5. ப⁴வந்தஸங்கா²ரஜாயமானபஞ்ஹோ

5. ராஜா ஆஹ ‘‘ப⁴ந்தே நாக³ஸேன, அத்தி² கேசி ஸங்கா²ரா, யே அப⁴வந்தா ஜாயந்தீ’’தி? ‘‘நத்தி², மஹாராஜ, கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ கோ², மஹாராஜ, ஸங்கா²ரா ஜாயந்தீ’’தி.

‘‘ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, இத³ம் கே³ஹம் அப⁴வந்தம் ஜாதம், யத்த² த்வம் நிஸின்னோஸீ’’தி? ‘‘நத்தி² கிஞ்சி, ப⁴ந்தே, இத⁴ அப⁴வந்தம் ஜாதம், ப⁴வந்தம் யேவ ஜாதம், இமானி கோ², ப⁴ந்தே, தா³ரூனி வனே அஹேஸும், அயஞ்ச மத்திகா பத²வியம் அஹோஸி, இத்தீ²னஞ்ச புரிஸானஞ்ச தஜ்ஜேன வாயாமேன ஏவமித³ம் கே³ஹம் நிப்³ப³த்த’’ந்தி. ‘‘ஏவமேவ கோ², மஹாராஜ, நத்தி² கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ ஸங்கா²ரா ஜாயந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, யே கேசி பீ³ஜகா³மபூ⁴தகா³மா பத²வியம் நிக்கி²த்தா அனுபுப்³பே³ன வுட்³டி⁴ம் விரூள்ஹிம் வேபுல்லம் ஆபஜ்ஜமானா புப்பா²னி ச ப²லானி ச த³தே³ய்யும், ந தே ருக்கா² அப⁴வந்தா ஜாதா, ப⁴வந்தா யேவ தே ருக்கா² ஜாதா. ஏவமேவ கோ², மஹாராஜ, நத்தி² கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ தே ஸங்கா²ரா ஜாயந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, கும்ப⁴காரோ பத²வியா மத்திகம் உத்³த⁴ரித்வா நானாபா⁴ஜனானி கரோதி, ந தானி பா⁴ஜனானி அப⁴வந்தானி ஜாதானி, ப⁴வந்தானி யேவ ஜாதானி. ஏவமேவ கோ², மஹாராஜ, நத்தி² கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ ஸங்கா²ரா ஜாயந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, வீணாய பத்தம் ந ஸியா, சம்மம் ந ஸியா, தோ³ணி ந ஸியா, த³ண்டோ³ ந ஸியா, உபவீணோ ந ஸியா, தந்தியோ ந ஸியும், கோணோ ந ஸியா, புரிஸஸ்ஸ ச தஜ்ஜோ வாயாமோ ந ஸியா, ஜாயேய்ய ஸத்³தோ³’’தி? ‘‘ந ஹி ப⁴ந்தே’’தி. ‘‘யதோ ச கோ², மஹாராஜ, வீணாய பத்தம் ஸியா, சம்மம் ஸியா, தோ³ணி ஸியா, த³ண்டோ³ ஸியா, உபவீணோ ஸியா, தந்தியோ ஸியும், கோணோ ஸியா, புரிஸஸ்ஸ ச தஜ்ஜோ வாயாமோ ஸியா, ஜாயேய்ய ஸத்³தோ³’’தி? ‘‘ஆம, ப⁴ந்தே, ஜாயேய்யா’’தி. ‘‘ஏவமேவ கோ², மஹாராஜ, நத்தி² கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ கோ² ஸங்கா²ரா ஜாயந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, அரணி ந ஸியா, அரணிபோதகோ ந ஸியா, அரணியோத்தகம் ந ஸியா, உத்தராரணி ந ஸியா, சோளகம் ந ஸியா, புரிஸஸ்ஸ ச தஜ்ஜோ வாயாமோ ந ஸியா, ஜாயேய்ய ஸோ அக்³கீ³’’தி? ‘‘ந ஹி ப⁴ந்தே’’தி. ‘‘யதோ ச கோ², மஹாராஜ, அரணி ஸியா, அரணிபோதகோ ஸியா, அரணியோத்தகம் ஸியா, உத்தராரணி ஸியா, சோளகம் ஸியா, புரிஸஸ்ஸ ச தஜ்ஜோ வாயாமோ ஸியா, ஜாயேய்ய ஸோ அக்³கீ³’’தி? ‘‘ஆம, ப⁴ந்தே, ஜாயேய்யா’’தி. ‘‘ஏவமேவ கோ², மஹாராஜ, நத்தி² கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ கோ² ஸங்கா²ரா ஜாயந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, மணி ந ஸியா, ஆதபோ ந ஸியா, கோ³மயம் ந ஸியா, ஜாயேய்ய ஸோ அக்³கீ³’’தி? ‘‘ந ஹி ப⁴ந்தே’’தி. ‘‘யதோ ச கோ², மஹாராஜ, மணி ஸியா, ஆதபோ ஸியா, கோ³மயம் ஸியா, ஜாயேய்ய ஸோ அக்³கீ³’’தி? ‘‘ஆம, ப⁴ந்தே, ஜாயேய்யா’’தி. ‘‘ஏவமேவ கோ², மஹாராஜ, நத்தி² கேசி ஸங்கா²ரா யே அப⁴வந்தா ஜாயந்தி, ப⁴வந்தா யேவ கோ² ஸங்கா²ரா ஜாயந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, ஆதா³ஸோ ந ஸியா, ஆபா⁴ ந ஸியா, முக²ம் ந ஸியா, ஜாயேய்ய அத்தா’’தி? ‘‘ந ஹி, ப⁴ந்தே’’தி. ‘‘யதோ ச கோ², மஹாராஜ, ஆதா³ஸோ ஸியா, ஆபா⁴ ஸியா, முக²ம் ஸியா, ஜாயேய்ய அத்தா’’தி? ‘‘ஆம, ப⁴ந்தே, ஜாயேய்யா’’தி. ‘‘ஏவமேவ கோ², மஹாராஜ, நத்தி² கேசி ஸங்கா²ரா, யே அப⁴வந்தா ஜாயந்தி, ப⁴வந்தா யேவ கோ² ஸங்கா²ரா ஜாயந்தீ’’தி.

‘‘கல்லோஸி, ப⁴ந்தே நாக³ஸேனா’’தி.

ப⁴வந்தஸங்கா²ரஜாயமானபஞ்ஹோ பஞ்சமோ.