11. சேதனாலக்க²ணபஞ்ஹோ

11. ‘‘ப⁴ந்தே நாக³ஸேன, கிம்லக்க²ணா சேதனா’’தி? ‘‘சேதயிதலக்க²ணா, மஹாராஜ, சேதனா அபி⁴ஸங்க²ரணலக்க²ணா சா’’தி.

‘‘ஓபம்மம் கரோஹீ’’தி. ‘‘யதா², மஹாராஜ, கோசிதே³வ புரிஸோ விஸம் அபி⁴ஸங்க²ரித்வா அத்தனா ச பிவேய்ய, பரே ச பாயேய்ய, ஸோ அத்தனாபி து³க்கி²தோ ப⁴வேய்ய, பரேபி து³க்கி²தா ப⁴வேய்யும். ஏவமேவ கோ², மஹாராஜ, இதே⁴கச்சோ புக்³க³லோ அகுஸலம் கம்மம் சேதனாய சேதயித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய. யேபி தஸ்ஸ அனுஸிக்க²ந்தி, தேபி காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி.

‘‘யதா² வா பன, மஹாராஜ, கோசிதே³வ புரிஸோ ஸப்பினவனீததேலமது⁴பா²ணிதம் ஏகஜ்ஜ²ம் அபி⁴ஸங்க²ரித்வா அத்தனா ச பிவேய்ய, பரே ச பாயேய்ய, ஸோ அத்தனா ஸுகி²தோ ப⁴வேய்ய, பரேபி ஸுகி²தா ப⁴வேய்யும். ஏவமேவ கோ², மஹாராஜ, இதே⁴கச்சோ புக்³க³லோ குஸலம் கம்மம் சேதனாய சேதயித்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. யேபி தஸ்ஸ அனுஸிக்க²ந்தி, தேபி காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி. ஏவம் கோ², மஹாராஜ, சேதயிதலக்க²ணா சேதனா அபி⁴ஸங்க²ரணலக்க²ணா சா’’தி.

‘‘கல்லோஸி, ப⁴ந்தே நாக³ஸேனா’’தி.

சேதனாலக்க²ணபஞ்ஹோ ஏகாத³ஸமோ.