3. கோடிபஞ்ஞாயனபஞ்ஹோ

3. ராஜா ஆஹ ‘‘ப⁴ந்தே நாக³ஸேன, யம் பனேதம் ப்³ரூஸி ‘புரிமா கோடி ந பஞ்ஞாயதீ’தி, கதமா ச ஸா புரிமா கோடீ’’தி? ‘‘யோ கோ², மஹாராஜ, அதீதோ அத்³தா⁴, ஏஸா புரிமா கோடீ’’தி. ‘‘ப⁴ந்தே நாக³ஸேன, யம் பனேதம் ப்³ரூஸி ‘புரிமா கோடி ந பஞ்ஞாயதீ’தி, கிம் பன, ப⁴ந்தே, ஸப்³பா³பி புரிமா கோடி ந பஞ்ஞாயதீ’’தி? ‘‘காசி, மஹாராஜ, பஞ்ஞாயதி, காசி ந பஞ்ஞாயதீ’’தி. ‘‘கதமா, ப⁴ந்தே, பஞ்ஞாயதி, கதமா ந பஞ்ஞாயதீ’’தி? ‘‘இதோ புப்³பே³, மஹாராஜ, ஸப்³பே³ன ஸப்³ப³ம் ஸப்³ப³தா² ஸப்³ப³ம் அவிஜ்ஜா நாஹோஸீதி ஏஸா புரிமா கோடி ந பஞ்ஞாயதி, யம் அஹுத்வா ஸம்போ⁴தி, ஹுத்வா படிவிக³ச்ச²தி, ஏஸப புரிமா கோடி பஞ்ஞாயதீ’’தி.

‘‘ப⁴ந்தே நாக³ஸேன, யம் அஹுத்வா ஸம்போ⁴தி, ஹுத்வா படிவிக³ச்ச²தி, நனு தம் உப⁴தோ சி²ன்னம் அத்த²ம் க³ச்ச²தீ’’தி? ‘‘யதி³, மஹாராஜ, உப⁴தோ சி²ன்னம் அத்த²ம் க³ச்ச²தி, உப⁴தோ சி²ன்னா ஸக்கா வட்³டே⁴து’’ந்தி? ‘‘ஆம, ஸாபி ஸக்கா வட்³டே⁴து’’ந்தி.’’நாஹம், ப⁴ந்தே, ஏதம் புச்சா²மி கோடிதோ ஸக்கா வட்³டே⁴து’’ந்தி? ‘‘ஆம ஸக்கா வட்³டே⁴து’’ந்தி.

‘‘ஓபம்மம் கரோஹீ’’தி. தே²ரோ தஸ்ஸ ருக்கூ²பமம் அகாஸி, க²ந்தா⁴ ச கேவலஸ்ஸ து³க்க²க்க²ந்த⁴ஸ்ஸ பீ³ஜானீ’’தி.

‘‘கல்லோஸி, ப⁴ந்தே நாக³ஸேனா’’தி.

கோடிபஞ்ஞாயனபஞ்ஹோ ததியோ.