7. தே²ரபடிஸந்த³ஹனாபடிஸந்த³ஹனபஞ்ஹோ

7. ராஜா ஆஹ ‘‘ப⁴ந்தே நாக³ஸேன, த்வம் பன படிஸந்த³ஹிஸ்ஸஸீ’’தி? ‘‘அலம், மஹாராஜ, கிம் தே தேன புச்சி²தேன, நனு மயா படிகச்சேவ அக்கா²தம் ‘ஸசே, மஹாராஜ, ஸஉபாதா³னோ ப⁴விஸ்ஸாமி, படிஸந்த³ஹிஸ்ஸாமி, ஸசே அனுபாதா³னோ ப⁴விஸ்ஸாமி, ந படிஸந்த³ஹிஸ்ஸாமீ’’’தி.

‘‘ஓபம்மம் கரோஹீ’’தி. ‘‘யதா², மஹாராஜ, கோசிதே³வ புரிஸோ ரஞ்ஞோ அதி⁴காரம் கரேய்ய. ராஜா துட்டோ² அதி⁴காரம் த³தே³ய்ய, ஸோ தேன அதி⁴காரேன பஞ்சஹி காமகு³ணேஹி ஸமப்பிதோ ஸமங்கி³பூ⁴தோ பரிசரேய்ய, ஸோ சே ஜனஸ்ஸ ஆரோசேய்ய ‘ந மே ராஜா கிஞ்சி படிகரோதீ’ தி. கிம் நு கோ² ஸோ, மஹாராஜ, புரிஸோ யுத்தகாரீ ப⁴வேய்யா’’தி? ‘‘ந ஹி ப⁴ந்தே’’தி. ‘‘ஏவமேவ கோ², மஹாராஜ, கிம் தே தேன புச்சி²தேன, நனு மயா படிகச்சேவ அக்கா²தம் ‘ஸசே ஸஉபாதா³னோ ப⁴விஸ்ஸாமி, படிஸந்த³ஹிஸ்ஸாமி, ஸசே அனுபாதா³னோ ப⁴விஸ்ஸாமி, ந படிஸந்த³ஹிஸ்ஸாமீ’’’தி.

‘‘கல்லோஸி, ப⁴ந்தே நாக³ஸேனா’’தி.

தே²ரபடிஸந்த³ஹனாபடிஸந்த³ஹனபஞ்ஹோ ஸத்தமோ.