி, ப⁴ந்தே, அனாலாபோ தேஸம் அஞ்ஞமஞ்ஞேஹி, நின்னத்தா க³ச்ச²ந்தீ’’தி. ‘‘ஏவமேவ கோ², மஹாராஜ, நின்னத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி, ந சக்கு²விஞ்ஞாணம் மனோவிஞ்ஞாணம் ஆணாபேதி ‘யத்தா²ஹம் உப்பஜ்ஜாமி, த்வம்பி தத்த² உப்பஜ்ஜாஹீ’தி, நாபி மனோவிஞ்ஞாணம் சக்கு²விஞ்ஞாணம் ஆணாபேதி ‘யத்த² த்வம் உப்பஜ்ஜிஸ்ஸஸி, அஹம்பி தத்த² உப்பஜ்ஜிஸ்ஸாமீ’தி, அனாலாபோ தேஸம் அஞ்ஞமஞ்ஞேஹி, நின்னத்தா உப்பஜ்ஜந்தீ’’’தி.

‘‘கத²ம், ப⁴ந்தே நாக³ஸேன, த்³வாரத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி? அபேபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, ரஞ்ஞோ பச்சந்திமம் நக³ரம் அஸ்ஸ த³ள்ஹபாகாரதோரணம் ஏகத்³வாரம், ததோ புரிஸோ நிக்க²மிதுகாமோ ப⁴வேய்ய, கதமேன நிக்க²மேய்யா’’தி? ‘‘த்³வாரேன, ப⁴ந்தே, நிக்க²மேய்யா’’தி. ‘‘அதா²பரோ புரிஸோ நிக்க²மிதுகாமோ ப⁴வேய்ய, கதமேன ஸோ நிக்க²மேய்யா’’தி? ‘‘யேன, ப⁴ந்தே, புரிமோ புரிஸோ நிக்க²ந்தோ, ஸோபி தேன நிக்க²மேய்யா’’தி.

‘‘கிம் நு கோ², மஹாராஜ, புரிமோ புரிஸோ பச்சி²மம் புரிஸம் ஆணாபேதி ‘யேனாஹம் க³ச்சா²மி, த்வம்பி தேன க³ச்சா²ஹீ’தி, பச்சி²மோ வா புரிஸோ புரிமம் புரிஸம் ஆணாபேதி ‘யேன த்வம் க³ச்சி²ஸ்ஸஸி, அஹம்பி தேன க³ச்சி²ஸ்ஸாமீ’தி. ‘‘ந ஹி, ப⁴ந்தே, அனாலாபோ தேஸம் அஞ்ஞமஞ்ஞேஹி, த்³வாரத்தா க³ச்ச²ந்தீ’’தி. ‘‘ஏவமேவ கோ², மஹாராஜ, த்³வாரத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி, ந சக்கு²விஞ்ஞாணம் மனோவிஞ்ஞாணம் ஆணாபேதி ‘யத்தா²ஹம் உப்பஜ்ஜாமி, த்வம்பி தத்த² உப்பஜ்ஜாஹீ’தி, நாபி மனோவிஞ்ஞாணம் சக்கு²விஞ்ஞாணம் ஆணாபேதி ‘யத்த² த்வம் உப்பஜ்ஜிஸ்ஸஸி, அஹம்பி தத்த² உப்பஜ்ஜிஸ்ஸாமீ’தி, அனாலாபோ தேஸம் அஞ்ஞமஞ்ஞேஹி, த்³வாரத்தா உப்பஜ்ஜந்தீ’’தி.

‘‘கத²ம், ப⁴ந்தே நாக³ஸேன, சிண்ணத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி?ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, பட²மம் ஏகம் ஸகடம் க³ச்சே²ய்ய, அத² து³தியம் ஸகடம் கதமேன க³ச்சே²ய்யா’’தி? ‘‘யேன, ப⁴ந்தே, புரிமம் ஸகடம் க³தம், தம்பி தேன க³ச்சே²ய்யா’’தி.

‘‘கிம் நு கோ², மஹாராஜ, புரிமம் ஸகடம் பச்சி²மம் ஸகடம் ஆணாபேதி ‘யேனாஹம் க³ச்சா²மி, த்வம்பி தேன க³ச்சா²ஹீ’தி, பச்சி²மம் வா ஸகடம் புரிமம் ஸகடம் ஆணாபேதி ‘யேன த்வம் க³ச்சி²ஸ்ஸஸி, அஹம்பி தேன க³ச்சி²ஸ்ஸாமீ’’’தி. ‘‘ந ஹி, ப⁴ந்தே, அனாலாபோ தேஸம் அஞ்ஞமஞ்ஞேஹி, சிண்ணத்தா க³ச்ச²ந்தீ’’தி. ‘‘ஏவமேவ கோ², மஹாராஜ, சிண்ணத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி, ந சக்கு²விஞ்ஞாணம் மனோவிஞ்ஞாணம் ஆணாபேதி ‘யத்தா²ஹம் உப்பஜ்ஜாமி, த்வம்பி தத்த² உப்பஜ்ஜாஹீ’தி, நாபி மனோவிஞ்ஞாணம் சக்கு²விஞ்ஞாணம் ஆணாபேதி ‘யத்த² த்வம் உப்பஜ்ஜிஸ்ஸஸி, அஹம்பி தத்த² உப்பஜ்ஜிஸ்ஸாமீ’தி, அனாலாபோ தேஸம் அஞ்ஞமஞ்ஞேஹி, சிண்ணத்தா உப்பஜ்ஜந்தீ’’தி.

‘‘கத²ம், ப⁴ந்தே நாக³ஸேன, ஸமுதா³சரிதத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி? ஓபம்மம் கரோஹீ’’தி. ‘‘யதா², மஹாராஜ, முத்³தா³க³ணனாஸங்க்²யாலேகா²ஸிப்பட்டா²னேஸு ஆதி³கம்மிகஸ்ஸ த³ந்தா⁴யனா ப⁴வதி, அதா²பரேன ஸமயேன நிஸம்மகிரியாய ஸமுதா³சரிதத்தா அத³ந்தா⁴யனா ப⁴வதி. ஏவமேவ கோ², மஹாராஜ, ஸமுதா³சரிதத்தா யத்த² சக்கு²விஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதி, ந சக்கு²விஞ்ஞாணம் மனோவிஞ்ஞாணம் ஆணாபேதி ‘யத்தா²ஹம் உப்பஜ்ஜாமி, த்வம்பி தத்த² உப்பஜ்ஜாஹீ’தி, நாபி மனோவிஞ்ஞாணம் சக்கு²விஞ்ஞாணம் ஆணாபேதி ‘யத்த² த்வம் உப்பஜ்ஜிஸ்ஸஸி, அஹம்பி தத்த² உப்பஜ்ஜிஸ்ஸாமீ’தி, அனாலாபோ தேஸம் அஞ்ஞமஞ்ஞேஹி, ஸமுதா³சரிதத்தா உப்பஜ்ஜந்தீ’’தி.

‘‘ப⁴ந்தே நாக³ஸேன, யத்த² ஸோதவிஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதீதி…பே… யத்த² கா⁴னவிஞ்ஞாணம் உப்பஜ்ஜதி…பே… யத்த² ஜிவ்ஹாவிஞ்ஞாணம் உப்பஜ்ஜதி …பே… யத்த² காயவிஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதீ’’தி? ‘‘ஆம, மஹாராஜ, யத்த² காயவிஞ்ஞாணம் உப்பஜ்ஜதி, தத்த² மனோவிஞ்ஞாணம்பி உப்பஜ்ஜதீ’’தி.

‘‘கிம் நு கோ², ப⁴ந்தே நாக³ஸேன, பட²மம் காயவிஞ்ஞாணம் உப்பஜ்ஜதி, பச்சா² மனோவிஞ்ஞாணம், உதா³ஹு மனோவிஞ்ஞாணம் பட²மம் உப்பஜ்ஜதி, பச்சா² காயவிஞ்ஞாண’’ந்தி? ‘‘காயவிஞ்ஞாணம், மஹாராஜ, பட²மம் உப்பஜ்ஜதி, பச்சா² மனோவிஞ்ஞாண’’ந்தி.

‘‘கிம் நு கோ², ப⁴ந்தே நாக³ஸேன,…பே… அனாலாபோ தேஸம் அஞ்ஞமஞ்ஞேஹி, ஸமுதா³சரிதத்தா உப்பஜ்ஜந்தீ’’தி.

‘‘கல்லோஸி, ப⁴ந்தே நாக³ஸேனா’’தி.

சக்கு²விஞ்ஞாணாதி³பஞ்ஹோ ஸத்தமோ.