3. ஞாணபஞ்ஞாபஞ்ஹோ

3. ராஜா ஆஹ ‘‘ப⁴ந்தே நாக³ஸேன, யஸ்ஸ ஞாணம் உப்பன்னம், தஸ்ஸ பஞ்ஞா உப்பன்னா’’தி? ‘‘ஆம, மஹாராஜ, யஸ்ஸ ஞாணம் உப்பன்னம், தஸ்ஸ பஞ்ஞா உப்பன்னா’’தி. ‘‘கிம், ப⁴ந்தே, யஞ்ஞேவ ஞாணம் ஸா யேவ பஞ்ஞா’’தி? ‘‘ஆம, மஹாராஜ, யஞ்ஞேவ ஞாணம் ஸா யேவ பஞ்ஞா’’தி. ‘‘யஸ்ஸ பன, ப⁴ந்தே, தஞ்ஞேவ ஞாணம் ஸா யேவ பஞ்ஞா உப்பன்னா, கிம் ஸம்முய்ஹேய்ய ஸோ, உதா³ஹு ந ஸம்முய்ஹேய்யா’’தி? ‘‘கத்த²சி, மஹாராஜ, ஸம்முய்ஹேய்ய, கத்த²சி ந ஸம்முய்ஹேய்யா’’தி. ‘‘குஹிம், ப⁴ந்தே, ஸம்முய்ஹேய்யா’’தி? ‘‘அஞ்ஞாதபுப்³பே³ஸு வா, மஹாராஜ, ஸிப்பட்டா²னேஸு, அக³தபுப்³பா³ய வா தி³ஸாய, அஸ்ஸுதபுப்³பா³ய வா நாமபஞ்ஞத்தியா ஸம்முய்ஹேய்யா’’தி. ‘‘குஹிம் ந ஸம்முய்ஹேய்யா’’தி? ‘‘யம் கோ² பன, மஹாராஜ, தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தஹிம் ந ஸம்முய்ஹேய்யா’’தி. ‘‘மோஹோ பனஸ்ஸ, ப⁴ந்தே, குஹிம் க³ச்ச²தீ’’தி? ‘‘மோஹோ கோ², மஹாராஜ, ஞாணே உப்பன்னமத்தே தத்தே²வ நிருஜ்ஜ²தீ’’தி.

‘‘ஓபம்மம் கரோஹீ’’தி. ‘‘யதா², மஹாராஜ, கோசிதே³வ புரிஸோ அந்த⁴காரகே³ஹே பதீ³பம் ஆரோபேய்ய, ததோ அந்த⁴காரோ நிருஜ்ஜே²ய்ய, ஆலோகோ பாதுப⁴வேய்ய. ஏவமேவ கோ², மஹாராஜ, ஞாணே உப்பன்னமத்தே மோஹோ தத்தே²வ நிருஜ்ஜ²தீ’’தி.

‘‘பஞ்ஞா பன, ப⁴ந்தே, குஹிம் க³ச்ச²தீ’’தி? ‘‘பஞ்ஞாபி கோ², மஹாராஜ, ஸகிச்சயம் கத்வா தத்தே²வ நிருஜ்ஜ²தி, யம் பன தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தம் ந நிருஜ்ஜ²தீ’’தி.

‘‘ப⁴ந்தே நாக³ஸேன, யம் பனேதம் ப்³ரூஸி ‘பஞ்ஞா ஸகிச்சயம் கத்வா தத்தே²வ நிருஜ்ஜ²தி, யம் பன தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தம் ந நிருஜ்ஜ²தீ’தி, தஸ்ஸ ஓபம்மம் கரோஹீ’’தி. ‘‘யதா², மஹாராஜ, யோ கோசி புரிஸோ ரத்திம் லேக²ம் பேஸேதுகாமோ லேக²கம் பக்கோஸாபேத்வா பதீ³பம் ஆரோபேத்வா லேக²ம் லிகா²பேய்ய, லிகி²தே பன லேகே² பதீ³பம் விஜ்ஜா²பேய்ய, விஜ்ஜா²பிதேபி பதீ³பே லேக²ம் ந வினஸ்ஸேய்ய. ஏவமேவ கோ², மஹாராஜ, பஞ்ஞா ஸகிச்சயம் கத்வா தத்தே²வ நிருஜ்ஜ²தி, யம் பன தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தம் ந நிருஜ்ஜ²தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, புரத்தி²மேஸு ஜனபதே³ஸு மனுஸ்ஸா அனுக⁴ரம் பஞ்ச பஞ்ச உத³கக⁴டகானி ட²பேந்தி ஆலிம்பனம் விஜ்ஜா²பேதும், க⁴ரே பதி³த்தே தானி பஞ்ச உத³கக⁴டகானி க⁴ரஸ்ஸூபரி கி²பந்தி, ததோ அக்³கி³ விஜ்ஜா²யதி, கிம் நு கோ², மஹாராஜ, தேஸம் மனுஸ்ஸானம் ஏவம் ஹோதி ‘புன தேஹி க⁴டேஹி க⁴டகிச்சம் கரிஸ்ஸாமா’’’தி? ‘‘ந ஹி, ப⁴ந்தே, அலம் தேஹி க⁴டேஹி, கிம் தேஹி க⁴டேஹீ’’தி? ‘‘யதா², மஹாராஜ, பஞ்ச உத³கக⁴டகானி, ஏவம் பஞ்சிந்த்³ரியானி த³ட்ட²ப்³பா³னி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரியம். யதா² தே மனுஸ்ஸா, ஏவம் யோகா³வசரோ த³ட்ட²ப்³போ³. யதா² அக்³கி³, ஏவம் கிலேஸா த³ட்ட²ப்³பா³. யதா² பஞ்சஹி உத³கக⁴டகேஹி அக்³கி³ விஜ்ஜா²பீயதி, ஏவம் பஞ்சிந்த்³ரியேஹி கிலேஸா விஜ்ஜா²பியந்தி, விஜ்ஜா²பிதாபி கிலேஸா ந புன ஸம்ப⁴வந்தி. ஏவமேவ கோ², மஹாராஜ, பஞ்ஞா ஸகிச்சயம் கத்வா தத்தே²வ நிருஜ்ஜ²தி, யம் பன தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தம் ந நிருஜ்ஜ²தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, வேஜ்ஜோ பஞ்சமூலபே⁴ஸஜ்ஜானி க³ஹேத்வா கி³லானகம் உபஸங்கமித்வா தானி பஞ்சமூலபே⁴ஸஜ்ஜானி பிஸித்வா [பிம்ஸித்வா (ஸீ. பீ.)] கி³லானகம் பாயேய்ய, தேஹி ச தோ³ஸா நித்³த⁴மேய்யும், கிம் நு கோ², மஹாராஜ, தஸ்ஸ வேஜ்ஜஸ்ஸ ஏவம் ஹோதி ‘புன தேஹி பஞ்சமூலபே⁴ஸஜ்ஜேஹி பே⁴ஸஜ்ஜகிச்சம் கரிஸ்ஸாமீ’’’தி? ‘‘ந ஹி, ப⁴ந்தே, அலம் தேஹி பஞ்சமூலபே⁴ஸஜ்ஜேஹி, கிம் தேஹி பஞ்சமூலபே⁴ஸஜ்ஜேஹீ’’தி? ‘‘யதா², மஹாராஜ, பஞ்சமூலபே⁴ஸஜ்ஜானி, ஏவம் பஞ்சிந்த்³ரியானி த³ட்ட²ப்³பா³னி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரியம், யதா² வேஜ்ஜோ, ஏவம் யோகா³வசரோ த³ட்ட²ப்³போ³. யதா² ப்³யாதி⁴, ஏவம் கிலேஸா த³ட்ட²ப்³பா³. யதா² ப்³யாதி⁴தோ புரிஸோ, ஏவம் புது²ஜ்ஜனோ த³ட்ட²ப்³போ³. யதா² பஞ்சமூலபே⁴ஸஜ்ஜேஹி கி³லானஸ்ஸ தோ³ஸா நித்³த⁴ந்தா, தோ³ஸே நித்³த⁴ந்தே கி³லானோ அரோகோ³ ஹோதி, ஏவம் பஞ்சிந்த்³ரியேஹி கிலேஸா நித்³த⁴மீயந்தி, நித்³த⁴மிதா ச கிலேஸா ந புன ஸம்ப⁴வந்தி. ஏவமேவ கோ², மஹாராஜ, பஞ்ஞா ஸகிச்சயம் கத்வா தத்தே²வ நிருஜ்ஜ²தி, யம் பன தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தம் ந நிருஜ்ஜ²தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, ஸங்கா³மாவசரோ யோதோ⁴ பஞ்ச கண்டா³னி க³ஹேத்வா ஸங்கா³மம் ஓதரேய்ய பரஸேனம் விஜேதும், ஸோ ஸங்கா³மக³தோ தானி பஞ்ச கண்டா³னி கி²பேய்ய, தேஹி ச பரஸேனா பி⁴ஜ்ஜேய்ய, கிம் நு கோ², மஹாராஜ, தஸ்ஸ ஸங்கா³மாவசரஸ்ஸ யோத⁴ஸ்ஸ ஏவம் ஹோதி ‘புன தேஹி கண்டே³ஹி கண்ட³கிச்சம் கரிஸ்ஸாமீ’’’தி? ‘‘ந ஹி, ப⁴ந்தே, அலம் தேஹி கண்டே³ஹி, கிம் தேஹி கண்டே³ஹீ’’தி? ‘‘யதா², மஹாராஜ, பஞ்ச கண்டா³னி, ஏவம் பஞ்சிந்த்³ரியானி த³ட்ட²ப்³பா³னி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரியம். யதா², மஹாராஜ, ஸங்கா³மாவசரோ யோதோ⁴, ஏவம் யோகா³வசரோ த³ட்ட²ப்³போ³. யதா² பரஸேனா, ஏவம் கிலேஸா த³ட்ட²ப்³பா³. யதா² பஞ்சஹி கண்டே³ஹி பரஸேனா பி⁴ஜ்ஜதி, ஏவம் பஞ்சிந்த்³ரியேஹி கிலேஸா பி⁴ஜ்ஜந்தி, ப⁴க்³கா³ ச கிலேஸா ந புன ஸம்ப⁴வந்தி. ஏவமேவ கோ², மஹாராஜ, பஞ்ஞா ஸகிச்சயம் கத்வா தத்தே²வ நிருஜ்ஜ²தி, யம் பன தாய பஞ்ஞாய கதம் ‘அனிச்ச’ந்தி வா ‘து³க்க²’ந்தி வா ‘அனத்தா’தி வா, தம் ந நிருஜ்ஜ²தீ’’தி.

‘‘கல்லோஸி, ப⁴ந்தே நாக³ஸேனா’’தி.

ஞாணபஞ்ஞாபஞ்ஹோ ததியோ.